Lukas 22:19 - Muna Southern Dialect

¹⁹ Pada anaꞌa nealamo dua roti, nefoampe katumpuno lalo, nobhebhehae maka nodawu-dawuandae anaguhuꞌino. Ambano, “Mbadhakumo inia, newaꞌaoku so hintimiu, habuomu nada ini somo kafeꞌulaimiu ne Idi.”

Lukas 22:19 Referans Kwoze

1 Korintus 10:16

Wakutuuno dofohoꞌuomu angguru poowa defoampe katumpuno lalo ne Lahataꞌala hampano kampohoꞌuꞌa anaꞌa, ingka tandanomo kaseꞌisentoomu bhe heano Kristus. Wakutuuno dopobheha-bhehaomu roti maka dohumaaꞌe, ingka tandanomo kaseꞌisentoomu bhe mbadhano Kristus.

Lukas 22:20

Peda dua anaꞌa palusi dohumaa nealamo toha kampohoꞌuꞌa bhe nopugau, “Kampohoꞌuꞌa aini podhandi buꞌouno Lahataꞌala bhe manusia, dofekatangkaane tuhuno heaku. Heakumo ini nefotuhu so hintimiu.

1 Korintus 10:4

Kosasawindo dofohoꞌu oe pototoꞌano, sanea oe maiꞌaono te surugaa. Kosasawindo dofohoꞌu oe maiꞌano ne kabhawono dempa pobhaianda; dempa anaꞌa ingka o wutonomo Kristus.

Titus 2:14

Anoa padamo noowa Wutono sampe dopongkoe so intaodiomu, mbali nofofobebasiꞌao maiꞌao ne sabhaha podiu modai. Patudhuno dua naefokonandooꞌao umati mongkilono, so fehebuaꞌano Wutono, umati mokokosono humabu metaano.

1 Petrus 2:24

Mbadhano wutono Kristus notongkue bhahi-bhahiꞌae dhosantoomu, sampe dokantaiꞌe te sau salipu. Patudhuno neanomo intaodiomu dabebasiomu maiꞌao ne kuasano dhosa bhe dadintoomu naposahataa bhe kapoindalono Lahataꞌala. Ingka kakowembe-wembenomo mbadhano Kristus mekaꞌuhikoomu.

Efesus 5:2

Dadimiu tabeano nakumabhintie kanini kaasi, peda wutono Kristus nofomoasiꞌao. Nofotawakalamo Wutono so intaodiomu sampe dopongkoe. Anoa nembali kapopanga mowondu nefoampe ne Lahataꞌala, mekaꞌianomo lalono Lahataꞌala.

Galatia 1:4

Yesus Kristus nofotawakala wutono sampe dopongkoe mbali katolosino dhosantoomu, so namolapaꞌao intaodiomu maiꞌao ne dhamani modai ini. Habuno Kristus ini noangkafi kapoindalono Lahataꞌala Amantoomu.

Yohanes 6:51

Idimo ini roti dumadino sumampuꞌano maiꞌaono te surugaa. Ane mie naomaa roti aini nadumadi ampa suhue dhamani. Roti so newaꞌaoku maitu dhagiku Wutoku, somo kadadiꞌando dhunia.”

Lukas 24:30

Hato naomaa bhe andoa, Yesus nealamo roti, nobarakatie maka nobhebhehae bhe nodawuandae.

Matius 14:19

Pada anaꞌa mie bhahi notududamo daengkoha ne kahoku. Dengkoha kaowu, noalamo roti lima onuno bhe kenta haa uluno naꞌa, nototohana te lani nefoampe katumpuno lalo ne Lahataꞌala maka nobhebhehae. Pada anaꞌa nowaꞌandae anaguhuꞌino dodawu-dawuandae mie bhahi maitu.

Yohanes 6:23

Pada amaitu nohatomo seꞌonu haa onu bhangka maiꞌaono we liwuno Tiberias nosede we owano kahumaaꞌando roti, sapalusino Ompu nefoampe katumpuno lalo endewi.

Lukas 22:17

Pada aitu nealamo kampohoꞌuꞌa, nefoampe katumpuno lalo ne Lahataꞌala maka ambano, “Alaeꞌomu maka podawu-dawueꞌomu.

1 Tesalonika 5:18

Ne sabhaha waweno dadi mefoampeomu katumpuno lalo, kapaꞌamo anaꞌa kapoindalono Lahataꞌala so hintimiu seꞌiseno bhe Kristus Yesus.

Galatia 4:25

Dadiꞌanomo Hagar ini gununo Sinai we witeno Arabu. Anoa ini nembali dua dopototoane bhe kotano Yerusalem, kapaꞌamo ampa aini miendo Yerusalem saneamo bhatua ⸤ nofobhatuada tubhono agama Yahudi⸥ .

Matius 15:36

Pada anaꞌa noalamo roti fitu onuno naꞌa bhe kakenta-kentano, nefoampe katumpuno lalo ne Lahataꞌala, nobhebhehae maka nowaꞌandae anaguhuꞌino dodawu-dawuandae mie bhahi.