Efesus 5:25 - Muna Southern Dialect

²⁵ Hintimiu moꞌane, moasianeomu hobhinemiu pedamo Kristus noasiꞌao umatino, nofotawakalaanda Wutono sampe nomateanda.

Efesus 5:25 Referans Kwoze

1 Petrus 3:7

Hintimiu dua moꞌaneꞌi, fosibhalaeꞌomu namisino hobhinemiu weo dadino polambu. Tandaiꞌeomu andoa maitu miina napototo kaꞌosando bhe hintimiu. Fosibhaladaomu, kapaꞌamo andoa dapoowa-owa bhe hintimiu saneamo so umawano kadawuno Lahataꞌala, maꞌanano dadi suhue dhamani. Dhalangieꞌomu bhahi-bhahiꞌae ini, keana notitee sambaheamiu.

Kolose 3:19

Hintimiu membalino moꞌane, moasianeomu hobhinemiu, koise noꞌosa lalomiu.

Efesus 5:28

Pedamo dua aitu o moꞌane tabeano naoasiꞌao hobhineno nameda kaasino ne mbadhano wutono. Mie moasiꞌaono hobhineno ingka noasiꞌaomo dua wutono.

Efesus 5:33

Mahinggamo nada amai, hintimiu moꞌane seemie-seemie tetewei moasiane hobhinemu nameda kaasimu ne wutomu; hintimiu hobhine fosibhalaeꞌomu moꞌanemiu.

Efesus 5:2

Dadimiu tabeano nakumabhintie kanini kaasi, peda wutono Kristus nofomoasiꞌao. Nofotawakalamo Wutono so intaodiomu sampe dopongkoe. Anoa nembali kapopanga mowondu nefoampe ne Lahataꞌala, mekaꞌianomo lalono Lahataꞌala.

Galatia 1:4

Yesus Kristus nofotawakala wutono sampe dopongkoe mbali katolosino dhosantoomu, so namolapaꞌao intaodiomu maiꞌao ne dhamani modai ini. Habuno Kristus ini noangkafi kapoindalono Lahataꞌala Amantoomu.

Powoha 1:5

bhe nomaiꞌao dua ne Yesus Kristus, sakusii tiparasaeano, kabhao-bhaono manuno maiꞌao ne mate bhe kokuasano ne sabhaha omputo ne dhunia ini. Yesusmo ini moasi kaitaomu bhe noangka ne tuhuno heano padamo nofolapa kaita maiꞌao ne dhosa.

Galatia 2:20

Tamaka ampa aitu adadimo. Ampamo kaowu suanomo dadiku wutokua, tamaka Kristus dumadino we laloku ini. Dadi nedambaꞌaoku ini, ingka o dadi weo kaparasaea ne Anano Lahataꞌala. Anoa noasi kanaumo sampe nofotawakala wutono dopongkoe so idi.

Powoha 5:9

Andoa delaguꞌao lagu buꞌou ambado, “Hintu nopantasi tahima kaluluno kitabi aitu bhe lumengka kafulutino, hampano Hintu padamo dosumbeleko, heamu padamo metolosiane manusia maiꞌao ne sabhaha sampuꞌa, sabhaha wamba, sabhaha siwulu bhe sabhaha bansano liwu so Lahataꞌala.

Matius 20:28

Kapaꞌamo wutono Anano Manusia - Idimo ini - nomai pae naefeꞌondofaoa tamaka nafoꞌondofao bhe nafowaꞌao inawano so katolosindo mie bhahi.”

Tula-tulando rasulu 20:28

Dadiꞌanomo dhagani wutomiu, dhaganieꞌomu umati marasaeano, peda dhagano dhumba noꞌondofao kadadi kakaneano. Kapaꞌamo hintimiumo nesangkeno Rohino Lahataꞌala membaliomu neangka so dhumaganino umatino Lahataꞌala. Umati andoa ini fehebuaꞌano Lahataꞌala, notolosianda heano Anano.

Yohanes 6:51

Idimo ini roti dumadino sumampuꞌano maiꞌaono te surugaa. Ane mie naomaa roti aini nadumadi ampa suhue dhamani. Roti so newaꞌaoku maitu dhagiku Wutoku, somo kadadiꞌando dhunia.”

1 Timotius 2:6

Anoa ini noowa Wutono mbali katolosino dhosando kosasawindo manusia. Pedamo anaꞌa Lahataꞌala nofotiwohamo kakampuu-mpuuno nofosalamati manusia ne tempo toka nefotantuno.

Efesus 5:24

Pedamo umati marasaeano dotuhu ne Kristus, pedamo dua aitu o hobhine sadhia natumuhu ne moꞌaneno.