1 Korintus 15:50 - Muna Southern Dialect

⁵⁰ Bhahitieꞌiku, nepulaoꞌaoku peda aini: o dagi bhe hea pae bhe kapooli namesua weo Kafopahintaꞌano Lahataꞌala; o mbadha so binasano pae bhe kapoolia naeꞌawa dawu ne dadi so pata binasano.

1 Korintus 15:50 Referans Kwoze

Matius 16:17

Ambano Yesus, “Kodawua sepaliꞌa Simon anano Yunus, kapaꞌamo suano manusia mohatoangkoe, tamaka Amaku te surugaa.

Efesus 4:17

Dadiꞌanomo, amohatokoomu weo neano Ompu bhe amodhagakoomu: koemo toha dadiomu peda mie tapa mandeꞌaono Lahataꞌala, mefekihino sabhaha tapa kofahalaano.

Galatia 5:16

Patudhuku peda aini: dadiomu angkafiomu kaatono Rohino Lahataꞌala, maka paemo mangkafiomu kapoindalono wuto.

2 Korintus 5:1

Kapaꞌamo tapandeꞌaane, mada kaowu dahumungga kadempo kaeateꞌantoomu ne dhunia ini ⸤ maꞌanano mbadha kasarantoomu⸥ , Lahataꞌala nofofontaa-ntaaꞌao lambu te surugaa so kaeateꞌa suhue dhamani. Kaeateꞌa anaꞌa miina dahumabue limando manusia.

Galatia 3:17

Patudhuno sandahaku saꞌituini peda aini: dhandino Lahataꞌala toka nehabuno maitu pae bhe kapoolia namosowoe tawa namekatembee tubhono agama Yahudi. Kapaꞌamo atorano agama Yahudi naꞌa ⸤ netubhono anabii Musa⸥ kaneꞌo nonandoo nopalusi fato moꞌono tolu fulu taꞌu nokundo Abraham.

1 Korintus 6:13

Nandoo dua mugauno o oti so iꞌino handa, o handa so kaeateꞌano oti, tamaka ingka kohaahondaꞌae ini sanea namosalie Lahataꞌala. Mbadhando manusia paise naembalia damakee so dapokawite-witeꞌao tamaka so daꞌumondofaoꞌao Ompu, bhe Ompu umondofaono mbadhando manusia.

Kolose 2:4

Kanandooꞌano afohatokoomu peda aini keana dobhohe-bhoheꞌikoomu mie mekameko-mekono wambano.

2 Korintus 9:6

Tandaiꞌeomu! Mie meꞌewino seendai tantumo natumobhe seendai dua, mie meꞌewino nobhahi teteweimo nabhahi dua natumobhea.

1 Korintus 7:29

Patudhuku peda aini: tempono dhamani aini tamo seendai. Dadiꞌanomo ne katumpono wakutuu aini mie kohobhineno naetaa nadumadi kao-kaomo miina bhe hobhineno;

1 Korintus 1:12

Nepulaoꞌaoku peda aini: hintimiu itu seemie-seemie nopugau, “Idi ne wetano Paulus”, “Idi ne wetano Apolos”, “Idi ne wetano Petrus”, bhe nandoo dua mugauno, “Idi ne wetano Kristus.”

Matius 25:34

Omputo anaꞌa napugau ne mie we suanano ambano, ‘Maimoomu, hintimiu nebarakatino Amaku, tahimamoomu Kafopahintaꞌa toka nefontaa-ntaano so hintimiu mpini pakatifokonandoono dhunia.

Roma 2:7

Namaꞌao dadi suhue dhamani ne mie kumampuu-mpuuno humabu metaano hampano deꞌondofi dadi tapa binasano, dadi kumalabhia bhe dadi tifosibhala.

1 Korintus 6:9

Miina mandeꞌaaneomua bhahaa putae mie humabu modaino paise daeꞌawa dawu weo Kafopahintaꞌano Lahataꞌala? Koise nokolilino totono lalomiu! Mie pokawite-witeno, mesombaino barahala, mie monsule, karambole moꞌane, gumaano sapada moꞌane tawa hobhine,

1 Korintus 6:10

kasoꞌo, mie kumadau-dauno, mempohoꞌuno, mie foꞌumbuno, bhe fobhohe-bhoheꞌino saneamo so pata mealano dawu weo Kafopahintaꞌano Lahataꞌala.

1 Korintus 15:42

Pedamo aini kawanuꞌando mie mate. Peda wine neꞌewi, o mbadha nekobuhu ingka o mbadha binasano, tamaka mbadha nefodadi o mbadha so tapa binasano.

1 Korintus 15:44

Nekobuhu ingka o mbadha maiꞌaono ne dhunia, nefodadi o mbadha maiꞌaono ne Rohino Lahataꞌala. Ane bhe mbadha maiꞌaono ne dhunia, tantumo nandoo dua mbadha maiꞌaono ne Rohino Lahataꞌala.

2 Timotius 4:18

Daanumo Ompu namosalamati kanau maiꞌao ne sabhaha patudhu modai. Anoa namowa kanau asumalamati amesua weo kafopahintaꞌano te surugaa. Nopantasi mpuu damosibhala Lahataꞌala ampa suhue dhamani! Amin.