Powoha 5:13 - Muna Southern Dialect

¹³ Afetingkemo dua kosasawindo mahaluku te surugaa, we dhunia, we pandano dhunia bhe we teꞌi, tangkanomo sabhaha ndumandooꞌano weo alamu bhalano ini, delagu ambado, “Sabhaha kapudhi, kafosibhala, kakalabhia bhe kuasa ampa suhue dhamani so Mengkohano ne kaengkohaꞌa kumalabhiano bhe so Anano Dhumba!”

Powoha 5:13 Referans Kwoze

Filipi 2:10

Neanomo weo neano Yesus sabhaha ndumandoono te surugaa, ne dhunia ini bhe we pandano dhunia, datumaohao sombado ne Anoa.

Powoha 5:3

Tamaka bhe naseemie miina bhe moolino, naetaa te surugaa, naetaa we dhunia, naetaa we pandano dhunia, so lumengkano kaluluno kitabi amaitu tawa moolino umondono weta we lalo.

Powoha 5:12

Suahando nohaaꞌi sepaliꞌa ambado, “Anano Dhumba nesumbele maitu nopantasi mpuu notahima kuasa, kahangkaea, kapande, kaꞌosa, kafosibhala, kakalabhia, bhe sabhaha kapudhi!”

Roma 11:36

Kapaꞌamo bhahi-bhahiꞌae nomaiꞌao ne Anoa, nonandoo hampano Anoa, bhe nasumuli dua ne Anoa. Notifosibhala mpuu Lahataꞌala ampa suhue dhamani! Amin.

1 Petrus 5:11

Anoamo kokuasano suhue dhamani! Amin.

Lukas 2:14

“Nokalabhia mpuu Lahataꞌala te wawono wawo, katohopo mpuu we dhunia, so manusia posahasiꞌano lalo bhe Lahataꞌala.”

Powoha 6:16

Andoa dopugau ne kabhawo bhe ne kontu maitu ambado, “Tabuhiki kainsami! Febuni kainsami maiꞌao ne Mengkohano ne kaengkohaꞌa kumalabhiano bhe amahano Anano Dhumba maitu.

Yudas 1:25

Anoamo Kaseemie-mieꞌano, Mosalamati kaitaomu noangka ne Yesus Kristus Ompuntoomu. Somo Anoa sabhaha kakalabhia, kafosibhala, kaꞌosa bhe kuasa notanda wawono, aitu bhe ampa suhue dhamani. Amin.

Roma 16:27

Anoamo Lahataꞌala Kaseemie-mieꞌano, foliuno kakotimbangi. Nopantasi mpuu namangka ne Yesus Kristus sadhia damekakalabhiaꞌe, ampa suhue dhamani! Amin.

Roma 9:5

Andoa maitu sampuꞌando awuaꞌintoomu, maka weo kamanusiano Kristus nomaiꞌao ne siwulundo. Anoamo Lahataꞌala te wawono bhahi-bhahiꞌae, mantasiꞌano damosibhalae ampa suhue dhamani. Amin.

Powoha 5:6

Palusi amaitu awohamo dua ne wunta-wuntano kaengkohaꞌa kumalabhiano, dolibu-libue mahaluku fato uluno bhe kamungkulaꞌi maitu, neehe-ehe seꞌulu Anano Dhumba pasae padamo dosumbelee. Tanduno fitu pele, matano fitu onu, andoa maitu kofitu bansaꞌae Rohino Lahataꞌala netuduno dolili ne kosekaꞌewaꞌae dhunia.

Powoha 1:6

Anoamo humabu kaita mbali bansano liwundo omputo bhe imamu meompuno ne Lahataꞌala Amano. Somo Anoa kakalabhia bhe kuasa suhue dhamani. Amin.

1 Petrus 4:11

Ane seemie neowa kafoinaꞌu, naetaa napugau kanggetumo wambano wutono Lahataꞌala. Ane seemie nofoꞌondofao, naetaa namake kaꞌosa newaꞌaono Lahataꞌala, neanomo ne sabhaha nehabumiu Lahataꞌala damekakalabhiaꞌe namangka ne Yesus Kristus. Ingka Anoamo kokalabhiano bhe kokuasano ampa suhue dhamani. Amin.

Efesus 3:21

Nopantasimo mpuu namangka ne Kristus Yesus, Lahataꞌala damekakalabhiaꞌe pomantulu-ntulu weo umatino ampa suhue dhamani. Amin.

Powoha 5:9

Andoa delaguꞌao lagu buꞌou ambado, “Hintu nopantasi tahima kaluluno kitabi aitu bhe lumengka kafulutino, hampano Hintu padamo dosumbeleko, heamu padamo metolosiane manusia maiꞌao ne sabhaha sampuꞌa, sabhaha wamba, sabhaha siwulu bhe sabhaha bansano liwu so Lahataꞌala.

Kolose 1:23

Tamaka tabeano mpuu-mpuunieꞌomu kaparasaeamiu, fekamatangkae kofindamiu. Koise nomagoeaꞌa, koise dua nogampi posahunaꞌao neꞌawamiu wakutuuno fetingkeomu Bhihita Metaa. Bhihita Metaa ainimo nefolele ne sabhaha manusia we towawano lani ini. Idimo dua ini, Paulus, katudu mefoleleno Bhihita Metaa naꞌa.

Matius 6:13

Koise folapasa kainsami weo kasoba, tamaka dhagani kainsami ne kuasa modai. [Kapaꞌamo Hintumo mahintano, kokuasano bhe kumalabhiano ampa suhue dhamani. Amin.]’

1 Timotius 4:16

Dhagani wutomu, dhaganie dua kafoinaꞌumu. Mpuu-mpuunie bhahi-bhahiꞌae naꞌa, kapaꞌamo ane moolie ingka mosalamatimo wutomu bhe kosasawindo mie metingkeko.

Yohanes 1:29

Nomentae Yohanes nowohamo Yesus nomaiꞌie. Nopugaumo ambano, “Ondoeꞌomu Anano Dhumbano Lahataꞌala, tumolosino dhosano dhunia.

Powoha 5:1

Pada anaꞌa awohamo selulu kitabi nointahaane suanano Mengkohano ne kaengkohaꞌa kumalabhiano maitu. Kaluluno kitabi anaꞌa nokokabuhi kohaawetaꞌae bhe dofulutiane bhindahi fitu kafuluti.

Powoha 13:8

Kosasawindo mie meateno we dhunia dasumomba ne anoa. Miemo andoa ini, mpini pakatifokonandoono dhunia, miina natibuhia neando weo Kitabindo Mie Dumadi, fehebuaꞌano Anano Dhumba toka nesumbele.