1 Pierre 3:19 - Mbeti ti Nzapa - Tënë so amu fini

¹⁹ Na lege ti Yingo so laa Christ ague, afa Nzoni Tënë na ayingo so ayeke na kanga,

1 Pierre 3:19 Referans Kwoze

1 Pierre 4:6

Ndani laa a fa nga ando Nzoni Tënë na azo so akui awe. A fâ ngbanga ti ala alingbi na ye so ala sara tongana ti azo kue. Fadeso, na lege ti Yingo, ala lingbi ti duti na fini tongana ti Nzapa.

Ésaïe 61:1

Yingo ti Kota Gbia NZAPA ayeke na ndö ti mbi. Biani, *KOTA GBIA atuku mafuta na li ti mbi, lo tokua mbi ti fa nzoni tënë na awayere, ti kanga ka ti be ti azo so be ti ala afâ, ti tene na azo so a gbu ala na ngbaa atene, a zi ala awe, ti tene na azo ti kanga atene, ala yeke sigigi na ya ti kanga!

Ésaïe 42:7

Mo yeke zi le ti awaziba, mo yeke zi azo ti kanga na da ti kanga, mo yeke sigigi na azo so ayeke na ya ti sururu, ala so ayeke ku na ya ti vukongo ndo.”

Ésaïe 49:9

Mbi tene na azo ti kanga: ‘Ala sigigi!’ Mbi tene na azo so aduti na ya ti vukongo ndo: ‘Ala sigigi, ala ga na ya ti lumiere!’ Ala yeke duti tongana ataba so ayeke te pere na tere ti lege, ala yeke wara kobe ti ala na ndö ti ahoto kue.

Néhémie 9:30

Mo kanga be ti mo na ala na ya ti ngu mingi. Na lege ti yingo ti mo, mo mu wango na ala na lege ti awayanga ti mo; me ala ma awayanga ti mo ni pepe. Tongaso mo zia ala na maboko ti azo ti amara nde.

Aye so Nzapa afa 20:7

Tongana ngu saki oko ni ahunzi awe, fade a yeke zi Satan na ya ti kanga so lo yeke daa.

Aye so Nzapa afa 19:10

Mbi kuku na gbe ti ange ni ti voro lo, me lo tene na mbi: “Sara ye tongaso pepe! Mbi yeke gi mba ti mo, zo ti kua; mbi yeke nga mba ti a-ita ti mo na ti azo so kue abata taa-tënë so Jésus afa. Mo voro gi Nzapa!” Taa-tënë so Jésus afa, ni laa amu ngangu na awayanga-Nzapa ti sara na kua ti ala.

1 Pierre 3:18

Biani, Christ wani akui fani oko biani biani ndali ti siokpari ti azo; lo so lo yeke mbirimbiri, lo kui ndali ti azo ti kirikiri titene lo gue na ala na le ti Nzapa. Azo afâ gi tere ti lo ti zo, me Nzapa akiri na lo na fini na lege ti Yingo-Vuru.

1 Pierre 3:20

so ti tene lo gue, lo fa tënë na ayingo ti azo so ake ando yanga ti Nzapa na ngoi so Noe aleke mangboko. Na ndembe so Nzapa akanga be ti lo ti ku titene ala kiri na be ti ala na lo, gi azo miombe senge laa ali na ya ti mangboko si na lege ti ngu, Nzapa asoo ala.