2 Korintus 8:3 - Muna Southern Dialect

³ Asakusiianda wutoku, andoa dofowaꞌao ampa kamondoindo bhahaa tanokolabhimo dua.

2 Korintus 8:3 Referans Kwoze

Filemon 1:14

Ampamo kaowu akiido akonihabu ane paeꞌo dapoꞌuumbeti bhe hintu. Patudhuku, habu metaamu naꞌa koemo mbaꞌinomo dofosuhuko, tamaka namaiꞌao weo kahelasino totono lalomu.

1 Korintus 16:2

Seꞌo-seꞌoleono Ahadhi, seemie-seemie naegaati dhoi seendai, naposahataa bhe hasilino. Dhoi anaꞌa hunsaeꞌomu, neanomo humato amai tokamo natifoꞌonu.

Tula-tulando rasulu 11:29

Dadiꞌanomo mie mangkafino Yesus dobhotusiemo daetawunao dhoi ampa so nepoo-poolindo seemie-seemiea maka damakatuandae bhahitie marasaeano we Yudea.

1 Korintus 9:17

Ibahano kahadhaa aini ahumabue amangkafi kapoindalono wutoku, tantumo naembali aesalo ponamboku. Tamaka kaefoleleꞌaku Bhihita Metaa suano kapoindaloku wutoku, ingka adhalangi kaowu taka neposahunaꞌaono Lahataꞌala ne idi.

1 Petrus 5:2

Aesalo mpuu ne hintimiu kamungkulaꞌi, ondofaandaomu umatino Lahataꞌala nefoparasaeano ne hintimiu itu. Kapaꞌamo andoa maitu kanggetumo kawaino dhumba, hintimiu o dhagano. Koise nokobuku lalomiu tamaka nahumelasi lalomiu dhumaganidaomu, noposahataa bhe kapoindalono Lahataꞌala. Koise dua ondofaandaomu so kolabaꞌaoꞌomu, tamaka kotu-kotuꞌu patudhumiu meompuniꞌidaomu.

1 Petrus 4:11

Ane seemie neowa kafoinaꞌu, naetaa napugau kanggetumo wambano wutono Lahataꞌala. Ane seemie nofoꞌondofao, naetaa namake kaꞌosa newaꞌaono Lahataꞌala, neanomo ne sabhaha nehabumiu Lahataꞌala damekakalabhiaꞌe namangka ne Yesus Kristus. Ingka Anoamo kokalabhiano bhe kokuasano ampa suhue dhamani. Amin.

1 Tesalonika 2:8

Kabhalano kanini kaasi mani ne hintimiu, sampe tahelasimo suano kaowu tafohatoangkoomu Bhihita Metaa, tamaka tahelasimo dua tawaꞌangkoomu dadi mani. Kapaꞌamo taoasiangkoomu sepaliꞌa.

Kolose 4:13

Awohaꞌao wuntano mataku, anoa ini noꞌuleiꞌe lalono nokahadhaa so hintimiu bhe so miendo Laodikia bhe miendo Hierapolis.

Filipi 2:13

Kapaꞌamo wutono Lahataꞌala kumahadhaano weo totono lalomiu, sampe undaomu bhe poolieꞌomu dhalangiomu patudhu metaano Lahataꞌala.

Roma 10:2

Kapaꞌamo naembali amohatokoomu putae dokamai-mai lalondo dofeompu ne Lahataꞌala, ampamo kaowu miina damandeꞌaane peda amai dofeompu sakotuꞌuno ne Lahataꞌala.

Galatia 4:15

Wakutuu anaꞌa namisieꞌomu kodawuaꞌomu sepaliꞌa. Tamaka ampa aitu ne amaiꞌemo bhahaa kakodawuamiu naꞌa? Apandeꞌaane, wakutuu anaꞌa hintimiu mohelasiomu, ane naembali mahingga matamiu sumungkieꞌomu maka maꞌa kanaꞌeomu idi.

Markus 14:8

Hobhine aini nehabumo ampa nepoo-poolino. Mbadhaku ini nominakiemo wawo, somo katokano humato dakumobuhu kanau.