Roma 14:19 - Muna Southern Dialect

¹⁹ Dadiꞌanomo ulei kaitaomu lalontoomu daꞌumondofi dhalano kapometaa, bhe kofahalaaꞌano so dapofeka-fekatangkaꞌao kaparasaea.

Roma 14:19 Referans Kwoze

Efesus 4:29

Weo pugaumiu, koe mepakeomu wamba tampahasa, tamaka mepakeomu kaowu wamba mokesa, wamba fotaa-taano pokantibhaꞌano bhe kafaraluundo mie bhaimu. Wamba medano naꞌa naeowa kabarakati so mie metingkee.

Roma 12:18

Uleiꞌe lalomiu ampa nepoo-poolimiu dadi pometaaꞌomu bhe kosasawindo mie.

Roma 15:2

Ondofi kaitaomu seemie-seemie so kaoꞌiaꞌano mie bhainto, so kaetaaꞌano, somo dua kafekatangkano kaparasaeano.

Ibrani 12:14

Uleiꞌe lalomiu dadi pometaa bhe kosasawindo mie bhaimiu, uleiꞌe dua lalomiu dumadi mongkilo so Ompu, kapaꞌamo miina bhe manusia so mohano Ompu ane pae nadumadi mongkilo.

2 Korintus 13:11

Panda-pandano, bhahitieꞌiku, fowulae lalomiu, fosangkae dadimiu! Tahimaeꞌomu sabhaha katangahi nefohatoꞌaoku ini. Sekakolaloomu, dadiomu weo kapometaa, maka Lahataꞌala kamaiꞌaoꞌano kanini kaasi bhe katohopono dadi sadhia napobhaiangkoomu!

Markus 9:50

O gaha daanumo netaa, tamaka ane nasimotembeꞌa, kiha-kiha damekakahaane dua ae? Dadiꞌanomo, tabeano membaliomu peda gaha, pometa-metaaꞌomu.”

Matius 5:9

Dokodawua mpuu meowano pometaa, kapaꞌamo dakumonada anaꞌino Lahataꞌala.

1 Petrus 3:11

Habu modai tabeano naꞌumohoe maka nahumabu metaaꞌano; naeꞌondofi pometaa, naꞌumuleiꞌe lalono ampa naꞌumawae.

1 Korintus 14:26

Bhahitieꞌiku! Kaowu nadamo amai? Ane pohompu-hompuomu, naetaa seemie-seemie bhe taiꞌano: nandoo so melaguno, nandoo so fofoinaꞌuno, nandoo so mefosampeno powoha maiꞌao ne Lahataꞌala, nandoo so mepakeno wambano Rohi, nandoo dua so maꞌanakino wambano Rohi naꞌa. Ampamo kaowu bhahi-bhahiꞌae naꞌa tabeano sanea so kamatangkaꞌano kaparasaeando umati.

1 Korintus 10:33

Dadiomu peda idi ini. O ae maka nehabuku sadhia aꞌuleiꞌe laloku afekaꞌia lalondo sabhaha mie, miina aeꞌondofi so kaetaaꞌano wutoku, tamaka so kaetaaꞌando mie bhahi, neanomo dasumalamati.

2 Timotius 2:22

Dadiꞌanomo fekakodoꞌoe nafusuundo kahangku dadi, uleiꞌe lalomu angkafi kapoindalono Lahataꞌala, fekatangkae kaparasaeamu, dadi weo kanini kaasi bhe kapometaa bhe mie bhaimu. Dadimo peda anaꞌa bhe mie metondalano ne Ompu maiꞌao ne totono lalo mongkilono.

1 Timotius 1:4

Fohatoda koemo dofotuhu-tuhu lalondo ne sabhaha kapu-kapuna bhe tula-tulano sampuꞌa tapa kotompano. Bhahi-bhahiꞌae naꞌa neowa kaowu potaga-tagaliꞌa, miina nafotulumi namodhulu patudhuno Lahataꞌala. Patudhuno Lahataꞌala naꞌa notipandeꞌao mpahinomo weo kaparasaea ne Anoa.

2 Korintus 12:19

Fenaiku nomponamo nokoduku we lalomiu insaodi tapobenteꞌao wuto mani ne wisemiu. ⸤ Ingka miina.⸥ Sabhaha pugau mani ini takowambaane ne wiseno Lahataꞌala nopoangkafi bhe kapoindalono Kristus. Bhahitieꞌiku timoasiꞌaono, bhahi-bhahiꞌae ini tahabue so kamatangkaꞌano kaparasaeamiu.

1 Korintus 7:15

Ampamo kaowu ane mie pata marasaeano naꞌa gaono nahumunsa hobhineno tawa moꞌaneno, koise eleꞌaaneomua. Kapaꞌamo hintimiu moꞌane tawa hobhineno miina titapuomu. Lahataꞌala ingka nobhasikoomu so dumadiꞌaoꞌomu weo katohopono lalo.

1 Korintus 8:1

Aitu akowambaꞌao oti kapopanga ne barahala. Nandoo mugauno, “Intaodi ini dokokapandemo.” Ampamo kaowu o kapande nofofekalangke diu, tamaka o kanini kaasi nofofekamatangka lalo.

1 Korintus 10:23

Nandoo mugauno, manusia nobebasi nehabu o ae maka dua. Anoamo, tamaka ambaku miina kosasawiꞌae nehabundo manusia nokofahalaa. O manusia nobebasi nehabu o ae maka dua, tamaka miina kosasawiꞌae nehabundo manusia maitu naefekamatangka totono lalo.

1 Korintus 14:3

Tamaka laꞌae kosuahano peda anabii, nopugau ne manusia, nofofekamatangka kaparasaea, nofotangahi, bhe nofolawesi lalo.

1 Korintus 14:4

Laꞌae mepakeno wambano Rohi, nofekamatangka kaowu kaparasaeano wutono, tamaka laꞌae kosuahano peda anabii nofekamatangka kaparasaeando umatino Lahataꞌala.

1 Korintus 14:5

Gaoku mpuu hintimiu kosasawimiu mepakeomu wambano Rohi, tamaka fofoliuꞌano gaoku kosuahaomu peda anabii. Kapaꞌamo nokofahalaa mie kosuahano peda anabii bhe mie mepakeno wambano Rohi, simbali nomaꞌanakie dua wambano naꞌa, so notifekamatangkaꞌao kaparasaeando umati sigaoꞌano.

Efesus 4:12

Katiwaꞌaoꞌano bhahi-bhahiꞌae ini, damotoka umati mongkilono so kahadhaando daꞌumondofao Ompu bhe mie bhaindo, neanomo mbadhano Kristus sadhulu-dhulu kabhala bhe kamatangka.