Mateo 8:20 - Mixteco del suroeste de Tlaxiaco Oaxaca

²⁰ Jee nkachiꞌ Jesús nu̱u̱nꞌ‑u: ―Rá ñu̱nkuii chi íyó rá yaviꞌ kava nu̱u̱nꞌ kíxíꞌ rátíꞌ, jee rá kitɨ chúchíyoꞌ ya̱ jíkó súkún íyó takaꞌ rátíꞌ. Soo nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, ni ntu̱ví íyó nu̱u̱nꞌ kosoꞌ xi̱ni̱ꞌ ni̱ꞌ najia̱ví ni̱ꞌ ―nkachiꞌ Jesús.

Mateo 8:20 Referans Kwoze

Lucas 2:7

Jee nsi̱káku ña se̱ꞌya yɨ́ɨ́ ña ya̱ kúvi se̱ꞌya xíꞌnañúꞌún ña, jee nsu̱kún ña saꞌma maa, jee ñakɨnꞌ ña maa nu̱u̱nꞌ káá ya̱ yájíꞌ rá sa̱na̱ꞌ, chi ntu̱ví íyó núne ka̱ꞌ iniꞌ veꞌi nu̱u̱nꞌ kínóo rá ñɨvɨ.

2 Corintios 8:9

Chi ya̱ jíníꞌ rán ya̱ íyó mániꞌ iniꞌ I̱toꞌoꞌ‑ó Jesús ya̱ kúvi Cristo néꞌyá re̱ꞌ yó ya̱ sáꞌá re̱ꞌ ya̱ váꞌa jín‑ó. Chi sú kúká re̱ꞌ chi xi̱ntíín re̱ꞌ ví nɨꞌɨ ya̱ íyó, soo nna̱saꞌá láꞌví re̱ꞌ maáréꞌ jie̱ꞌe̱ꞌ ya̱ kúvi ya̱ váꞌa nu̱u̱nꞌ ránoꞌó, sáva ni̱ꞌi̱nꞌ‑órán ya̱ yɨ́yáꞌvi ka̱ꞌ ya̱ táji Ndiosíꞌ, jie̱ꞌe̱ꞌ ya̱ nnoꞌo láꞌví Cristo.

Lucas 2:16

Saájee ne̱ numíjiꞌíꞌ kua̱ꞌa̱nꞌ ráa, jee nna̱niꞌinꞌ ráa María jín José, jín nchíkɨ́n vá, káá‑a ɨɨn nu̱u̱nꞌ ñúꞌún ya̱ yájíꞌ rá sa̱na̱ꞌ.

Lucas 2:12

Jee yaꞌá kúvi‑i ɨin seña nu̱u̱nꞌ ránú sáva nakuniꞌ rán maa: ya̱ naniꞌinꞌ rán ɨɨn nchíkɨ́n yɨ́kɨ́n yɨ́sukunꞌ‑u saꞌma jee káá‑a ɨɨn nu̱u̱nꞌ káá ya̱ yájíꞌ rá sa̱na̱ꞌ ―nkachiꞌ najiáꞌáꞌ ííꞌ vá.

Lucas 8:3

Jee inka ka̱ꞌ ví Juana, ñasɨ́ꞌɨ́ Chuza, te̱e tátúníꞌ nu̱u̱nꞌ rá musúꞌ veꞌi Herodes te̱e nísotíñú, jee inka ví Susana, jín kue̱ꞌe̱ꞌ ka̱ꞌ ñaꞌan, jee maáráña yɨ́tíñú ráa chíneí ráa Jesús jín rá nantíñú maáráa jie̱ꞌe̱ꞌ ya̱ jíniñúꞌún re̱ꞌ jín rá te̱e kútáꞌán jín re̱ꞌ.

Mateo 12:32

Jee néni ɨɨn káꞌánꞌ niva̱ꞌa‑a si̱kɨ̱ꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee koo tu̱ꞌun nekáꞌnú iniꞌ Ndiosíꞌ kune̱ꞌyá re̱ꞌ ñɨvɨ vá. Soo néni ɨɨn ñɨvɨ káꞌánꞌ niva̱ꞌa si̱kɨ̱ꞌ Ta̱chi̱ꞌ Ííꞌ Ndiosíꞌ, jee ni nsáꞌ kunekáꞌnú iniꞌ re̱ꞌ kune̱ꞌyá re̱ꞌ ñɨvɨ vá, ni iniꞌ ñɨ̱vɨ́ tiempúꞌ yaꞌá, ni ñɨ̱vɨ́ kiji tiempúꞌ ichinúúnꞌ.

Mateo 19:28

Jee nkachiꞌ Jesús: ―Máá nááꞌ vá káchíꞌ ni̱ꞌ nu̱u̱nꞌ rán, ya̱ sáá kenta tiempúꞌ ya̱ nɨꞌɨ nasama jiáá, sáá kenta nuꞌuꞌ, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ yaꞌá sáva kuvi ni̱ꞌ Se̱ꞌya Ñɨvɨ, jee sáá kuneeꞌ ni̱ꞌ teyuꞌ kúñáꞌnú nu̱u̱nꞌ tatúníꞌ ni̱ꞌ, nu̱u̱nꞌ viiꞌ nasɨ́kuitɨꞌ kúñáꞌnú ni̱ꞌ, jee ránoꞌó ya̱ níkɨ́nꞌ rán nuꞌuꞌ, jee suni sukuán kuneeꞌ rán ni uxúꞌ u̱vi̱ꞌ (12) teyuꞌ ñáꞌnú, sáva sanáaꞌ rán tatúníꞌ rán nu̱u̱nꞌ rá ñɨvɨ ya̱ kúvi ráa rá ni uxúꞌ u̱vi̱ꞌ (12) tataꞌ ichiyúkúnꞌ ya̱ nkene ráa nu̱u̱nꞌ rá ni uxúꞌ u̱vi̱ꞌ (12) rá se̱ꞌya yɨ́ɨ́ Israel.

Mateo 17:9

Jee sáá nnene ráa va̱nuun ráa xi̱ni̱ꞌ yuku vá, jee nta̱túníꞌ Jesús nu̱u̱nꞌ ráa, jee nkachiꞌ re̱ꞌ: ―Ni ɨɨn nu̱u̱nꞌ koto nákani rán ya̱ niniꞌ rán, ne̱kua̱ꞌ xinátekuꞌ i̱i̱ꞌ tuku Ndiosíꞌ nuꞌuꞌ kene ni̱ꞌ nteñu rá ni̱yɨ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ re̱ꞌ.

Mateo 16:27

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kiji tuku ni̱ꞌ iniꞌ ñɨ̱vɨ́ yaꞌá, jee viiꞌ víꞌí kuñáꞌnú ni̱ꞌ jín tiñu níso ni̱ꞌ kuéntáꞌ kua̱ꞌ kúñáꞌnú maá Tátáꞌ ni̱ꞌ Ndiosíꞌ, jee kiji ni̱ꞌ jín rá najiáꞌáꞌ ííꞌ ni̱ꞌ. Saájee nachunáán ni̱ꞌ nu̱u̱nꞌ ta ɨɨn rá ñɨvɨ sánikua̱ꞌ na̱ja íyó tiñu nsa̱ꞌá ráa.

Mateo 16:13

Sáá nkenta Jesús ñuꞌun ñuunꞌ tɨ́ɨn ñuunꞌ Cesarea Filipo, jee ni̱ka̱tu̱ꞌún re̱ꞌ rá te̱e súkuáꞌa re̱ꞌ vá, jee nkachiꞌ re̱ꞌ: ―¿Né ɨɨn káchíꞌ ñɨvɨ ya̱ kúvi nuꞌuꞌ?, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ñɨ̱vɨ́ ―nkachiꞌ re̱ꞌ.

Mateo 12:40

Chi kuéntáꞌ kua̱ꞌ ñúꞌún Jonás u̱ni̱ꞌ ki̱vɨ̱ꞌ jín u̱ni̱ꞌ yakuááꞌ iniꞌ ɨɨn tia̱ká máá káꞌnú nasɨ́kuitɨꞌ, jee suni sukuán kuvi jín nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, chi kɨse̱ꞌí ni̱ꞌ chi̱ji ñuꞌun u̱ni̱ꞌ ki̱vɨ̱ꞌ jín u̱ni̱ꞌ yakuááꞌ.

Mateo 12:8

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kúvi ni̱ꞌ I̱toꞌoꞌ rá ki̱vɨ̱ꞌ nájiáví, ya̱ kuvi tatúníꞌ ni̱ꞌ ná kúvi ya̱ saꞌá ñɨvɨ ki̱vɨ̱ꞌ vá ―nkachiꞌ Jesús.

Mateo 13:37

Saájee nna̱xiníkó Jesús jee nkachiꞌ re̱ꞌ: ―Te̱e ya̱ xínáváꞌ nikɨn tataꞌ váꞌa ví nuꞌuꞌ, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ñɨ̱vɨ́.

Marcos 8:38

Chi néni ɨɨn ya̱ kúkanuun‑u jie̱ꞌe̱ꞌ nuꞌuꞌ jín jie̱ꞌe̱ꞌ tu̱ꞌun ni̱ꞌ nu̱u̱nꞌ rá ñɨvɨ kua̱chi yaꞌá, ya̱ na̱ni jie̱ꞌe̱ꞌ xínóo ráa Ndiosíꞌ, jee suni maáníꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kukanuun ni̱ꞌ jie̱ꞌe̱ꞌ ñɨvɨ vá, sáá niji ni̱ꞌ va̱ne̱ꞌ tu̱u̱nꞌ nasɨ́kuitɨꞌ ya̱ viiꞌ kúñáꞌnú ni̱ꞌ jín Tátáꞌ ni̱ꞌ Ndiosíꞌ, jín rá najiáꞌáꞌ ííꞌ re̱ꞌ ―nkachiꞌ Jesús.

Lucas 9:58

Jee nkachiꞌ Jesús nu̱u̱nꞌ‑u: ―Rá ñu̱nkuii chi íyó rá yaviꞌ kava nu̱u̱nꞌ kíxíꞌ rátíꞌ, jee rá kitɨ chúchíyoꞌ ya̱ jíkó súkún íyó takaꞌ rátíꞌ. Soo nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, ni ntu̱ví íyó nu̱u̱nꞌ kosoꞌ xi̱ni̱ꞌ ni̱ꞌ najia̱ví ni̱ꞌ ―nkachiꞌ re̱ꞌ.

Lucas 12:8

Jee nkachiꞌ re̱ꞌ ka̱ꞌ nu̱u̱nꞌ rá ñɨvɨ: ―Káchíꞌ ni̱ꞌ nu̱u̱nꞌ rán, ya̱ ntáká ñɨvɨ ya̱ na̱siáꞌa ráa ya̱ nááꞌ ichinúúnꞌ rá inka ñɨvɨ ya̱ kúvi ni̱ꞌ I̱toꞌoꞌ ráa, jee nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, suni na̱siáꞌa ni̱ꞌ ya̱ nááꞌ ya̱ yɨ́ꞌɨ́ ráa nu̱u̱nꞌ ni̱ꞌ ichinúúnꞌ rá najiáꞌáꞌ ííꞌ Ndiosíꞌ.

Lucas 18:8

Chi ya̱ nááꞌ vá káchíꞌ ni̱ꞌ nu̱u̱nꞌ rán, ya̱ ñamani nasaꞌá na̱a̱ꞌ re̱ꞌ keꞌneꞌ re̱ꞌ tiñu chineí re̱ꞌ ráa. Soo nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee sáá nenta ni̱ꞌ, jee, ¿á ntu su naniꞌinꞌ ni̱ꞌ koo rá ñɨvɨ ñɨ̱vɨ́ yaꞌá ya̱ kuneí nijia iniꞌ ráa Ndiosíꞌ rúja? ―nkachiꞌ Jesús.

Lucas 21:36

Saáva nito koo rán, ka̱ka̱nꞌ táꞌvíꞌ rán nu̱u̱nꞌ Ndiosíꞌ ntáká tiempúꞌ, sáva kuneí rán ka̱ku rán nu̱u̱nꞌ nta̱ká rá tu̱nóꞌó yaꞌá kiji, jee sáva kuneí rán kenta rán kuiñɨ rán ichinúúnꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

Juan 1:51

Jee nkachiꞌ Jesús nu̱u̱nꞌ re̱ꞌ: ―Máá nááꞌ vá káchíꞌ ni̱ꞌ nu̱u̱nꞌ nú ya̱ kuniꞌ nú kunune antivɨ́ ne̱ nu̱u̱nꞌ nééꞌ Ndiosíꞌ, jee kuniꞌ rán rá najiáꞌáꞌ ííꞌ Ndiosíꞌ náa núun ráa kiji ráa nu̱u̱nꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

Juan 3:13

’Chi ni ɨɨn ntu̱náꞌ nkáa kɨ̱ꞌɨ̱nꞌ antivɨ́, chisaꞌ métúꞌún ni ya̱ nééꞌ antivɨ́ ya̱ nki̱nkuun ne̱ antivɨ́ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ.

Juan 3:14

Kuéntáꞌ nkuvi sáá nsi̱káa Moisés nte̱kaa re̱ꞌ ɨɨn ko̱o̱ꞌ ka̱a nu̱u̱nꞌ yutun nu̱u̱nꞌ ñu̱ꞌún saɨn, jee suni sukuán íyó sikáa ñɨvɨ tekaa ráa nuꞌuꞌ nu̱u̱nꞌ yutun, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ.

Juan 6:27

Koto nániꞌvɨꞌ iniꞌ rán jie̱ꞌe̱ꞌ ya̱ yájíꞌ ya̱ tívɨ́. Chisaꞌ naniꞌvɨꞌ iniꞌ rán ni̱ꞌi̱nꞌ rán kuéntáꞌ ɨɨn ya̱ yájíꞌ ya̱ íyó nɨ́ɨ́nkání ya̱ sáꞌá‑a ya̱ kutekuꞌ rán nɨ́ɨ́nkání jín Ndiosíꞌ. Yaꞌá vá taji ni̱ꞌ nu̱u̱nꞌ ránoꞌó, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, chi Tátáꞌ ni̱ꞌ Ndiosíꞌ nstúvi re̱ꞌ nu̱u̱nꞌ ñɨvɨ ya̱ ñani re̱ꞌ nuꞌuꞌ kuniso ni̱ꞌ tiñu vá sáva nakuniꞌ ñɨvɨ níso ni̱ꞌ tiñu vá.

Juan 6:53

Saáva nkachiꞌ Jesús nu̱u̱nꞌ ráa: ―Máá nááꞌ vá káchíꞌ ni̱ꞌ nu̱u̱nꞌ rán: Retú nsáꞌ kajiꞌ rán yɨkɨkúñu ni̱ꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee retú nsáꞌ koꞌo rán ni̱ñɨ̱ꞌ ni̱ꞌ, jee nsáꞌ ni̱ꞌi̱nꞌ rán ya̱ kutekuꞌ rán nɨ́ɨ́nkání jín Ndiosíꞌ.

Juan 6:62

¿Ná kukaꞌvi iniꞌ rán retú kuniꞌ rán nuꞌuꞌ kɨ̱naa ni̱ꞌ ne̱ antivɨ́ nu̱u̱nꞌ nneeꞌ ni̱ꞌ ne̱ xíꞌnañúꞌún? Maáníꞌ kúvi maáréꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ.

Juan 12:34

Saájee nna̱xiníkó rá ñɨvɨ nu̱u̱nꞌ re̱ꞌ: ―Ya nteso̱ꞌo ránꞌ ya̱ nu̱u̱nꞌ Tutuꞌ níso tu̱ꞌun ley Ndiosíꞌ káchíꞌ ya̱ máá Cristo kutekuꞌ‑u nɨ́ɨ́nkání. Jee, ¿na̱ja chi káchíꞌ nú íyó naneꞌen ráa maáréꞌ ya̱ nta̱jí Ndiosíꞌ re̱ꞌ nu̱u̱nꞌ ñɨ̱vɨ́ sáva kuvi Se̱ꞌya Ñɨvɨ nu̱u̱nꞌ kunintakaa? ¿Né ɨɨn kúvi maáréꞌ ya̱ nta̱jí Ndiosíꞌ re̱ꞌ nu̱u̱nꞌ ñɨ̱vɨ́ sáva kuvi re̱ꞌ Se̱ꞌya Ñɨvɨ rúja? ―nkachiꞌ ráa.

Juan 13:31

Jee sáá nkene Judas kua̱ꞌa̱nꞌ re̱ꞌ, jee nkachiꞌ Jesús: ―Nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee vitan jee ya̱ túvi nijinꞌ nu̱u̱nꞌ rá ñɨvɨ na̱sa kúñáꞌnú nasɨ́kuitɨꞌ ni̱ꞌ jín tiñu níso ni̱ꞌ, jee túvi ya̱ kúñáꞌnú nasɨ́kuitɨꞌ ka̱ꞌ Ndiosíꞌ jie̱ꞌe̱ꞌ tiñu saꞌá ni̱ꞌ.

Hechos 7:56

Jee nkachiꞌ re̱ꞌ: ―¡Kune̱ꞌyá rán! Néꞌyá ni̱ꞌ núne antivɨ́ nu̱u̱nꞌ nééꞌ Ndiosíꞌ. Jee néꞌyá ni̱ꞌ Jesús, ya̱ nta̱jí Ndiosíꞌ re̱ꞌ nu̱u̱nꞌ ñɨ̱vɨ́ sáva kuvi re̱ꞌ Se̱ꞌya Ñɨvɨ, jee íñɨ́ re̱ꞌ ichi kuáꞌá Ndiosíꞌ ―nkachiꞌ Esteban.