1 Tesalonika 2:12 - Muna Southern Dialect

¹² Maꞌanano tatangahikoomu, tafekatangka lalomiu, pakade taesalo mpuu dumadiomu naposahataa bhe kapoindalono Lahataꞌala. Kapaꞌamo Lahataꞌala nosaliꞌikoomu mesuaꞌomu weo Kafopahintaꞌano kumalabhiano.

1 Tesalonika 2:12 Referans Kwoze

Efesus 4:1

Dadiꞌanomo, idi mie netohongku hampano afeompu ne Kristus ini, aesalo mpuu ne hintimiu dadiomu naposahataa bhe kapoindalono Lahataꞌala, kapaꞌamo hintimiu mie toka nebhasino Lahataꞌala.

1 Yohanes 2:6

Laꞌae mugauno nodadi noseꞌise bhe Lahataꞌala, tabeano nadumadi namangkafi sandahano dadino Yesus Kristus.

1 Tesalonika 4:12

Ane nada anaꞌa, pae membaliomu wowoꞌono mie bhaimu, dadimiu naetaa ne pomatano mie sigaoꞌano tapa marasaeano ne Kristus.

1 Petrus 5:10

Tamaka Lahataꞌala kamaiꞌaoꞌano sabhaha rahamati, Anoamo bhasikoomu so mealaomu dawu weo kakalabhia suhue dhamani bhe Kristus. Dadiꞌanomo namada kumadee-deeꞌomu sebantaha, Lahataꞌala namosangkamo dadimiu, namoehekoomu, namekaꞌosakoomu bhe namekamatangka kofindamiu.

1 Tesalonika 5:24

Lahataꞌala toka sumaliꞌikoomu nahumabue bhahi-bhahiꞌae naꞌa, hampano nokampuu-mpuu ne dhandino.

Kolose 1:10

Ane nada naꞌa, dadimiu namantasimo peda mie mangkafino Ompu bhe mekaꞌiano lalono Lahataꞌala. Kobhakeomu weo habu metaamiu, sampe sedhuluꞌa dua mandeꞌaoꞌomu Lahataꞌala.

Efesus 5:8

Daanumo endefiꞌini hintimiu meateomu weo kahohondo, tamaka ampa aitu pesuamoomu we mentaleaꞌano, seꞌisemoomu bhe Ompu. Dadiꞌanomo dadiomu peda mie meateno ne mentaleaꞌano.

1 Petrus 2:9

Tamaka hintimiu bansano liwu tipilino, imamu meompuno ne Omputo, bansano liwu mongkilono, umati fehebuaꞌano wutono Lahataꞌala. Lahataꞌala nopilikoomu bhe nobhasikoomu maiꞌao weo kahohondo pesuaꞌomu weo kantalea kumalabhiano, neanomo moleleeꞌomu sabhaha habuno timenteꞌaono.

1 Tesalonika 4:1

Panda-pandano bhahitieꞌi, padamo tatangahikoomu nada amai dadumadi damekaꞌia lalono Lahataꞌala. Anaꞌa daanumo habuemoomu. Tamaka aitu taesalo mpuu weo neano Ompu Yesus, nasedhuluꞌa dua kakampuu-mpuuno habumiu naꞌa.

Kolose 2:6

Ingka tahimaemoomu Kristus Yesus nembali Ompumiu. Dadiꞌanomo podiumiu tabeano napoangkafi bhe kapoindalono, kapaꞌamo seꞌisemoomu bhe Kristus.

Efesus 5:2

Dadimiu tabeano nakumabhintie kanini kaasi, peda wutono Kristus nofomoasiꞌao. Nofotawakalamo Wutono so intaodiomu sampe dopongkoe. Anoa nembali kapopanga mowondu nefoampe ne Lahataꞌala, mekaꞌianomo lalono Lahataꞌala.

Galatia 5:16

Patudhuku peda aini: dadiomu angkafiomu kaatono Rohino Lahataꞌala, maka paemo mangkafiomu kapoindalono wuto.

1 Korintus 1:9

Lahataꞌala nokampuu-mpuu ne dhandino. Ingka Anoamo bhasikoomu seꞌiseomu bhe Anano, Yesus Kristus Ompuntoomu.

Filipi 1:27

Ampamo kaowu, kodadimiu tabeano naposahataa bhe wambano Bhihita Metaano Kristus. Ane nada anaꞌa, naetaa amai amohakoomu toha, naetaa pae amai ametingke kaowu bhihitamiu, tetewei amandeꞌaane putae notangkamo kofindamiu, sepatudhuomu, sekakolaloomu poewangiomu so kaparasaea ne Bhihita Metaa.

1 Petrus 3:9

Kadai koise bhoosianeomu kadai, feꞌawu koise tobhoosianeomu feꞌawu, tamaka mesaloomu kabarakatino Lahataꞌala so mie aitu. Kapaꞌamo dadimo medano aitu katibhasiꞌamiu, somo meꞌawaꞌaoꞌomu kabarakati.

2 Timotius 1:9

Anoamo mosalamati kaita, Anoamo dua bhasi kaita so dadumadi mongkiloꞌao. Katifosalamatiꞌantoomu suano mbaꞌinomo habu metaantoomu, tamaka nengkoha ne patudhu bhe rahamatino Wutono. Rahamati aini nowaꞌa kaitae noangka ne Kristus Yesus, mpini miinaꞌo natifokonandoo dhunia.

Roma 8:28

Ingka dopandeꞌaanemo, ne kadhadhia ae maka dua Lahataꞌala nokahadhaa so kaetaaꞌano mie moasiane, mie toka nebhasino posahataa bhe patudhuno.

Roma 8:30

Mie toka nepilino Lahataꞌala mpini kabhao-bhaono, andoamo dua nebhasino. Mie toka nebhasino maitu andoamo dua netahimano peda mie banara. Mie toka netahimano peda mie banara maitu, andoamo dua ⸤ so⸥ metahimano kakalabhiano Lahataꞌala.

2 Korintus 4:6

Kapaꞌamo Lahataꞌala padamo nokobhoasao, “Nobheteꞌo toha tilanga weo kahohondo.” Ingka Anoamo dua mobheteno tilangano weo totono lalontoomu, neanomo naentalea fekihintoomu so dalumosangiꞌao kakalabhiano Lahataꞌala kotilangano ne ulano Kristus.

2 Tesalonika 1:10

Ne oleo kahatoꞌano naꞌa, Ompu damekakalabhiaꞌe umati mongkilono bhe damenteane kosasawindo marasaeano. Bhe hintimiu dua, kapaꞌamo bhihita neowa mani parasaeaꞌemoomu.

2 Petrus 1:3

Lahataꞌala nopakemo kuasa Kaseemie-mieꞌano, nowaꞌa kaita sabhaha maraluuꞌano so dadumadi lumebeꞌao. Kafowaꞌaoꞌano hampano dopandeꞌaanemoomu Kristus, Anoamo fobhasino so daealaꞌao dawu weo kakalabhiano bhe kataano lalono.

3 Yohanes 1:6

Andoa padamo detula-tulaꞌao kanini kaasimu ne wisendo umati marasaeano ne ini. Naetaa mpuu nehabumu itu ane tulumida damopansuhu kala-kalando. Habu medano naꞌa ingka mekaꞌianomo lalono Lahataꞌala.