Mateo 24:21 - Mixteco del suroeste de Tlaxiaco Oaxaca

²¹ Chi saájee tiempúꞌ yukuán koo tu̱nóꞌó máá na̱sɨ xéénꞌ nasɨ́kuitɨꞌ, ya̱ ni ntiáꞌan kuvi ne̱ tiempúꞌ xíꞌnañúꞌún ña̱ko̱o ñɨ̱vɨ́ yaꞌá ne̱ vitan, jee ni nsáꞌ koo‑o ka̱ꞌ suꞌva.

Mateo 24:21 Referans Kwoze

Lucas 21:24

Jee sava ráa kuviꞌ ráa jín yuꞌú yuchiꞌ espada nu̱u̱nꞌ kantáꞌán, jee tɨɨn rá ñɨvɨ inka ñuunꞌ sava ráa kɨ̱ꞌɨ̱nꞌ rává jín ráa nu̱u̱nꞌ ntáká ñuunꞌ. Jee rá ñɨvɨ ya̱ ntu kúvi ráa ñɨvɨ ñuunꞌ Israel, jee kua̱ñu̱ꞌ ráa nu̱u̱nꞌ ñuunꞌ Jerusalén tatúníꞌ ráa yukuán. Jee tatúníꞌ ráa yukuán nekuaꞌ kenta i̱nu tiempúꞌ ñani Ndiosíꞌ ya̱ tatúníꞌ ráa nu̱u̱nꞌ ñuunꞌ vá sukuán.

1 Tesalonicenses 2:16

Chi núkú ráa jiásɨ́ꞌ ráa nu̱u̱nꞌ ránuꞌuꞌ, sáá káchítu̱ꞌún ránꞌ tu̱ꞌun jie̱ꞌe̱ꞌ Jesús nu̱u̱nꞌ rá ñɨvɨ ntu kúvi Israel, sáva natavaꞌ Ndiosíꞌ rá ñɨvɨ vá nu̱u̱nꞌ kua̱chi ráa nanitáꞌvíꞌ ráa. Suꞌva sukuáni sáꞌá rá ñɨvɨ Israel vá ya̱ núkueꞌeꞌ ka̱ꞌ kua̱chi si̱kɨ̱ꞌ ráa. Saájee ne̱ nkúvi ka̱ꞌ, jee nkenta ya̱ kítɨ́ꞌ iniꞌ Ndiosíꞌ néꞌyá re̱ꞌ ráa jee xinóꞌo re̱ꞌ ráa.

Mateo 24:29

’Jee kuísá ntañúꞌún kuitɨꞌ ré njia̱ꞌa tu̱nóꞌó rá ki̱vɨ̱ꞌ yukuán, jee nuneenꞌ nka̱niiꞌ, jee nsáꞌ kutuunꞌ ka̱ꞌ ñuꞌunꞌ yo̱o̱ꞌ, jee ku̱te̱ꞌ rá tiu̱u̱nꞌ ne̱ súkún, jee kajiaꞌ rá fuersáꞌ súkún ya̱ tɨ́ɨn nɨꞌɨ ya̱ íyó súkún.

Marcos 13:9

’Soo nito koo rán maárán, chi naku̱ꞌva ráa ránoꞌó xi̱ntíín rá te̱e jiéꞌnéꞌ kua̱chi. Jee ku̱ꞌva rá ñɨvɨ ránoꞌó jín yoꞌo iniꞌ rá veꞌi sinagoga nu̱u̱nꞌ kútútú rá ñɨvɨ Israel. Jee kuiñɨ rán ichinúúnꞌ rá te̱e nísotíñú kúvi gobernador jín rá te̱e ya̱ tátúníꞌ rá nación sijíta ráa ránoꞌó, jie̱ꞌe̱ꞌ ya̱ yɨ́ꞌɨ́ rán nu̱u̱nꞌ nuꞌuꞌ. Jee suꞌva naku̱ꞌva rán ya̱ nááꞌ jie̱ꞌe̱ꞌ nuꞌuꞌ nu̱u̱nꞌ ráa.

Mateo 24:20

Ka̱ka̱nꞌ táꞌvíꞌ rán nu̱u̱nꞌ Ndiosíꞌ ya̱ nkúvi rá tiñu yaꞌá tiempúꞌ kúvíjin víꞌí ya̱ kuniñúꞌún kaku rán jee ni nkúvi‑i ki̱vɨ̱ꞌ nájiáví.

Apoclipsis 7:14

Jee nkachiꞌ ni̱ꞌ nu̱u̱nꞌ‑u: ―Tátáꞌ ni̱ꞌ, noꞌó jíníꞌ ―nkachiꞌ ni̱ꞌ. Jee nkachiꞌ‑i nu̱u̱nꞌ ni̱ꞌ: Rá ñɨvɨ yaꞌá ví rá nku̱neí ráa njia̱ꞌa ráa nu̱u̱nꞌ máá maá tu̱nóꞌó xéénꞌ nnoꞌo ráa. Jee nno̱noo ánímaꞌ ráa jie̱ꞌe̱ꞌ ni̱ꞌi̱ꞌ maáréꞌ ya̱ kúvi re̱ꞌ Lanchi Lúlí vá, kuéntáꞌ nna̱kete ráa saꞌma ráa jee nnu̱kuíjín‑i sáꞌá re̱ꞌ jín ni̱ñɨ̱ꞌ maáréꞌ.

Apoclipsis 16:18

Saájee ñanu̱te̱ꞌ tajia, jee nnɨꞌɨn xá njiaku, jee nkana víꞌí tajia, jee nkenta ɨɨn ñutáan máá na̱sɨ nijia ya̱ ni ntiáꞌan koo sukuán, ne̱ nɨ́ɨ́nkání tiempúꞌ ya̱ íyó ñɨvɨ iniꞌ ñɨ̱vɨ́, chi na̱ ka̱ꞌ a̱nasɨ́ nta̱an ñutáan vá.