Hechos 13:10 - Mixteco del suroeste de Tlaxiaco Oaxaca

¹⁰ Jee nkachiꞌ re̱ꞌ nu̱u̱nꞌ‑u: ―¡Kúneí tu̱ntúꞌún jín nú! ¡Máá jíka xínáꞌví nú! ¡Se̱ꞌya kui̱ꞌna̱ꞌ kúvi nú! ¡Kénta nú si̱kɨ̱ꞌ nɨꞌɨ ya̱ váꞌa! ¿Á ni nsíkɨ́kui̱ñɨ̱ꞌ nú ya̱ nátatúꞌún nú jie̱ꞌe̱ꞌ ichi na̱a̱ꞌ I̱toꞌoꞌ ráníꞌ Jesús rúja?

Hechos 13:10 Referans Kwoze

Juan 8:44

Chi ránoꞌó chi tátáꞌ rán kúvi kui̱ꞌna̱ꞌ kúñáꞌnú, chi kuíni rán saꞌá rán rá tiñu ya̱ níyo iniꞌ tátáꞌ rán vá saꞌá rán. Chi maáréꞌ kúvi re̱ꞌ ya̱ sáꞌá re̱ꞌ ni̱yɨ ne̱ tiempúꞌ xíꞌnañúꞌún ya̱ ña̱ko̱o ñɨ̱vɨ́ yaꞌá. Jee ni ntu̱ví íñɨ́‑ɨ jín ya̱ naáꞌ, chi ntu̱ví ñúꞌún ya̱ naáꞌ iniꞌ‑i. Sáá káꞌánꞌ re̱ꞌ tu̱ꞌun túꞌún jee káꞌánꞌ re̱ꞌ sánikua̱ꞌ na̱sa íyó maáréꞌ, chi ya̱ kini túꞌún ví re̱ꞌ jee kúvi re̱ꞌ tátáꞌ nu̱u̱nꞌ ya̱ váji tu̱ꞌun túꞌún.

Gálatas 1:7

Soo ntu̱ví inka tu̱ꞌun váꞌa ya̱ síkáku‑u yó, naní evangelio. Chisaꞌ kua̱chi íyó ya̱ sava ñɨvɨ stáña̱ꞌán ránoꞌó, jee kuíni ráa sama ráa tu̱ꞌun váꞌa jie̱ꞌe̱ꞌ Cristo.

2 Corintios 11:3

Soo yúꞌví ni̱ꞌ ya̱ sa̱naanꞌ jee kusɨ́ɨ́n rán nu̱u̱nꞌ yɨ́tíñú rán ne̱ saɨn ninuꞌun iniꞌ rán nu̱u̱nꞌ métúꞌún Cristo, jee sukuán jíta antúníꞌ rán, kuéntáꞌ nxi̱náꞌví ko̱o̱ꞌ Eva jín máñáꞌ ti̱ꞌ.

Mateo 13:38

Jee ñu̱ꞌún nu̱u̱nꞌ káá tataꞌ sáꞌá ví ñɨ̱vɨ́ yaꞌá, jee rá nikɨn váꞌa vá kúvi rá ñɨvɨ yɨ́ꞌɨ́ xi̱ntíín Ndiosíꞌ ya̱ tátúníꞌ re̱ꞌ nu̱u̱nꞌ ráa, jee rá yu̱ku̱ꞌ ne̱ꞌén ví rá ñɨvɨ yɨ́ꞌɨ́ xi̱ntíín ya̱ kíni.

1 Juan 3:8

Soo ñɨvɨ ya̱ sáꞌá kua̱chi, jee íñɨ́ ráa jín kui̱ꞌna̱ꞌ kúñáꞌnú. Chi kui̱ꞌna̱ꞌ kúñáꞌnú sáꞌá‑a kua̱chi ne̱ tiempúꞌ xíꞌnañúꞌún. Jee jie̱ꞌe̱ꞌ yaꞌá kúvi ya̱ nkiji máá Se̱ꞌya Ndiosíꞌ sáva xináánꞌ re̱ꞌ rá tiñu ya̱ sáꞌá kui̱ꞌna̱ꞌ kúñáꞌnú.

Lucas 11:52

’Na̱ ka̱ꞌ xe̱e̱nꞌ kunoꞌo rán ka̱ꞌ ránoꞌó, te̱e súkuáꞌa jie̱ꞌe̱ꞌ tu̱ꞌun nta̱túníꞌ Ndiosíꞌ yanaꞌán, chi jín rá ñujiínꞌ xínéꞌénꞌ rán jiásɨ́ꞌ rán nu̱u̱nꞌ rá ñɨvɨ sáva nkíku̱ꞌun iniꞌ ráa Tu̱ꞌun Ndiosíꞌ, ya̱ kúvi‑i nakáa ya̱ jíne‑e ichi ya̱ kuniꞌ ñɨvɨ iniꞌ Ndiosíꞌ. Jee nsiíyo rán nakáa vá chi ni maárán ntu kívɨ rán ichi vá, jee jiásɨ́ꞌ rán nu̱u̱nꞌ rá ñɨvɨ kívɨ ráa maa ―nkachiꞌ Jesús.

2 Pedro 2:15

Chi nku̱sɨ́ɨ́n ráa nu̱u̱nꞌ ichi na̱a̱ꞌ Ndiosíꞌ. Jee nchi̱nikɨnꞌ ráa ichi ñujiínꞌ nsa̱ꞌá Balaam ya̱ nkuvi re̱ꞌ se̱ꞌya Beor. Jee nñunu̱u̱nꞌ re̱ꞌ ni̱ꞌi̱nꞌ re̱ꞌ xu̱ꞌún nu̱u̱nꞌ tiñu nsa̱ꞌá re̱ꞌ ya̱ ntu íyó na̱a̱ꞌ.

Hechos 20:30

Jee ne̱ nteñu rán koo rá te̱e ya̱ kijiéꞌé xinéꞌénꞌ ráa tu̱ꞌun xínáꞌví nu̱u̱nꞌ Tu̱ꞌun Ndiosíꞌ nu̱u̱nꞌ rá ñɨvɨ níta ñujiínꞌ Jesús sáva tɨɨn rává tu̱ꞌun xínéꞌénꞌ ráa sáva kunikɨnꞌ rává ráa.

Mateo 23:13

’¡Na̱ ka̱ꞌ xe̱e̱nꞌ kunoꞌo rán ka̱ꞌ ránoꞌó, te̱e xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ, jín ránoꞌó te̱e kúvi fariseo!, ¡te̱e sansuꞌva kúvi rán! Chi jiásɨ́ꞌ rán ya̱ ki̱vɨ rá ñɨvɨ xi̱ntíín Ndiosíꞌ ya̱ nééꞌ antivɨ́ súkún tatúníꞌ re̱ꞌ nu̱u̱nꞌ ráa, chi ránoꞌó jee ni ntu kívɨ rán xi̱ntíín re̱ꞌ, jee ni ntu jiáꞌa rán ya̱ ki̱vɨ rá inka ka̱ꞌ ñɨvɨ.

Mateo 15:19

Chi ne̱ ánímaꞌ ñɨvɨ va̱ji ntáká ya̱ níváꞌa ñúꞌún iniꞌ antúníꞌ ñɨvɨ, ya̱ sáꞌá ñɨvɨ ni̱yɨ, jín ñɨvɨ ya̱ ya nta̱na̱ꞌá soo núnéꞌén ráa jín inka ñɨvɨ ya̱ ntu ntánáꞌá jín ráa, jín ya̱ sáꞌá téní ráa, jín ya̱ sáꞌá kuíꞌná ráa, jín ya̱ kátúꞌún ráa, jín ya̱ kákuíyuꞌú ráa si̱kɨ̱ꞌ táꞌán ráa.

Mateo 3:7

Soo sáá niniꞌ re̱ꞌ ya̱ kénta kue̱ꞌe̱ꞌ víꞌí rá te̱e yɨ́ꞌɨ́ ñujiínꞌ fariseo jín rá te̱e yɨ́ꞌɨ́ ñujiínꞌ saduceo nu̱u̱nꞌ síkuánuté re̱ꞌ, jee nkachiꞌ re̱ꞌ nu̱u̱nꞌ ráa: ―Ránoꞌó, kuéntáꞌ tataꞌ ko̱o̱ꞌ xe̱e̱nꞌ kúvi rán. ¿Né ɨɨn nxtúꞌva ya̱chi̱ꞌ nu̱u̱nꞌ rán, ya̱ kene kunu rán ka̱ku rán nu̱u̱nꞌ tu̱nóꞌó xéénꞌ kiji ya̱ xinóꞌo Ndiosíꞌ ránoꞌó chi kítɨ́ꞌ iniꞌ re̱ꞌ néꞌyá re̱ꞌ kua̱chi rán rúja?

Juan 1:23

Jee nna̱xiníkó Juan nu̱u̱nꞌ ráa: ―Maáníꞌ kúvi nusuyuꞌú ya̱ kánajíín ne̱ nu̱u̱nꞌ ñu̱ꞌún sáɨn nu̱u̱nꞌ ntu̱ví ñɨvɨ jee káchíꞌ‑i: “[Satúꞌva rán ánímaꞌ rán sáva koo maniꞌ rán natuꞌva rán I̱toꞌoꞌ‑ó kuéntáꞌ] nasaꞌá na̱a̱ꞌ rán ichi kiaaꞌ re̱ꞌ”, sáni nkachiꞌ Isaías te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán.

Lucas 11:39

Soo nkachiꞌ I̱toꞌoꞌ‑ó nu̱u̱nꞌ fariseo vá: ―Ránoꞌó fariseo, jee kuéntáꞌ nákete rán kua̱chi ya̱ta̱ꞌ vasúꞌ jíꞌi rán jín ya̱ta̱ꞌ ko̱ꞌo̱ꞌ ñúyájíꞌ rán. Soo ichi iniꞌ ránú ñúchitú máá tu̱ꞌun u̱ꞌvi̱ꞌ iniꞌ jín tu̱ꞌun níváꞌa.

Génesis 18:19

Chi nka̱ji ni̱ꞌ re̱ꞌ sáva tatúníꞌ re̱ꞌ nu̱u̱nꞌ rá se̱ꞌya re̱ꞌ jín nu̱u̱nꞌ rá ichiyúkúnꞌ re̱ꞌ kiji tiempúꞌ ichinúúnꞌ sáva chuꞌun re̱ꞌ ráa ichi I̱toꞌoꞌ kunikɨnꞌ ráa maa sáva saꞌá ráa nɨꞌɨ ya̱ kúvi ya̱ váꞌa jín ya̱ íyó na̱a̱ꞌ sáva sikúnkuvi ni̱ꞌ ya̱ nkachiꞌ ni̱ꞌ saꞌá ni̱ꞌ nu̱u̱nꞌ re̱ꞌ, ya̱ kúvi ni̱ꞌ I̱toꞌoꞌ.”

Génesis 3:15

Jee saꞌá ni̱ꞌ ya̱ tu̱fi̱ꞌ ta̱ꞌán noꞌó jín ñaꞌan vá, jín ya̱ tu̱fi̱ꞌ ta̱ꞌán se̱ꞌya ichiyúkúnꞌ nú jín se̱ꞌya ichiyúkúnꞌ ña. Jee ɨɨn se̱ꞌya ichiyúkúnꞌ ña xtufíꞌ re̱ꞌ xi̱ni̱ꞌ nú, jee suvinú xtufíꞌ xu̱jieꞌéꞌ re̱ꞌ.

Efesios 4:14

Sáva nkúvi‑ó ka̱ꞌ kuéntáꞌ rá súchí lúlí ya̱ ntu ɨɨn ni jiáni iniꞌ ráa, jee sáva ntu kúvi‑ó ka̱ꞌ kuéntáꞌ ɨɨn nantíñú xínó xíníji ta̱chi̱ꞌ víjin chínaꞌá‑a cháꞌá chúkuán ya̱ súkuíkó‑o, chi nsáꞌ síkívɨ inka tu̱ꞌun ka̱ꞌ maáó yaꞌá yukuán, ya̱ xínéꞌénꞌ rá te̱e xínáꞌví cháꞌá chúkuán, ya̱ nito nasɨ́kuitɨꞌ íyó ráa jee máñáꞌ ráa jín tu̱ꞌun jíta xínéꞌénꞌ ráa.