Amato 29:1 - Mbeti ti Nzapa - Tënë so amu fini

¹ Zo so a gboto mê ti lo si lo ngba ti sara ngangu li, fade a yeke kinda lo gi hio tongaso, mbeni ye ti sara titene lo kiri lo ga nzoni ayeke daa pepe.

Amato 29:1 Referans Kwoze

Amato 6:15

Ndani laa, fade ye ti ngangu ayeke si na lo gi hio tongaso, a yeke buba dutingo ti lo gi hio tongaso, mbeni ye ti sara si lo kiri lo ga nzoni ayeke daa pepe.

1 Samuel 2:25

Tongana zo asara sioni na mba ti lo, fade Nzapa ayeke gbu koko ti lo. Me tongana zo asara sioni na KOTA GBIA, zo wa laa ayeke gbu ande koko ti lo, zo wa?” Me amolenge ni ama tënë ti babâ ti ala pepe, ngbanga ti so KOTA GBIA aleke na be ti lo ti sara si ala kui.

Amato 28:18

Zo so ayeke sara ye na lege ti taa-tënë, fade lo yeke soo kuâ; me zo so ayeke sara ye ge nde si lo yeke sara kâ nde, oko ti asarango ye ni ayeke sara si lo ti.

Jean 13:18

Mbi yeke tene tënë so ndali ti ala kue pepe; mbi hinga azo so mbi soro ala. Mbeti ti Nzapa atene: ‘Zo so mbi na lo, e yeke te kobe, lo laa lo yo gere ti lo ti do mbi.’ Alingbi tënë so aga taa-tënë.

Jean 13:26

Jésus akiri tënë na lo, atene: “Mbi yeke yoro nduru mapa na ya ti ngu ti kasa ti mu na mbeni zo: zo ni laa.” Na pekoni, lo mu mapa, lo yoro na ya ti ngu ti kasa ni si lo mu na Judas, molenge ti Iskariote.

Awatokua 1:25

ti sara kua ti watokua na peko ti Judas so azia kua ni ti gue na ndo so alingbi na lo.”

1 Tesalonike 5:3

Na ndembe so azo ayeke tene ande, atene: “E yeke na siriri, mbeni ye ti sarango e ayeke daa pepe!”, gi na ndembe so laa kota kpale ayeke ti na ndö ti ala fafade tongana songo ya ti mama ti ngo so aga nduru ti du. Fade ala yeke wara lege ti sigigi na ya ni pepe.

Awatokua 1:18

Lo gue lani lo vo mbeni yaka na nginza so lo wara na lege ti ye ti sioni ti lo. Kâ, lo ti na li ti lo, ya ti lo asungba si avi ti lo kue atuku na sese.

Néhémie 9:29

Mo mu wango na ala titene ala kiri na gbe ti *Ndia ti mo; me na lege ti kuru baba ti ala, ala ma atënë ti ndia ti mo pepe. Ala sara siokpari ti ke andia ti mo, ataa so andia ni ayeke mu fini na azo so asara ye alingbi na ni. Akotara ti e angba ti sara ngangu li, ala tomboka na tere ti mo, ala ke ti ma yanga ti mo.

2 Mbai 36:13

Lo tomboka na tere ti gbia Nabukodonosor so asara si Sedesias adeba yanga ti lo na iri ti Nzapa. Lo sara ngangu li, lo kpengba be ti lo, lo ke ti kiri na mbage ti KOTA GBIA, Nzapa ti Israel.

2 Mbai 33:10

KOTA GBIA atene tënë na Manase nga na azo ti lo, me ala dingi mê ti ala pepe ti ma tënë ni.

1 Agbia 22:28

Mishe akiri tënë na lo, atene: “Tongana mo kiri na nzoni tere biani, andaa KOTA GBIA atene tënë na lege ti mbi pepe.” Lo kiri lo tene: “Ala amara kue, ala ma!”

1 Agbia 18:18

Élie akiri tënë: “Mbi laa mbi ga na kpale na ndö ti Israel pepe; me mo na azo ti sewa ti mo. Biani, ala ke ti sara ye alingbi na andia ti *KOTA GBIA si ala gue ti voro anzapa *Baal.

1 Agbia 17:1

Élie, zo ti kete kodro ti Tishebe, na sese ti Galaad atene na gbia Akab, atene: “*KOTA GBIA, Nzapa ti Israel ayeke na fini! Lo so mbi yeke sara na lo, mbi tene na mo: ‘Na ya ti angu so ayeke ga, ngu-Nzapa ayeke pika oko pepe, ataa ngu ti pere ayeke duti daa pepe, gi tongana mbi mu yanga si!’ ”

1 Samuel 2:34

“Ye so ayeke fa na mo atene, tënë so mbi tene na mo ayeke taa-tënë ayeke so: Hofni na Pinas, amolenge ti mo use kue ayeke kui gi na ya ti lango oko.

Jérémie 17:23

Ti akotara ti ala ni, ala ma mbi pepe, ala dingi mê ti ala ti ma mbi pepe. Ala sara ngangu li, ala ke ti ma tënë si ala ke awango ti mbi.

Ésaïe 48:4

Mbi hinga kue, ala yeke azo ti ngangu li, li ti ala akpengba tongana wen, li ti ala akpengba mingi.

2 Mbai 25:16

So wayanga-Nzapa ni angba ti tene tënë, Amasia afâ tënë na yanga ti lo si lo tene: “Zo wa laa azia mo wamungo-wango na gbia, zo wa? Kai tënë so! Mo ye pika?” Wayanga-Nzapa ni akai, me lo tene: “Fadeso mbi hinga, mbi tene, Nzapa aleke na be ti lo titene mo kui, ngbanga ti so mo sara ye so si mo ke ti ma wango ti mbi.”

1 Agbia 20:42

Tongaso wayanga-Nzapa ni atene na lo: “Tënë so KOTA GBIA atene ayeke so: ‘Lani, mbi zia koli so titene a fâ lo; me mo zi maboko na tere ti lo si lo kpe, lo hon. Fadeso, mo laa mo yeke wara kuâ na peko ti lo si azo ti kodro ti mo ayeke wara nga kuâ na peko ti azo ti kodro ti lo.’ ”

Mbeti ti Job 9:4

Ndara ti Nzapa ayeke kota mingi, ngangu ti lo ayeke mingi; zo wa laa alingbi ti gbu le ni na lo si lo wara sioni pepe, zo wa?

Amato 28:28

Tongana azo ti sioni asi na kota ndo, azo kue ayeke honde tere ti ala. Tongana azo ti sioni ni akui, azo ti mbirimbiri ayeke ga gbani gbani.

Jérémie 36:31

Mbi yeke ga na tere ti lo, *ahale ti lo nga na akota zo ti yangbo ti lo ndali ti sioni ti ala. Akpale so kue mbi tene tënë ni si ala ke ti ma mbi so, mbi yeke sara si aga na ndö ti ala, na ndö ti azo so alango na Jérusalem nga na ndö ti azo ti Juda.’ ”

Habakuk 2:7

Azo so asara boon na mo so, ala yeke londo hio ti ga na tere ti mo pepe? Ala yeke londo ti yingi mo pepe? Ala yeke nzi nga aye ti mo.

Sigingo 9:7

Faraon atokua azo ti gue ti baa ye ni. Na popo ti anyama ti azo ti Israel, mbeni oko akui pepe. Me Faraon angba ti sara ngangu li si lo ke ti zia lege na azo ti Israel ti gue.

Amato 28:14

Ti lo nzoni, zo so akpe lakue mbeto ti sarango sioni ye! Me zo so akpengba be ti lo, fade lo yeke ti na ya ti kpale.

Ésaïe 28:22

Fadeso, ala zia lege ti hengo ndo, tongaso pepe, kamba so akanga na ala, ayeke kiri ti kanga ala ngangu. Biani, Kota Gbia NZAPA so ayeke na ndö ti dunia kue atene na mbi atene, lo leke na be ti lo ti buba kodro ni biani biani.

Jérémie 14:19

“KOTA GBIA, mo ke Juda biani awe? Be ti mo ake *Sion awe? Ngbanga ti nyen si mo zia ka na tere ti e si ka ni amu pepe so? E baa ti e lani e tene, fade e yeke duti nzoni, me ye ti nzoni oko ayeke daa pepe. E yeke ku lani ngoi titene ka ti e amu, me kota mbeto laa aga.