Titus 3:2 - Muna Southern Dialect

² Fohatoda dua koise dofoꞌumbu, koe dopotaga-tagali, tamaka dapometaa bhe damotiwoha kamaluno lalondo ne sabhaha mie.

Titus 3:2 Referans Kwoze

Efesus 4:31

Ohoeꞌomu sabhaha kaleano lalo, ponanti-nantiꞌao bhe amaha. Ohoeꞌomu dua pokei-keisiꞌao amaha, bhe pofeka-fekaꞌaebu. Fekakodoꞌoeꞌomu bhahi-bhahiꞌae naꞌa bhe sabhaha podiu modai.

Efesus 4:2

Naetaa sadhia mekapanda wutomiu, naomalu lalomiu bhe kosabahaomu. Fotiwohaeꞌomu kanini kaasimiu weo potulu-tulumiꞌa.

1 Timotius 3:3

Suano dua mie mempohoꞌuno, suano mansoꞌamahano, tamaka momaluno lalo, meowano pometaa, suano meompuno ne dhoi.

1 Petrus 3:10

⸤ Weo Kitabi notibuhi peda aini,⸥ “Ane o mie noasiꞌao dadi metaa bhe nopoindalo kataano namisi, tabeano nadhumagani lelano ne pugau modai bhe wiwino ne wamba kopaha.

1 Petrus 3:8

Panda-pandano, soba dadi sekakolaloomu, poanta-antangiꞌao namisimiu, pomoa-moasiꞌaoꞌomu peda mie sebhahi-bhahitieno, pomobhe-mobhelaꞌaoꞌomu lalo bhe fekapanda diumiu.

Yakobus 4:11

Bhahitieꞌiku, koise poꞌumbu-umbuomua. Laꞌae moꞌalano tawa bhitahakino bhahitieno, ingka nofoꞌala bhe nobhitahaki pahintano Lahataꞌala. Maka ane foꞌalaomu pahintano Lahataꞌala, maꞌanano miina mangkafieꞌomu tamaka abhiomu wutomiu te wawono pahintano Lahataꞌala, tapeda seemie fobhitahakino.

Galatia 5:22

Tamaka ane mie dodadi nokuasaida Rohino Lahataꞌala, hasilino ingka dopomoa-moasiꞌao, nowula lalondo, notohopo lalondo, dokosabaha, nomalu lalondo, netaa lalondo, notai lalondo,

Matius 11:29

Tongkuomu wowoꞌoku ⸤ maꞌanano angkafi pahintaku⸥ bhe poguhuomu ne Idi, kapaꞌamo Idi ini netaa laloku bhe afekapanda Wutoku. Tetewei meꞌawaomu kalalesano lalo.

1 Petrus 2:1

Dadiꞌanomo, ohoeꞌoomu toha sabhaha modaiꞌano, koemo kopahaomu, koemo fehaaꞌulaomu, koemo nokondua lalomiu bhe koemo dua foꞌumbuomua.

Yakobus 3:17

Tamaka o mie meꞌawano kakotimbangi maiꞌaono te wawo nomoinda totono lalono, noasiane pometaa, nomalu lalono bhe neangka. Anoa nobhela lalono ne mie bhaino, sadhia nehabu metaaꞌano, ane bhe posala maꞌanano miina naeꞌawi seweta, miina dua namehaaꞌula.

Galatia 6:10

Tinangke bhe kasalawamiu, habu metaa ne kosasawindo mie, mangke-mangkemo ne bhahitie marasaeano ne Kristus.

Galatia 6:1

Bhahitieꞌiku, ane nandoo mie nehatofimiu nehabu dhosa, hintimiu dumadino mangkafino Rohino Lahataꞌala tabeano tumondaeꞌomu so nasumuliꞌao ne metaaꞌano. Tamaka tabeano malu-malusieꞌomu bhe dhagani wutomiu bhahasaa tiwudhuomu dua bhe hintimiu.

1 Timotius 3:11

O hobhinendo dua tabeano mie metaano diu, suano mie pande umbu, tabeano damoolie damewanaki totono lalondo bhe datiparasaea mpuu.

1 Tesalonika 2:7

Nomalu lalo mani taeate bhe hintimiu, tapedamo seemie ina nodambaꞌao anano.

Filipi 4:5

Naetaa kamaluno lalomiu damandeꞌaane sabhaha mie, kapaꞌamo Ompu nomaꞌomo nahumatoa.

1 Korintus 9:19

Idi ini o mie bebasi, suano bhatuando manusia. Ampamo kaowu afobhatua wutoku ne kosasawindo mie, neanomo sedhuluꞌa dua kabhahindo mie so neowaku ne Kristus.

2 Korintus 12:20

Kapaꞌamo nomihi laloku bhahasaa amai ahumatofikoomu napoꞌala bhe nepoindaloku, pedamo aitu hintimiu moha kanauꞌomu napoꞌala bhe nepoindalomiu. Nomihi laloku kunanomo bhe pogiha-gihaꞌa, pokondu-konduaꞌa lalo, amaha, kafosibhalano kafaraluuno wuto, poꞌumbu-umbu, pokamu-kamuntuiꞌao, kalangkeno diu, bhe kahungga.

2 Korintus 10:1

Idi, Paulus, bhe nemesaloku. Ambado miina aokado apugau ne wisemiu, aokado kaowu apugau ane apokodoꞌotiangkoomu. Aitu hampano kamaluno bhe kataano lalono Kristus,

Tula-tulando rasulu 23:5

Ambano Paulus, “Tabea, miina amandeꞌaanea anoa itu Imamu Bhalano. Ingka notibuhi, ‘Koise pugau molea ne mie neangkando liwu!’ ”

Yudas 1:10

Tamaka mie andoa saꞌituini defolimba sabhaha wamba kafekaꞌaebu ne tapa nepandeꞌaondo. Andoa itu tapedamo kadadi tapa kofekihi, nepandeꞌaondo dodadi kaowu so mbadhando. Gahaꞌaitumo anaꞌamo so kabinasaꞌando.

Yudas 1:8

Pedamo dua mie nepulaoꞌaoku saꞌituini. Andoa dopokamoni-monifi kaowu, sampe tadohabumo ampa kapoindalono mbadhando. Kuasano Lahataꞌala dopisakie, dofekaꞌaebu dumadino weo kakalabhia te surugaa.

2 Petrus 2:10

mangkenomo andoa mangka-angkafino nafusuu hamesa bhe kapoindalo pokahakuno bhe misakino kuasano Lahataꞌala. Kaꞌosano kakadondo bhe kalangkeno diundo mie mpahaguru-guruno naꞌa, sampe dokadomo dua dofekaꞌaebu dumadino weo kakalabhia te surugaa.

1 Petrus 4:4

Ampa aitu mie tapa mandeꞌaono Lahataꞌala tadomente mbaꞌinomo miinamo posabhangkaandaomu weo podiu tampahasa pontalabhi-labhino maitu, katiꞌumbuꞌamiumo.

1 Korintus 6:10

kasoꞌo, mie kumadau-dauno, mempohoꞌuno, mie foꞌumbuno, bhe fobhohe-bhoheꞌino saneamo so pata mealano dawu weo Kafopahintaꞌano Lahataꞌala.