Roma 6:13 - Muna Southern Dialect

¹³ Koemo owaomu katokano mbadhamiu ne dhosa, namakee so patudhu modai. Tamaka owa wutomiu ne Lahataꞌala peda mie madano mateno suli dodadi. Owaomu dua katokano mbadhamiu ne Lahataꞌala, neanomo namakee so dhumalangiꞌaoꞌomu kapoindalono.

Roma 6:13 Referans Kwoze

Roma 12:1

Dadiꞌanomo bhahitieꞌiku, hampano kataano lalono Lahataꞌala, aesalo mpuu ne hintimiu, owaomu mbadhamiu peda kapopanga dumadino, mongkilono bhe mekaꞌiano lalono Lahataꞌala. Nadamo aini tabeano kofeompumiu sakotuꞌuno ne Lahataꞌala.

Roma 6:16

Miina mandeꞌaaneomua gahaꞌa, ane doowa wutondo ne seemie manusia so dadhumalangiꞌao kapoindalono, ingka dembalimo bhatuano mie neangkafi maitu; bheanea dembali bhatuano dhosa meowano mate, bheanea dembalimo bhatua meangkano ne Lahataꞌala, meowano katitahimaꞌanto peda mie banara.

1 Petrus 2:24

Mbadhano wutono Kristus notongkue bhahi-bhahiꞌae dhosantoomu, sampe dokantaiꞌe te sau salipu. Patudhuno neanomo intaodiomu dabebasiomu maiꞌao ne kuasano dhosa bhe dadintoomu naposahataa bhe kapoindalono Lahataꞌala. Ingka kakowembe-wembenomo mbadhano Kristus mekaꞌuhikoomu.

Kolose 3:5

Dadiꞌanomo fekamateeꞌomu weo totono lalomiu sabhaha fekihino dhunia: podiu tampahasa bhe pokahaku, o nafusuu bhe kapoindalo modai bhe kakadau-dau, kapaꞌamo o kakadau-dau ini ingka nopototo bhe desombai barahala.

Roma 7:5

Endefiꞌini dodadiomu doangkafi kamanusiantoomu. Wakutuu anaꞌa katokano mbadhantoomu nokuasaiꞌe sabhaha kapoindalo modai, dhohono nofoluaꞌe tubhono agama Yahudi, sampe fahalaano ingka neowa mate.

1 Petrus 4:2

Dadiꞌanomo katumpono dadimiu we dhunia ini pakeeꞌomu angkafiomu kapoindalono Lahataꞌala, koise angkafiomu kapoindalono manusia.

Kolose 2:13

Hintimiu endefiꞌini momateomu hampano sabhaha kaꞌalamiu pakade mbadhamiu miina natisunaa. Tamaka ampa aitu Lahataꞌala nofodadikomoomu poowa-owaomu bhe Kristus. Lahataꞌala noꞌamponiemo sabhaha kaꞌalantoomu.

1 Korintus 6:20

Kapaꞌamo hintimiu itu padamo doꞌolikoomu, olimiu padamo dotanduaꞌane. Dadiꞌanomo pakeomu mbadhamiu so kakalabhiano Lahataꞌala.

1 Yohanes 1:9

Tamaka ane domangakuꞌao dhosantoomu ⸤ ne wiseno Lahataꞌala⸥ , teteweimo naꞌumamponie sabhaha dhosantoomu bhe namekanggelaꞌie sabhaha diu modaintoomu. Kapaꞌamo Lahataꞌala nokampuu-mpuu ne dhandino bhe noꞌadhili.

1 Korintus 6:15

Bhahaa miina mandeꞌaaneomua o mbadhamiu itu ingka o katokanomo dua mbadhano wutono Kristus? Naembali bhahaa katokano mbadhano Kristus amakee so mbadhano karambole? Ingka tantumo paise!

Efesus 2:5

Lahataꞌala nofodadi kaita dopoowa bhe Kristus, mahinggamo domatemoomu hampano dokangkalaꞌi pahintano. Tandaiꞌeomu, hintimiu nofosalamatikoomu Lahataꞌala hampano kataano lalono.

Filipi 1:20

Nemokambaꞌaono laloku bhe neposahunaꞌaoku, putae nehabuku ini pae aoambanoanea, tamaka sadaa-daa aokado apugau, mangke-mangke ne wakutuu aini. Neanomo mbadhaku ini somo mekakalabhiano Kristus, naetaa weo dadiku, naetaa weo mateku.

1 Korintus 6:9

Miina mandeꞌaaneomua bhahaa putae mie humabu modaino paise daeꞌawa dawu weo Kafopahintaꞌano Lahataꞌala? Koise nokolilino totono lalomiu! Mie pokawite-witeno, mesombaino barahala, mie monsule, karambole moꞌane, gumaano sapada moꞌane tawa hobhine,

Roma 6:19

Kaesambiliꞌaku bhatua, aesandaha kaowu ne dadindo manusia seꞌo-seꞌoleo, kapaꞌamo nomahasai melosangiomu. Endefiꞌini ingka owaomu katokano mbadhamiu membaliomu bhatuano sabhaha diu timohaku bhe patudhu modai meowano kadai. Tamaka ampa aitu owaomu katokano mbadhamiu membaliomu bhatua so mehabuno kabanara meowano dadi mongkilo.

2 Korintus 10:4

Kapaꞌamo ewanga nepake mani suano ewangano dhunia, tamaka ewanga sumangkaꞌano bhe kuasano Lahataꞌala. Ewanga aini nomondoiꞌe nesansa sabhaha benteno liwu motangka.

Roma 6:11

Dadiꞌanomo abhi wutomiu momatemoomu maiꞌao ne kuasano dhosa, tamaka dadimoomu so Lahataꞌala weo kaseꞌisemiu bhe Kristus Yesus.

Efesus 5:14

Kapaꞌamo bhahi-bhahiꞌae tiwohaꞌano, tantumo nentalea. Kanandooꞌanomo dokowambaane peda aini, “Wanumo hintu moodono, wanumo maiꞌao ne mate, maka naꞌumulawiko tilangano Kristus.”

2 Korintus 8:5

Kawaꞌaondo noliuꞌe nehatono fekihi mani. Kabhao-bhaono doowa wutondo ne Ompu, pada anaꞌa noposahataa bhe kapoindalono Lahataꞌala, doowamo dua wutondo ne insaodi.

2 Korintus 5:15

Kristus padamo nomate so kosasawindo manusia, neanomo manusia dumadino paemo dadumadi so wutondo tamaka so Kristus toka mateanda bhe nefowanu maiꞌao ne mate.

Roma 7:23

tamaka ne katokano mbadhaku awoha tubho sigaoꞌano, poewangino bhe tubhono Lahataꞌala neꞌakuino fekihiku. Panda-pandano idi ini kanggetumo notohongku kanau dhosa, kumuasainomo katokano mbadhaku.

Lukas 15:32

Nopantasi mpuu daoꞌiaꞌomu bhe dahumame-hameomu kapaꞌamo aimu kanggetu nomatemo, gahaꞌa sulimo nodadi, nomiinae sulimo apoꞌawaane.’ ”

Yakobus 4:1

Nomaiꞌao ne amai bhahaa powengke-wengkeꞌa bhe potaga-tagaliꞌamiu itu? Ingka nomaiꞌao ne kapoindalono mbadha pogihaꞌano kansuhu weo totono lalomiu.

Roma 1:29

Totono lalondo noponoꞌaomo sabhaha modaiꞌano, podiu pata metaaꞌano, o kakadau-dau, pokondu-konduaꞌao lalo, nafusuu dafopongko, pogiha-gihaꞌa, kabhohe-bhoheꞌi bhe feꞌili dadumai-dai mie bhaindo.

Yohanes 5:24

Amohatokoomu, kotu-kotuꞌu sasuka metingkeno wambaku bhe marasaeano ne Tumudu kanau, ingka neꞌawamo dadi suhue dhamani. Paise naeꞌawa kahukumu, kapaꞌamo nogampimo maiꞌao ne mate nopesuamo weo dadi.

Lukas 15:24

Kapaꞌamo anaku ini kanggetu nomatemo, gahaꞌa sulimo nodadi. Nomiinae, sulimo apoꞌawaane.’ Pada aitu dohame-hamemo.

2 Tesalonika 2:12

Hato pandano, kosasawindo mie tapa marasaeano ne kabanara maitu bhe moindalono habu modai, daeꞌawa kahukumu.

2 Korintus 5:14

Kanini kaasino Kristus nowadhumpa kainsami, hampano tapandeꞌaanemo lalo mani ane seemie nomateꞌao mie bhahino, nokomaꞌana kosasawindo domatemo.

2 Timotius 2:15

Uleiꞌe lalomu kahadhaa so noꞌiaꞌao Lahataꞌala, membalimo mie tapa moambanoꞌaono nekahadhaano, maꞌanano fofoinaꞌuꞌao bhoasao banara melaa-melaa.