Mateo 12:32 - Mixteco del suroeste de Tlaxiaco Oaxaca

³² Jee néni ɨɨn káꞌánꞌ niva̱ꞌa‑a si̱kɨ̱ꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee koo tu̱ꞌun nekáꞌnú iniꞌ Ndiosíꞌ kune̱ꞌyá re̱ꞌ ñɨvɨ vá. Soo néni ɨɨn ñɨvɨ káꞌánꞌ niva̱ꞌa si̱kɨ̱ꞌ Ta̱chi̱ꞌ Ííꞌ Ndiosíꞌ, jee ni nsáꞌ kunekáꞌnú iniꞌ re̱ꞌ kune̱ꞌyá re̱ꞌ ñɨvɨ vá, ni iniꞌ ñɨ̱vɨ́ tiempúꞌ yaꞌá, ni ñɨ̱vɨ́ kiji tiempúꞌ ichinúúnꞌ.

Mateo 12:32 Referans Kwoze

Marcos 3:29

Soo néni ɨɨn ya̱ káꞌánꞌ tu̱ꞌun níváꞌa si̱kɨ̱ꞌ Ta̱chi̱ꞌ Ííꞌ Ndiosíꞌ, ni nsáꞌ koo tunkáꞌnú iniꞌ, chi si̱kɨ̱ꞌ ráa kino̱o kua̱chi vá nɨ́ɨ́nkání.

Juan 7:39

Soo nkachiꞌ Jesús rá tu̱ꞌun yaꞌá jie̱ꞌe̱ꞌ Ta̱chi̱ꞌ Ííꞌ Ndiosíꞌ, chi rá ñɨvɨ ya̱ kúneí iniꞌ ráa re̱ꞌ, jee ni̱ꞌi̱nꞌ ráa Ta̱chi̱ꞌ Ííꞌ Ndiosíꞌ kɨꞌɨ‑ɨ iniꞌ ánímaꞌ ráa. Chi ni ntiáꞌan taji Ndiosíꞌ Ta̱chi̱ꞌ Ííꞌ re̱ꞌ, chi jie̱ꞌe̱ꞌ ntiáné kɨ̱naa Jesús antivɨ́ súkún nu̱u̱nꞌ kúñáꞌnú re̱ꞌ.

1 Timoteo 1:13

Ñani re̱ꞌ nuꞌuꞌ nu̱u̱nꞌ tiñu vá, súnika̱ꞌ nkaꞌanꞌ niva̱ꞌa ni̱ꞌ si̱kɨ̱ꞌ re̱ꞌ, jee nito u̱ꞌvi̱ꞌ ni̱ꞌ si̱kɨ̱ꞌ rá ñɨvɨ re̱ꞌ, jee ntenu̱u̱nꞌ ni̱ꞌ nne̱ꞌyá ni̱ꞌ ráa. Soo nku̱náꞌví iniꞌ re̱ꞌ nne̱ꞌyá re̱ꞌ nuꞌuꞌ, chi nsa̱ꞌá naanꞌ ni̱ꞌ yaꞌá, chi ntiáꞌan i̱nu̱ꞌ iniꞌ ni̱ꞌ Cristo.

Tito 2:12

Jie̱ꞌe̱ꞌ ya̱ íyó mániꞌ iniꞌ re̱ꞌ, jee suꞌva síkújia re̱ꞌ iniꞌ‑ó ya̱ chusává‑ó maáó nu̱u̱nꞌ ichi níváꞌa ya̱ ntu íyó sáni kuíni Ndiosíꞌ, jín nu̱u̱nꞌ ya̱ níyo iniꞌ‑ó ya̱ íyó sáni níyo iniꞌ rá ñɨvɨ ñɨ̱vɨ́ ya̱ ntu chíꞌi ráa maáráa naꞌá Ndiosíꞌ. Jee suꞌva síkújia re̱ꞌ iniꞌ‑ó, ya̱ tiempúꞌ vitan kueꞌnu kájí‑ó, jín ya̱ kaka na̱a̱ꞌ‑ó nu̱u̱nꞌ Ndiosíꞌ, jín ya̱ kɨtíñú‑ó nu̱u̱nꞌ ichi na̱a̱ꞌ sáni kuíni Ndiosíꞌ.

Efesios 1:21

Jee ñani re̱ꞌ maa kúñáꞌnú‑u ka̱ꞌ nu̱u̱nꞌ ntáká rá kúñáꞌnú, nu̱u̱nꞌ rá nísotíñú, nu̱u̱nꞌ rá níso fuersáꞌ, jín nu̱u̱nꞌ rá i̱toꞌoꞌ ñáꞌnú ka̱ꞌ, [sú kúvi ráa te̱e, áxí ta̱chi̱ꞌ kíni, áxí najiáꞌáꞌ ííꞌ Ndiosíꞌ], jee níso‑o tiñu kúñáꞌnú ka̱ꞌ nsú káꞌ ntáká tiñu, nsú kua̱chi tiempúꞌ vitan chisaꞌ suni tiempúꞌ kiji ichinúúnꞌ.

Hechos 3:19

Nakani iniꞌ rán jie̱ꞌe̱ꞌ kua̱chi rán, jee nakunikɨnꞌ rán Ndiosíꞌ, sáva xinónoo re̱ꞌ kua̱chi rán. Jee sáva maá I̱toꞌoꞌ‑ó taji tiempúꞌ ya̱ nuva̱ꞌa iniꞌ rán.

Lucas 12:10

Jee ntáká ñɨvɨ ya̱ kaꞌanꞌ niva̱ꞌa‑a si̱kɨ̱ꞌ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee koo tu̱ꞌun nekáꞌnú iniꞌ Ndiosíꞌ kune̱ꞌyá re̱ꞌ ñɨvɨ vá [ya̱ nakani iniꞌ ráa]. Soo ɨɨn ñɨvɨ ya̱ kaꞌanꞌ niva̱ꞌa‑a si̱kɨ̱ꞌ Ta̱chi̱ꞌ Ííꞌ Ndiosíꞌ, jee ni nsáꞌ kunekáꞌnú iniꞌ re̱ꞌ kune̱ꞌyá re̱ꞌ ñɨvɨ vá.

Mateo 12:31

’Jee saáva káchíꞌ ni̱ꞌ nu̱u̱nꞌ rán ya̱ kúvi kunekáꞌnú iniꞌ Ndiosíꞌ jie̱ꞌe̱ꞌ ntáká nu̱u̱nꞌ kua̱chi sáꞌá rá ñɨvɨ, jín suni rá tu̱ꞌun níváꞌa káꞌánꞌ rá ñɨvɨ si̱kɨ̱ꞌ Ndiosíꞌ. Soo ni nsáꞌ kunekáꞌnú iniꞌ Ndiosíꞌ tu̱ꞌun káꞌánꞌ niva̱ꞌa rá ñɨvɨ si̱kɨ̱ꞌ Ta̱chi̱ꞌ Ííꞌ re̱ꞌ.

1 Timoteo 1:15

Tu̱ꞌun na̱a̱ꞌ ví yaꞌá. Jee íyó tɨɨn nɨꞌɨ ñɨvɨ tu̱ꞌun yaꞌá, ya̱ káchíꞌ, ya̱ Cristo Jesús ya̱ nkiji nu̱u̱nꞌ ñɨ̱vɨ́, sáva natavaꞌ re̱ꞌ rá ñɨvɨ kua̱chi nu̱u̱nꞌ kua̱chi ráa sikáku re̱ꞌ ráa. Jee nuꞌuꞌ, ña̱ko̱so̱ꞌ ni̱ꞌ ka̱ꞌ nu̱u̱nꞌ ya̱ nsa̱ꞌá ni̱ꞌ kua̱chi mánasɨ́ nijia.

Juan 7:12

Jee káꞌánꞌ yuꞌuꞌ víꞌí rá ñɨvɨ kue̱ꞌe̱ꞌ si̱kɨ̱ꞌ Jesús nteñu ráa. Sava ráa káchíꞌ: “Te̱e va̱ꞌa kúvi re̱ꞌ.” Soo sava ráa ka̱ꞌ káchíꞌ: “Ntu̱ví, chisaꞌ xínáꞌví re̱ꞌ rá ñɨvɨ kue̱ꞌe̱ꞌ”, káchíꞌ ráa.

Lucas 23:34

Soo nkachiꞌ Jesús: ―Tááꞌ ni̱ꞌ, kunekáꞌnú iniꞌ nú kune̱ꞌyá nú ráa, chi ntu̱ví jíníꞌ ráa na̱ kúvi ya̱ sáꞌá ráa ―nkachiꞌ re̱ꞌ. Jee tásáva ráa saꞌma re̱ꞌ nu̱u̱nꞌ ɨɨn inka ráa jee nsi̱kɨ́ ráa suertéꞌ sáva tasáva ráa maa.

Marcos 10:30

jee ni̱ꞌi̱nꞌ‑i sientúꞌ íchí ka̱ꞌ iniꞌ ñɨ̱vɨ́ yaꞌá tiempúꞌ tékúꞌ‑ó ñɨ̱vɨ́ yaꞌá, rá veꞌi, rá ñaniꞌ, rá ku̱ꞌva, rá ku̱ꞌvi̱ꞌ, rá nánáꞌ, rá se̱ꞌya, jín rá ñuꞌun, sú koto u̱ꞌvi̱ꞌ ñɨvɨ maa. Jee suni tiempúꞌ kiji, jee ñɨvɨ vá kutekuꞌ‑u nɨ́ɨ́nkání jín Ndiosíꞌ saꞌá re̱ꞌ.

Juan 7:52

Jee nna̱xiníkó rá te̱e vá jee nkachiꞌ ráa: ―¿Á suni te̱e ñuunꞌ Galilea kúvi nú ya̱ káꞌánꞌ nú sukuán? Nanukú kávii va̱ꞌa nú nu̱u̱nꞌ Tutuꞌ níso Tu̱ꞌun Ndiosíꞌ jee kuniꞌ nú ya̱ Galilea ntu kene nu̱u̱nꞌ ñuunꞌ vá ɨɨn te̱e ya̱ nakani‑i tu̱ꞌun kene yuꞌú Ndiosíꞌ ―nkachiꞌ rá te̱e vá.

Lucas 7:34

Jee nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee ntiaaꞌ ru nuꞌuꞌ jee yájíꞌ ni̱ꞌ jíꞌi ni̱ꞌ, jee káchíꞌ ránú: “¡Kune̱ꞌyá! Kúvi re̱ꞌ te̱e a̱sɨ̱nꞌ iniꞌ jín te̱e ka̱ꞌva̱ꞌ nixiꞌ ya̱ ma̱ni̱ꞌ re̱ꞌ jín rá te̱e tíꞌñá nákeꞌen xu̱ꞌún náneeꞌ vetíñú ñuunꞌ Roma jín rá ñɨvɨ kua̱chi”, káchíꞌ rán.

Mateo 11:19

Jee, nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee ntiaaꞌ ru nuꞌuꞌ jee yájíꞌ ni̱ꞌ jee jíꞌi ni̱ꞌ, jee káchíꞌ ráa: “¡Kune̱ꞌyá! Kúvi re̱ꞌ te̱e a̱sɨ̱nꞌ iniꞌ jín te̱e ka̱ꞌva̱ꞌ nixiꞌ ya̱ ma̱ni̱ꞌ re̱ꞌ jín rá te̱e tíꞌñá nákeꞌen xu̱ꞌún náneeꞌ vetíñú ñuunꞌ Roma, jín ya̱ ma̱ni̱ꞌ‑i jín rá ñɨvɨ kua̱chi”, káchíꞌ ráa. Soo ñɨvɨ ya̱ tɨ́ɨn tu̱ꞌun níchí Ndiosíꞌ ya̱ xínéꞌénꞌ ráníꞌ stúvi ráa ya̱ na̱a̱ꞌ kúvi tu̱ꞌun vá jie̱ꞌe̱ꞌ tiñu váꞌa sáꞌá ráa ―nkachiꞌ Jesús.

Mateo 13:55

Chi, ¿á nsú te̱e yaꞌá ví se̱ꞌya te̱e chútáꞌán yutun rúja? Jee, ¿á nsú nánáꞌ re̱ꞌ naní María rúja? Jee, ¿á nsú rá ñaniꞌ re̱ꞌ ví Jacobo, jín José, jín Simón jín Judas rúja?

Mateo 8:20

Jee nkachiꞌ Jesús nu̱u̱nꞌ‑u: ―Rá ñu̱nkuii chi íyó rá yaviꞌ kava nu̱u̱nꞌ kíxíꞌ rátíꞌ, jee rá kitɨ chúchíyoꞌ ya̱ jíkó súkún íyó takaꞌ rátíꞌ. Soo nuꞌuꞌ ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, ni ntu̱ví íyó nu̱u̱nꞌ kosoꞌ xi̱ni̱ꞌ ni̱ꞌ najia̱ví ni̱ꞌ ―nkachiꞌ Jesús.

Mateo 12:8

Chi nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee kúvi ni̱ꞌ I̱toꞌoꞌ rá ki̱vɨ̱ꞌ nájiáví, ya̱ kuvi tatúníꞌ ni̱ꞌ ná kúvi ya̱ saꞌá ñɨvɨ ki̱vɨ̱ꞌ vá ―nkachiꞌ Jesús.

Mateo 13:22

Jee nikɨn ña̱kava‑a nteñu rá yu̱ku̱ꞌ iñu sáá nxi̱náváꞌ te̱e vá maa, suvi‑i kúvi ñɨvɨ ya̱ tésóꞌo ráa Tu̱ꞌun Ndiosíꞌ, soo nániꞌvɨꞌ víꞌí ka̱ꞌ iniꞌ‑i jie̱ꞌe̱ꞌ kue̱ꞌe̱ꞌ tiñu íyó iniꞌ ñɨ̱vɨ́ yaꞌá jee kuíni‑i kukúká‑a, jee yaꞌá xínáꞌví‑i ñɨvɨ vá, jee sátéꞌéꞌ‑e vá nu̱u̱nꞌ Tu̱ꞌun Ndiosíꞌ, jee saáva ntu jiáꞌnu ñɨvɨ vá ntu jíjia‑a jín Tu̱ꞌun Ndiosíꞌ, kuéntáꞌ ntu kénta ku̱ꞌva nikɨn tataꞌ.

Mateo 13:39

Jee maáréꞌ ya̱ túfíꞌ ta̱ꞌán jín Ndiosíꞌ ví ya̱ ntee yu̱ku̱ꞌ ne̱ꞌén vá ví kui̱ꞌna̱ꞌ kúñáꞌnú, jee sáá kenta nastútú tataꞌ sáꞌá vá, yukuán kúvi sáá kenta ji̱nu ñɨ̱vɨ́ yaꞌá, jee rá nastútú tataꞌ ví rá najiáꞌáꞌ ííꞌ Ndiosíꞌ.

Mateo 13:40

Jee kuéntáꞌ kua̱ꞌ túꞌun rá yu̱ku̱ꞌ ne̱ꞌén vá, ya̱ ka̱yu̱ꞌ‑u nu̱u̱nꞌ ñúꞌún xéénꞌ, jee sukuán kuvi sáá kenta ki̱vɨ̱ꞌ ji̱nu ñɨ̱vɨ́ yaꞌá.

Marcos 3:28

’Máá nááꞌ vá káchíꞌ ni̱ꞌ nu̱u̱nꞌ rán, ya̱ Ndiosíꞌ kunekáꞌnú iniꞌ re̱ꞌ jie̱ꞌe̱ꞌ ntáká nu̱u̱nꞌ kua̱chi sáꞌá rá ñɨvɨ, jín néni ɨɨn tu̱ꞌun níváꞌa káꞌánꞌ ñɨvɨ si̱kɨ̱ꞌ Ndiosíꞌ.

Lucas 16:8

’Saájee nna̱kuetúꞌún i̱toꞌoꞌ xí tiñu vá musúꞌ ntu náaꞌ vá ya̱ nito víꞌí‑i jín rá tiñu sáꞌá‑a. Chi rá ñɨvɨ jiáꞌnu ñujiínꞌ ñɨ̱vɨ́ yaꞌá nito víꞌí ráa ka̱ꞌ jie̱ꞌe̱ꞌ rá tiñu sáꞌá ráa jín ɨɨn inka rá táꞌán ráa, nsú káꞌ rá se̱ꞌya Ndiosíꞌ ya̱ túúnꞌ ñuꞌunꞌ Ndiosíꞌ ánímaꞌ ráa.

Lucas 18:30

jee si̱kɨ̱ꞌ ka̱ꞌ ni̱ꞌi̱nꞌ‑i iniꞌ ñɨ̱vɨ́ yaꞌá tiempúꞌ tékúꞌ‑u ñɨ̱vɨ́ yaꞌá, nsú káꞌ kua̱ꞌ nxi̱nóo‑o, jee tiempúꞌ kiji ichinúúnꞌ ni̱ꞌi̱nꞌ‑i kutekuꞌ‑u nɨ́ɨ́nkání jín Ndiosíꞌ saꞌá re̱ꞌ ―nkachiꞌ Jesús.

1 Timoteo 4:8

Chi sikújia‑ó yɨkɨkúñu‑ó jee íyótiñu yakuꞌ, soo retú kueꞌnu‑ó ichi na̱a̱ꞌ sáni kuíni Ndiosíꞌ íyótiñu nɨꞌɨ nu̱u̱nꞌ. Chi suꞌva ni̱ꞌi̱nꞌ‑ó ya̱ váꞌa ya̱ nchi̱sóyuꞌú Ndiosíꞌ taji re̱ꞌ ni ya̱ tékúꞌ‑ó tiempúꞌ vitan, jín tiempúꞌ kiji ichinúúnꞌ sáá kutekuꞌ‑ó nɨ́ɨ́nkání jín re̱ꞌ.

1 Timoteo 6:17

Rá ñɨvɨ kúká ya̱ kúmí víꞌí nantíñú tiempúꞌ vitan, tetíñú nú ráa, ya̱ koto íyó vi̱xi̱ꞌ ráa, jee ya̱ koto jiáꞌa ráa tu̱neí iniꞌ ráa nu̱u̱nꞌ rá nantíñú kue̱ꞌe̱ꞌ yɨ́yáꞌvi, chi ntu̱ví kúun yoꞌo‑o jee ntu sukuáni chíneí‑i ráa. Chisaꞌ tatúníꞌ nú nu̱u̱nꞌ ráa, ya̱ ku̱ꞌva ráa tu̱neí iniꞌ ráa nu̱u̱nꞌ Ndiosíꞌ tékúꞌ, ya̱ kue̱ꞌe̱ꞌ víꞌí táji re̱ꞌ nu̱u̱nꞌ‑ó nɨꞌɨ nantíñú jíniñúꞌún‑ó, sáva kusɨ̱ɨ̱ꞌ iniꞌ‑ó jín‑i.

2 Timoteo 4:10

Chi Demas nxi̱nóo nuꞌuꞌ, chi ñúnúunꞌ re̱ꞌ ka̱ꞌ rá íyó ñɨ̱vɨ́ yaꞌá, jee kua̱ꞌa̱nꞌ re̱ꞌ ne̱ ñuunꞌ Tesalónica. Jee Crescente kua̱ꞌa̱nꞌ ñuunꞌ Galacia. Jee Tito kua̱ꞌa̱nꞌ ñuunꞌ Dalmacia.

Santiago 1:27

Jee tɨ́ɨn kuéntáꞌ Tátáꞌ‑ó Ndiosíꞌ ya̱ néñu̱ꞌun ninuꞌun‑ó re̱ꞌ, jín ya̱ saɨn iniꞌ‑ó ya̱ néñu̱ꞌun‑ó re̱ꞌ retú sáꞌá‑ó yaꞌá: ya̱ chíneí‑ó rá kuáchí nkino̱o láꞌví jín rá ñaꞌan ya̱ nkino̱o náꞌví ráa, ya̱ kúkuíꞌyáꞌ iniꞌ ráa nu̱u̱nꞌ ya̱ nóꞌo ráa, jee suni ya̱ kúmí‑ó maáó ya̱ ntu sátéꞌén‑ó ánímaꞌ‑ó jín ya̱ niváꞌa ya̱ níyo iniꞌ ñɨvɨ ñɨ̱vɨ́.