Galatia 2:14 - Muna Southern Dialect

¹⁴ Awoha kaowu podiundo maitu miina napoangkafi bhe kabanarano Bhihita Metaa, apugaumo ne Petrus ne wisendo kosasawindo naꞌa ambaku, “Hintu itu mieno Yahudi, gahaꞌa dadi peda seemie suano Yahudi ⸤ ingka miinamo mangkafi tubhono agama Yahudi⸥ . Nada amai dua mosuhu bhahitieꞌi suano Yahudi damangkafi atorano agama Yahudi?”

Galatia 2:14 Referans Kwoze

Galatia 2:5

Tamaka bhe naseendai miina tasumowoandaa, neanomo Bhihita Metaa netahimamiu itu sadaa-daaꞌe nobanara, pae nakosalo-saloa.

Tula-tulando rasulu 10:28

Ambano Petrus ne andoa, “Ingka pandeꞌaaneomu o falia bhalano weo agama mani ane miendo Yahudi dopoanaꞌibhai bhe mie suano miendo Yahudi tawamoa dopesua weo lambudo. Tamaka Lahataꞌala padamo nofotiwoha kanaꞌe, pae naembalia akumona mie bhaiku dohaku tawa miina daongkiloa.

1 Timotius 5:20

Mie mehabuno dhosa tabeano mefeꞌulaiane ne wisendo umati bhahino, neanomo sigaoꞌano daoteꞌimo.

Galatia 6:12

O mie mosuhukoomu mesunaomu, ingka gaondo defewoha kaowu putae doangkafi tutuhano mbadha. Tamaka kahabuꞌando peda aitu keana kaowu dofodee-deeda ⸤ miendo Yahudi⸥ hampano kaparasaeando ne mateno Kristus te sau salipu.

Ibrani 12:13

Fekalaaꞌe kaangkaꞌano aꞌemu, neanomo aꞌemu mokempano itu paise natokulepea.

Ibrani 9:10

Kapaꞌamo sabhaha kapopanga maitu nopokai kaowu bhe oti nehumaa bhe nefohoꞌu bhe sabhaha atorano kangkilono mbadha. Bhahi-bhahiꞌae maitu sanea kaowu atorano mbadha, nofaraluu kaowu ampa tempono Lahataꞌala namahabuꞌouni podhandiꞌa naꞌa.

Galatia 2:9

Dowoha kaowu rahamati netahimaku so aembaliꞌao rasulu, maka Yakobus, Petrus bhe Yohanes dopointaha lima kanaumo bhe Barnabas dua, peda tandano pobhahitie. Andoa ini ingka kapasandeꞌandomo mie marasaeano. Tapoꞌunda-undapianemo insaodi taefolele Bhihita Metaa ne mie suano Yahudi, andoa daefolele Bhihita Metaa ne miendo Yahudi.

Galatia 2:7

Bhahamoa neangkaꞌindo umati maitu dopandeꞌaomo lalondo ingka idi ini noposahunaꞌa kanaumo Lahataꞌala aefolele Bhihita Metaa ne mie suano Yahudi, pedamo dua posahunaꞌaono Lahataꞌala ne Petrus naefolele Bhihita Metaa ne miendo Yahudi.

Roma 14:14

Weo kaseꞌiseku bhe Ompu Yesus, apandeꞌaane bhe aparasaea mpuu miina bhe oti moharamuꞌano nomaiꞌao ne oti aitu. Ampamo kaowu ane nandoo mie mefoharamuno oti, ingka oti anaꞌa daanumo noharamu so anoa.

Tula-tulando rasulu 15:24

Tafetingke nandoo seemie hodua maiꞌaono we insaodi ini dofohaliakoomu bhe dofekasabhaangkoomu kafoguhundo, tamaka suano katudu mani.

Galatia 2:3

Tamaka mahinggamo Titus poowaꞌaku maitu miendo Yunani, anoa miina damosuhuea naesuna.

Tula-tulando rasulu 15:1

Nandoo seemie hodua maiꞌaono we Yudea dokala we Antiokia dofoguhu bhahitieꞌi ne itu. Ambado, “Ane pae dasumunakoomu peda adhati kahunsaꞌaono Musa, pae naembalia damosalamatikoomua.”

Tula-tulando rasulu 15:5

Tamaka domai dua seemie hodua kamungkula miendo Farisi marasaeano ne Yesus. Ambado, “O mie suano Yahudi toka marasaeano ne Yesus tetewei dasumunada, damosuhuda damangkafi dua tubhono agama Yahudi.”

Galatia 1:6

Ingka amenteangkoomu dua. Hintimiu padamo nobhasikoomu Lahataꞌala hampano rahamatino Kristus, tamaka kahimbano dua kukundoeꞌomu, maka meangkafiomu bhihita metaa sigaoꞌano tapa maiꞌaono ne Lahataꞌala.

Galatia 1:18

Nopalusi tolu taꞌu, makaneꞌomo akala we Yerusalem so apoꞌawaꞌao Petrus, maka abutu we lambuno ompuluꞌa lima oleo.

Kolose 1:5

Katangkaꞌanomo kaparasaeamiu naꞌa bhe kanini kaasimiu ne mie bhaimiu, hampano kaposahunaꞌao umawaomu nefontaa-ntaano Lahataꞌala te surugaa. Kaposahunaꞌao ini ingka tokamo fetingkeeꞌomu wakutuuno dofohatoangkoomu bhoasao banarano, maꞌanano o Bhihita Metaa.