2 Tesalonika 2:13 - Muna Southern Dialect

¹³ Bhahitieꞌi nemoasiꞌaono Ompu! Insaodi tabeano sadhia taefoampe katumpuno lalo ne Lahataꞌala hampano hintimiu, kapaꞌamo mpini kabhao-bhaono Lahataꞌala nopilikoomu namosalamatikoomu. Kasalamatimiu naꞌa noangka ne Rohino Lahataꞌala fofekangkilono bhe kaparasaeamiu ne kabanara.

2 Tesalonika 2:13 Referans Kwoze

2 Timotius 1:9

Anoamo mosalamati kaita, Anoamo dua bhasi kaita so dadumadi mongkiloꞌao. Katifosalamatiꞌantoomu suano mbaꞌinomo habu metaantoomu, tamaka nengkoha ne patudhu bhe rahamatino Wutono. Rahamati aini nowaꞌa kaitae noangka ne Kristus Yesus, mpini miinaꞌo natifokonandoo dhunia.

1 Tesalonika 5:9

Kapaꞌamo Lahataꞌala miina nafopili so nofokantibhaꞌao amaha, tamaka so daeꞌawaꞌao kasalamatiꞌa mangkaꞌano ne Yesus Kristus Ompuntoomu.

1 Tesalonika 1:4

Bhahitieꞌi nemoasiꞌaono Lahataꞌala, ingka tapandeꞌaanemo Lahataꞌala nopilikoomu.

2 Tesalonika 1:3

Bhahitieꞌiku, insaodi tabeano sadhia taefoampe katumpuno lalo ne Lahataꞌala mbaꞌinomo hintimiu. Daanumo nopantasimo peda anaꞌa, kapaꞌamo kaparasaeamiu saꞌende-ende, pomoni-moniniꞌa sapada-pada hintimiu seemieno bhe seemieno dhulu kamatangka.

Roma 9:11

Miinaꞌo dalumentea anaꞌi hoduano maitu, miinaꞌo dua daehabu metaaꞌano bhe modaiꞌano, Lahataꞌala padamo nokobhoasao ne Ribka, “Titiisa nameompu ne aino.” Katibhoasaoꞌano peda anaꞌa, so nentaleaꞌao putae kapilino Lahataꞌala miina naengkoha ne habundo manusia, tamaka nengkoha ne kapoindalono wutono Lahataꞌala fobhasino.

Tula-tulando rasulu 13:48

Dofetingke anaꞌa kosasawindo mie suano Yahudi doꞌia bhe dopudhi bhoasaono Lahataꞌala; o mie nepilino Lahataꞌala so dumadino suhue dhamani doparasaeamo.

1 Yohanes 4:10

Suano intaodiomu maꞌinduluno moasiꞌaono Lahataꞌala, tamaka Anoa fomoasiꞌaono sampe notudu Anano nembali kapopanga pometaaꞌaono manusia bhe Lahataꞌala, mosalinomo dhosantoomu. Ainiꞌaemo kanini kaasi sakotuꞌuno.

2 Tesalonika 2:12

Hato pandano, kosasawindo mie tapa marasaeano ne kabanara maitu bhe moindalono habu modai, daeꞌawa kahukumu.

Efesus 2:8

Katifosalamatiꞌamiu hampano rahamatino Lahataꞌala, noangka ne kaparasaeamiu ne Kristus. O kasalamati maitu suano hasilino kahadhaano wutomiu, tamaka kotu-kotuꞌu katohaino Lahataꞌala.

1 Yohanes 4:19

Intaodiomu ini dofomoasiꞌao, hampano Lahataꞌala paꞌindulumo nofomoasiꞌao.

Yakobus 1:18

Noangkafi kapoindalono Wutono, Lahataꞌala nofowaꞌao dadi buꞌou dembaliomu anaꞌino, hampano ⸤ dofetingke bhe doparasaeaꞌomu⸥ bhoasaono kabanara. Patudhuno neanomo daembaliomu titiisa ne olotando sabhaha nefokonandoono Lahataꞌala.

2 Tesalonika 2:16

Sio-siomo wutono Ompuntoomu Yesus Kristus bhe Lahataꞌala Amantoomu nalumawesi bhe namekatangka lalomiu, neanomo so nehabumiu bhe so nepugauꞌaomiu sanea metaaꞌano. Kapaꞌamo Lahataꞌala nofomoasiꞌao; weo kataano lalo nofowaꞌao kaposahunaꞌao metaa bhe kalawesino lalo suhue dhamani.

Kolose 1:5

Katangkaꞌanomo kaparasaeamiu naꞌa bhe kanini kaasimiu ne mie bhaimiu, hampano kaposahunaꞌao umawaomu nefontaa-ntaano Lahataꞌala te surugaa. Kaposahunaꞌao ini ingka tokamo fetingkeeꞌomu wakutuuno dofohatoangkoomu bhoasao banarano, maꞌanano o Bhihita Metaa.

Galatia 3:1

Hintimiu miendo Galatia, kabhohemiu gahaꞌa! Nofobhohe-bhoheꞌikoomu laꞌae bhahaa ⸤ sampe hunsaomu kafoinaꞌu banara⸥ ? Ingka padamo afekantale-ntaleaꞌangkoeꞌomu mateno Yesus Kristus te sau salipu.

Tula-tulando rasulu 15:9

Lahataꞌala miina napoꞌala-alaandaa bhe intaodiomu; totono lalondo padamo nofekangkiloe hampano doparasaea.

Ibrani 1:10

Ambano toha, “Hintu Ompu, kabhao-bhaono mefongkohano sandino dhunia, o lani angkaꞌano limamu.

2 Timotius 3:15

Feꞌulaiꞌe dua, notanda kaanaꞌimu pandeꞌaanemo Kitabi. Nomaiꞌaomo ne Kitabi aini naembali damandeꞌao kaangkaꞌano kasalamati, mangkano weo kaparasaea ne Kristus Yesus.

2 Timotius 2:15

Uleiꞌe lalomu kahadhaa so noꞌiaꞌao Lahataꞌala, membalimo mie tapa moambanoꞌaono nekahadhaano, maꞌanano fofoinaꞌuꞌao bhoasao banara melaa-melaa.

2 Tesalonika 2:10

Anoa naepake sabhaha akala modai so naefekakolilinoꞌao totono lalondo manusia so binasano. So kabinasaꞌando mbaꞌinomo miina datumahima bhe miina daoasiꞌao kabanara so mosalamatida.

Roma 8:33

Nandoo bhahaa so mobhieꞌaono mie nepilino Lahataꞌala? Ingka miina, kapaꞌamo wutono Lahataꞌala padamo nofotahima peda mie banara.

Roma 6:17

Tamaka aitu foampe kaitaomu katumpuno lalo ne Lahataꞌala! Kapaꞌamo endefiꞌini hintimiu daanumo membaliomu bhatuano dhosa, tamaka ampa aitu sampuu-mpuu lalomiu angkafimoomu kafoinaꞌu metaa netahimamiu.

Yohanes 14:6

Ambano Yesus, “Idimo ini o kaangkaꞌa, meowano kabanara bhe fowaꞌaono dadi. Bhe naseemie paise bhe so humatono ne Amaku ane paise namangka ne Idi.

Yohanes 1:1

Pakatandano ⸤ miinaꞌo nandumandoo dhunia,⸥ nekonando Bhoasao nonandoomo. Bhoasao amaitu nopobhai bhe Lahataꞌala. Bhoasao amaitu nopototo bhe Lahataꞌala.

Lukas 1:75

sadhia daongkilo bhe dadumadi metaa ne wiseno suhue dadinto.

Kolose 3:12

Hintimiu umatino Lahataꞌala timoasiꞌaono, padamo nopilikoomu mbali fehebuaꞌano mongkilono. Dadiꞌanomo fotiwohaeꞌomu kabhelano lalo bhe kataano lalomiu ne mie bhaimu, fekapandae diumu, fekamalu lalomu bhe kosabaha.

1 Korintus 1:21

Hampano kapandeno Lahataꞌala, nofotantuemo putae manusia miina naembalia namandeꞌao Lahataꞌala nomaiꞌao ne kapandeno wutono. Tamaka Lahataꞌala nokopatudhu namosalamati mie marasaeano noangka ne bhihita nefolele mani, gahaꞌaitumo bhihitamo aini nekonando dhunia sanea bhohe.

1 Tesalonika 2:12

Maꞌanano tatangahikoomu, tafekatangka lalomiu, pakade taesalo mpuu dumadiomu naposahataa bhe kapoindalono Lahataꞌala. Kapaꞌamo Lahataꞌala nosaliꞌikoomu mesuaꞌomu weo Kafopahintaꞌano kumalabhiano.

1 Tesalonika 4:7

Kapaꞌamo Lahataꞌala miina nafosaliꞌi dadumadi pokawite-wite, tamaka dadumadi mongkilo.