Hebreos 7:19 - Mixteco del suroeste de Tlaxiaco Oaxaca

¹⁹ Chi ntu̱náꞌ nsáꞌá ley Moisés ya̱ kino̱o na̱a̱ꞌ ñɨvɨ nu̱u̱nꞌ Ndiosíꞌ. Soo vitan nkenta nni̱ꞌi̱nꞌ‑ó ya̱ koo tu̱neí iniꞌ‑ó ya̱ váꞌa ka̱ꞌ ya̱ kino̱o na̱a̱ꞌ‑ó nu̱u̱nꞌ re̱ꞌ, chi jie̱ꞌe̱ꞌ vá natuꞌva‑ó nu̱u̱nꞌ Ndiosíꞌ.

Hebreos 7:19 Referans Kwoze

Hechos 13:39

Ntu kúvi kino̱o na̱a̱ꞌ‑ó nu̱u̱nꞌ Ndiosíꞌ jie̱ꞌe̱ꞌ sikúnkuvi‑ó tu̱ꞌun ley nta̱túníꞌ Ndiosíꞌ, ya̱ njia̱ꞌa re̱ꞌ nu̱u̱nꞌ Moisés. Chisaꞌ Jesús sííyo nɨꞌɨ kua̱chi nɨꞌɨ rá ñɨvɨ kúneí iniꞌ ráa re̱ꞌ, jee kino̱o na̱a̱ꞌ ráa nu̱u̱nꞌ Ndiosíꞌ sáꞌá Jesús.

Hebreos 4:16

Saáva ne̱ yuchí kukáꞌnú iniꞌ‑ó natuꞌva‑ó nu̱u̱nꞌ teyuꞌ Ndiosíꞌ nu̱u̱nꞌ tátúníꞌ re̱ꞌ jee kaꞌanꞌ‑ó jín re̱ꞌ ya̱ íyó mániꞌ iniꞌ re̱ꞌ néꞌyá re̱ꞌ yó, sáva ni̱ꞌi̱nꞌ‑ó ya̱ kunáꞌví iniꞌ re̱ꞌ yó jín ya̱ íyó mániꞌ iniꞌ re̱ꞌ chineí re̱ꞌ yó sáá jíniñúꞌún‑ó maa.

Hebreos 9:9

Chi jie̱ꞌe̱ꞌ ntáká rá yaꞌá xínéꞌénꞌ‑e nu̱u̱nꞌ‑ó na̱ja kúvi tiempúꞌ vitan. Chi sókóꞌ ñɨvɨ nantíñú jín sa̱na̱ꞌ nu̱u̱nꞌ Ndiosíꞌ, soo rá nantíñú jín rá sa̱na̱ꞌ ya̱ sókóꞌ maa nu̱u̱nꞌ Ndiosíꞌ yukuán jee ntu kúvi kuitɨꞌ saꞌá‑a ya̱ kino̱o noo ánímaꞌ ñɨvɨ ya̱ néñu̱ꞌun Ndiosíꞌ sukuán jee saáva ntu kénta kuniꞌ ráa ya̱ ntu níso ráa kua̱chi.

Romanos 8:3

Chi máá maá Ndiosíꞌ nsa̱ꞌá re̱ꞌ tiñu vá ya̱ ntu nkúvi saꞌá ley nta̱túníꞌ re̱ꞌ ya̱ njiáꞌa re̱ꞌ nu̱u̱nꞌ Moisés. Jee ntu nkúvi saꞌá ley vá tiñu vá, chi táyáꞌ ley vá chi táyáꞌ iniꞌ‑ó jee ntu nkúneí‑ó sikúnkuvi‑ó ley vá jín yɨkɨkúñu‑ó. Jee máá maá Ndiosíꞌ nsa̱ꞌá re̱ꞌ tiñu vá chi nchu̱ichí re̱ꞌ Se̱ꞌya re̱ꞌ nu̱u̱nꞌ ñɨ̱vɨ́ yaꞌá jín yɨkɨkúñu‑u ya̱ kúnkunuún jín yɨkɨkúñu ñɨvɨ yɨ́ꞌɨ́ xi̱ntíín kua̱chi, sú ntu íyó kua̱chi re̱ꞌ. Jee nta̱jí re̱ꞌ Se̱ꞌya re̱ꞌ sáva kuviꞌ‑i so̱ko̱ꞌ‑o maáa jie̱ꞌe̱ꞌ kua̱chi‑ó, sáva sukuán nsi̱jíta Ndiosíꞌ kua̱chi‑ó ya̱ nna̱kuniso Jesús maa iniꞌ yɨkɨkúñu re̱ꞌ.

Hebreos 11:40

Chi nsa̱ꞌá túꞌva Ndiosíꞌ ɨɨn ta̱ꞌvi̱ꞌ ya̱ kúvi ya̱ váꞌa víꞌí ka̱ꞌ nu̱u̱nꞌ‑ó, sáva kua̱chi jín maáó nuún nkáá kino̱o na̱a̱ꞌ ráa jín maáó saꞌá re̱ꞌ.

Hebreos 10:1

Chi tu̱ꞌun ley Moisés kuvi‑i kuéntáꞌ ɨɨn xi̱ne̱ꞌñu̱ꞌ ya̱ xínéꞌénꞌ‑e ya̱ váꞌa ya̱ kiji jín Cristo, soo ntu sáꞌá‑a mákua sáꞌá nijia re̱ꞌ. Chi ni nsáꞌ kúvi saꞌá ley vá ya̱ kino̱o na̱a̱ꞌ rá ñɨvɨ jie̱ꞌe̱ꞌ ya̱ sukuáni yɨ́táꞌán ta kui̱ya̱ꞌ ta kui̱ya̱ꞌ sókóꞌ rá ñɨvɨ sa̱na̱ꞌ ya̱ kúyatin ráa nu̱u̱nꞌ Ndiosíꞌ néñu̱ꞌun ráa re̱ꞌ sukuán.

Hebreos 6:18

Jee saájee íyó u̱vi̱ꞌ tu̱ꞌun nkachiꞌ re̱ꞌ vá ya̱ ni ntu̱né kúvi sama‑a, chi ntu kuvi katúꞌún Ndiosíꞌ. Saáva nsa̱náaꞌ re̱ꞌ sukuán sáva nuneí téyɨ́ɨ́ iniꞌ maáórán ya̱ numíjiꞌíꞌ nna̱tuꞌva‑ó nu̱u̱nꞌ re̱ꞌ nama re̱ꞌ yó, sáva ni̱ꞌi̱nꞌ‑ó tu̱neí iniꞌ‑ó ya̱ ni̱ꞌi̱nꞌ‑ó ta̱ꞌvi̱ꞌ taji re̱ꞌ nu̱u̱nꞌ‑ó.

Romanos 5:2

Chi suni Cristo nsa̱ꞌá ya̱ nkívɨ‑ó nu̱u̱nꞌ ya̱ íyó mániꞌ iniꞌ Ndiosíꞌ néꞌyá re̱ꞌ yó, sú ntu íyó ni̱ꞌi̱nꞌ‑ó maa. Jee íñɨ́ ni̱ꞌin‑ó jín ya̱ íyó mániꞌ iniꞌ Ndiosíꞌ néꞌyá re̱ꞌ yó. Jee kúsɨ́ɨꞌ iniꞌ ánímaꞌ‑ó chi íyó tu̱neí iniꞌ‑ó kúnáaꞌ iniꞌ‑ó ya̱ taji re̱ꞌ nu̱u̱nꞌ‑ó ya̱ viiꞌ kúñáꞌnú‑ó jín re̱ꞌ.

Hebreos 8:6

Soo vitan jee su̱tu̱ꞌ‑ó ya̱ kúvi Cristo nni̱ꞌi̱nꞌ re̱ꞌ tiñu máá ñáꞌnú nasɨ́kuitɨꞌ ka̱ꞌ nsú káꞌ rá tiñu nsa̱ꞌá rá su̱tu̱ꞌ vá. Jee suni sukuán níso re̱ꞌ tiñu ñujiínꞌ jie̱ꞌe̱ꞌ tratúꞌ jiáá ya̱ kúvi va̱ꞌa nasɨ́kuitɨꞌ ka̱ꞌ nsú káꞌ tratúꞌ túꞌú. Jee suni ñakɨnꞌ Ndiosíꞌ tratúꞌ jiáá vá jie̱ꞌe̱ꞌ rá tiñu váꞌa nasɨ́kuitɨꞌ ka̱ꞌ nchi̱sóyuꞌú re̱ꞌ ya̱ saꞌá re̱ꞌ maa.

Hebreos 7:25

Jee rá ñɨvɨ ya̱ jiánatuꞌva ráa nu̱u̱nꞌ Ndiosíꞌ jie̱ꞌe̱ꞌ Cristo, jee saáva kávii kuitɨꞌ kuvi natavaꞌ Jesús ráa nu̱u̱nꞌ kua̱chi ráa, jee sikáku re̱ꞌ xinánitáꞌvíꞌ re̱ꞌ nɨ́ɨ́nkání ráa, chi tékúꞌ re̱ꞌ nɨ́ɨ́nkání, sáva yɨ́tuvi re̱ꞌ náma re̱ꞌ ráa nu̱u̱nꞌ Ndiosíꞌ.

Gálatas 2:16

Jee jíníꞌ‑ó ya̱ ntu kénta kino̱o na̱a̱ꞌ ɨɨn ñɨvɨ nu̱u̱nꞌ Ndiosíꞌ jie̱ꞌe̱ꞌ ya̱ núkú‑u ya̱ saꞌá‑a ya̱ káchíꞌ tu̱ꞌun ley nta̱túníꞌ Ndiosíꞌ, ya̱ njiáꞌa re̱ꞌ nu̱u̱nꞌ Moisés yanaꞌán. Chisaꞌ sííyo re̱ꞌ kua̱chi si̱kɨ̱ꞌ ñɨvɨ sáva ku̱ꞌvayuꞌú re̱ꞌ ya̱ kino̱o na̱a̱ꞌ‑a nu̱u̱nꞌ re̱ꞌ chi kúneí iniꞌ ñɨvɨ vá Jesús ya̱ kúvi Cristo. I̱ña̱jée nku̱neí iniꞌ‑ó Jesucristo, sáva siíyo Ndiosíꞌ kua̱chi‑ó, chi kúneí iniꞌ‑ó Cristo, jee nsú jie̱ꞌe̱ꞌ ya̱ núkú‑ó saꞌá‑ó ya̱ káchíꞌ ley vá. Chi ni ɨɨn ñɨvɨ ntu kínóo na̱a̱ꞌ nu̱u̱nꞌ Ndiosíꞌ jie̱ꞌe̱ꞌ ya̱ núkú‑u saꞌá‑a ya̱ káchíꞌ ley vá.

Juan 14:6

Jee nkachiꞌ Jesús nu̱u̱nꞌ‑u: ―Nuꞌuꞌ kúvi ni̱ꞌ ichi ya̱ nátuꞌva ñɨvɨ nu̱u̱nꞌ Ndiosíꞌ, jín nu̱u̱nꞌ nuꞌuꞌ va̱ji ya̱ naáꞌ, jín maáníꞌ ví ya̱ sáꞌá‑a ya̱ kutekuꞌ ñɨvɨ jín Ndiosíꞌ nɨ́ɨ́nkání. Ntu íyó inka ka̱ꞌ ichi ya̱ kenta ñɨvɨ nu̱u̱nꞌ Tátáꞌ ni̱ꞌ Ndiosíꞌ, chi métúꞌún nuꞌuꞌ ví‑i ya̱ sáꞌá ya̱ nkénta ñɨvɨ nu̱u̱nꞌ Ndiosíꞌ.

Hebreos 7:11

Chi nu̱u̱nꞌ tataꞌ váji ichinúúnꞌ Leví nkiji rá te̱e ya̱ nniso re̱ꞌ tiñu su̱tu̱ꞌ. Jee néen kuéntáꞌ rá su̱tu̱ꞌ vá tu̱ꞌun ley Ndiosíꞌ ya̱ nni̱ꞌi̱nꞌ rá ñɨvɨ nación Israel. Jee ntu nkúvi saꞌá rá su̱tu̱ꞌ Leví kino̱o na̱a̱ꞌ rá ñɨvɨ ya̱ níkɨ́nꞌ ley vá. Chi retánꞌ nkuvi saꞌá‑a vá jee, ¿na̱kui chi íyó nakui̱ñɨ̱ꞌ inka ka̱ꞌ su̱tu̱ꞌ kua̱ꞌ nkuvi su̱tu̱ꞌ Melquisedec, nsú káꞌ kua̱ꞌ kúvi su̱tu̱ꞌ tataꞌ Aarón?

1 Timoteo 1:1

Nuꞌuꞌ Pablo, ya̱ níso ni̱ꞌ tiñu apóstol Cristo Jesús, ya̱ nchu̱ichí re̱ꞌ nuꞌuꞌ sánikua̱ꞌ nta̱túníꞌ Ndiosíꞌ jín Cristo Jesús, ya̱ níso ni̱ꞌ tiñu yaꞌá. Jee Ndiosíꞌ ví ya̱ natavaꞌ re̱ꞌ yó nu̱u̱nꞌ kua̱chi‑ó síkáku re̱ꞌ yó. Jee Jesús nísotíñú re̱ꞌ ya̱ kúvi re̱ꞌ Cristo, [ya̱ ñani Ndiosíꞌ maáréꞌ sáva tatúníꞌ re̱ꞌ ñɨ̱vɨ́], jee íyó tu̱neí iniꞌ‑ó ya̱ saꞌá re̱ꞌ ya̱ nkachiꞌ re̱ꞌ.

Colosenses 1:27

Jee nkuini iniꞌ re̱ꞌ ya̱ sikúkáꞌnú re̱ꞌ iniꞌ ráa, ya̱ na̱ ka̱ꞌ viiꞌ kúñáꞌnú yɨ́yáꞌvi ka̱ꞌ ví ya̱ váꞌa, ya̱ níso tu̱ꞌun yuꞌuꞌ yaꞌá, ya̱ jiáꞌa re̱ꞌ nu̱u̱nꞌ rá ñɨvɨ ntu kúvi Israel. Tu̱ꞌun yaꞌá kúvi ya̱ yɨ́ꞌɨ́ Cristo iniꞌ ánímaꞌ rán. Jee saáva íyó tu̱ꞌun neí iniꞌ‑ó ya̱ kuneeꞌ‑ó nɨ́ɨ́nkání jín re̱ꞌ, ya̱ nu̱u̱nꞌ viiꞌ nasɨ́kuitɨꞌ ví‑i.

Efesios 3:12

Jee jie̱ꞌe̱ꞌ yɨ́ꞌɨ́‑ó nu̱u̱nꞌ Cristo jee íyó neí iniꞌ‑ó ne̱ yuchí kúkáꞌnú iniꞌ‑ó natuꞌva‑ó nu̱u̱nꞌ Ndiosíꞌ chi kúneí iniꞌ‑ó Cristo.

Gálatas 3:24

Saájee tu̱ꞌun ley ni̱yo kuéntáꞌ ɨɨn musúꞌ ya̱ náka rá kuáchí, jee náka‑a ránuꞌuꞌ ne̱ nu̱u̱nꞌ Cristo. Náka‑a ránuꞌuꞌ sáva siíyo Ndiosíꞌ kua̱chi ránꞌ sáva ku̱ꞌvayuꞌú re̱ꞌ ya̱ kino̱o na̱a̱ꞌ ránꞌ nu̱u̱nꞌ re̱ꞌ jie̱ꞌe̱ꞌ ya̱ kúneí iniꞌ ránꞌ Jesús.

Juan 1:17

Chi njia̱ꞌa Ndiosíꞌ nu̱u̱nꞌ Moisés tu̱ꞌun ley re̱ꞌ sáva ku̱ꞌva‑a vá nu̱u̱nꞌ rá ñɨvɨ. Jee, Jesús ya̱ kúvi Cristo, nsa̱ꞌá Ndiosíꞌ ya̱ nsa̱ꞌá re̱ꞌ ya̱ nni̱ꞌi̱nꞌ‑ó ya̱ váꞌa ma̱ni̱ꞌ iniꞌ Ndiosíꞌ jín ya̱ naáꞌ.

Romanos 7:7

Saájee, ¿ná kúvi ya̱ kachiꞌ‑ó résa? ¿Á kúvi ley kua̱chi résa? ¡Ntu̱ví kuitɨꞌ! Soo ni nsáꞌ kukáꞌnú iniꞌ ni̱ꞌ ná kúvi kua̱chi retánꞌ nsú ley káchíꞌ maa. Chi suni ni nku̱níꞌ ni̱ꞌ ná kúvi ya̱ nééꞌ uꞌvi iniꞌ, retánꞌ ntu káchíꞌ ley: “Koto nééꞌ uꞌvi iniꞌ nú rá nantíñú inka ñɨvɨ.”

Gálatas 3:21

Saájee, ¿á kénta tu̱ꞌun ley vá si̱kɨ̱ꞌ ya̱ nchi̱sóyuꞌú Ndiosíꞌ rúja? ¡Ntu̱ví kuitɨꞌ!, chi retánꞌ ntaji Ndiosíꞌ néni ɨɨn ley ya̱ kúvi xitékúꞌ‑u yó nɨ́ɨ́nkání jín re̱ꞌ, nékúvi, ña̱re kúvi saꞌá ley vá ya̱ kino̱o na̱a̱ꞌ‑ó nu̱u̱nꞌ Ndiosíꞌ jie̱ꞌe̱ꞌ ya̱ síkúnkuvi‑ó ya̱ káchíꞌ ley vá, nékúvi.

Hebreos 3:6

Soo Cristo, kúvi re̱ꞌ Se̱ꞌya Ndiosíꞌ, jee síkúnkuvi na̱a̱ꞌ re̱ꞌ ntáká tiñu ya̱ yósóꞌ re̱ꞌ nu̱u̱nꞌ rá ñɨvɨ veꞌi Ndiosíꞌ, ya̱ suvi kúvi maáórán, retú íñɨ́ ni̱ꞌin‑ó níkɨ́nꞌ kutú‑ó kúneí iniꞌ‑ó re̱ꞌ ne̱ kenta nu̱u̱nꞌ nɨ́ꞌɨ tékúꞌ‑ó, jín ya̱ kúsɨ́ɨꞌ víꞌí iniꞌ‑ó jie̱ꞌe̱ꞌ ya̱ íyó tu̱neí iniꞌ‑ó ya̱ kuneeꞌ‑ó jín Ndiosíꞌ.

Hebreos 7:20

Chi nsa̱náaꞌ Ndiosíꞌ nu̱u̱nꞌ tu̱ꞌun nkachiꞌ re̱ꞌ ya̱ Jesús kúvi‑i su̱tu̱ꞌ nu̱u̱nꞌ‑ó. Jee ntu̱ví nsánáaꞌ Ndiosíꞌ nu̱u̱nꞌ tu̱ꞌun nkachiꞌ re̱ꞌ sáá ñani re̱ꞌ rá inka te̱e kuvi ráa su̱tu̱ꞌ.

Hebreos 11:6

Soo retú ntu ínúꞌ iniꞌ‑ó kúneí iniꞌ‑ó Ndiosíꞌ tékúꞌ, jee ni ntu íyó na̱ja kuvi kuva̱ꞌa iniꞌ re̱ꞌ kune̱ꞌyá re̱ꞌ yó. Chi ñɨvɨ nátuꞌva‑a nu̱u̱nꞌ re̱ꞌ jee íyó‑o i̱nu̱ꞌ iniꞌ‑i ya̱ íyó nijia re̱ꞌ, jín suni ya̱ ku̱ꞌva re̱ꞌ ta̱ꞌvi̱ꞌ nu̱u̱nꞌ rá ñɨvɨ ya̱ nánukú ráa re̱ꞌ.

Santiago 4:8

Natuꞌva rán nu̱u̱nꞌ Ndiosíꞌ, jee natuꞌva re̱ꞌ nu̱u̱nꞌ rán. ¡Ñɨvɨ kua̱chi! ¡Íyó saꞌá noo rán maárán nu̱u̱nꞌ kua̱chi sáꞌá rán! ¡Ñɨvɨ ya̱ ɨɨn u̱vi̱ꞌ ñúꞌún iniꞌ ánímaꞌ rán! ¡Jee íyó saꞌá ninuꞌun rán ánímaꞌ rán!