Galatia 2:20 - Muna Southern Dialect

²⁰ Tamaka ampa aitu adadimo. Ampamo kaowu suanomo dadiku wutokua, tamaka Kristus dumadino we laloku ini. Dadi nedambaꞌaoku ini, ingka o dadi weo kaparasaea ne Anano Lahataꞌala. Anoa noasi kanaumo sampe nofotawakala wutono dopongkoe so idi.

Galatia 2:20 Referans Kwoze

Galatia 5:24

Mie membalino fehebuaꞌano Kristus Yesus, kapoindalono mbadhano padamo dofekamatee te sau salipu, maꞌanano sabhaha nafusuu bhe kapoindalono kamanusiano dosobuemo.

2 Korintus 5:15

Kristus padamo nomate so kosasawindo manusia, neanomo manusia dumadino paemo dadumadi so wutondo tamaka so Kristus toka mateanda bhe nefowanu maiꞌao ne mate.

Roma 6:8

Ane domatemoomu poowa bhe Kristus, maka doparasaea teteweimo dua dadumadi poowa bhe Kristus.

Galatia 6:14

Tamaka o idi akiido naowose bhakeku ne ae maka dua, mpahinomo Ompuntoomu Yesus Kristus mateno te sau salipu nefosibhalakua. Kapaꞌamo mbaꞌinomo mateno Kristus te sau salipu, dhunia ini miinamo bhe fahalaanoa so idi, kao-kaomo nomatemo so idi. Pedamo dua idi ini, kao-kaomo amatemo so dhunia.

2 Korintus 13:5

Tiisangi totono lalomiu bhahaꞌi kotu-kotuꞌu parasaeaꞌomu ne Kristus. Udhi wutomiu! Miina mandeꞌaaneomu gahaꞌa putae Kristus Yesus nodadi weo totono lalomiu? Ane pae nada naꞌa, ingka miina mooliomu kaꞌudhi anaꞌa.

Roma 6:13

Koemo owaomu katokano mbadhamiu ne dhosa, namakee so patudhu modai. Tamaka owa wutomiu ne Lahataꞌala peda mie madano mateno suli dodadi. Owaomu dua katokano mbadhamiu ne Lahataꞌala, neanomo namakee so dhumalangiꞌaoꞌomu kapoindalono.

1 Tesalonika 5:10

Anoamo ini mateno so intaodiomu ini, neanomo ne oleo kahatoꞌano dadumadi bhe Anoa, mahinggamo nandoo daoꞌuhi, mahinggamo dua damatemo.

Titus 2:14

Anoa padamo noowa Wutono sampe dopongkoe so intaodiomu, mbali nofofobebasiꞌao maiꞌao ne sabhaha podiu modai. Patudhuno dua naefokonandooꞌao umati mongkilono, so fehebuaꞌano Wutono, umati mokokosono humabu metaano.

Galatia 1:4

Yesus Kristus nofotawakala wutono sampe dopongkoe mbali katolosino dhosantoomu, so namolapaꞌao intaodiomu maiꞌao ne dhamani modai ini. Habuno Kristus ini noangkafi kapoindalono Lahataꞌala Amantoomu.

Yohanes 17:21

Aesalo sio-siomo kosasawindo daseꞌise, peda Hintu Ama seꞌise bhe Idi, Idi aseꞌise bhe Hintu. Sio-siomo dua daseꞌise bhe Intaodi, neanomo dhunia damarasaea Hintumo tumudu kanau.

Roma 8:37

Mahinggamo peda anaꞌa, weo sabhaha kasabha maitu intaodiomu deꞌawaomu kafotalo mangaliuno, noangka ne Anoa moasi kaita.

1 Yohanes 5:20

Dopandeꞌaanemo dua Anano Lahataꞌala padamo nomai we dhunia ini, nowaꞌa kaitaomu kapooli damandeꞌao Anoa banarano. Intaodiomu dodadi doseꞌise bhe Lahataꞌala, doseꞌise dua bhe Yesus Kristus, Anano. Anoamo itu Lahataꞌala sakotuꞌuno, Anoamo dua meowano dadi suhue dhamani.

Efesus 5:2

Dadimiu tabeano nakumabhintie kanini kaasi, peda wutono Kristus nofomoasiꞌao. Nofotawakalamo Wutono so intaodiomu sampe dopongkoe. Anoa nembali kapopanga mowondu nefoampe ne Lahataꞌala, mekaꞌianomo lalono Lahataꞌala.

Filipi 4:13

Bhe katulumino Kristus maꞌa kanau kaꞌosa, amondoiꞌe awiseki sabhaha waweno dadi.

Efesus 3:17

Sio-siomo hampano kaparasaeamiu, Kristus naeate kansuhu weo totono lalomiu, maka dadimiu naengkoha bhe nakopahaka weo kanini kaasi.

Galatia 3:11

Dadiꞌanomo nentaleamo sepaliꞌa miina bhe netahimano Lahataꞌala peda mie banara mbaꞌinomo dodhalangi tubhono agama Yahudi. Ingka notibuhi dua weo Kitabi peda aini, “Mie netahimano Lahataꞌala peda mie banara hampano kaparasaeano, anoamo itu so meꞌawano dadi.”

Yohanes 3:16

Hampano kabhalano kanini kaasino Lahataꞌala ne dhunia ini, sampe nofowaꞌaomo Anano Kaenseemie, neanomo sasuka marasaeano ne Anoa pae nabinasaa, tamaka naeꞌawa dadi suhue dhamani.

1 Yohanes 1:7

Tamaka ane dodadiomu ne mentaleaꞌano peda Anoa dumadino weo tilanga, ingka doseꞌisemoomu bhe mie bhaintoomu, maka heano Yesus, Anano Lahataꞌala, nofekanggela kaitaomu maiꞌao ne sabhaha dhosa.

Kolose 1:27

Ne umatinomo ini, gaono Lahataꞌala namotiwohae kabhalano kabarakatino bhe kakalabhiano rahasia aitu so sabhaha bansano liwu te dhunia ini. Rahasia anaꞌa peda aini: Kristus neate weo totono lalondo umatino, Anoamo puuno kaposahunaꞌaomiu so menamisiꞌaoꞌomu dua kakalabhiano Lahataꞌala.

Roma 5:2

Noangka ne kaparasaeantoomu ne Yesus Kristus ini, intaodiomu deꞌawamoomu dua kaangkaꞌa dopesua weo kalibuno rahamatino Lahataꞌala, kaeateꞌantomo ampa aitu. Nowula lalontoomu weo posahunaꞌao daeala dawu weo kakalabhiano Lahataꞌala.

Roma 1:17

Kapaꞌamo weo Bhihita Metaa naꞌa notiwohamo kaangkaꞌando manusia so datitahimaꞌao peda mie banara ne Lahataꞌala. Kaangkaꞌa anaꞌa notanda ne kaparasaea, nopuli ne kaparasaea. Kapaꞌamo nandoo tibuhino weo Kitabi peda ini, “Mie netahimano Lahataꞌala peda mie banara hampano kaparasaeano, anoamo itu so meꞌawano dadi.”

2 Korintus 13:3

Kapaꞌamo hintimiu meꞌondofiomu bukutii putae Kristus nokowamba noangka ne idi. Kristus miina nalumubhakikoomu tamaka nofotiwohae kuasano ne olotamiu itu.

Powoha 1:5

bhe nomaiꞌao dua ne Yesus Kristus, sakusii tiparasaeano, kabhao-bhaono manuno maiꞌao ne mate bhe kokuasano ne sabhaha omputo ne dhunia ini. Yesusmo ini moasi kaitaomu bhe noangka ne tuhuno heano padamo nofolapa kaita maiꞌao ne dhosa.

1 Tesalonika 1:10

Ambado dua meantagiomu kahatoꞌano Anano Lahataꞌala namaiꞌao te surugaa. Nepulaoꞌaondo naꞌa Yesus, nefowanuno Lahataꞌala nomaiꞌao ne mate, fofosalamatinomo maiꞌao ne amahano Lahataꞌala mada kaowu.

Yohanes 10:11

Idimo ini dhagano dhumba metaano lalo. Dhaga metaano lalo nopotahoꞌao inawano so dhumbano.

Yohanes 6:57

Amaku, kamaiꞌaoꞌano dadi, Anoa tumudu kanau, kadadiꞌakumo. Pedamo dua anaꞌa sasuka momaano mbadhaku naeꞌawa dadi maiꞌao ne Idi.

Powoha 3:20

Ondo itu, aeehe-ehe ne wiseno fointo bhe afeabha. Ane bhe so metingkeno suahaku maka nalumengka kanau, Idi amesua apoꞌawaane maka aomaa apombali bhe anoa, anoa naomaa napombali bhe Idi.

1 Petrus 1:8

Mahinggamo wutono Kristus miina mohaeꞌomu, ingka moasianeomu. Ampa aitu mahingga sadaa-daa miina mohaeꞌomu, ingka sadaa-daa dua parasaeaꞌeomu. Kanandooꞌanomo moꞌiaꞌomu mpuu, kaꞌosano kawulano lalomiu naꞌa miina natikiha-kihaa.

Matius 20:28

Kapaꞌamo wutono Anano Manusia - Idimo ini - nomai pae naefeꞌondofaoa tamaka nafoꞌondofao bhe nafowaꞌao inawano so katolosindo mie bhahi.”

Yohanes 15:13

Miina nandumandoo kanini kaasi moliuno kanini kaasino seemie potahoꞌaono inawano so sabhangkaꞌino.

Galatia 2:16

Mahinggamo peda anaꞌa, tapandeꞌaanemo o manusia notahimae Lahataꞌala peda mie banara mpahinomo hampano noparasaea ne Yesus Kristus, suano mbaꞌinomo nodhalangi tubhono agama Yahudi. Dadiꞌanomo insaodi dua taparasaeamo ne Yesus Kristus, neanomo weo kaparasaea mani maitu naembali natumahima kainsami Lahataꞌala peda mie banara, suano mbaꞌinomo taangkafi tubhono agama. Kapaꞌamo bhe naseemie miina bhe netahimano Lahataꞌala peda mie banara mbaꞌinomo nodhalangi tubhono agama Yahudi.

2 Korintus 10:3

Insaodi daanumo nandoo tadadi ne dhunia ini, tamaka tapoewangi miina taepake ewangano dhunia.

Yohanes 6:69

Insaodi taparasaeamo bhe tapandeꞌaanemo Hintumo mie mongkilo Katuduno Lahataꞌala.”

Yohanes 1:49

Ambano Natanael, “Guru, Hintu Anano Lahataꞌala, Hintumo Omputono Israel.”

2 Korintus 1:24

Koe fekihiomu insaodi tamosuhuangkoomu so neparasaeamiu, hampano notangkamo koehemiu weo kaparasaeamiu, tamaka gao mani dakumahadhaa dapoowa-owa so kaowulaꞌano lalomiu.

Tula-tulando rasulu 9:20

Lasao dua nopesua weo lambu-lambu kasambaheaꞌa nefebhihitaiꞌao putae Yesus Anano Lahataꞌala.

Efesus 5:25

Hintimiu moꞌane, moasianeomu hobhinemiu pedamo Kristus noasiꞌao umatino, nofotawakalaanda Wutono sampe nomateanda.

2 Korintus 5:7

Hampano dadi mani nengkoha ne kaparasaea, suano mbaꞌinomo tawohaꞌao wuntano mata mani.

Yohanes 3:35

Amano noasiꞌao Anano sampe kosasawiꞌae kuasa nofopuliemo ne Anano.

1 Yohanes 4:14

Insaodi padamo tawoha Anano Lahataꞌala, maka tasakusiiane putae Anoa notudue Amano so Mosalamatino dhunia.

Tula-tulando rasulu 8:36

Andoa dokala kansuhu, gahaꞌa dehatomo koꞌoeꞌano. Ambano kabhala maitu, “Ingka inia o oe, nandoo bhahaa nekaemiku ane dakumadiu kanaumoa?”

Matius 4:3

Gahaꞌa nomaimo Fosobano maitu bhe nopugau ambano, “Ane hintu ini Anano Lahataꞌala, soba tududa kontu ini daembali roti.”

Roma 3:22

Kafotahimaꞌano Lahataꞌala peda mie banara naꞌa noangka weo kaparasaea ne Yesus Kristus. Kaangkaꞌa aini notilengka so kosasawindo manusia, hampano manusia miina dapoꞌala-alaa.

Roma 4:25

Anoamo mada neowa ne limando fopongkono dhohono dhosantoomu, tamaka padamo dua nofowanue Lahataꞌala maiꞌao ne mate so naembaliꞌao dasumuli dapometaa bhe Lahataꞌala.

Roma 5:6

Wakutuuno miina dakonipooliomua, ne tempo toka nefotantuno Lahataꞌala, Kristus nomate so intaodiomu mie modai.

Roma 5:8

Tamaka Lahataꞌala nofotiwohamo kanini kaasino ne intaodiomu peda aini: Kristus nomate so intaodiomu wakutuuno nandoo dokodhosaomu.

Roma 8:10

Ane Kristus neate weo totono lalomiu, mahinggamo mbadhamiu namate dhohono dhosa, tamaka o rohi sadaa-daa nadumadi hampano Lahataꞌala notahimakoomu peda mie banara.

Roma 14:7

Intaodiomu ini, bhe naseemie miina bhe dumadino so wutono, bhe naseemie miina dua bhe mateno so wutono.

1 Korintus 6:17

Tamaka o mie kumapotino Ompu ingka noserohimo bhe Ompu.

2 Korintus 5:14

Kanini kaasino Kristus nowadhumpa kainsami, hampano tapandeꞌaanemo lalo mani ane seemie nomateꞌao mie bhahino, nokomaꞌana kosasawindo domatemo.

2 Korintus 11:10

Bhe kabanarano Kristus weo totono laloku, amohatokoomu: pugauku afowose bhakeku ini pae bhe so umonto-ontomiea ne kadieno Akaya itu.

Filipi 1:21

Dadiku ini so Kristus; mateku aabhiemo dua labaku.

Ibrani 8:3

Seemie-seemie Imamu Bhalano dosangkee so naefoampeꞌao kawaꞌao bhe kapopanga nesumbele ne Lahataꞌala. Pedamo dua aitu Imamuntoomu nofaraluu dua bhe nefoampeno.