Matius 4:23 - Muna Southern Dialect

²³ Yesus noangkai kosekaꞌewaꞌae kadieno Galilea, nofofoinaꞌu ne lambu-lambu kasambaheaꞌa. Anoa nefolele Bhihita Metaa Kafopahintaꞌano Lahataꞌala, poowa nefekaꞌosa sabhaha mie mosaki bhe modaino namisi ne liwu aitu.

Matius 4:23 Referans Kwoze

Matius 9:35

Pedamo aitu, Yesus noliligi kota bhe liwu ne itu, nofofoinaꞌu weo lambu kasambaheaꞌa bhe nefolele Bhihita Metaano Kafopahintaꞌano Lahataꞌala, poowa nefekasali sabhaha saki bhe kadaino namisi.

Markus 1:39

Pada aitu Yesus nolilimo we kadieno Galilea, nefolele Bhihita Metaa weo lambu-lambu kasambaheaꞌando bhe nefolimba seetani.

Tula-tulando rasulu 10:38

Pandeꞌaanemoomu dua Lahataꞌala nopili Yesus miendo Nasaret maitu maka nowaꞌane Rohino bhe kuasa. Anoa nolili nehabu metaaꞌano, nefekaꞌosa sabhaha mie nekuasaino Kafeompuꞌando seetani, mbaꞌinomo Lahataꞌala nopobhaiane.

Lukas 7:22

Dadiꞌanomo Yesus tanotobhoosidamo ambano, “Sulimoomu fohatoomu Yohanes, fohatoaneomu o ae newoha bhe nefetingkemiu: kabunto suli dofowoha, mie kalu dekala-kala, kokuli modaino donggela, kapongke dofofetingke, mie mate suli dodadi, bhe mie ngkumaasi-asi defebhihitaianda Bhihita Metaa.

Matius 11:5

Kabunto suli dofowoha, mie kalu dekala-kala, kokuli modaino donggela, kapongke dofofetingke, mie mate suli dodadi bhe mie ngkumaasi-asi defebhihitaianda Bhihita Metaa.

Matius 13:54

Sahatono we liwu kamaiꞌaoꞌano, nofofoinaꞌumo weo lambu kasambaheaꞌa. O mie tadomente bhe dopugau ambado, “Nomaiane ne amai bhahaa sabhaha kapande bhe kuasano nehabu giu timenteꞌaono maitu?

Markus 1:21

Yesus bhe mie mangkafie dohatomo we liwuno Kapernaum. Sahatono oleono Sabat, Yesus lasao nopesua weo lambu kasambaheaꞌa maka nofofoinaꞌu.

Roma 10:15

Nada amai dua daefolele bhihita ane pae bhe fotuduno dakumala? Noposahataa bhe tibuhino weo Kitabi peda aini, “Nokesa mpuu hatondo mie mefoleleno Bhihita Metaa.”

Lukas 8:1

Miina naomponaa pada anaꞌa Yesus noliligimo kota bhe liwu nefolele Bhihita Metaa Kafopahintaꞌano Lahataꞌala. Weo kala-kalano naꞌa dopobhaiane anaguhuꞌino ompulu hoduano,

Markus 6:2

Nohato oleono Sabat nofofoinaꞌumo toha weo lambu kasambaheaꞌa. Mie bhahi domente dofetingke kafoinaꞌuno. Ambado, “Noꞌawae ne amai bhahaa kapandeno maitua? Dowaꞌane dawua ae bhahaa mie aini? Peda ae nokokuasa nehabu giu timenteꞌaono maitu?

Matius 24:14

Bhihita Metaano Kafopahintaꞌano Lahataꞌala ini damolelee ne kosekaꞌewaꞌae dhunia, neanomo sabhaha bansano liwu dametingkee. Mada anaꞌa kaneꞌomo nahumato kafetompaino dhamani.”

Matius 12:9

Nomaiꞌao ne itu Yesus nopesuamo weo lambu kasambaheaꞌando.

Yohanes 18:20

Yesus notobhoosimo ambano, “Idi sadhia apugau mentalea-mentalea ne dhunia, afofoinaꞌu ne lambu-lambu kasambaheaꞌa bhe ne Lambuno Lahataꞌala kapofoꞌo-foꞌonuꞌando kosasawindo miendo Yahudi. Miina sepaliꞌa apugau mpebuni.

Lukas 13:10

Sewakutuu ne oleono Sabat Yesus tangasano nofofoinaꞌu ne seꞌonu lambu kasambaheaꞌa.

Lukas 9:11

Tamaka mie bhahi dopandeꞌaane lasao doangkafie. Yesus notahimada maka nofoinaꞌuanda Kafopahintaꞌano Lahataꞌala bhe nofekaꞌosa mie mefaraluuno katotomata.

Lukas 5:17

Seꞌoleo tangasano Yesus nofofoinaꞌu nandoo seemie hodua miendo Farisi bhe pande-pande Kitabi dengkoha-ngkoha dofetingke pugauno. Andoa domaiꞌao ne sabhaha liwu ne kadieno Galilea, Yudea bhe Yerusalem. Kuasano Ompu nokabhinti Yesus sampe nembali nefekaꞌosa mie mosaki.

Markus 3:10

Nobhahi sepaliꞌa nefekaꞌosa mie mosakino, sampe mie mosakino dopodhumpu-dhumpuhao domaꞌoti Yesus dakumadampaeꞌao.

Markus 1:14

Notitohongku kaowu Yohanes, Yesus nokalamo we Galilea. Nefolele Bhihita Metaa maiꞌaono ne Lahataꞌala.

Tula-tulando rasulu 20:25

Kosasawimiu padamo aangkaikoomu aefebhihitaiꞌao Kafopahintaꞌano Lahataꞌala. Aitu apandeꞌaanemo, paemo moha kanauꞌomua.

Tula-tulando rasulu 18:4

Seꞌo-seꞌoleono Sabat Paulus nokala nopuga-pugau bhe miendo Yahudi bhe Yunani we lambu kasambaheaꞌa, patudhuno namoparasaeada dua ne Yesus.

Yohanes 6:59

Kosasawiꞌae ini nokowambaane Yesus we liwuno Kapernaum, wakutuuno nofofoinaꞌu weo lambu kasambaheaꞌa.

Lukas 10:9

Fekaꞌosadaomu mie mosaki ne itu bhe fohatodaomu, ‘Kafopahintaꞌano Lahataꞌala nomaꞌomo bhe hintimiu.’

Lukas 6:17

Pada aitu dosisampu-sampuꞌamo maiꞌao te kabhawo maka dofetumpu we potateꞌano. Ne itu dobhahi sepaliꞌa mie mangkafie dohompumo bhe dobhahi dua mie sigaoꞌano. Andoa maitu domaiꞌao ne kosekaꞌewaꞌae kadieno Yudea, domaiꞌao we Yerusalem, bhe domaiꞌao dua we kadieno Tirus bhe Sidon we wiwino teꞌi.

Matius 14:14

Hato nosede, Yesus nowohamo mie bhahi maitu. Anoa nobhelaanda lalo sampe mie mosakino nofekaꞌosada.

Matius 13:19

Kotika mie metingkeno bhoasao Kafopahintaꞌano Lahataꞌala tamaka miina nalumosangiea, nomaiꞌie Kafeompuꞌando seetani norampasi bhoasao kaneꞌo neꞌewi weo totono lalondo maitu. Aitumo maꞌanano wine mondawuꞌano ne kaangkaꞌa.

Matius 3:2

ambano, “Fetompaꞌao dhosamiu, doliomu ne Lahataꞌala, kapaꞌamo Kafopahintaꞌano Lahataꞌala nomaꞌomo.”

Yohanes 7:1

Pada anaꞌa Yesus nowaliligimo kadieno Galilea, hampano nokiido nalumili we kadieno Yudea, kapaꞌamo ne naꞌa miendo Yahudi dopatudhu damongkoe.

Lukas 20:1

Seꞌoleo Yesus nefoinaꞌu mie bhahi weo Lambuno Lahataꞌala bhe nofohatoanda Bhihita Metaa. Gahaꞌa dohatomo dua neangkaꞌindo imamu, pande-pande Kitabi bhe kamu-kamungkulaꞌindo Yahudi.

Lukas 4:14

Weo kuasano Rohino Lahataꞌala, Yesus nosulimo we Galilea. Bhihitano nolelemo ne kosekaꞌewaꞌae kadie aitu.

Lukas 6:6

Seꞌoleono dua Sabat Yesus nopesuamo weo lambu kasambaheaꞌa maka nofofoinaꞌu. Ne itu nandoo seemie mokepeno limano sembali, o suanano.

Lukas 7:21

Wakutuu anaꞌa dobhahi mie nefekaꞌosano Yesus nomaiꞌao ne sabhaha saki bhe kakadee-dee. Nobhahi dua seetani nefolimbano bhe kabunto nefowulano matando sampe dofowoha.

Lukas 9:60

Tamaka Yesus nopugaumo ambano, “Hunsaꞌanomo mie mate dakumobuhu mie mate bhaindo, tamaka hintu kala folele bhihita Kafopahintaꞌano Lahataꞌala.”

Lukas 16:16

Kitabino Musa bhe Kitabino ana-anabii sadaa-daa nolaku ampa ne dhamanino Yohanes, tamaka notanda ne dhamanino Yohanes Kafopahintaꞌano Lahataꞌala dofoleleemo maka sabhaha mie dopogolo-golo damesua.

Tula-tulando rasulu 28:31

Mentalea-mentalea nokado nefolele bhihita Kafopahintaꞌano Lahataꞌala bhe nofofoguhuꞌao kafoinaꞌuno Ompu Yesus Kristus, miina bhe umonto-ontomiea