Jude 1:16 - Ṉa Alaofua Falu 1923 1949

¹⁶ Wane na kera uubulu taa ki neri, wane na kera kanabaebae, kera abula sulia si thathami la taa kera ki (ma kera sorea si do roṉo lana ka baita faamau ana fokoda), ma uria na kera thathamia todado la, kera rikia imole ki e ai kesi totoo.

Jude 1:16 Referans Kwoze

II. Pita 2:18

Sulaania, ana bae lada roṉo lana ka baita faamau me fakoka, uria si do na seena imole e thathamidaki, ma ana daidei la, kera gafoa imole eki na keki thaka na mai faisia toa ana ade garo la;

II. Pita 2:10

Ma imole eki u boo na kera abula sulia seena imole asi thathami la ne faataali kera, ma keka fare faekwa ana toa gwauwai ki. Kera seeraraa, keka naunibaita, kesi leleba si maṉa na keki ṉata taa i seena toa inoto faamau ki:

Filifae 2:14

Muki ilia si do ki sui boo uubulu taa la ki ma oli susuua ki ka ai faisia;

I. Pita 4:2

Fasi asi maṉa na nia kai to u ana seena imole e ai si to lau uria si do eki na wane ki kera thathamia, si do na tha God e thathamia naa na nia kai to uria.

I. Timothi 6:5

Firua si sui wane liode taa ki ma mamana la eri e ai naa faisida, manatade soso na gwauna si lio ni fare baita la atha God ana todado la: oki lae faisia toa una eki.

I. Korinitha 10:10

Bia musi uuubulu taa, ’uria lau boo tei toa iada kera uubulu taa, ma nia ne kwaithauṉi e thauṉida keka sui.

Jude 1:18

Na kera soree isamulua na ba, Asi maṉa iisi toa ni onioṉa la keki fula, na keki abula sulia si thathami la taa kera ki asi lio ni fare faekwa la atha God.

II. Pita 3:3

Uria na mulu thaitoomana totonao si do eri, afa boṉi iisi ki toa ni onioṉa la keki lae mai fafia onioṉa la kera, ma keki abula sulia si thathami la taa kera ki,

I. Pita 2:11

Toa liliothaua nau ki, ku ṉata kwaitakoi, ku soree isamulua mala toa na muka makafa to bamulua ma toa kwaita ki, muki to faisia si thathami la taa ki seena imole, na ka firu bia maṉoka;

Fa Ṉu Abu ki 15:4

Na maana ka faare faekwa ana imole na abula lane a’i si lea; ma sui kai faabaitaa toa na kera faare baita atha Jihova. Wane eri ne othi ana ta si do, sui ka a’i si talaa othi la nia eri, boro so ka ṉalia mena mai si ade la ne taa iana italaana.

Jude 1:15

Fasi ni nia ṉa Wane ni Kotu, kai ṉata sulia toa eki sui boo, ma kai faaseenonia toa eki sui na kera fare faekwa atha God uria si ra kera ana fare faekwa la atha God na kera ilia ka sui bana asi lio ni fare faekwa la kera eri, ma uria aefara la ni sui bana na toa ana abula taa la na kera fare faekwa atha God kera aefara ania.

I. Pita 1:14

Mala kala wela na kera thathamii ade sulia si ṉata, musi ade ’uria si thathami la taa totonao kamulua ki asi maṉa ne ai musi thaitoomana si do ki:

Galesia 5:16

Ma nau ku sorea, Muki abula atha Spirit, sui sa muka ade sulia si thathami la taa seena imole e ai.

Jone 6:61

Ma sui tha Jesus, uria ne thaitoomana i talaana na toa nia ne toleda kera uubulu asi do eri, ka soree isada, Do eri kai faataofai kamulua?

Fa Ṉu Abu ki 17:10

Raraṉada italaada ka to ana kakalia seeda: keka fafakao kera ana fokoda.

II. Timothi 4:3

Uria na si maṉa toto kai fula na kesi alamatania keki faaroṉoda asi kwaifamanataia taliṉei eri; ma aliṉada kai mamale, adedea keki ofua toa in kwaifamanatai iada sulia thathami la taa kera ki;

I. Thesalonika 4:5

Ana si thathami la taa faamau, ’uria lau boo Jenetaele ki na kesi thaitoomana tha God, e ai;

Galesia 5:24

Ma toa eki atha Christ kera fota fafia seena imole ana ’ai rarafolo ana si lio ma si thathami la taa nia ki.

Jone 6:41

Mania Ju ki kera uubulu taa suli nia, uria ne sorea, Nau na berede ne sifo mai faisia thalo.

Luke 19:7

Ma si maṉa na kera rikia, kera sui boo keka uubulu taa, keka una eri, Nia e lae kai to si ana bia wane ne abula taa.

Luke 15:2

Ma Farisi ki bia wane ni kekeda ki keka ubulutai nia, keka una eri, Wane nei kai thathagonia toa na kera abula taa, ma kai faṉa bida.

Luke 5:30

Ma wane ni kekeda kera ki bia Farisi ki keka uubulu taa uria toa nia ne toleda, keka una eri, Uria ta na muki faṉa ma muki kuu bia wane ni ṉali lana takisi ki ma toa na kera abula taa?

Fa Ṉu Abu ki 106:25

Keka uubulu taa i la biui‐maku kera ki, me a’i kesi fafuroṉoa liṉana ṉata lana tha Jihova.

Fa Ṉu Abu ki 73:8

Keka onioṉa, ma ana lioda ne taa keka ṉata sulia si ade la ne kwaifamaui: keka ṉata mala wane inoto.