Mateo 23:33 - Mixteco del suroeste de Tlaxiaco Oaxaca

³³ ’¡Ko̱o̱ꞌ ránoꞌó! ¡Se̱ꞌya ko̱o̱ꞌ xe̱e̱nꞌ ví ránoꞌó! ¿Na̱ja kuvi ka̱ku rán nu̱u̱nꞌ sikɨ́naanꞌ Ndiosíꞌ ránoꞌó kɨ̱ꞌɨ̱nꞌ rán nu̱u̱nꞌ ñuꞌúnꞌ xéénꞌ?

Mateo 23:33 Referans Kwoze

Mateo 3:7

Soo sáá niniꞌ re̱ꞌ ya̱ kénta kue̱ꞌe̱ꞌ víꞌí rá te̱e yɨ́ꞌɨ́ ñujiínꞌ fariseo jín rá te̱e yɨ́ꞌɨ́ ñujiínꞌ saduceo nu̱u̱nꞌ síkuánuté re̱ꞌ, jee nkachiꞌ re̱ꞌ nu̱u̱nꞌ ráa: ―Ránoꞌó, kuéntáꞌ tataꞌ ko̱o̱ꞌ xe̱e̱nꞌ kúvi rán. ¿Né ɨɨn nxtúꞌva ya̱chi̱ꞌ nu̱u̱nꞌ rán, ya̱ kene kunu rán ka̱ku rán nu̱u̱nꞌ tu̱nóꞌó xéénꞌ kiji ya̱ xinóꞌo Ndiosíꞌ ránoꞌó chi kítɨ́ꞌ iniꞌ re̱ꞌ néꞌyá re̱ꞌ kua̱chi rán rúja?

Mateo 12:34

¡Ránoꞌó ya̱ kúvi rán kuéntáꞌ tataꞌ ko̱o̱ꞌ xe̱e̱nꞌ! Jee, ¿na̱sa kúvi kachiꞌ rán tu̱ꞌun váꞌa rúja?, chi ñɨvɨ kánéꞌén ví maárán. Chi máá ya̱ ñúꞌún chitú ánímaꞌ ñɨvɨ ví ya̱ kéne yuꞌú‑u káchíꞌ‑i.

Juan 8:44

Chi ránoꞌó chi tátáꞌ rán kúvi kui̱ꞌna̱ꞌ kúñáꞌnú, chi kuíni rán saꞌá rán rá tiñu ya̱ níyo iniꞌ tátáꞌ rán vá saꞌá rán. Chi maáréꞌ kúvi re̱ꞌ ya̱ sáꞌá re̱ꞌ ni̱yɨ ne̱ tiempúꞌ xíꞌnañúꞌún ya̱ ña̱ko̱o ñɨ̱vɨ́ yaꞌá. Jee ni ntu̱ví íñɨ́‑ɨ jín ya̱ naáꞌ, chi ntu̱ví ñúꞌún ya̱ naáꞌ iniꞌ‑i. Sáá káꞌánꞌ re̱ꞌ tu̱ꞌun túꞌún jee káꞌánꞌ re̱ꞌ sánikua̱ꞌ na̱sa íyó maáréꞌ, chi ya̱ kini túꞌún ví re̱ꞌ jee kúvi re̱ꞌ tátáꞌ nu̱u̱nꞌ ya̱ váji tu̱ꞌun túꞌún.

Lucas 3:7

Jee kue̱ꞌe̱ꞌ víꞌí rá ñɨvɨ jiáꞌánꞌ ráa kénta ráa nu̱u̱nꞌ Juan sáva sikuánuté re̱ꞌ ráa, jee nkachiꞌ re̱ꞌ nu̱u̱nꞌ, ráa: ―Ránoꞌó kuéntáꞌ tataꞌ ko̱o̱ꞌ xe̱e̱nꞌ kúvi rán. ¿Né ɨɨn nxtúꞌva ya̱chi̱ꞌ nu̱u̱nꞌ rán ya̱ kene kunu rán ka̱ku rán nu̱u̱nꞌ tu̱nóꞌó xéénꞌ kiji ya̱ xinóꞌo Ndiosíꞌ ránoꞌó chi kítɨ́ꞌ iniꞌ re̱ꞌ néꞌyá re̱ꞌ kua̱chi rán rúja?

Mateo 5:22

Soo nuꞌuꞌ káchíꞌ ni̱ꞌ nu̱u̱nꞌ ránú ya̱ néni ɨɨn ñɨvɨ ya̱ kítɨ́ꞌ iniꞌ‑i néꞌyá‑a ñanitáꞌán‑a, koo si̱kɨ̱ꞌ‑ɨ kɨ̱ꞌɨ̱nꞌ‑ɨ xi̱ntíín nu̱u̱nꞌ keꞌneꞌ kua̱chi. Jee néni ɨɨn ñɨvɨ tenu̱u̱nꞌ ñanitáꞌán‑a jee kachiꞌ nu̱u̱nꞌ ñanitáꞌán‑a ya̱ ntu̱náꞌ tiñu, jee kɨ̱ꞌɨ̱nꞌ‑ɨ ichinúúnꞌ rá te̱e nísotíñú ñáꞌnú ka̱ꞌ keꞌneꞌ ráa kua̱chi. Jee néni ɨɨn ñɨvɨ ya̱ kachiꞌ‑i: “Ñɨvɨ naanꞌ”, nu̱u̱nꞌ ñanitáꞌán‑a koo si̱kɨ̱ꞌ‑ɨ kɨ̱ꞌɨ̱nꞌ‑ɨ nu̱u̱nꞌ ñúꞌúnꞌ xéénꞌ.

Génesis 3:15

Jee saꞌá ni̱ꞌ ya̱ tu̱fi̱ꞌ ta̱ꞌán noꞌó jín ñaꞌan vá, jín ya̱ tu̱fi̱ꞌ ta̱ꞌán se̱ꞌya ichiyúkúnꞌ nú jín se̱ꞌya ichiyúkúnꞌ ña. Jee ɨɨn se̱ꞌya ichiyúkúnꞌ ña xtufíꞌ re̱ꞌ xi̱ni̱ꞌ nú, jee suvinú xtufíꞌ xu̱jieꞌéꞌ re̱ꞌ.

Apoclipsis 12:9

Sukuán nkuvi jee ntavaꞌ rá najiáꞌáꞌ ííꞌ vá ko̱o̱ꞌ mánasɨ́ yukuán antivɨ́ súkún. Jee ko̱o̱ꞌ mánasɨ́ vá kúvi ko̱o̱ꞌ ya̱ íyó ne̱ yanaꞌán víꞌí. Jee maátíꞌ ví ya̱ naní ti̱ꞌ kui̱ꞌna̱ꞌ kúñáꞌnú jín suni naní ti̱ꞌ Satanás. Jee maáa vá xínáꞌví‑i rá ñɨvɨ kua̱íyó ñɨ̱vɨ́. Jee ntavaꞌ ráa maa ne̱ jín rá najiáꞌáꞌ‑a antivɨ́ súkún, jee nsi̱kéne ráa maa jín ne̱ rá najiáꞌáꞌ‑a nu̱u̱nꞌ ñu̱ꞌún iniꞌ ñɨ̱vɨ́ yaꞌá.

Hebreos 12:25

Jee saáva nito koo rán sáva ntu kúíchi iniꞌ rán Ndiosíꞌ ya̱ káꞌánꞌ jín rán. Chi nu̱u̱nꞌ ntu nkáku rá ñɨvɨ ya̱ nku̱ichi iniꞌ ráa maáréꞌ ya̱ nneeꞌ re̱ꞌ iniꞌ ñɨ̱vɨ́ yaꞌá jee nstúꞌva ya̱chi̱ꞌ re̱ꞌ nu̱u̱nꞌ ráa, jee saꞌ víꞌí káꞌ nkáku‑órán tu̱nóꞌó kunoꞌo‑ó retú nanikóyátá‑ó nu̱u̱nꞌ maáréꞌ ya̱ nééꞌ antivɨ́ jee stúꞌva ya̱chi̱ꞌ re̱ꞌ nu̱u̱nꞌ yó.

Hebreos 10:29

Jee, ¿na̱ja ka̱ꞌ vá jiáni iniꞌ rán na̱ inka ka̱ꞌ tu̱nóꞌó xéénꞌ ka̱ꞌ íyó ni̱ꞌi̱nꞌ rá ñɨvɨ kunoꞌo ráa ya̱ nkuniichiꞌ ráa Se̱ꞌya Ndiosíꞌ? Kúvi kuéntáꞌ nñu̱jiéꞌé ráa maa. Jee nku̱ichi iniꞌ ráa ni̱ñɨ̱ꞌ re̱ꞌ kuéntáꞌ ntu̱náꞌ níyotiñu ya̱ ni̱ꞌi̱ꞌ re̱ꞌ jee ñatɨ ni̱ñɨ̱ꞌ re̱ꞌ, ya̱ ñakɨnꞌ‑ɨ tratúꞌ ya̱ nsa̱ꞌá sɨ́ɨ́n re̱ꞌ ráa nu̱u̱nꞌ kua̱chi ráa. Jee suni ntenu̱u̱nꞌ ráa Ta̱chi̱ꞌ Ííꞌ Ndiosíꞌ ya̱ sáꞌá‑a ya̱ ni̱ꞌi̱nꞌ‑ó ya̱ íyó mániꞌ iniꞌ Ndiosíꞌ néꞌyá re̱ꞌ yó.

Hebreos 2:3

Jee nu̱u̱nꞌ ni̱yo sukuán, jee maáórán, ¿na̱sa ka̱ꞌ vá saꞌá‑ó jee kaku‑ó nu̱u̱nꞌ tu̱nóꞌó vá, retú ntu nénu̱u̱nꞌ‑ó chuꞌun iniꞌ‑ó jie̱ꞌe̱ꞌ tu̱ꞌun máá ñáꞌnú káꞌ jie̱ꞌe̱ꞌ ya̱ na̱sa natavaꞌ Jesús yó nu̱u̱nꞌ kua̱chi‑ó sikáku re̱ꞌ yó rúja? Chi xíꞌna ka̱ꞌ nkachitu̱ꞌún maá I̱toꞌoꞌ‑ó Jesús tu̱ꞌun yaꞌá, jee kuíre rá te̱e ya̱ nteso̱ꞌo maa, jee nna̱stúvi ráa ya̱ naáꞌ jie̱ꞌe̱ꞌ tu̱ꞌun yaꞌá nu̱u̱nꞌ‑órán

2 Corintios 11:3

Soo yúꞌví ni̱ꞌ ya̱ sa̱naanꞌ jee kusɨ́ɨ́n rán nu̱u̱nꞌ yɨ́tíñú rán ne̱ saɨn ninuꞌun iniꞌ rán nu̱u̱nꞌ métúꞌún Cristo, jee sukuán jíta antúníꞌ rán, kuéntáꞌ nxi̱náꞌví ko̱o̱ꞌ Eva jín máñáꞌ ti̱ꞌ.

Mateo 23:32

Jee ránoꞌó, saꞌá rá tiñu kánéꞌén ya̱ nsa̱ꞌá rá tátáꞌ jííꞌ ichiyúkúnꞌ rán ne̱kua̱ꞌ nachuchítú rán sáꞌá rán kua̱ꞌ ñúkúꞌvá ya̱ niváꞌa nsa̱ꞌá ráa.