2 Korintus 3:18 - Muna Southern Dialect

¹⁸ Ampa aitu kosasawintoomu ini sanea tapa mekantutuno, ulantoomu miina natidapohia, tapedamo paeasa motiwohano kakalabhiano Ompu. Kanandooꞌanomo intaodiomu dotibhaliiꞌomu dhulu kapototo bhe ulano Wutono, dhulu kaompona dhulu kakalabhia. Kakalabhia amaitu ingka nomaiꞌao ne Ompu, Rohinomo Lahataꞌala.

2 Korintus 3:18 Referans Kwoze

2 Korintus 4:6

Kapaꞌamo Lahataꞌala padamo nokobhoasao, “Nobheteꞌo toha tilanga weo kahohondo.” Ingka Anoamo dua mobheteno tilangano weo totono lalontoomu, neanomo naentalea fekihintoomu so dalumosangiꞌao kakalabhiano Lahataꞌala kotilangano ne ulano Kristus.

Roma 12:2

Koemo mesandahaomu ne sabhaha podiu bhe kaneano dhunia ini, tamaka hunsaꞌanomo Lahataꞌala namahabuꞌouni fekihimiu sampe natibhalii dadimiu. Ane nadamo anaꞌa mandeꞌaaneomu medano ae kapoindalono Lahataꞌala: sabhaha podiu metaaꞌano, mekaꞌiano lalono bhe sumangkaꞌano.

2 Korintus 4:4

Kafeompuꞌando seetani kumuasaino dhamani aini nosongkowimo fekihindo mie tapa marasaeano sampe miina damoha tilangano Bhihita Metaa. Bhihita aini ingka nofofohatoꞌao kakalabhiano Kristus, ulanomo Lahataꞌala tiwohaꞌano.

1 Korintus 13:12

Ampa aitu tapedamo deꞌondo-ondoomu ondula pata mentalea weo paeasa mohawu, tamaka namada kaowu dapowise. Ampa aitu kapandeku miinaꞌo nasumangkaa, tamaka namada kaowu kapandeku naoponomo, pedamo wutono Lahataꞌala nosangka mpuu nopandeꞌa kanau.

Kolose 3:10

Ampa aitu dowaꞌangkomoomu dadi buꞌou, hintimiu membalimoomu manusia buꞌou. Mokonandoono dadi buꞌou naꞌa nopahabuꞌounikoomu kansuhu ampa sifatimiu napototo bhe Wutono. Patudhuno neanomo mandeꞌaaneomu mpuu wutono Lahataꞌala maitu.

Roma 8:29

Andoa padamo nopilida Lahataꞌala mpini kabhao-bhaono, padamo dua nofotantuda mpini wawono dasekatu bhe Anano. Pedamo anaꞌa Anano maitu nembalimo titiisa, o aino dobhahi.

1 Korintus 15:49

Pedamo dua intaodiomu ampa aitu dopototoomu bhe Adam, maiꞌao ne bungahasi, namada kaowu dapototoomu dua bhe Kristus maiꞌaono te surugaa.

2 Korintus 5:17

Sasuka seꞌiseno bhe Kristus ingka nembalimo manusia buꞌou, ngkodauꞌano nolalomo, nohatomo buꞌouꞌano.

Yohanes 1:14

Bhoasao amaitu nembalimo manusia neate bhe intaodiomu; dowohaemoomu kakalabhiano, dadino noponoꞌao kanini kaasi bhe kabanara. Kakalabhia naꞌa notahimae peda seemie Ana Kaenseemieno Lahataꞌala.

Yakobus 1:23

Mie metingkeno bhoasaono Lahataꞌala tamaka miina nadhumalangiea, ingka nopototo bhe mie umondo-ondono ulano weo paeasa.

Yohanes 17:24

Ama, gaoku mpuu ne amai kaeateꞌaku, somo dua kaeateꞌando mie kawaꞌaomu ne Idi, dapobhai kanau. Ane nada anaꞌa damoha kakalabhiaku. Kakalabhia anaꞌa waꞌa kanauꞌe kapaꞌamo moasi kanau mpini miinaꞌo natifokonandoo dhunia.

Titus 3:5

Anoa nofosalamati kaita suano mbaꞌinomo habu metaantoomu tamaka hampano rahamati bhe kabhelano lalono. Lahataꞌala nohunsa Rohino mongkilono weo totono lalontoomu so namekanggelaꞌiꞌao dhosantoomu maka sumuli dalumente weo dadi buꞌou.

Roma 8:7

Fekihino mie nekuasaino kapoindalono mbadha sapoewangi bhe Lahataꞌala, mbaꞌinomo miina natumuhu ne pahintano Lahataꞌala. Mie medando aitu daanumo pae namoolia natumuhua ne Lahataꞌala.

Roma 8:4

Lahataꞌala nohabu peda maitu neanomo sabhaha pahinta nebuhi weo Kitabino Musa kotu-kotuꞌu nasumangka weo dadintoomu. Kapaꞌamo intaodiomu miinamo dadumadi doangkafi kamanusiantoomu, tamaka dodadimo doangkafi kaatono Rohino Lahataꞌala.

Yohanes 12:41

Yesaya nopugau peda ini mbaꞌinomo nowohae kakalabhiano Yesus bhe padamo dua nokowambaane.

Roma 13:14

Fokanaomu Ompu Yesus Kristus ne ulumiu tapedamo pakea buꞌou ⸤ maꞌanano membaliomu peda wutono Kristus⸥ , koe folalesaea mbadhamiu so namangkafiꞌao sabhaha kapoindalono.

Galatia 6:15

Desuna bhe miina daesuna miina nakomaꞌa-maꞌanaa, ampamo dembali manusia buꞌou komaꞌanaꞌano.

1 Timotius 1:11

Kafoinaꞌu anaꞌa nopoangkafi bhe Bhihita Metaa maiꞌaono ne Lahataꞌala, kumalabhiano bhe mantasiꞌano damosibhalae. Bhihita Metaa ainimo nefoposahunaꞌaono Lahataꞌala ne idi so amolele.

Yohanes 17:22

Padamo awaꞌanda kakalabhia kawaꞌaomu ne Idi, neanomo andoa daseꞌise, pedamo Intaodi doseꞌise dua.

2 Korintus 3:17

O Ompu maitu o Rohi, maka ne amai kanandooꞌano Rohino Lahataꞌala, ne itumo dua kanandooꞌano kabebasi.

1 Yohanes 3:2

Bhahitieꞌiku timoasiꞌaono! Aitu intaodiomu ini anaꞌino Lahataꞌala, tamaka nada amai wutonto ini mada kaowu, miinaꞌo dafofohatoanea. Ampamo kaowu dopandeꞌaaneomu nahumato Kristus namotiwoha toha Wutono, dapototomoomu bhe Anoa, kapaꞌamo ne naꞌa damohaomu wutono Kristus peda katuno sakotu-kotuꞌuno.