2 Korintus 4:6 - Muna Southern Dialect

⁶ Kapaꞌamo Lahataꞌala padamo nokobhoasao, “Nobheteꞌo toha tilanga weo kahohondo.” Ingka Anoamo dua mobheteno tilangano weo totono lalontoomu, neanomo naentalea fekihintoomu so dalumosangiꞌao kakalabhiano Lahataꞌala kotilangano ne ulano Kristus.

2 Korintus 4:6 Referans Kwoze

1 Petrus 2:9

Tamaka hintimiu bansano liwu tipilino, imamu meompuno ne Omputo, bansano liwu mongkilono, umati fehebuaꞌano wutono Lahataꞌala. Lahataꞌala nopilikoomu bhe nobhasikoomu maiꞌao weo kahohondo pesuaꞌomu weo kantalea kumalabhiano, neanomo moleleeꞌomu sabhaha habuno timenteꞌaono.

2 Petrus 1:19

Dadiꞌanomo sedhuluꞌa kamatangkano tafintahaki putae bhoasaono Lahataꞌala nekosuahaꞌaondo ana-anabii daanumo nentoo. Naetaa mpuu umondofaaneomu bhoasao anaꞌaa, kapaꞌamo nokotilanga pedamo kantalea we mohohondoꞌano. Tilanga aitu ondo-ondoeꞌomu kansuhu, ampa nahumaha kamentae maka o kowine nakotilanga weo totono lalomiu.

Efesus 5:8

Daanumo endefiꞌini hintimiu meateomu weo kahohondo, tamaka ampa aitu pesuamoomu we mentaleaꞌano, seꞌisemoomu bhe Ompu. Dadiꞌanomo dadiomu peda mie meateno ne mentaleaꞌano.

2 Korintus 4:4

Kafeompuꞌando seetani kumuasaino dhamani aini nosongkowimo fekihindo mie tapa marasaeano sampe miina damoha tilangano Bhihita Metaa. Bhihita aini ingka nofofohatoꞌao kakalabhiano Kristus, ulanomo Lahataꞌala tiwohaꞌano.

Ibrani 1:3

Anoa nofotiwoha tilangano kakalabhiano Lahataꞌala, katuno bhe sifatino pasae wutono Lahataꞌala. Anoamo dua tumukono alamu bhalano ini nopake bhoasaono foliuno kuasa. Nopalusi nofekangkilo manusia maiꞌao ne dhosando, Anoa nengkohamo ne suanano Lahataꞌala fofoliuno kakalabhia te wawono wawo.

2 Korintus 3:18

Ampa aitu kosasawintoomu ini sanea tapa mekantutuno, ulantoomu miina natidapohia, tapedamo paeasa motiwohano kakalabhiano Ompu. Kanandooꞌanomo intaodiomu dotibhaliiꞌomu dhulu kapototo bhe ulano Wutono, dhulu kaompona dhulu kakalabhia. Kakalabhia amaitu ingka nomaiꞌao ne Ompu, Rohinomo Lahataꞌala.

Yohanes 11:40

Ambano Yesus, “Ingka padamo afohatoko, ane marasaea omoha kakalabhiano Lahataꞌala.”

Kolose 1:15

Lahataꞌala miina natiwohaa, tamaka Kristus ulanomo Lahataꞌala tiwohaꞌano. Anoamo kabhao-bhaono, koeateno nofoliuda bhahi-bhahiꞌae nefokonandoono Lahataꞌala.

Efesus 1:17

Aesalo ne Lahataꞌalano Ompuntoomu Yesus Kristus, Amantoomu kumalabhiano, sio-siomo namaꞌangkoomu Rohino. Rohi aitu namaꞌangkoomu kapande bhe kantaleano fekihi sampe kotu-kotuꞌu mandeꞌaaneomu Lahataꞌala.

Yohanes 1:14

Bhoasao amaitu nembalimo manusia neate bhe intaodiomu; dowohaemoomu kakalabhiano, dadino noponoꞌao kanini kaasi bhe kabanara. Kakalabhia naꞌa notahimae peda seemie Ana Kaenseemieno Lahataꞌala.

1 Petrus 1:12

Lahataꞌala nofohato ana-anabii naꞌa putae bhihita nekosuahaꞌaondo, suano so wutondo tamaka so hintimiu. Ingka bhihitamo dua anaꞌa nefetingkemiu ampa aini ne mie meowano Bhihita Metaa. Weo kuasano Rohino Lahataꞌala nefosampu maiꞌao te surugaa, mie anaꞌa dofosampeangkoomu Bhihita Metaa anaꞌa. Mahinggamo malaꞌekati, gaondo damandeꞌaane dua bhihita aini.

Filipi 2:6

Mahingga Anoa sakotuꞌuno Lahataꞌala, miina nakopatudhu kanandoono pasae Lahataꞌala maitu namintahakie kansuhu.

Yohanes 12:41

Yesaya nopugau peda ini mbaꞌinomo nowohae kakalabhiano Yesus bhe padamo dua nokowambaane.

Lukas 10:22

Kosasawiꞌae padamo nowaꞌa kanaꞌe Amaku. Miina bhe mandeꞌaono Anano Lahataꞌala mpahinomo Amano. Miina dua bhe mandeꞌaono Amano mpahinomo Anano, bhe kosasawindo mie neꞌundaꞌaono Anano Lahataꞌala damandeꞌao Amano.”

Tula-tulando rasulu 26:18

so molosaꞌao matando, neanomo dahumunsamo kahohondo maka damesua we mentaleaꞌano, damaiꞌao ne kuasano Kafeompuꞌando seetani dadumoli ne Lahataꞌala. Neanomo dua dhosando natiꞌamponi hampano kaparasaeando ne Idi, pakade daeꞌawa dawua nefotantuno Lahataꞌala so mie mongkilo.’

1 Korintus 12:8

Seemie nowaꞌane kapooli nokotimbangi pugauno, o Rohi fowaꞌaono. Seemieno nowaꞌane kapooli nokokapande pugauno, o Rohimo dua anaꞌa fowaꞌaono.

2 Korintus 2:10

Kapaꞌamo laꞌae nemaꞌafuꞌaomiu kaꞌalano, ingka amaꞌafuanemo dua. Kapaꞌamo toka nemaꞌafuꞌaoku, ane daanumo nandoo so nemaꞌafuꞌao, ingka ahabuemo ne wiseno Kristus so kaetaaꞌamiu.

Efesus 1:18

Aesalo dua sio-siomo natilengka totono lalomiu, neanomo lumosangieꞌomu kakesano posahunaꞌao so neꞌawamiu maiꞌao ne Lahataꞌala bhasikoomu; neanomo mandeꞌaaneomu dua kapontalabhi-labhino kabarakati nefontaa-ntaano Lahataꞌala so umatino mongkilono.

1 Tesalonika 2:12

Maꞌanano tatangahikoomu, tafekatangka lalomiu, pakade taesalo mpuu dumadiomu naposahataa bhe kapoindalono Lahataꞌala. Kapaꞌamo Lahataꞌala nosaliꞌikoomu mesuaꞌomu weo Kafopahintaꞌano kumalabhiano.

Ibrani 6:4

Kapaꞌamo ane bhe mie kumukundono Lahataꞌala, miinamo bhe dhalano dasumuli dametompaꞌao dhosando. Endefiꞌini padamo notilada tilangano Lahataꞌala, denamisimo kadawuno surugaa bhe padamo dua dotahima Rohino Lahataꞌala peda bhaindo.