2 Korintus 5:1 - Muna Southern Dialect

¹ Kapaꞌamo tapandeꞌaane, mada kaowu dahumungga kadempo kaeateꞌantoomu ne dhunia ini ⸤ maꞌanano mbadha kasarantoomu⸥ , Lahataꞌala nofofontaa-ntaaꞌao lambu te surugaa so kaeateꞌa suhue dhamani. Kaeateꞌa anaꞌa miina dahumabue limando manusia.

2 Korintus 5:1 Referans Kwoze

1 Yohanes 3:2

Bhahitieꞌiku timoasiꞌaono! Aitu intaodiomu ini anaꞌino Lahataꞌala, tamaka nada amai wutonto ini mada kaowu, miinaꞌo dafofohatoanea. Ampamo kaowu dopandeꞌaaneomu nahumato Kristus namotiwoha toha Wutono, dapototomoomu bhe Anoa, kapaꞌamo ne naꞌa damohaomu wutono Kristus peda katuno sakotu-kotuꞌuno.

Ibrani 9:24

Kapaꞌamo Kristus miina namesua weo Boloku Foliuno Kangkilo nehabundo manusia, membalino kaowu sandahano Boloku Foliuno Kangkilo sakotuꞌuno ⸤ te surugaa⸥ , tamaka Kristus nopesuamo te puuno surugaa, ampa aitu nofewise ne Lahataꞌala so sabhaha kafaraluuntoomu.

2 Korintus 4:7

Arataa moꞌali ini neate ne nuꞌua wite ⸤ maꞌanano mbadha kasara mani⸥ , so nentaleaꞌao putae kaꞌosa pontalabhi-labhino naꞌa miina namaiꞌao ne wuto mani tamaka nomaiꞌao ne Lahataꞌala.

Ibrani 9:11

Tamaka Kristus padamo nomai peda seemie Imamu Bhalano meowano sabhaha metaaꞌano toka ndumandoono. Padamo nolempagie Tenda kaeateꞌano Lahataꞌala, noliuꞌe kasangkano bhe kakalabhiano ⸤ bhe tenda we dhunia ini⸥ . Tenda amaitu ingka suano kahabundo manusia, maꞌanano miina natilentu ne dhunia nefokonandoono ini.

1 Petrus 1:4

Intaodiomu doposahunaꞌao sepaliꞌa daeꞌawa kadawu nefontaa-ntaano Ompu so umatino. Kadawu nehunsa-hunsano te surugaa maitu pae nabinasaa, pae naohakua bhe pae naleleua.

2 Korintus 5:4

Nandoo deateomu weo kadempo ini, sadhia dofedee hampano kabhieno wowoꞌontoomu. Daanumo miina gaontoomu dahumunsaemo mbadha kasara ini, tamaka gaontoomu damakeemo mbadha nsurugaa, neanomo mbadha kasarantoomu ini natumoloemo dadi suhue dhamani.

Markus 14:58

“Insaodi padamo tafetingkee nopugau, ‘Ahumunggae lambuno Lahataꞌala kahabuꞌando manusia ini, maka natolu oleo aefoehemo sigaoꞌano, suano kahabuꞌando manusia.’ ”

2 Petrus 3:11

Ane kosasawiꞌae damobinasae nada naꞌa, nada amai bhahaa beano so dadimiu? Ingka tabeano naongkilo bhe nalumebe mpuu podiumiu.

Kolose 2:11

Weo kaseꞌisemiu bhe Kristus, hintimiu padamo dosunakoomu. Ampamo kaowu suano kasuna nekahadhaando limando manusia, tamaka kasuna nekahadhaano Kristus weo totono lalomiu, maꞌanano noaliangkoomu kuasano dhosa we lalomiu.

1 Yohanes 3:19

Ane dopomoa-moasiꞌao dopandeꞌaanemoomu intaodiomu mieno kabanara, dadiꞌanomo totono lalontoomu natumohopo dua weo dadinto ne wiseno Lahataꞌala.

1 Yohanes 3:14

Ingka dopandeꞌaanemoomu, intaodiomu ini kao-kaomo dogampiomu maiꞌao ne mate, dopesuaꞌomu ne dadi. Katipandeꞌaoꞌano mbaꞌinomo doasiꞌao bhahitieꞌintoomu. Mie tapa moasiꞌaono bhahitieno sadaa-daaꞌe nokuasaiꞌe mate.

Ibrani 11:10

Kapaꞌamo Abraham neanta-antagi naeate ne seꞌonu kota kosandi motangkano, kota anaꞌa noꞌide-idee bhe nofoehee wutono Lahataꞌala.

1 Korintus 3:9

Kapaꞌamo insaodi ini taposabha-sabhangka weo kahadhaa so Lahataꞌala, hintimiu itu tapedamo kaampono Lahataꞌala, tapedamo dua lambu so Lahataꞌala.

2 Timotius 1:12

Kanandooꞌanomo aeꞌawa sabhaha kakadee-dee ini, tamaka miina aoambanoanea, mbaꞌinomo apandeꞌaane o laꞌae neparasaeaku. Apandeꞌaane mpuu Anoa nokokuasa nadhumagani neposahunaꞌaono ne idi ampa ne oleo kahatoꞌano Ompu.

Tula-tulando rasulu 7:48

Ampamo Lahataꞌala Foliuno Kuasa miina naeate ne lambu kahabundo manusia, peda tibuhiꞌano weo Kitabindo anabii,