Titus 2:10 - Muna Southern Dialect

¹⁰ Koise dokalima-lima, tamaka damotiwohae kalaano totono lalondo bhe datiparasaea. Ane podiundo nada anaꞌa, ingka dofotiwohaemo ne mie bhaindo kakesano kafoinaꞌuno Lahataꞌala Mosalamati kaita.

Titus 2:10 Referans Kwoze

Matius 5:16

Pedamo aitu dua tilangamiu tabeano naentalea ne wisendo mie bhaimiu, dowohaꞌao podiumiu metaaꞌano so damudhiꞌao Amamiu te surugaa.”

1 Petrus 2:12

Ehe mengkohamiu ne olotando mie tapa marasaeano ne Lahataꞌala tabeano naetaa sepaliꞌa, neanomo ane dakumonakoomu mie modai, ingka damohaꞌao wutondo sabhaha habu metaamiu. Dadiꞌanomo ne oleo kahatoꞌano Lahataꞌala andoa damekakalabhiaꞌe dua.

2 Yohanes 1:9

Sasuka tapa mintahakino kafoinaꞌuno Kristus tamaka nekapingkaane, miinamo naseꞌise bhe Lahataꞌala. Sasuka mintahakino kafoinaꞌu anaꞌa noseꞌise bhe Lahataꞌala Ama bhe Anano.

Efesus 4:1

Dadiꞌanomo, idi mie netohongku hampano afeompu ne Kristus ini, aesalo mpuu ne hintimiu dadiomu naposahataa bhe kapoindalono Lahataꞌala, kapaꞌamo hintimiu mie toka nebhasino Lahataꞌala.

1 Petrus 3:16

Ampamo kaowu totono lalomiu kumatanga-tangano, tabeano namoinda. Patudhuno ane o mie daꞌumumbukoomu mbaꞌinomo dadi metaamiu peda mie mangkafino Kristus, tadaoambanoꞌaomo wutondo.

Titus 1:3

Ne wakutuu toka nefotantuno, Lahataꞌala nofekakoꞌulaemo dhandino naꞌa weo bhoasaono, ⸤ o Bhihita Metaa⸥ . Foleleꞌano Bhihita Metaa aini noposahunaꞌa kanaꞌemo idi, nopoangkafi bhe pahintano Lahataꞌala Mosalamati kaita.

1 Timotius 6:3

Ane nandoo fofoguhuꞌaono kafoinaꞌu poꞌalatiꞌano bhe kafoinaꞌu aini, maꞌanano miina namangkafiea kafoinaꞌu kumotuꞌuno maiꞌao ne Ompuntoomu Yesus Kristus bhe kafoinaꞌuno agamantoomu,

1 Timotius 6:1

Miendo sarani membalino bhatua, tabeano namabhi kafeompuꞌano mie mantasino meꞌawano kafosibhala, keana neano Lahataꞌala bhe kafoinaꞌuntoomu damekaꞌaebue mie.

1 Korintus 4:2

Sifati neꞌondofi ne mie neposahunaꞌao peda anaꞌa, ingka o kataino lalono ne kafeompuꞌano.

Lukas 16:10

Ambano toha Yesus, “Ane seemie nembali doposahunaꞌaane giu mohobu, tetewei natiposahunaꞌao dua ne giu bhalano. Tamaka ane miina naembali daposahunaꞌaane giu mohobu, tetewei dua paise natiposahunaꞌao ne giu bhalano.

Matius 24:45

“Laꞌae bhahaa bhatua motuhuno lalo bhe mandeno maitu? Anoamo maitu nesangkeno kafeompuꞌano so neangkando bhatua bhaino, naetaganaanda daomaa napobutu bhe tempono.

1 Timotius 5:17

Neangkando umati kumahadhaa metaano, nopantasi naetahima kafosibhala bhe ponambo metaa, mangke-mangkemo andoa umuleino lalondo defosampe bhoasaono Ompu bhe dofofoinaꞌu.

1 Timotius 1:1

Timotius, nekoanaꞌaoku mpuu weo kaparasaea ne Ompu! Suha aini nomaiꞌao ne Paulus. Idimo ini rasuluno Kristus Yesus hampano pahintano Lahataꞌala mosalamati kaita bhe pahintano Kristus Yesus, kaengkohaꞌano posahunaꞌaontoomu ⸤ so daeꞌawaꞌao dadi suhue dhamani⸥ . Sio-siomo Lahataꞌala Amantoomu bhe Kristus Yesus Ompuntoomu sadhia napobhaiangko kabarakatino, rahamatino bhe katohopono dadi.

Filipi 4:8

Panda-pandano bhahitieꞌiku, fekihimiu fosingiꞌianeomu sabhaha giu metaa tipudhiꞌano, maꞌanano kumotuꞌuꞌano, mantasiꞌano, banaraꞌano, mongkiloꞌano, mokesaꞌano bhe metaaꞌano fetingkeꞌa.

Filipi 1:27

Ampamo kaowu, kodadimiu tabeano naposahataa bhe wambano Bhihita Metaano Kristus. Ane nada anaꞌa, naetaa amai amohakoomu toha, naetaa pae amai ametingke kaowu bhihitamiu, tetewei amandeꞌaane putae notangkamo kofindamiu, sepatudhuomu, sekakolaloomu poewangiomu so kaparasaea ne Bhihita Metaa.

Yohanes 12:6

Kapugauꞌano peda naꞌa suano mbaꞌinomo noniniꞌao mie mokae, tamaka mbaꞌinomo anoa maitu seemie kasoꞌo, nentelamo nohumaa dhoi weo kaenteiꞌa dhoi neintahano.

Lukas 1:47

noꞌia totono laloku hampano Lahataꞌala Mosalamati kanau,

Lukas 1:80

Anaꞌi anaꞌa dhulu kabhala dhulu kamatangka rohino. Anoa neate we pandaso bhalano ampa ne oleono namotiwoha wutono ne miendo Israel.

Titus 3:4

Tamaka Lahataꞌala Mosalamati kaita padamo nofotiwoha kataano lalono bhe kanini kaasino ne manusia.