1 Petrus 1:12 - Muna Southern Dialect

¹² Lahataꞌala nofohato ana-anabii naꞌa putae bhihita nekosuahaꞌaondo, suano so wutondo tamaka so hintimiu. Ingka bhihitamo dua anaꞌa nefetingkemiu ampa aini ne mie meowano Bhihita Metaa. Weo kuasano Rohino Lahataꞌala nefosampu maiꞌao te surugaa, mie anaꞌa dofosampeangkoomu Bhihita Metaa anaꞌa. Mahinggamo malaꞌekati, gaondo damandeꞌaane dua bhihita aini.

1 Petrus 1:12 Referans Kwoze

Yohanes 15:26

Mada kaowu atumuduangkoomu Fotulumino maiꞌaono ne Amaku, Rohino Lahataꞌala meowano kabanara. Anoamo itu sumakusii kanau.

Efesus 3:10

Patudhuno Lahataꞌala, ampa aitu sabhaha mintahano kuasa bhe rohi neangka te antara, damandeꞌaane dua kandalono fehikino Lahataꞌala mangkaꞌano ne umatino.

1 Korintus 2:10

Tamaka ne intaodiomu Lahataꞌala padamo nofohato kaitae noangka ne Rohino. Rohino Lahataꞌala ingka nolosangi bhahi-bhahiꞌae, mahingga patudhuno Lahataꞌala tifebuniꞌano sepaliꞌa.

Ibrani 4:2

Kapaꞌamo Bhihita Metaa ingka padamo dofolelee ne intaodiomu pedamo dua ne andoa. Ampamo kaowu Bhihita Metaa miina nakofahalaaꞌa so andoa hampano dofetingkee tamaka miina dapoangkafiane bhe kaparasaea.

Markus 16:15

Pada aitu Yesus nofohatodamo ambano, “Kalaomu ne amai liwu ne dhunia ini maka foleleomu Bhihita Metaa ne kosasawindo manusia!

1 Petrus 1:25

Tamaka bhoasaono Ompu sadaa-daa ampa suhue dhamani.” Ingka bhoasaomo aini o Bhihita Metaa toka nefosampe ne hintimiu.

Powoha 5:11

Pada amaitu awoha bhe afetingkemo dua suahano kantawundo malaꞌekati dolibu-libu kaengkohaꞌa kumalabhiano, mahaluku bhe kamungkulaꞌi maitu, kabhahindo ntini lasa-lasa, ntini hewu-hewu lasa.

2 Korintus 6:6

nongkilo totono lalo mani, takotimbangi, takosabaha, netaa lalo mani, bhe katulumino Rohino Lahataꞌala, bhe kanini kaasi kumampuu-mpuuno;

2 Korintus 1:22

Padamo dua nokatanda kaita mbali fehebuaꞌano. Anoamo dua fowaꞌaono Rohino weo totono lalontoomu, somo kafekantoono dhandino ⸤ putae tetewei mada kaowu daꞌumawae kosasawiꞌae nedhandiꞌaono⸥ .

Roma 15:19

noangka dua ne tanda-tanda tapa mentela bhe giu timenteꞌaono, saneamo hampano kuasano Rohino Lahataꞌala. Hampanomo kuasa anaꞌa kaliliꞌaku aefolele Bhihita Metaano Kristus ne amai maka dua, notanda we Yerusalem ampa te kadieno Ilirikum.

Tula-tulando rasulu 2:33

Pada nosangkee Lahataꞌala te melangkeꞌano bhe nowaꞌane kuasa, notahimamo Rohino Lahataꞌala nedhandiꞌaono maitu. Rohi aitu nofosampuemo dua ne insaodi ini, peda newoha bhe nefetingkemiu aitu.

Ibrani 2:4

We simbalino dua anaꞌa, Lahataꞌala nofekamatangka kasakusiindo nepake tanda tapa mentela, giu timenteꞌaono bhe sabhaha kuasa mangaliuno, bhe nofodawu-dawuꞌao dua kawaꞌaono Rohino Lahataꞌala nopoangkafi bhe kapoindalono Wutono.

Galatia 1:16

Hampano dua rahamatino nofotipandeꞌao kanau Anano, neanomo amolelee bhihitano ne sabhaha bansano liwu suano Yahudi. Wakutuu anaꞌa bhe naseemie miina bhe nekalaꞌiku aesalo fekihi.

Galatia 1:12

Kapaꞌamo Bhihita aini miina atumahimae ne manusia, suano dua manusia moguhu kanaꞌe, tamaka iꞌino Bhihita Metaa ini atahimae ne wutono Yesus Kristus. Anoamo motiumba kanaꞌe.

Roma 10:15

Nada amai dua daefolele bhihita ane pae bhe fotuduno dakumala? Noposahataa bhe tibuhino weo Kitabi peda aini, “Nokesa mpuu hatondo mie mefoleleno Bhihita Metaa.”

Roma 1:17

Kapaꞌamo weo Bhihita Metaa naꞌa notiwohamo kaangkaꞌando manusia so datitahimaꞌao peda mie banara ne Lahataꞌala. Kaangkaꞌa anaꞌa notanda ne kaparasaea, nopuli ne kaparasaea. Kapaꞌamo nandoo tibuhino weo Kitabi peda ini, “Mie netahimano Lahataꞌala peda mie banara hampano kaparasaeano, anoamo itu so meꞌawano dadi.”

Lukas 15:10

Amohatokoomu, nadamo dua anaꞌa malaꞌekatino Lahataꞌala daoꞌia hampano seemie kodhosa metompaꞌaono dhosano.”

Matius 11:25

Wakutuu anaꞌa Yesus nosambaheamo ambano, “Notumpu laloku, Ama, Ompuno lani bhe dhunia, kapaꞌamo kosasawiꞌae ini febunie ne mie kotimbangi bhe mie mande, tamaka fotiwohae ne mie mepandano kaengkohaꞌa pata kokasikolano.

1 Tesalonika 2:9

Bhahitieꞌi, tetewei nandoo dua feꞌulaiꞌeomu kaꞌosano taꞌulei bhe tafekawule-wule. Mentae mohondo takahadhaa taeꞌondofi kadadiꞌa mani keana taembali wowoꞌomiu, poowa taefoleleangkoomu Bhihita Metaa maiꞌaono ne Lahataꞌala.

Lukas 9:6

Pada anaꞌa anaguhuꞌino dokalamo doliligi sabhaha liwu defolele Bhihita Metaa bhe defekaꞌosa mie mosaki ne amai maka kahatoꞌando.

Lukas 2:26

bhe padamo dua nofohatoe, paeꞌo namatea ane paeꞌo namoha Omputo Fosalamatino nedhandiꞌaono Ompu.

Matius 16:17

Ambano Yesus, “Kodawua sepaliꞌa Simon anano Yunus, kapaꞌamo suano manusia mohatoangkoe, tamaka Amaku te surugaa.

Matius 11:27

Kosasawiꞌae padamo nowaꞌa kanaꞌe Amaku. Miina bhe mandeꞌaono Anano Lahataꞌala mpahinomo Amano. Miina dua bhe mandeꞌaono Amano mpahinomo Anano, bhe kosasawindo mie neꞌundaꞌaono Anano Lahataꞌala damandeꞌao Amano.

Ibrani 11:13

Kosasawindo mie saꞌituini sanea dokokaparasaea sampe mate. Andoa miina daetahima sabhaha nedhandiꞌaono Lahataꞌala, tamaka kao-kaomo tadowoha we kodoꞌoꞌano o ae so neꞌawando mada kaowu maka doꞌiaꞌane. Pedamo aitu domangaku dembali mie humato bhe humampe we dhunia ini.

Roma 1:15

Dadiꞌanomo apoindalo mpuu aefolele Bhihita Metaa ne hintimiu dua meateno we kotano Roma itu.

Tula-tulando rasulu 16:10

Pada nokopowoha peda maitu, lasao taokanu tapolimba se kadieno Makedonia. Hampano nopalusi powoha maitu, tasefekihimo ingka wutono Lahataꞌala gahaꞌa mugau kainsami taefolele Bhihita Metaa ne itu.

Tula-tulando rasulu 10:44

Tangasano Petrus nopugau, nosampumo Rohino Lahataꞌala nokabhinti kosasawindo mie metingkeno pugauno.

Tula-tulando rasulu 8:25

Pada detula-tula dosakusiiꞌao Yesus bhe defolele bhoasaono Lahataꞌala, Petrus bhe Yohanes dosulimo we Yerusalem. Wakutuuno dosuli, nobhahi dua liwu ne kadieno Samaria kaefoleleꞌando Bhihita Metaa.

Tula-tulando rasulu 4:31

Pada dosambahea, lambu kapohompu-hompuꞌando tanomagegomo. Kosasawindo nokabhintidamo Rohino Lahataꞌala maka notangkamo lalondo defolele bhoasaono Lahataꞌala.

Tula-tulando rasulu 4:8

Petrus nokabhintie Rohino Lahataꞌala maka notobhoosi ambano, “Neangkaꞌindo umati bhe kamu-kamungkulaꞌi!

1 Timotius 3:16

Kotu-kotuꞌu nobhala mpuu rahasiano agamantoomu ini, Anoa nofotiwoha Wutono nembali manusia, nosakusiiane Rohino Lahataꞌala Anoa ini mie banara, dowohae malaꞌekati, bhihitano dofolelee ne sabhaha bansano liwu tapa mandeꞌaono Lahataꞌala, doparasaeaꞌe ne kosekaꞌewaꞌae dhunia ini, notisangke weo kakalabhia te surugaa.

1 Petrus 4:6

Kanandooꞌanomo Bhihita Metaa dofolelee dua ne mie mateno. Patudhuno, mbadhando daanumo netompaloimo mate, peda kabhotusino Lahataꞌala so manusia, tamaka rohindo dadumadi naposahataa bhe kapoindalono Lahataꞌala.