Matius 11:23 - Muna Southern Dialect

²³ Hintu liwuno Kapernaum, kunaꞌemu dasumangkeko te lani? Paise, hintu daꞌumohoko we narakaa, kapaꞌamo ane endefiꞌini we Sodom nakumadhadhia tanda-tanda tapa mentela newohamiu ini, tetewei liwu aitu nandumandooꞌe ampa seꞌoleo itu.

Matius 11:23 Referans Kwoze

Matius 4:13

Anoa nohunsamo Nasaret maka neate we Kapernaum, seꞌonu liwu ne wiwino teꞌino Galilea, we kadieno Zebulon bhe Naftali.

Powoha 11:8

Maeatindo tanaendole-ndolemo ne kabhongka we kota bhalano. Nea kaꞌibahatino kota anaꞌa Sodom bhe Mesir, kota aitumo dua katikantaiꞌano Ompundo te sau salipu.

Yudas 1:7

Feꞌulaiꞌeomu dua kotano Sodom bhe Gomora bhe liwu-liwu pomaꞌotiꞌano. Podiundo miendo kota aini tanopototomo dua bhe habundo malaꞌekati saꞌituini: dehabu sabhaha diu pokawite-wite bhe dopokagaa-gaa sapada moꞌane tawa sapada hobhine. Andoa ini dosikisaaꞌanda efi suhue dhamani, somo kafodhagando sabhaha mie.

Tula-tulando rasulu 2:27

Kapaꞌamo alusuku pae humunsae weo dhuniando mie mate, mbadhano bhatuamu mongkilono pae nahumansurua.

Lukas 14:11

Kapaꞌamo sasuka mekalangkeno wutono namekapandae Ompu, sasuka mekapandano wutono namekalangkee.”

Matius 16:18

Amohatoko, hintumo Petrus ⸤ maꞌanano nea aini o kontu dempa,⸥ maka te wawono dempa aini amoehe umatiku. Mahingga kuasano mate pae natumaloea.

Matius 8:5

Hato nopesua we Kapernaum, nopoꞌawaanemo seemie neangkando tantarando Roma, nefetulumi ne Yesus.

Lukas 16:23

Gahaꞌa mie hangkaea naꞌa nomatemo dua maka dokobuhue. We dhuniando mie mate nokadee-dee sepaliꞌa. Wakutuu nototohana, gahaꞌa nowohamo Abraham te mokodoꞌoꞌano noꞌawi Lasarus.

Lukas 4:23

Yesus nopugaumo dua ne andoa ambano, “Teteweimo patudhumiu malenda kanauꞌomu peda ini, ‘Hintu foagono, fekaꞌosa wutomu! Ingka padamo tafetingke mehabu sabhaha tanda timenteꞌaono we Kapernaum; dadiꞌanomo habue dua ne liwu kamaiꞌaoꞌamu ini.’ ”

Matius 17:24

Wakutuuno Yesus bhe anaguhuꞌino dohato we Kapernaum, domaimo mealano sewano Lambuno Lahataꞌala ne Petrus bhe dopugau ambado, “Bhahaa gurumu miina natumanduaoa sewano haa woka perano so Lambuno Lahataꞌala?”

Matius 10:15

Amohatokoomu kotu-kotuꞌu, nahumato Oleono Kiama kahukumu neꞌawano witeno Sodom bhe Gomora nandoo naosape ane dapototoane bhe so neꞌawano liwu aitu.”

Lukas 10:15

Hintu liwuno Kapernaum! Kunaꞌemu dasumangkeko te lani? Paise, tamaka daꞌumohoko we narakaa!”

Tula-tulando rasulu 2:31

dadiꞌanomo o ae so kumadhadhiaꞌano te wise nowohaemo. Nopugauane wawo putae Mesias Omputo Fosalamatino namanu namaiꞌao ne mate. Ambano Daud, ‘Pae dahumunsae weo dhuniando mie mate, mbadhano pae nahumansurua.’

Powoha 1:18

Idimo dumadino, padamo amate, tamaka ondo kanau itu, ingka adadimo ampa suhue dhamani. Idimo mintahano kunsino mate bhe dhuniano mate.

Powoha 6:8

Taꞌawohamo dua seꞌulu adhaha, wuluno nopupuda, mie sumawikie neano Mate, noangkafie dhuniano mate. Andoa dowaꞌanda kuasa ne sekafato dawuꞌa dhunia, miendo damongkoanda kampue, o gaba, o hopu bhe sabhaha kadadi fohumaano we dhunia.

Powoha 20:13

O teꞌi noowa mie komate-mateno weo teꞌi; pedamo dua o mate bhe dhuniano mate doowa miendo mateno, maka seemie-seemie dobhotusida noposahataa bhe habundo.