Titus 2:13 - Muna Southern Dialect

¹³ Ampa aini nandoo dontaa-ntaaꞌomu oleo bhalano neposahunaꞌaontoomu so meowano dawua. Ne oleo anaꞌa natiwohamo kakalabhiano Lahataꞌala Foliuno Kuasa bhe Yesus Kristus Mosalamati kaita.

Titus 2:13 Referans Kwoze

2 Timotius 4:8

Aitu nokantaa-ntaamo so idi kawaꞌao so mie fotalono hampano adadi aangkafi kapoindalono Lahataꞌala. Kawaꞌao anaꞌa namaꞌa kanaꞌe Ompu ne oleo kahatoꞌano, kapaꞌamo Anoamo Fobhitahakino umadhilino. Bhahamoa suano kaowu idi so tumahimae, tamaka kosasawindo mie mokambano lalo ne oleo kahatoꞌano.

1 Korintus 1:7

Dadiꞌanomo miinamo bhe kapooli nedawuꞌaono Rohino Lahataꞌala nemokaeꞌaomiua maka taanta-antagimoomu oleo so katiwohaꞌano Ompuntoomu Yesus Kristus ne sabhaha mie.

Matius 16:27

Kapaꞌamo namada kaowu Anano Manusia namai weo kakalabhiano Amano dapoangkaꞌaane malaꞌekatino. Wakutuu anaꞌa namaꞌandamo ⸤ kabarakati tawa kahukumu⸥ ne manusia seemie-seemie naposahataa bhe habuno.

Titus 1:2

Kafoinaꞌu aini nengkoha ne posahunaꞌaontoomu daeꞌawa dadi suhue dhamani. Dadi anaꞌa padamo nofodhandiane Lahataꞌala mpini miinaꞌo natifokonandoo dhunia. Ingka Lahataꞌala miina bhe kapooli nakopahaa.

Markus 14:62

“Anoamo,” ambano Yesus, “maka mada kaowu, mohaomu Anano Manusia - Idimo ini - naengkoha ne suanano Lahataꞌala kokuasano, mohaeꞌomu dua namai te wunta-wuntano olu te lani.”

Ibrani 9:28

Pedamo dua anaꞌa Kristus sepaku kaowu noowa Wutono mbali kapopanga nesumbele so katitolosiꞌano dhosando manusia bhahino. Anoa namendua namai, paemo naehefu dhosaa tamaka naeowa kasalamati so mie mantagino kahatoꞌano.

2 Petrus 3:18

Naetaa mpuu modhuluomu kabhala bhe kamatangkamiu weo kanini kaasino Yesus Kristus, Ompu bhe Fosalamatino, bhe nasedhuluꞌa dua mandeꞌaaneomu. Nopantasi mpuu damosibhalae haꞌoleo ini ampa suhue dhamani! Amin.

2 Korintus 4:4

Kafeompuꞌando seetani kumuasaino dhamani aini nosongkowimo fekihindo mie tapa marasaeano sampe miina damoha tilangano Bhihita Metaa. Bhihita aini ingka nofofohatoꞌao kakalabhiano Kristus, ulanomo Lahataꞌala tiwohaꞌano.

Roma 15:13

Sio-siomo Lahataꞌala kaengkohaꞌano posahunaꞌaomiu, nakumabhintiangkoomu kawulano lalo bhe katohopono dadi hampano kaparasaeamiu, neanomo weo kuasano Rohino Lahataꞌala nasedhuluꞌa dua kabhalano posahunaꞌaomiu.

Roma 5:5

Posahunaꞌao aini paise nafofekandidiki lalo, kapaꞌamo totono lalonto noponoꞌaomo kanini kaasino Lahataꞌala. Kanini kaasi ini noowae Rohino Lahataꞌala toka newaꞌaono ne intaodiomu.

2 Petrus 1:1

Suha aini nomaiꞌao ne Simon Petrus, palima-lima bhe rasuluno Yesus Kristus, so bhahitieꞌi pototoꞌano kaparasaea bhe insaodi. Nepulaoꞌaoku kaparasaeantoomu ne Yesus Kristus, Lahataꞌalantoomu mosalamati kaita bhe meowano kaꞌadhili.

1 Petrus 1:7

Patudhuno kosasawiꞌae ini somo kaꞌudhino kaparasaeamiu, nokampuu-mpuu bhahaꞌi miina. Sanginomo bulawa o bara mobinasa doꞌudhiane efi, bhemo toha kaparasaeamiu ne Lahataꞌala, ingka nofoliuꞌe kakoharagaa bhe bulawa. Mada kaowu daꞌumudhie natipandeꞌaomo kamatangkano, maka kaparasaeamiu natipudhimo ne Lahataꞌala, meꞌawaomu kafosibhala bhe kakalabhia ne oleo kahatoꞌano Yesus Kristus.

1 Petrus 1:3

Pudhi kaitaomu Lahataꞌala Amano Yesus Kristus Ompuntoomu, kapaꞌamo nofowaꞌaomo dadi buꞌou hampano kabhalano rahamatino. Anoa padamo nofowanu Yesus Kristus maiꞌao ne mate, kaeꞌawaꞌantomoomu dadi buꞌou bhe posahunaꞌao motangka so oleo mbuhumai.

2 Timotius 4:1

Nandoo so nefeꞌulaiꞌaoku ne hintu, ingka bhe Lahataꞌala mandeꞌaane, bhe Kristus Yesus so bhitahakino dumadino bhe mateno. Anoa nasumuli namai maka namahinta nada seemie Omputo. Dadiꞌanomo aefeꞌulaiangko,

2 Korintus 4:6

Kapaꞌamo Lahataꞌala padamo nokobhoasao, “Nobheteꞌo toha tilanga weo kahohondo.” Ingka Anoamo dua mobheteno tilangano weo totono lalontoomu, neanomo naentalea fekihintoomu so dalumosangiꞌao kakalabhiano Lahataꞌala kotilangano ne ulano Kristus.

Tula-tulando rasulu 24:15

Pedamo dua andoa ini, o idi aposahunaꞌao ne Lahataꞌala putae kosasawindo mie mate sumuli dadumadi, namie metaa, namie modai!

Markus 8:38

Ane doambano doangkafi kanau bhahaꞌi doambano doangkafi kafoinaꞌuku ne olotando mie modai bhe mie kodhosa dhamani aini, Anano Manusia - Idimo ini - naoambanoane dua mie aitu ane namai weo kakalabhiano Amano, dalumibu-libue malaꞌekati mongkilono.”

Powoha 1:7

Ondo kaitaomu, Anoa nahumato te olu kapute bhe sabhaha mie daohae, mahinggamo andoa mada kumahadae. Kosasawindo bansano liwu ne dhunia ini daoꞌaefie. Uumbe mpuu. Amin.

Titus 3:4

Tamaka Lahataꞌala Mosalamati kaita padamo nofotiwoha kataano lalono bhe kanini kaasino ne manusia.

Kolose 3:4

Kristusmo ini kamaiꞌano dadintoomu; mada kaowu ane namotiwoha Wutono, hintimiu dua tetewei tiwohaomu bhe Anoa mesuaꞌomu weo kakalabhiano.

Kolose 1:23

Tamaka tabeano mpuu-mpuunieꞌomu kaparasaeamiu, fekamatangkae kofindamiu. Koise nomagoeaꞌa, koise dua nogampi posahunaꞌao neꞌawamiu wakutuuno fetingkeomu Bhihita Metaa. Bhihita Metaa ainimo nefolele ne sabhaha manusia we towawano lani ini. Idimo dua ini, Paulus, katudu mefoleleno Bhihita Metaa naꞌa.

1 Yohanes 4:14

Insaodi padamo tawoha Anano Lahataꞌala, maka tasakusiiane putae Anoa notudue Amano so Mosalamatino dhunia.

Kolose 1:5

Katangkaꞌanomo kaparasaeamiu naꞌa bhe kanini kaasimiu ne mie bhaimiu, hampano kaposahunaꞌao umawaomu nefontaa-ntaano Lahataꞌala te surugaa. Kaposahunaꞌao ini ingka tokamo fetingkeeꞌomu wakutuuno dofohatoangkoomu bhoasao banarano, maꞌanano o Bhihita Metaa.

Matius 26:64

Ambano Yesus, “Ingka pedamo pugaumu itu. Ampamo kaowu amohatoko, notanda aitu mohaomu Anano Manusia naengkoha ne suanano Lahataꞌala kokuasano, mohaeꞌomu namai te wunta-wuntano olu te lani.”

Matius 25:31

“Ane namai kaowu Anano Manusia weo kakalabhiano napoowa-owa bhe kosasawindo malaꞌekatino, maka naengkoha-ngkoha te kaengkohaꞌano kumalabhiano.

2 Tesalonika 2:16

Sio-siomo wutono Ompuntoomu Yesus Kristus bhe Lahataꞌala Amantoomu nalumawesi bhe namekatangka lalomiu, neanomo so nehabumiu bhe so nepugauꞌaomiu sanea metaaꞌano. Kapaꞌamo Lahataꞌala nofomoasiꞌao; weo kataano lalo nofowaꞌao kaposahunaꞌao metaa bhe kalawesino lalo suhue dhamani.

2 Tesalonika 2:8

kaneꞌomo manusia foliuno kadai naꞌa namotiumba wutono. Tamaka nahumato Ompu Yesus, manusia ini tanabuso komate-mateno, namobinasaane tilangano kumalabhiano.

Kolose 1:27

Ne umatinomo ini, gaono Lahataꞌala namotiwohae kabhalano kabarakatino bhe kakalabhiano rahasia aitu so sabhaha bansano liwu te dhunia ini. Rahasia anaꞌa peda aini: Kristus neate weo totono lalondo umatino, Anoamo puuno kaposahunaꞌaomiu so menamisiꞌaoꞌomu dua kakalabhiano Lahataꞌala.

Roma 8:18

Aparasaea mpuu, sabhaha kakadee-dee netompalointo ne dhamani aini pae sepaliꞌa napobandingia bhe kakalabhia pataꞌo tiwohaꞌano so neꞌawantoomu mada kaowu.

1 Timotius 1:1

Timotius, nekoanaꞌaoku mpuu weo kaparasaea ne Ompu! Suha aini nomaiꞌao ne Paulus. Idimo ini rasuluno Kristus Yesus hampano pahintano Lahataꞌala mosalamati kaita bhe pahintano Kristus Yesus, kaengkohaꞌano posahunaꞌaontoomu ⸤ so daeꞌawaꞌao dadi suhue dhamani⸥ . Sio-siomo Lahataꞌala Amantoomu bhe Kristus Yesus Ompuntoomu sadhia napobhaiangko kabarakatino, rahamatino bhe katohopono dadi.

Titus 1:4

Titus, hintu anaku mpuu, kapaꞌamo intaodi saneamo marasaeano ne Kristus. Sio-siomo sadhia napobhaiangko kanini kaasi bhe katohopono dadi maiꞌao ne Lahataꞌala Amantoomu bhe Kristus Yesus Mosalamati kaita.

Yudas 1:21

Dhaganiomu wutomiu weo kanini kaasino Lahataꞌala poowa ntaa-ntaaꞌomu oleono Ompuntoomu Yesus Kristus, so fowaꞌaono rahamatino, o dadi suhue dhamani.