San Juan 4:1 - Alacatlatzala Mixtec New Testament

¹ Nafariseo xi̱ni̱ so̱ꞌo na ndí kua̱ꞌa̱ ní ka̱ ni̱vi ndíko̱n sa̱ta̱ ta̱Jesús vitin no̱o̱ ni̱vi na ndíko̱n sa̱ta̱ ta̱Juan, ta ta̱Jesús sákuchu ra kua̱ꞌa̱ ní ka̱ ni̱vi no̱o̱ ta̱Juan káchí na, káꞌa̱n na.

San Juan 4:1 Referans Kwoze

San Juan 3:26

Ta saá ki̱xaa̱ nayóꞌo no̱o̱ ta̱Juan ta ni̱ka̱ꞌa̱n na xíꞌin ra: ―Tata Rabí, ¿án nákáꞌán ún ta̱a ta̱ ni̱xi̱yo xíꞌin ún inka̱ táꞌví yuꞌu̱ yu̱ta Jordán, ta̱a ta̱ nda̱to̱ꞌon ún xa̱ꞌa̱ xíꞌin ndi̱? Ta vitin yóo ra inka̱ xiiña sákuchu ra ni̱vi, ta ndiꞌi ni̱vi kua̱ꞌa̱n na no̱o̱ yóo ra ―káchí nayóꞌo xíꞌin ta̱Juan.

San Juan 3:22

Ta ndi̱ꞌi ni̱yaꞌa ñayóꞌo, ta saá ke̱e ta̱Jesús kua̱ꞌa̱n ra. Ta naxíka xíꞌin ra kua̱ꞌa̱n na xíꞌin ra nda̱ ñoo estado Judea, ta sa̱kán loꞌo ki̱vi̱ ndóo na ñoo yóꞌo, ta sákuchu na ni̱vi.

2 Corintios 4:5

Ta saá, ki̱vi̱ káꞌa̱n ndoso ndi̱ to̱ꞌon no̱o̱ ndó, ta to̱ꞌon ña káꞌa̱n ndi̱ o̱n si̱ví xa̱ꞌa̱ ña kasa káꞌno xíꞌin mi̱i ndi̱ kúu ña, ta kuiti káꞌa̱n ndi̱ xa̱ꞌa̱ ña kasa káꞌno ndi̱ Jesucristo, ta ndáto̱ꞌon ndi̱ ndí Jesucristo kúu Ta̱a ta̱Káꞌno no̱o̱ ndiꞌi ña yóo ñoyívi. Ta ndáto̱ꞌon ndi̱ xíꞌin ndó ndí kúu ndi̱ ni̱vi na kísa chiño no̱o̱ ndó, ta kéꞌé ndi̱ saá xa̱ꞌa̱ ña kíꞌvi ní ini ndi̱ xíni ndi̱ Jesucristo.

1 Corintios 15:47

Kui̱ya̱ xi̱na̱ꞌá ní Ndios ti̱in ra yaa̱ no̱o̱ ñoꞌo̱, ta xíꞌin yaa̱ yóꞌo ki̱sa va̱ꞌa ra ta̱a ta̱no̱ó. Ta inka̱ no̱o̱ ta̱a, ta̱ kúu Jesucristo, ta̱yóꞌo ke̱e ra ñoyívi ni̱no ta ki̱xaa̱ ra no̱o̱ ñoꞌo̱ yóꞌo.

1 Corintios 2:8

Ta nda̱ ñii ni̱vi na kúu nachiño na xáꞌnda chiño no̱o̱ ni̱vi ñoyívi yóꞌo, o̱n vása ní‑kunda̱a̱ ini na yu kúu ña chi̱tóni̱ Ndios. Saá chi tá ní kunda̱a̱ ini na ñava̱ꞌa chi̱tóni̱ Ndios, níkúu, ta saá o̱n vása ní‑katakaa̱ ndaa na Ta̱a ta̱Káꞌno no̱o̱ yó ndaꞌa̱ tón cruz, níkúu. Ta Ta̱a ta̱Káꞌno no̱o̱ yó yóꞌo kúu Jesucristo, ta̱a ta̱ kómí ndiꞌi ndee̱ va̱ꞌa ña náꞌno.

Hechos 10:36

Ndios siꞌna ti̱ꞌví ra ni̱vi ña ka̱ꞌa̱n ndoso na to̱ꞌon ra no̱o̱ ni̱vi na kúu sa̱ꞌya ñani síkuá ta̱Israel. Ta to̱ꞌon va̱ꞌa ra yóꞌo káchí ña ndí xa̱ꞌa̱ ña ki̱sa ndivi Jesucristo, ta̱a ta̱ kúu ta̱Káꞌno no̱o̱ ndiꞌi ña yóo, ndiꞌi ni̱vi kúchiño nakutáꞌan va̱ꞌa na xíꞌin Ndios, saá chi Jesucristo ni̱xiꞌi̱ ra ndaꞌa̱ tón cruz xa̱ꞌa̱ kua̱chi ndiꞌi ni̱vi.

Apocalipsis 19:16

Ta ta̱a ta̱káꞌno ta̱ yóso kuáyí yaa, ndíxin ra tiko̱to̱ káꞌno káni̱, ta̱nda̱ si̱ko̱n ra ta̱nda̱ no̱o̱ si̱ꞌin ra ni̱ka̱ꞌyi̱ ki̱vi̱ ra, ña káchí saá: “Ta̱Rey káꞌno no̱o̱ ndiꞌi narey. Ta̱a ta̱Káꞌno no̱o̱ ndiꞌi nanáꞌno”, káchí ki̱vi̱ ña ni̱ka̱ꞌyi̱ no̱o̱ tiko̱to̱ ra.

Santiago 2:1

Nañani yó xíꞌin náki̱ꞌva̱ yó, ndóꞌó kúu na kándixa Jesucristo, Ta̱a ta̱Káꞌno no̱o̱ yó, ta̱ kómí ndiꞌi ndee̱ va̱ꞌa. Ta xa̱ꞌa̱ ña kándixa ndó saá, o̱n váꞌa naka̱xin ndó ni̱vi, saá chi ñii ki̱ꞌva xíni̱ ñóꞌó kukiꞌvi ini yó koni yó nandáꞌví xíꞌin nakuíká.

San Lucas 2:11

Ki̱vi̱ vitin ka̱ku ñii ta̱loꞌo ñoo ta̱rey David, ta ta̱loꞌo yóꞌo kúu Ta̱a ta̱ Saka̱ku ndóꞌó. Ta Cristo Ta̱a ta̱Káꞌno no̱o̱ yó kúu ra.

San Lucas 19:34

Ta nda̱kuii̱n na, káchí na saá: ―Mi̱i ta̱Káꞌno no̱o̱ yó xíni̱ ñóꞌó rí ―káchí na xíꞌin na.

San Lucas 19:31

Tá yóo ni̱vi na nda̱ka̱ to̱ꞌon ndóꞌó: “¿Nda̱chun ndáxin ndó burro yóꞌo?”, kachí na xíꞌin ndó, ta ndakuii̱n ndó, kachí ndó saá xíꞌin na: “Ta̱Káꞌno no̱o̱ yó xíni̱ ñóꞌó rí”, kachí ndó xíꞌin na ―káchí ta̱Jesús xíꞌin o̱vi̱ naxíka xíꞌin ra.

San Lucas 1:76

Ta saá ni̱ka̱ꞌa̱n ra xíꞌin tikuáꞌá loꞌo sa̱ꞌya ra, káchí ra saá: Yóꞌó, ta̱loꞌo, ki̱vi̱ kukáꞌno ún, ta kuu ún ta̱profeta ta̱ ka̱ꞌa̱n ndoso to̱ꞌon Ndios. Ndasa va̱ꞌa ún yichi̱ xa̱ꞌa̱ ña kivi kixaa̱ Ta̱a ta̱Káꞌno no̱o̱ yó, ta̱a ta̱ va̱xi ñoyívi yóꞌo, ta yóꞌó kuu ta̱ ko̱ꞌo̱n siꞌna no̱o̱ ra.

San Lucas 7:13

Ta xi̱ni ta̱Jesús ñáyóꞌo, ta na̱taꞌví ní ini ra xi̱ni ñaꞌá ra, ta ni̱ka̱ꞌa̱n ra xíꞌin ñá: ―O̱n kuaku ún ―káchí ra xíꞌin ñá.

San Lucas 7:19

ta ti̱ꞌví ra na kua̱ꞌa̱n na no̱o̱ ta̱Jesús, ña nda̱ka̱ to̱ꞌon na ra siꞌa: ―¿Án yóꞌó kúu ta̱a ta̱ ndáti ndi̱ tiꞌví Ndios saka̱ku ra na ñoyívi yóꞌo, án kundati ka̱ ndi̱ inka̱ ra?

1 Corintios 1:17

Saá chi o̱n si̱ví xa̱ꞌa̱ ña sakuchu i̱ ni̱vi kúu xa̱ꞌa̱ ña ti̱ꞌví Cristo yi̱ꞌi̱, ta xa̱ꞌa̱ ña ka̱ꞌa̱n ndoso i̱ to̱ꞌon va̱ꞌa xa̱ꞌa̱ ra kúu ña ti̱ꞌví ra yi̱ꞌi̱. Ta o̱n si̱ví to̱ꞌon ña ndíchí ña káku si̱ni̱ ni̱vi kúu to̱ꞌon ña ndáto̱ꞌon i̱ xíꞌin ni̱vi xa̱ꞌa̱ ra. O̱n vása chíkaa̱ i̱ ndee̱ ña sanoo i̱ ini ni̱vi xíꞌin to̱ꞌon ña ndíchí si̱ni̱ ni̱vi, chi tá yi̱ꞌi̱ keꞌé i̱ saá, níkúu, ta chikaa̱ i̱ ni̱no̱ ndee̱ ña ni̱xiꞌi̱ Cristo ndaꞌa̱ tón cruz xa̱ꞌa̱ kua̱chi ni̱vi.