2 Petrus 3:11 - Muna Southern Dialect

¹¹ Ane kosasawiꞌae damobinasae nada naꞌa, nada amai bhahaa beano so dadimiu? Ingka tabeano naongkilo bhe nalumebe mpuu podiumiu.

2 Petrus 3:11 Referans Kwoze

1 Petrus 1:15

Tamaka tabeano naongkilo totono lalomiu weo sabhaha nehabumiu, tapedamo kangkilono wutono Lahataꞌala toka bhasikoomu.

Filipi 1:27

Ampamo kaowu, kodadimiu tabeano naposahataa bhe wambano Bhihita Metaano Kristus. Ane nada anaꞌa, naetaa amai amohakoomu toha, naetaa pae amai ametingke kaowu bhihitamiu, tetewei amandeꞌaane putae notangkamo kofindamiu, sepatudhuomu, sekakolaloomu poewangiomu so kaparasaea ne Bhihita Metaa.

1 Petrus 2:12

Ehe mengkohamiu ne olotando mie tapa marasaeano ne Lahataꞌala tabeano naetaa sepaliꞌa, neanomo ane dakumonakoomu mie modai, ingka damohaꞌao wutondo sabhaha habu metaamiu. Dadiꞌanomo ne oleo kahatoꞌano Lahataꞌala andoa damekakalabhiaꞌe dua.

2 Petrus 3:12

Weo dadi medando naꞌa ntumaa-ntaaꞌomu oleono kahatoꞌano Ompu bhe uleiꞌe lalomiu so napikihatoꞌao. Ne oleo anaꞌa o lani naowolo natikantunu, sabhaha ndumandooꞌano te lani nameꞌoe hampano hendeno efi.

1 Timotius 6:11

Tamaka hintu manusia fehebuaꞌano Lahataꞌala, fekakodoꞌo wutomu ne kosasawiꞌae naꞌa. Ambae dadi banara, dadi lumebe, kampuu-mpuu weo kaparasaeamu, moasianda mie bhaimu, kosabaha potaami weo kasabha, fekamalu lalomu.

Yakobus 3:13

Ane ne olotamiu itu nandoo kofekihi metaano bhe kokapandeno, tabeano namotiwohae ne podiu metaa weo dadino, bhe naomalu lalono, noposahataa bhe fekihi kotimbangino.

Filipi 3:20

Tamaka intaodiomu ini, o liwuntoomu ingka te surugaa. Surugaamo dua anaꞌa so kamaiꞌaoꞌano Omputo Fosalamatino Yesus Kristus nentaa-ntaantoomu.

2 Petrus 1:3

Lahataꞌala nopakemo kuasa Kaseemie-mieꞌano, nowaꞌa kaita sabhaha maraluuꞌano so dadumadi lumebeꞌao. Kafowaꞌaoꞌano hampano dopandeꞌaanemoomu Kristus, Anoamo fobhasino so daealaꞌao dawu weo kakalabhiano bhe kataano lalono.

1 Timotius 6:3

Ane nandoo fofoguhuꞌaono kafoinaꞌu poꞌalatiꞌano bhe kafoinaꞌu aini, maꞌanano miina namangkafiea kafoinaꞌu kumotuꞌuno maiꞌao ne Ompuntoomu Yesus Kristus bhe kafoinaꞌuno agamantoomu,

1 Timotius 4:12

Koise bhe misakiko mbaꞌinomo nandoo nohangku dadimu. Tamaka membalimo sandaha so neangkafindo mie marasaeano, weo pugaumu, weo podiumu, weo kanini kaasi ne mie bhaimu, weo kaparasaeamu ne Kristus Yesus bhe weo kangkilono dadimu.

Matius 8:27

Anaguhuꞌino maitu domente sepaliꞌa, ambado, “O mie ae bhahaa Anoa ini, sampe kawea bhe oe doangkafi dua pahintano?”

Yakobus 1:24

Gahaꞌa pada nofotinda-tindae, sanogampi nolimpuꞌaanemo dua katuno ulano naꞌa.

1 Timotius 3:16

Kotu-kotuꞌu nobhala mpuu rahasiano agamantoomu ini, Anoa nofotiwoha Wutono nembali manusia, nosakusiiane Rohino Lahataꞌala Anoa ini mie banara, dowohae malaꞌekati, bhihitano dofolelee ne sabhaha bansano liwu tapa mandeꞌaono Lahataꞌala, doparasaeaꞌe ne kosekaꞌewaꞌae dhunia ini, notisangke weo kakalabhia te surugaa.

1 Tesalonika 1:5

Kapaꞌamo Bhihita Metaa nehatoꞌao mani ne hintimiu suano kaowu taꞌo pugau, tamaka bhe kuasano Rohino Lahataꞌala, notiparasaea mpuu kantoono. Ingka pandeꞌaaneomu peda amai tadadi bhe hintimiu so kaetaaꞌamiu.

1 Timotius 6:6

Daanumo agama neowa kahangkaea bhalano ane notumpumo lalondo ne kanandoo netahimando.

2 Petrus 1:6

O kapande napotubhahi bhe kafewanakino totono lalo; kafewanakino totono lalo napotubhahi bhe kakosabaha dopotaami weo kasabha; kakosabaha dopotaami weo kasabha napotubhahi bhe dadi lumebe.

Ibrani 13:5

Koise membaliomu bhatuano dhoi, netaamo notumpu lalomiu ne kanandoomiu. Kapaꞌamo Lahataꞌala padamo nokobhoasao, “Paise sepaliꞌa akumatahokoa, paise sepaliꞌa ahumunsakoa.”

2 Korintus 1:12

Nowose bhake mani hampano totono lalo mani kumatanga-tangano nofohato kainsami putae nokotuꞌu dadi mani ne dhunia ini, ingka tadhalangie weo kangkilo bhe kahelasino lalo maiꞌaono ne Lahataꞌala, mangke-mangke dadi mani pokaiꞌano bhe hintimiu. Katidhalangiꞌano miina tamangkafi kapandedo manusia, tamaka tapasande ne rahamatino Lahataꞌala.

Roma 13:11

Aini tetewei dhumalangieꞌomu, hampano ingka pandeꞌaanemoomu koeateno dhamani aini. Ingka nohatomo tempono manuomu ne kaodomiu, kapaꞌamo ampa aitu oleo so katifosalamatiꞌantoomu sedhuluꞌamo dua kakomaꞌo bhe pakaparasaeantoomu.

Roma 13:12

Nobhalamo nekundono alo, nomaꞌomo kamentae. Dadiꞌanomo hunsa kaitaeꞌomu podiuno kahohondo, fokana kaitaomu katokano habu metaa so nehabu ne mentaleaꞌano.

2 Petrus 3:10

Oleo kahatoꞌano Ompu tetewei nahumato, nahumato nada kasoꞌo. Ne oleo anaꞌa o lani namiinae napoangka huhu timoteꞌi bhe sabhaha ndumandooꞌano te lani nahumampuniane efi. O dhunia bhe kosasawiꞌae ndumandoono te wawono naosali.