Lucas 22:19 - Mixteco del suroeste de Tlaxiaco Oaxaca

¹⁹ Jee ntɨɨn re̱ꞌ ɨɨn i̱xta̱tíláꞌ jee njia̱ꞌa re̱ꞌ ya̱ kútaꞌviꞌ nu̱u̱nꞌ Ndiosíꞌ, jee ña̱ꞌnu̱ꞌ re̱ꞌ maa njia̱ꞌa re̱ꞌ maa nu̱u̱nꞌ ráa, jee nkachiꞌ re̱ꞌ nu̱u̱nꞌ ráa: ―Yaꞌá ví ñunéꞌyúꞌ ni̱ꞌ, ya̱ jiáꞌa ni̱ꞌ sáva kuviꞌ ni̱ꞌ jie̱ꞌe̱ꞌ ya̱ váꞌa kuvi ránoꞌó. Jee suꞌva kajiꞌ rán yaꞌá sáva naku̱ꞌun iniꞌ rán ya̱ níꞌiꞌ ni̱ꞌ jie̱ꞌe̱ꞌ rán ―nkachiꞌ re̱ꞌ.

Lucas 22:19 Referans Kwoze

1 Corintios 10:16

Jee sáá jíꞌi tútú‑ó copa ííꞌ nixiꞌ nu̱xi jee jiáꞌa‑ó ya̱ kútaꞌviꞌ‑ó nu̱u̱nꞌ Cristo, ¿á nsáꞌ sáꞌá‑ó maa chi násánuún‑ó iniꞌ‑ó jín ya̱ ni̱ꞌi̱ꞌ Cristo jie̱ꞌe̱ꞌ‑ó jee ñatɨ ni̱ñɨ̱ꞌ re̱ꞌ rúsa? Jee sunisaá sáá tásáva‑ó i̱xta̱tíláꞌ ya̱ yájíꞌ tútú nkáá‑ó maa, jee, ¿á nsáꞌ sáꞌá‑ó maa chi násánuún‑ó iniꞌ‑ó jín ya̱ nso̱ko̱ꞌ Cristo yɨkɨkúñu re̱ꞌ sáá ni̱ꞌi̱ꞌ re̱ꞌ nu̱u̱nꞌ kurúsiꞌ jie̱ꞌe̱ꞌ‑ó rúsa?

Lucas 22:20

Jee suni sukuán nsa̱ꞌá re̱ꞌ jín vasúꞌ ñúꞌún nixiꞌ nu̱xi uva, sáá nkuvi nku̱xíní re̱ꞌ jín ráa, jee ntɨɨn re̱ꞌ vasúꞌ, jee nkachiꞌ re̱ꞌ: ―Vasúꞌ yaꞌá ví tratúꞌ jiáá ya̱ kakɨnꞌ Ndiosíꞌ jín ni̱ñɨ̱ꞌ ni̱ꞌ ya̱ katɨ‑ɨ sáá kuviꞌ ni̱ꞌ sáva chunáán nkáꞌnú ni̱ꞌ nu̱u̱nꞌ Ndiosíꞌ jie̱ꞌe̱ꞌ kua̱chi rán.

1 Corintios 10:4

Jee suni ntáká ráa nni̱ꞌi̱nꞌ ráa nute njiáꞌa Ndiosíꞌ nu̱u̱nꞌ ráa, chi jíꞌíꞌ ráa nute ya̱ nsa̱ꞌá re̱ꞌ ya̱ nkene‑e i̱ka̱ꞌ niyo ya̱ njiáꞌa Ndiosíꞌ jín ya̱ kútáꞌán niyo vá jín ráa sáá kua̱ꞌa̱nꞌ ráa jíka ráa. Jee Cristo kúvi kava vá.

Tito 2:14

Chi njia̱ꞌa re̱ꞌ maáréꞌ ya̱ kuviꞌ re̱ꞌ jie̱ꞌe̱ꞌ‑ó, sáva chunáán nkáꞌnú re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ‑ó, sáva nakani núne re̱ꞌ yó naꞌá nta̱ká nu̱u̱nꞌ ya̱ niva̱ꞌa. Jee nna̱saꞌá noo nɨꞌɨ kuitɨꞌ re̱ꞌ kua̱chi níso ánímaꞌ‑ó, sáva kuvi‑ó ñɨvɨ maáréꞌ, sáva kuꞌun káñá iniꞌ‑ó saꞌá‑ó ya̱ váꞌa.

1 Pedro 2:24

Chi máá Cristo nna̱kuniso yɨkɨkúñu re̱ꞌ ntáká kua̱chi sáꞌá‑ó sáá níꞌiꞌ re̱ꞌ nu̱u̱nꞌ kurúsiꞌ, sáva kuviꞌ‑ó nu̱u̱nꞌ kua̱chi‑ó kene‑ó nu̱u̱nꞌ kua̱chi‑ó jee sáva nakueꞌnu‑ó ichi jiáꞌnu na̱a̱ꞌ. Chi jie̱ꞌe̱ꞌ nu̱u̱nꞌ ntúfiꞌ re̱ꞌ vá, yukuán núváꞌa‑ó sííyo re̱ꞌ kua̱chi‑ó.

Efesios 5:2

Jee íyó kueꞌnu rán jín tu̱ꞌun ñúnúunꞌ táꞌán, kuéntáꞌ suni ñúnúunꞌ Cristo yó, jee nna̱ku̱ꞌva re̱ꞌ maáréꞌ jie̱ꞌe̱ꞌ‑ó, chi nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ ni̱ꞌi̱ꞌ re̱ꞌ jie̱ꞌe̱ꞌ‑ó. Yukuán kúvi kuéntáꞌ ɨɨn xikoꞌ jiáꞌánꞌ vi̱xi̱ꞌ ya̱ téñuꞌunꞌ maa nu̱u̱nꞌ Ndiosíꞌ. Jee kúváꞌa iniꞌ Ndiosíꞌ néꞌyá re̱ꞌ maa.

Gálatas 1:4

Nso̱ko̱ꞌ Jesús maáréꞌ ya̱ níꞌiꞌ re̱ꞌ jie̱ꞌe̱ꞌ kua̱chi‑ó, sáva sikáku re̱ꞌ yó, sáva ntu íyó kaka‑ó ichi tu̱ꞌun kánéꞌén, sáni sáꞌá rá ñɨvɨ nééꞌ ñɨ̱vɨ́ vitan ya̱ ntu yɨ́ꞌɨ́ ráa nu̱u̱nꞌ re̱ꞌ. Nsa̱ꞌá re̱ꞌ suꞌva sáni kuíni Tátáꞌ‑ó Ndiosíꞌ.

Juan 6:51

Chi maáníꞌ kuvi i̱xta̱tíláꞌ tékúꞌ vá ya̱ nkikuun ni̱ꞌ ne̱ antivɨ́, sáva néni ɨɨn ñɨvɨ ya̱ kajiꞌ ráa maa, jee saꞌá‑a ya̱ kutekuꞌ ráa nɨ́ɨ́nkání jín Ndiosíꞌ. Jee i̱xta̱tíláꞌ ya̱ ku̱ꞌva ni̱ꞌ ví yɨkɨkúñu ni̱ꞌ. Ku̱ꞌva ni̱ꞌ maa sáva ni̱ꞌi̱nꞌ ñɨvɨ ñɨ̱vɨ́ kuvi kutekuꞌ ráa nɨ́ɨ́nkání jín Ndiosíꞌ ―nkachiꞌ Jesús.

Lucas 24:30

Jee sáá ña̱kuneeꞌ re̱ꞌ yuꞌú mesa kuxíní re̱ꞌ jín ráa, jee nkeꞌen re̱ꞌ i̱xta̱tíláꞌ, jee njia̱ꞌa re̱ꞌ ya̱ kútaꞌviꞌ nu̱u̱nꞌ Ndiosíꞌ, jee ña̱ꞌnu̱ꞌ re̱ꞌ maa, jee sáá njia̱ꞌa re̱ꞌ maa nu̱u̱nꞌ ráa,

Mateo 14:19

Saájee nta̱túníꞌ re̱ꞌ nu̱u̱nꞌ rá ñɨvɨ kue̱ꞌe̱ꞌ ya̱ ki̱kuneeꞌ ráa nu̱u̱nꞌ iteꞌ nééꞌ nu̱u̱nꞌ ñu̱ꞌún. Jee ntɨɨn re̱ꞌ ni úꞌúnꞌ rá i̱xta̱tíláꞌ vá jín ni núvíꞌ rá tia̱ká, jee nna̱kune̱ꞌyá re̱ꞌ ne̱ súkún antivɨ́, jee njia̱ꞌa re̱ꞌ ya̱ kútaꞌviꞌ nu̱u̱nꞌ Ndiosíꞌ, jee ña̱ꞌnu̱ꞌ re̱ꞌ rá i̱xta̱tíláꞌ vá njia̱ꞌa re̱ꞌ maa nu̱u̱nꞌ rá te̱e súkuáꞌa re̱ꞌ vá, jee suviráa njia̱ꞌa maa nu̱u̱nꞌ rá ñɨvɨ kue̱ꞌe̱ꞌ vá.

Juan 6:23

Jee rá inka ka̱ꞌ barkúꞌ va̱ji ichi ñuunꞌ Tiberias, jee nkenta rává yatin nu̱u̱nꞌ nneeꞌ ráa nyajiꞌ ráa i̱xta̱tíláꞌ sáá njia̱ꞌa Jesús ya̱ kútaꞌviꞌ nu̱u̱nꞌ Ndiosíꞌ jie̱ꞌe̱ꞌ‑e.

Lucas 22:17

Jee kuíre ntɨɨn re̱ꞌ ɨɨn vasúꞌ nixiꞌ nu̱xi uva, jee njia̱ꞌa re̱ꞌ ya̱ kútaꞌviꞌ re̱ꞌ nu̱u̱nꞌ Ndiosíꞌ, jee nkachiꞌ re̱ꞌ: ―Yaꞌá rán vasúꞌ yaꞌá, jee tasáva rán maa nteñu maárán koꞌo ntáká maárán maa.

1 Tesalonicenses 5:18

Ntáká jie̱ꞌe̱ꞌ kúvi, ku̱ꞌva rán ya̱ kútaꞌviꞌ nu̱u̱nꞌ Ndiosíꞌ, chi sukuán kuíni re̱ꞌ saꞌá rán, ya̱ yɨ́ꞌɨ́ rán nu̱u̱nꞌ Cristo Jesús.

Gálatas 4:25

Chi Agar kúvi kuéntáꞌ yuku Sinaí ya̱ íñɨ́ nu̱u̱nꞌ ñuꞌun Arabia. Jee suni kúvi ña kuéntáꞌ ñuunꞌ Jerusalén ya̱ íyó‑o vitan. Chi rá se̱ꞌya ñuunꞌ vá kúvi ráa musúꞌ sátíñú saɨn ya̱ yɨ́ꞌɨ́ ráa chi̱ji xi̱ntíín tu̱ꞌun ley vá ya̱ nta̱túníꞌ Ndiosíꞌ.

Mateo 15:36

Jee ntɨɨn Jesús ni uxáꞌ rá i̱xta̱tíláꞌ vá, jín rá tia̱ká vá, jee njia̱ꞌa re̱ꞌ ya̱ kútaꞌviꞌ re̱ꞌ nu̱u̱nꞌ Ndiosíꞌ. Jee ña̱ꞌnu̱ꞌ re̱ꞌ maa njia̱ꞌa re̱ꞌ maa nu̱u̱nꞌ rá te̱e súkuáꞌa re̱ꞌ vá, jee rá te̱e súkuáꞌa re̱ꞌ vá njia̱ꞌa maa nu̱u̱nꞌ rá ñɨvɨ kue̱ꞌe̱ꞌ vá.