Mateo 26:64 - Mixteco del suroeste de Tlaxiaco Oaxaca

⁶⁴ Jee nkachiꞌ Jesús nu̱u̱nꞌ re̱ꞌ: ―Nuꞌuꞌ ví‑i sáni nkachiꞌ kí nú maa, soo káchíꞌ ni̱ꞌ nu̱u̱nꞌ rán ya nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee ne̱ vitan kuniꞌ rán nuꞌuꞌ kuneeꞌ ni̱ꞌ xiín ichi kuáꞌá Ndiosíꞌ ya̱ níso fuersáꞌ ííꞌ nu̱u̱nꞌ nɨꞌɨ, nu̱u̱nꞌ kúñáꞌnú ni̱ꞌ jín re̱ꞌ, jee kuniꞌ rán niji ni̱ꞌ nu̱u̱nꞌ vi̱ko̱ꞌ súkún ―nkachiꞌ Jesús.

Mateo 26:64 Referans Kwoze

Marcos 14:62

Jee nkachiꞌ Jesús: ―Nuꞌuꞌ ví‑i. Jee nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, kuniꞌ rán nuꞌuꞌ kuneeꞌ ni̱ꞌ xiín ichi kuáꞌá Ndiosíꞌ ya̱ níso fuersáꞌ ííꞌ nu̱u̱nꞌ nɨꞌɨ, nu̱u̱nꞌ kúñáꞌnú ni̱ꞌ jín re̱ꞌ. Jee kuniꞌ rán niji ni̱ꞌ nteñu vi̱ko̱ꞌ súkún ―nkachiꞌ re̱ꞌ nu̱u̱nꞌ ráa.

Hebreos 1:3

Jee ne̱ tu̱u̱nꞌ maá Se̱ꞌya re̱ꞌ viiꞌ kúñáꞌnú‑u mákua kúñáꞌnú re̱ꞌ, chi nuún náku‑u iniꞌ re̱ꞌ, chi ɨɨn ni kuvi ni núvíꞌ ráa. Jee tu̱ꞌun káꞌánꞌ Se̱ꞌya re̱ꞌ níso fuersáꞌ ííꞌ jee jín tu̱ꞌun tátúníꞌ Se̱ꞌya re̱ꞌ íyó kutú nɨꞌɨ ya̱ íyó. Jee sáá nkuvi nna̱sánoo‑o yó nu̱u̱nꞌ kua̱chi‑ó jie̱ꞌe̱ꞌ ya̱ nsa̱ꞌá‑a, jee nna̱kuneeꞌ‑e ichi kuáꞌá nu̱u̱nꞌ nééꞌ re̱ꞌ kúñáꞌnú re̱ꞌ tátúníꞌ re̱ꞌ ne̱ antivɨ́ súkún.

Apoclipsis 1:7

¡Kune̱ꞌyá rán!, chi nenta Cristo nu̱u̱nꞌ viko, jee ntáká rá ñɨvɨ kuniꞌ jín núunꞌ ráa re̱ꞌ, jee suni ne̱ rá ñɨvɨ ya̱ nkaanꞌ ráa yaviꞌ re̱ꞌ ñaꞌniꞌ ráa re̱ꞌ kuniꞌ jínúunꞌ ráa re̱ꞌ. Saájee suni ne̱ ntáká rá tataꞌ rá ñɨvɨ íyó kua̱íyó iniꞌ ñɨ̱vɨ́ yaꞌá, jee jiaku iniꞌ ráa kunaꞌyuꞌ ráa ya̱ ntu ni̱nu̱ꞌ iniꞌ ráa kaníjiá ráa re̱ꞌ. Saá nijia, sukuán koo.

Hebreos 12:2

Kunenu̱u̱nꞌ‑ó Jesús ya̱ nu̱u̱nꞌ maáréꞌ va̱ji ya̱ kuneí iniꞌ‑ó re̱ꞌ, jee síkújia re̱ꞌ iniꞌ‑ó ya̱ kuneí va̱ꞌa iniꞌ‑ó re̱ꞌ ne̱ nu̱u̱nꞌ nɨꞌɨ. Chi ñeꞌneꞌ iniꞌ re̱ꞌ nnoꞌo re̱ꞌ nu̱u̱nꞌ kurúsiꞌ, jee ntu ntɨ́ɨn kuéntáꞌ re̱ꞌ ya̱ ku̱ꞌva rá ñɨvɨ tu̱nkánuun nu̱u̱nꞌ re̱ꞌ ya̱ kuviꞌ re̱ꞌ sukuán, chi njia̱ꞌa Ndiosíꞌ re̱ꞌ ya̱ kusɨ̱ɨ̱ꞌ víꞌí iniꞌ re̱ꞌ ichinúúnꞌ jee suni nna̱kuneeꞌ re̱ꞌ ichi kuáꞌá teyuꞌ nu̱u̱nꞌ nééꞌ Ndiosíꞌ tátúníꞌ‑i.

Lucas 21:27

Saájee kuniꞌ rá ñɨvɨ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, kiji ni̱ꞌ nu̱u̱nꞌ vi̱ko̱ꞌ jín fuersáꞌ ííꞌ níꞌin níso ni̱ꞌ ya̱ viiꞌ nasɨ́kuitɨꞌ kúñáꞌnú ni̱ꞌ ya̱ va̱ne̱ꞌ tu̱u̱nꞌ kujianu̱te̱ꞌ nuva ni̱ꞌ.

Mateo 24:30

Saájee nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ jee tu̱vi seña nuꞌuꞌ ne̱ súkún, saájee kunaꞌyuꞌ nɨꞌɨ kuitɨꞌ rá ñɨvɨ ñuunꞌ íyó ñɨ̱vɨ́ yaꞌá, jee kuniꞌ ráa nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee niji ni̱ꞌ nu̱u̱nꞌ vi̱ko̱ꞌ súkún jín kue̱ꞌe̱ꞌ nasɨ́kuitɨꞌ fuersáꞌ ííꞌ níꞌin níso ni̱ꞌ, jín ya̱ viiꞌ nasɨ́kuitɨꞌ kúñáꞌnú ni̱ꞌ ya̱ va̱ne̱ꞌ tu̱u̱nꞌ kujianu̱te̱ꞌ nuva ni̱ꞌ.

Mateo 26:25

Saájee nna̱xiníkó Judas, te̱e ya̱ naku̱ꞌva re̱ꞌ Jesús, jee nkachiꞌ re̱ꞌ: ―¿Á nuꞌuꞌ ví‑i rúja?, Mestrúꞌ ―nkachiꞌ Judas. ―Maánú káchíꞌ maa ―nkachiꞌ Jesús.

Mateo 25:31

’Chi sáá niji tuku ni̱ꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee viiꞌ víꞌí kuñáꞌnú ni̱ꞌ, jee nɨꞌɨ rá najiáꞌáꞌ ííꞌ kutáꞌán ráa jín ni̱ꞌ, saájee ki̱kuneeꞌ ni̱ꞌ teyuꞌ nu̱u̱nꞌ tatúníꞌ ni̱ꞌ nu̱u̱nꞌ viiꞌ ñáꞌnú nasɨ́kuitɨꞌ.

Mateo 16:27

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kiji tuku ni̱ꞌ iniꞌ ñɨ̱vɨ́ yaꞌá, jee viiꞌ víꞌí kuñáꞌnú ni̱ꞌ jín tiñu níso ni̱ꞌ kuéntáꞌ kua̱ꞌ kúñáꞌnú maá Tátáꞌ ni̱ꞌ Ndiosíꞌ, jee kiji ni̱ꞌ jín rá najiáꞌáꞌ ííꞌ ni̱ꞌ. Saájee nachunáán ni̱ꞌ nu̱u̱nꞌ ta ɨɨn rá ñɨvɨ sánikua̱ꞌ na̱ja íyó tiñu nsa̱ꞌá ráa.

Apoclipsis 20:11

Jee niniꞌ ni̱ꞌ ɨɨn teyuꞌ kuíjín kúñáꞌnú nu̱u̱nꞌ kuna̱a̱ꞌ tiñu. Jee yukuán nééꞌ Ndiosíꞌ ya̱ tátúníꞌ re̱ꞌ tiñu. Jee nkuiyo ñɨ̱vɨ́ jín súkún nu̱u̱nꞌ re̱ꞌ. Chi ntu̱ví ka̱ꞌ né núꞌ koo ráa nu̱u̱nꞌ re̱ꞌ.

1 Tesalonicenses 4:16

Chi máá maá I̱toꞌoꞌ‑ó kinkuun súkún, sáá kanajíín Ndiosíꞌ tatúníꞌ re̱ꞌ, jee kanajíín ɨɨn ta̱chi̱yuꞌú ɨɨn najiáꞌáꞌ ííꞌ kúñáꞌnú ka̱ꞌ, ya̱ káchíꞌ‑ó arcángel, jee tivɨꞌ nusuꞌ ɨɨn trompeta Ndiosíꞌ. Saájee rá níꞌiꞌ ya̱ yɨ́ꞌɨ́ ráa nu̱u̱nꞌ Cristo, xíꞌnañúꞌún ráa ka̱ꞌ natekuꞌ i̱i̱ꞌ ráa jee nako̱o yɨkɨkúñu ráa.

Hechos 1:11

Jee nkachiꞌ núvíꞌ rá te̱e vá nu̱u̱nꞌ ráa: ―Rá te̱e Galilea, ¿na̱ kuvi chi íñɨ́ rán néꞌyá rán súkún? Jesús yaꞌá, ya̱ nkene‑e nteñu rán jee nnaa‑a ne̱ súkún, nuún niji tuku‑u mákua niniꞌ rán maa kua̱ꞌa̱nꞌ‑a súkún ―nkachiꞌ núvíꞌ rá te̱e vá.

Juan 18:37

Saájee nkachiꞌ Pilato nu̱u̱nꞌ Jesús: ―¿Á noꞌó kúvi te̱e nísotíñú tátúníꞌ nú résa? Jee nna̱xiníkó Jesús: ―Suvini̱ꞌ kúvi te̱e nísotíñú tátúníꞌ ni̱ꞌ kuéntáꞌ ya̱ nkachiꞌ kí nú. Chi jie̱ꞌe̱ꞌ yaꞌá kúvi ya̱ va̱ji ni̱ꞌ nkaku ni̱ꞌ iniꞌ ñɨ̱vɨ́ yaꞌá, sáva kachiꞌ ni̱ꞌ ya̱ naáꞌ. Ntáká ñɨvɨ ya̱ íñɨ́‑ɨ jín ya̱ naáꞌ, jee ñúꞌún iniꞌ ráa tɨ́ɨn ráa tu̱ꞌun káchíꞌ ni̱ꞌ ―nkachiꞌ Jesús.

Lucas 22:70

Saájee ni̱ka̱tu̱ꞌún nta̱ká ráa: ―Saájee, ¿á maánú kúvi Se̱ꞌya Ndiosíꞌ résa? ―nkachiꞌ ráa. Jee nkachiꞌ Jesús nu̱u̱nꞌ ráa: ―Suvi kúvi nijia ni̱ꞌ sánikua̱ꞌ káchíꞌ maárán ya̱ kúvi ni̱ꞌ ―nkachiꞌ Jesús.

Mateo 27:11

Jee náka ráa Jesús nkenta ichinúúnꞌ te̱e nísotíñú naní Pilato, ya̱ kúvi gobernador, jee ni̱ka̱tu̱ꞌún Pilato Jesús: ―¿Á noꞌó kúvi te̱e kúñáꞌnú ya̱ tátúníꞌ nu̱u̱nꞌ rá ñɨvɨ ñuunꞌ Israel? ―nkachiꞌ Pilato nu̱u̱nꞌ Jesús. Jee nna̱xiníkó Jesús nu̱u̱nꞌ Pilato: ―Noꞌó káchíꞌ nú maa ―nkachiꞌ Jesús.

Romanos 14:10

Soo noꞌó, ¿na̱ jie̱ꞌe̱ꞌ chi síjíta nú ñanitáꞌán nú résa? Áxí, ¿na̱ jie̱ꞌe̱ꞌ chi kúníichiꞌ nú néꞌyá nú ñanitáꞌán nú ranika̱ꞌ? Chi nta̱ká‑ó vá kuiñɨ‑ó ichinúúnꞌ nu̱u̱nꞌ keꞌneꞌ Ndiosíꞌ jie̱ꞌe̱ꞌ ya̱ nsa̱ꞌá‑ó.

Mateo 8:20

Jee nkachiꞌ Jesús nu̱u̱nꞌ‑u: ―Rá ñu̱nkuii chi íyó rá yaviꞌ kava nu̱u̱nꞌ kíxíꞌ rátíꞌ, jee rá kitɨ chúchíyoꞌ ya̱ jíkó súkún íyó takaꞌ rátíꞌ. Soo nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, ni ntu̱ví íyó nu̱u̱nꞌ kosoꞌ xi̱ni̱ꞌ ni̱ꞌ najia̱ví ni̱ꞌ ―nkachiꞌ Jesús.

Mateo 16:28

Chi máá naáꞌ vá káchíꞌ ni̱ꞌ nu̱u̱nꞌ rán, ya̱ íyó sava rán ya̱ íñɨ́ yaꞌá, nsáꞌ kuviꞌ ráa ne̱kua̱ꞌ kuniꞌ ráa nuꞌuꞌ ya̱ kiji ni̱ꞌ jín tiñu ñáꞌnú níso ni̱ꞌ tatúníꞌ ni̱ꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ―nkachiꞌ Jesús.

Mateo 22:44

Nkachiꞌ maá I̱toꞌoꞌ‑ó Ndiosíꞌ nu̱u̱nꞌ I̱toꞌoꞌ ni̱ꞌ: “Kuneeꞌ xiín ichi kuáꞌá ni̱ꞌ nu̱u̱nꞌ tatúníꞌ nú jín ni̱ꞌ, jee kuneeꞌ nú yukuán ne̱kua̱ꞌ kuneí ni̱ꞌ jín rá ñɨvɨ jíníꞌ u̱ꞌvi̱ꞌ néꞌyá ráa noꞌó, kakɨnꞌ ni̱ꞌ ráa chi̱ji jie̱ꞌe̱ꞌ nú”, nkachiꞌ Ndiosíꞌ, nkachiꞌ David.

Mateo 28:18

Saájee ña̱kuyatin Jesús nu̱u̱nꞌ ráa, jee nkachiꞌ re̱ꞌ nu̱u̱nꞌ ráa: ―Ntaji Tátáꞌ ni̱ꞌ Ndiosíꞌ ntáká tiñu ñáꞌnú kunisotíñú ni̱ꞌ antivɨ́ súkún jín iniꞌ ñɨ̱vɨ́ yaꞌá.

Lucas 22:69

Soo ne̱ vitan jee nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kuneeꞌ ni̱ꞌ xiín ichi kuáꞌá Ndiosíꞌ ya̱ níso fuersáꞌ ííꞌ nu̱u̱nꞌ nɨꞌɨ, nu̱u̱nꞌ kúñáꞌnú ni̱ꞌ jín re̱ꞌ ―nkachiꞌ Jesús.