Ibrani 6:17 - Muna Southern Dialect

¹⁷ Lahataꞌala nopoindalo nofotiwoha kakampuu-mpuuno lalono ne manusia tumahimano dhandino, putae patudhuno maitu paise nabhaliiꞌea, dadiꞌanomo dhandino naꞌa nofekamatangkaane femata.

Ibrani 6:17 Referans Kwoze

Ibrani 6:18

Haa hondano ini paise natibhaliia, kapaꞌamo Lahataꞌala pae bhe kapoolia nagumau-gau podhandino bhe fematano naꞌa. Kanandooꞌanomo intaodiomu meoluno ne Lahataꞌala daeꞌawa katangkano lalo so damintahakiꞌao kaposahunaꞌao kumantaa-ntaano te wisentoomu.

Ibrani 11:9

Hampano kaparasaeano, Abraham neate peda mie humato we koliwuno, ne wite nedhandiꞌaono Lahataꞌala naꞌa. Ne itu neate weo tenda. Pedamo dua aitu Ishak bhe Yakub, sanea metahimano dhandi sehondano naꞌa maiꞌao ne Lahataꞌala.

Yohanes 10:10

Kasoꞌo nomai kaowu nosibu, nofopongko bhe nofofekabinasa, tamaka o Idi amai so daeꞌawaꞌao dadi, bhe dadumadi napontalabhi-labhi.

1 Petrus 3:7

Hintimiu dua moꞌaneꞌi, fosibhalaeꞌomu namisino hobhinemiu weo dadino polambu. Tandaiꞌeomu andoa maitu miina napototo kaꞌosando bhe hintimiu. Fosibhaladaomu, kapaꞌamo andoa dapoowa-owa bhe hintimiu saneamo so umawano kadawuno Lahataꞌala, maꞌanano dadi suhue dhamani. Dhalangieꞌomu bhahi-bhahiꞌae ini, keana notitee sambaheamiu.

1 Petrus 1:3

Pudhi kaitaomu Lahataꞌala Amano Yesus Kristus Ompuntoomu, kapaꞌamo nofowaꞌaomo dadi buꞌou hampano kabhalano rahamatino. Anoa padamo nofowanu Yesus Kristus maiꞌao ne mate, kaeꞌawaꞌantomoomu dadi buꞌou bhe posahunaꞌao motangka so oleo mbuhumai.

Yakobus 1:17

Sabhaha kawaꞌao metaa bhe kadawu sumangka nomaiꞌao te surugaa, nofosampue Amantoomu mokonandoono sabhaha kantalea te lani. Anoamo Lahataꞌala tapa tibhaliino, tapa dua meowano ondula mohohondono mebhali-bhaliino.

Ibrani 6:16

Ane manusia dofemata ingka dosambili moliuno kuasa bhe wutondo, maka femata maitu mbalimo kafekamatangkano pugau, kasongkonomo potaga-tagaliꞌa.

Ibrani 6:12

Takiido membaliomu mie mantawa, tamaka gao mani mangkafiomu sandahano mie tumahimano nedhandiꞌaono Lahataꞌala hampano kaparasaea bhe kakosabahando.

Galatia 3:29

Ane hintimiu membalimoomu fehebuaꞌano Kristus, maka membalimoomu dua sampuꞌano Abraham, dadiꞌanomo kohakumoomu dua tumahimaomu dhandino Lahataꞌala.

Roma 11:29

Kapaꞌamo ane Lahataꞌala padamo nepili mie bhe nowaꞌanda kadawuno, pae bhe kapoolia nasumuli nabhalii kabhotusino.

Ibrani 11:7

Hampano kaparasaeano, Nuh nofodhagae Lahataꞌala so kumadhadhiaꞌano te wise, tapaꞌo newohano. Nuh neangka ne Lahataꞌala sampe nefotoka bhangka bhalano, mbalimo mosalamatie bhe koseꞌonu polambuno. Noangka ne kaparasaeano naꞌa dhunia dohukumue, tamaka wutono Nuh notahimae Lahataꞌala peda seemie banara hampano kaparasaeano.

Roma 8:17

Ane intaodiomu dembalimo anaꞌino Lahataꞌala, nokomaꞌana dokohakumo dua daꞌumawa sabhaha kabarakati nefontaa-ntaano Lahataꞌala so anaꞌino. Kabarakati nefontaa-ntaa naꞌa datumahimaeꞌomu dapoowa-owa bhe Kristus. Kapaꞌamo ane dokadee-deeꞌomu poowa bhe Kristus, teteweimo dua dafofekalabhia poowa bhe Kristus.

Yakobus 2:5

Bhahitieꞌiku timoasiꞌaono, fetingke kanauꞌomu! Mie mokae ne pomatano dhunia ingka nofepilida Lahataꞌala, dembali mie hangkaea weo kaparasaeando. Andoamo dua so kohakuꞌaono metahimano kadawu weo Kafopahintaꞌano Lahataꞌala, peda nedhandiꞌaono Lahataꞌala ne mie moasiane.

Efesus 1:11

Lahataꞌala nofokonandoo bhahi-bhahiꞌae noposahataa bhe kapoindalono bhe patudhuno Wutono. Mpini kabhao-bhaono nofopilimo bhe tokamo nofotantue daembali umatino hampano kaseꞌisentoomu bhe Kristus.