Daniel 11:24 - Mbeti ti Nzapa - Tënë so amu fini

²⁴ Na ngoi so siriri ayeke duti na ya ti kodro ni, lo yeke gue na ando nde nde ti sese ni so mosoro asi singo daa. Kâ, fade lo yeke sara aye so akotara ti lo ade ti sara mara ni laoko pepe: lo yeke kangbi na azo ti lo aye so lo gbu na peko ti bira, aye so lo gbu na ngangu na maboko ti azo nga na aye ti mosoro nde nde. Lo yeke leke na be ti lo ti sara bira titene lo mu angangu gbagba. Me ye so kue ayeke ninga mingi pepe.

Daniel 11:24 Referans Kwoze

Matthieu 9:4

Jésus ahinga tënë ti be ti ala si lo hunda ala, lo tene: “Ngbanga ti nyen si be ti ala ayeke sioni tongaso?

Daniel 7:25

lo yeke tene asioni tënë na tere ti Nzapa so ayeke na yayu kâ na ndö ti aye kue si lo yeke sara ngangu na azo so Nzapa asoro ala. Lo yeke leke na be ti lo ti sanze alango ti nze nga na andia ti azo ti Nzapa. Fade a yeke zia azo ti Nzapa na maboko ti gbia ni na ya ti ngu ota na ndambo.

Ezekiel 38:10

“Tënë so mbi Kota Gbia NZAPA, mbi tene ayeke so: Na lango ni so, fade atënë mingi mingi ayeke ga na be ti mo; mo yeke leke pialo so ayeke sioni.

Amato 23:7

Biani, be ti lo ayeke nde na tënë so lo yeke tene. Lo lingbi ti tene na mo: “Mo te, mo nyon”, me na be ti lo kâ, ye ni ayeke nde.

Amato 19:6

Azo mingi ayeke tene anzerengo tënë ti handa na akota zo; azo kue aye tënë ti zo so ayeke mu kadoo na azo.

Amato 17:8

Ambeni zo abaa ti ala petengo goro tongana waraga so ayeke zi lege na ala; ala baa atene, ndo so kue ala yeke gue daa, aye ti ala kue ayeke ga nzoni.

Néhémie 9:25

Ala mu agbata so ngangu gbagba ayeke na tere ni, asese so ayeke du akobe mingi, ada so asi singo na mara ti amosoro nde nde, adu ti ngu so a zi ni awe, ayaka ti *vinye na ti olive nga na gba ti akeke so ayeke le mingi. Ndali ti nzoni be ti mo, ala te ye, ya ti ala asi, ala kono, ala duti na ngia.

Awafango-ngbanga 9:4

Tongaso ala mu na Abimelek ale ti nginza balembarambara so ayeke na ya ti da ti nzapa Baal-Berit. Lo mu nginza so, lo futa na agodobe nga na azo ti kirikiri titene ala mu peko ti lo.

Wungo ti azo 13:20

Ala baa wala sese ni ayeke le kobe mingi wala ayeke le kobe mingi pepe; akeke ayeke daa mingi wala ayeke daa pepe. Ala sara ngangu, ala gue, aga na ale ti kobe ti kodro ni.” – Andaa ngoi ni so ayeke kozo ngoi ti fango ale ti *vinye –.

Ezekiel 34:14

Mbi yeke gue na ala na nzoni ndo ti tengo pere; ala yeke wara nzoni pere ti tengo ni na ndö ti ahoto ti Israel. Kâ, ataba ti mbi alingbi ti lango kpoo na ndo so nzoni pere ayeke daa si ala te nzoni pere na ndö ti ahoto ti Israel.

Daniel 11:23

Na peko ti so azo mingi ayeke ma tere na lo, lo yeke sara mayere ti handa azo. Ngangu ti lo ayeke gue gi na nduzu, ataa so li ti azo ti lo awu mingi pepe.