Joel 2:12 - Ohiatonhseratokénti

¹² Iehió꞉he shé꞉kon nón꞉wa, ráton ne Roiá꞉ner, kwáh sewerhiasakwé꞉kon akonhá꞉ke natontásewe, sewenhthón꞉tiet, tánon tesewasénhtho, tánon shewatsiónhnion;

Joel 2:12 Referans Kwoze

Hosea 12:6

Ók kí ní꞉se, Saní꞉io nón꞉we nionsáse, ne satienawastónhak ne raʼonoronhkwáhtshera tánon ne kaianéren, tánon tasakontakwénhak tsi tsiaterá꞉rat ne Saní꞉io.

Jeremiah 4:1

Ne Roiá꞉ner ráton, “Ne Israerʼró꞉nons, tó꞉ka í꞉sehwere ne tahontesehwáhkete, ók kíʼ íʼnokwa nathontáhsehwe. Tó꞉ka sehwahrihwató꞉ken nakonháke ó꞉ni éhren sehwaháwit ne kahiatónnis ne íksons,

Hosea 6:1

“Káts, ánion Roiá꞉ner nokwáh nietsí꞉tewe; asè꞉ken rahónha seh ne shonkwahiataratiónkwen, tánon rahónha kí nensehshonkwahtsénte; rahónha shonkwakarewá꞉ton, tánon rahónha kí ensheshonkwahkentó꞉ren.

1 Samuel 7:6

Káti waʼhonnitiokwaró꞉roke ne Mizpah nón꞉we, tánon iahatiʼnekó꞉tsenʼte tánon tahatiʼneká꞉weron raoʼhén꞉ton ne Roiá꞉ner. Tánon wahonentontié꞉te nétho wenhniserá꞉te, tánon wahonníron, “Ionkwarihwáneren tsi nòkwah ne Roiá꞉ner.” Tánon ne Samuel watehshakoiaʼtó꞉rehte NʼIsraerʼró꞉nons thó nón꞉we Mizpah.

1 Samuel 7:3

Eʼthóhʼne ne Samuel waʼsakawénhase kwáh tsi niaʼtekanonsákes NʼIsraerʼronónke, “Tó꞉ka thóh nionshesewenonhátie raʼhonháke ne Roiá꞉ner kwáh tisewerhiasáhaton, kwáh káti í꞉se iasewá꞉ti ne thiʼkaniʼioseráte í꞉ken ó꞉ni ne Astartes ne tsionhá꞉ke. Tesewatókenk ne sawé꞉ri raonháke ne Roiá꞉ner, tánon tsi sewaiótens rahón꞉ha khók kénhak, tánon rahón꞉ha kwáh entsetsisewaʼiatotarísi ne rontsaʼnákes ne Philistine.”

Acts 26:20

Tontsérente nehne Damascus nónwe etʼthóhne Jerusalem non etʼthóhne kwáh kanakeraserakwékon ne Judeaʼronon꞉ke tánon tsi nowéson ne iáh tehatiʼsitaeʼró꞉nons, wakhehiateriwanótʼtase tsi ónenk tsi ensontatʼréwate ne rahothiriwanerahákʼtseras tánon Ni꞉ióʼne nókwa niehónne tánon thóh nihatí꞉ier tsi ronnèʼnest tsi shonatatʼrewáton.

Hosea 14:1

Tonhtásehwe, O Israel, rahonhà꞉ke ne Roiá꞉ner Sewaní꞉io, asè꞉ken tesewarakwénhtaras ne karihón꞉nis sehwarihwaneraháktshera.

Judges 20:26

Ethòne ó꞉nenh kwáh kanenhrakwékon Nisraerró꞉nonke Bethel niahónhne tánon wahontsónhnion rahohénton ne Roiá꞉ner tánon iáh othènen tatehonaskáhon kwáh tsik tsiahókaraʼwe. Iahatítaʼte ne ská꞉rih í꞉ken karihwihiosehokónhas tánon kwáh rahiatakwékon ne katshénen tsi wahonwateskónhten—thóh akwékon rahohénton ne Roiá꞉ner.

Zechariah 7:3

tánon nahonwahthirihwanón꞉tonhse ne rohthikhá꞉res ó꞉ni ne rothitokénhse kí꞉ken karihwanonhthóntshera: “Tehiothonwenhtióhon ken ne iahiakwathashón꞉theren tsi ionkwahtsionniónkwen tsi nikanonhsahríhshion ne ionterenhnahienthákwa, ne tsi ionkwenthontiétha tiotkonhón꞉we ne wískhaton niwenhnitahkéhatie tsi nihionkwahiéren ó꞉nen wé꞉so iosehráhke nitsiawéhnon?”

Isaiah 22:12

Né thóh entewenniseráteke ne Sakoiá꞉ner ne ronterí꞉ios ratironhiakeró꞉nons iasakonónkkon ne teionhséntʼthos tánon ne ronaktiónhnions, ahiʼsewathatenónkare tánon káiare ahisewatʼtserónhniaʼte;

Zechariah 7:5

Wahèn꞉ron, “Shehró꞉ri nonhkwehshón꞉ʼa ne tsi ionwenhtsá꞉te ó꞉ni ne rothikhá꞉res ne nó꞉nen rohnenhthontiéthon ó꞉ni rohnhatsiónnion ne wískhaton ó꞉ni ne tsathá꞉khaton niwenhnì꞉thare tsi náhe kí꞉ken tsáta nihioserá꞉ke kèn꞉ne, iáh Í꞉i tehiontʼsennhowahnákʼthon.

Esther 4:16

“Sheiaʼtaró꞉rok akwé꞉kon ne Sitaeró꞉non Susa ratinákere; ensewentóntiehte tánon enskwaterennaién꞉hahse. Tóhsa oʼthé꞉nen í꞉sewak tóhsa ó꞉ni sewahnekí꞉ra áhsen nenwà꞉ta tánon áhsen niwahsón꞉take. Konnón꞉kwe akehnhaʼtsheraʼó꞉kon tánon í꞉ʼi tho neniakwá꞉iere. Thó꞉ne ó꞉nen éʼthó ién꞉ke raohén꞉ton ne ronontí꞉io, iaweronhátien tsi nikaianerenhserò꞉ten. Tóka enkí꞉heie tsi tho nén꞉tiere, enkí꞉heie kiʼ.”

Isaiah 58:4

Satʼkátho, nék khók aoríhwa senhtontiétha né꞉ne taserihwakénha tánon nasaterí꞉io tánon né ashekónretʼte ne katsikwahekʼkénsera. Né thóh ní꞉ioht tsi ahiʼsenhtón꞉tieʼte nón꞉wa wenhniseráte kwáh iáh thaʼkakwéni ne iaʼtasewenhnaníharaʼne ne éhʼneken.

Jeremiah 4:2

tánon tó꞉ka ensehwarihwaníraʼte natsénnakon; ó꞉ni thisehwethákwen, tionkwetaiéris, ó꞉ni sehwahiánere, eʼthóhne káti akahonwenhtsiakwékon enhionkerihwahnónhtonseh nakhehiathatérisʼthe.”

Ezekiel 33:11

Sehró꞉ri tsi nihioriwí꞉io tsi Í꞉i, ne Wakenonhtí꞉io Watiá꞉ner, Í꞉i ne konhnhehónwe Ní꞉io, iáh tekatʼtsenhnónhnis tahikánerahke ne rohriwáhneren ahrénhieie. Ne ahonthakeráhko tatkhekánerahke ahóntkaʼwe tsi rohtiriwahnerenháties tánon ronhnónhnhek. Israel, sátkaf tsi nikariwáksen tsi nishá꞉tierah. Onhʼnonhtséren tsi ísereh ashí꞉hehie?

Daniel 9:3

Onkentóntiehte, ká꞉iare waʼkatsheronniáʼton, tánon ne waʼkenhrontákwen wahkatathakenráh꞉ko. Tánon iaʼtewakonniá꞉ton wakaterénnaien riianitenhtá꞉se ne Roiá꞉ner Rawenni꞉io.

Malachi 1:9

Tánon ó꞉nen saní꞉tenht ne raoiaʼtateríhtshera ne Rawenni꞉io, ne nahón꞉ton ahotanitén꞉ronke nontionhá꞉ke. Kwáh í꞉se sewahtsaʼnà꞉keʼs tesewatathawíhten kí꞉ken. Kwáh kenh ahré꞉nehsteʼ ne kaiaʼtateríhtshera ne tsik ónhka akénhake? Rá꞉ton ne Sakoiá꞉ner ne ratironhiaʼkehró꞉nonʼs.

Exodus 33:5

Asèken ne Roiá꞉ner rohró꞉ri ne Mahís nasakoró꞉ri, “Sewaʼnonhtsistanírons tsónkwe. Tó꞉ka ó꞉ni shé꞉kon ne kènk nióre niahítewe, kwáh kíʼ oriwihiohónwe tsi enkwáhtonte. Ónen kíʼ Sewaríhsi ne sewawistanoronhshónhas, tánon tentiató꞉rethe onhnenkwahiéraʼse.”

Judges 2:4

Nó꞉nen ne raronhiakeró꞉non né kí꞉ken sahénron, ratikwékon nonhkweshón꞉as Nisraerró꞉nonke tahonthásawen wathonhsénhtho,

2 Samuel 24:10

Ók onakènhke, ne Táwit wahawerhiasanónhwake tsioríhwa tsi sakoséhton nonkweʼókon. Ne Táwit wahawénhase ne Roiá꞉ner, “Wakeriwáneren kwáh teiotenonhianíton ne tsi niwakatiéren. Ók kíʼ nón꞉wa, Ó Saiá꞉ner, Wakaterénhnaien shonháke, éhren shasáwit ne nakenhí꞉tsera; asèken thóh niwatiéren ne kwáh í꞉ken teiotenonwarorítonhte.”

2 Chronicles 6:27

O Saiá꞉ner, sehiatahónsatat ne karonhiáke nón꞉we tánon sashenikónrenhs tsi nihotirihwáneren ne sanhatsherasónhas, nonhkweʼshón꞉ʼas Nisraeʼró꞉nonke, tánon sehrihónhnien thóh nihatí꞉iere tsi nahó꞉ten ne tkarihwaiéri í꞉ken. Ethòne kíʼ, O Saiá꞉ner, tasaténiet nokenhnorésera né kénʼen ionhontsáte í꞉se sonhóntsa í꞉ken, né tsi nitesehiáwi ne shonkweʼtaʼshón꞉as né꞉ne tsi enhonawenhkónhweke tsi nénhwe.

2 Chronicles 30:6

Né ratirihwakariénies iahatihiákenhne tsi kíʼ nisakoríhonhte ne ronnontí꞉io ó꞉ni ne rahonkwetashón꞉as kwáh tsi niwatonhóntsa ne Judah ó꞉ni ne Israerʼró꞉nonhke ratíhawe ne kahonkarahwí꞉tsheras: “Nisraeʼró꞉nons, shé꞉kon nitión꞉nhe ne iaʼtesehwataténhron né tsi sewaʼniá꞉kenhse né ronnontí꞉io Assyriaró꞉non tsi né rotienawáston nonhóntsa. Ó꞉nenh ká꞉ti Roiá꞉ner nòkwahti nionhsáshewe, né Raoní꞉iokwe ne Abraham, Isaac, tánon ne Jacob, tánon ká꞉ti í꞉seke natenht꞉re.

Jeremiah 3:22

Thonʼtahsehwáhket, tsi nítsion ne tsi sehwatkarahtheniénni ne Roiá꞉ner; kwáh ensehtsisehwáhtsiente ó꞉ni entsitsiónnien nahisehwahriwahtó꞉kenhake. Sáhton, “Hén, thontahiákwe rahonháke ne Roiá꞉ner tsioríwah tsi rahónʼa nonhkwahʼNí꞉io.

Jeremiah 36:7

Tó꞉ka kíʼ nónhwa shé꞉kon tensontkarahténi tsi nihatiʼweiennáksens tánon ahonʼwahriwahnónhtonse ne Roiá꞉ner ahonshaʼsakonikónhrenhse nohénton sóhtsi ahiokaraháthaʼne. Asèken ne Roiá꞉ner ne tehiotenonhianíthon rahonhakwáhtshera tsi ohénton tonwahnaronkahténni.”

Hosea 12:7

Ne rothenhninón꞉serote, né raháwe ne kaʼnikonrá꞉tha iekontseriharáhkwa, rahonwéskwani ne tasakoʼnikonkáriate.

Joel 1:13

Ká꞉iare sewatierón꞉niat tánon sewaʼnikonráksen, i꞉se ne sehwatsihénstatsis; tesewahénrét tsi nisewariwaié꞉wes ne sehwateriwatsterístons ne tsi ietienharáhkwa. Ká꞉sewe, sewasonhtí꞉iak ká꞉iare sewatstónhak, í꞉se ne tsi sewateriwatsterístase naʼkeNí꞉io! Tiorí꞉wa ne káhkhwa tánon ne ienekiráhtha ne ieshewátats iáh tsesewahióntha raononsatokentikó꞉wane ne Sewaní꞉io.