Hebreos 4:15 - Mixteco del suroeste de Tlaxiaco Oaxaca

¹⁵ Chi maá su̱tu̱ꞌ kúñáꞌnú ya̱ íyó jín‑ó, jee ntu kúvi re̱ꞌ ɨɨn su̱tu̱ꞌ ya̱ ntu kúvi kunáꞌví iniꞌ re̱ꞌ kune̱ꞌyá re̱ꞌ yó jie̱ꞌe̱ꞌ ya̱ táyáꞌ iniꞌ‑ó, chi suni ne̱ maáréꞌ ni̱yo tu̱ꞌun xíníyo iniꞌ jín re̱ꞌ ntáká nu̱u̱nꞌ kuéntáꞌ kua̱ꞌ maáó ranika̱ꞌ. Soo ni ɨɨn kua̱chi ntu nsa̱ꞌá re̱ꞌ.

Hebreos 4:15 Referans Kwoze

2 Corintios 5:21

Chi Cristo, jee ni ntu̱ví íyó kua̱chi re̱ꞌ, soo nsa̱ꞌá Ndiosíꞌ ya̱ kuniso Cristo kua̱chi‑ó, sáva kúvi ya̱ váꞌa nu̱u̱nꞌ‑ó, sáva saꞌá re̱ꞌ ya̱ na̱a̱ꞌ kúvi‑ó sánikua̱ꞌ kúvi Ndiosíꞌ, jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo.

1 Juan 3:5

Jee jíníꞌ rán ya̱ Jesús nkiji re̱ꞌ ñɨ̱vɨ́ yaꞌá sáva siíyo re̱ꞌ rá kua̱chi‑ó. Jee ntu̱ví ná kua̱chi re̱ꞌ íyó.

1 Pedro 2:22

Chi [Cristo jee]: ni ɨɨn kuitɨꞌ kua̱chi ntu nsáꞌá re̱ꞌ, jee ni ɨɨn tu̱ꞌun xínáꞌví ntu nyɨ́ꞌɨ yuꞌú re̱ꞌ.

Hebreos 7:26

Jee saáva, Jesús kúvi nijia re̱ꞌ su̱tu̱ꞌ maá kúñáꞌnú nasɨ́kuitɨꞌ ka̱ꞌ sáni jíniñúꞌún‑ó. Chi i̱i̱ꞌ víꞌí re̱ꞌ, chi ni ntu̱ví kua̱chi re̱ꞌ, jee íyó noo re̱ꞌ, jee íyó sɨ́ɨ́n re̱ꞌ nu̱u̱nꞌ rá ñɨvɨ íyó kua̱chi, jee nkenta kúñáꞌnú nasɨ́kuitɨꞌ re̱ꞌ ne̱ nu̱u̱nꞌ súkún nasɨ́kuitɨꞌ ka̱ꞌ antivɨ́.

Hebreos 4:14

Íyó jín‑ó ɨɨn su̱tu̱ꞌ kúñáꞌnú ka̱ꞌ ya̱ nnaa re̱ꞌ súkún nu̱u̱nꞌ nééꞌ Ndiosíꞌ. Jesús ví su̱tu̱ꞌ vá, ya̱ kúvi re̱ꞌ Se̱ꞌya Ndiosíꞌ. Saáva íyó kuiñɨ ni̱ꞌin‑ó jín tu̱ꞌun njia̱ꞌayuꞌú‑ó ya̱ jínúꞌ iniꞌ‑ó.

Hebreos 5:2

Jee su̱tu̱ꞌ vá kuvi koo másúꞌ iniꞌ re̱ꞌ jín rá ñɨvɨ ntu jiáku̱ꞌun iniꞌ ráa Tu̱ꞌun Ndiosíꞌ jín ya̱ kújíká ráa nu̱u̱nꞌ tu̱ꞌun vá, chi suni ne̱ maá su̱tu̱ꞌ vá táyáꞌ iniꞌ re̱ꞌ kuéntáꞌ rá ñɨvɨ vá.

Juan 8:46

¿Né ɨɨn ránoꞌó kúvi chikua̱chi rán nuꞌuꞌ ré íyó ɨɨn kua̱chi ni̱ꞌ rúja? Retú ya̱ naáꞌ káchíꞌ ni̱ꞌ, ¿na̱ kuvi chi ntu̱ví jínúꞌ iniꞌ rán nuꞌuꞌ rúja?

Lucas 22:28

’Soo ránoꞌó, jee nkino̱o rán kútáꞌán rán jín nuꞌuꞌ nu̱u̱nꞌ rá tu̱nóꞌó táꞌánꞌ ni̱ꞌ.

Lucas 4:2

Jee yukuán nneeꞌ re̱ꞌ u̱vi̱xiko (40) ki̱vɨ̱ꞌ, jee yukuán nnu̱kú kui̱ꞌna̱ꞌ kúñáꞌnú sikúvi‑i iniꞌ re̱ꞌ. Jee ni ntu̱náꞌ nyájíꞌ re̱ꞌ rá ki̱vɨ̱ꞌ vá, jee sáá njia̱ꞌa rá ki̱vɨ̱ꞌ vá, jee nkenta so̱ko iniꞌ re̱ꞌ.

Mateo 12:20

Jee [koo másúꞌ iniꞌ re̱ꞌ jín rá ñɨvɨ táyáꞌ iniꞌ], kuéntáꞌ ntu jiáꞌnu re̱ꞌ iteꞌ tu̱yo̱ó nátaꞌnu, jee kuéntáꞌ ntu xínáꞌváꞌ re̱ꞌ yu̱ꞌve̱ꞌ ɨɨn itɨ vesíkɨ ka̱ꞌ tɨ́ɨn ñuꞌunꞌ, saꞌá re̱ꞌ suꞌva ne̱kua̱ꞌ kuneí kakɨnꞌ re̱ꞌ ya̱ saꞌá Ndiosíꞌ ya̱ kino̱o na̱a̱ꞌ rá ñɨvɨ re̱ꞌ nu̱u̱nꞌ‑u.

Mateo 4:1

Saájee náka Ta̱chi̱ꞌ Ííꞌ Ndiosíꞌ Jesús kua̱ꞌa̱nꞌ nu̱u̱nꞌ ñu̱ꞌún saɨn nu̱u̱nꞌ ntu̱náꞌ ñɨvɨ nééꞌ sáva sikúvi kui̱ꞌna̱ꞌ iniꞌ re̱ꞌ.

Romanos 8:3

Chi máá maá Ndiosíꞌ nsa̱ꞌá re̱ꞌ tiñu vá ya̱ ntu nkúvi saꞌá ley nta̱túníꞌ re̱ꞌ ya̱ njiáꞌa re̱ꞌ nu̱u̱nꞌ Moisés. Jee ntu nkúvi saꞌá ley vá tiñu vá, chi táyáꞌ ley vá chi táyáꞌ iniꞌ‑ó jee ntu nkúneí‑ó sikúnkuvi‑ó ley vá jín yɨkɨkúñu‑ó. Jee máá maá Ndiosíꞌ nsa̱ꞌá re̱ꞌ tiñu vá chi nchu̱ichí re̱ꞌ Se̱ꞌya re̱ꞌ nu̱u̱nꞌ ñɨ̱vɨ́ yaꞌá jín yɨkɨkúñu‑u ya̱ kúnkunuún jín yɨkɨkúñu ñɨvɨ yɨ́ꞌɨ́ xi̱ntíín kua̱chi, sú ntu íyó kua̱chi re̱ꞌ. Jee nta̱jí re̱ꞌ Se̱ꞌya re̱ꞌ sáva kuviꞌ‑i so̱ko̱ꞌ‑o maáa jie̱ꞌe̱ꞌ kua̱chi‑ó, sáva sukuán nsi̱jíta Ndiosíꞌ kua̱chi‑ó ya̱ nna̱kuniso Jesús maa iniꞌ yɨkɨkúñu re̱ꞌ.

Hebreos 9:28

Jee suni sukuán Cristo ɨɨn ni íchí nso̱ko̱ꞌ re̱ꞌ maáréꞌ ni̱ꞌi̱ꞌ re̱ꞌ sáva nsiíyo re̱ꞌ kua̱chi rá ñɨvɨ kue̱ꞌe̱ꞌ. Jee niji tuku re̱ꞌ ya̱ uvíꞌ íchí, soo nsú káꞌ sáva so̱ko̱ꞌ tuku re̱ꞌ maáréꞌ jie̱ꞌe̱ꞌ kua̱chi, chisaꞌ kiji re̱ꞌ sáva xinánitáꞌvíꞌ re̱ꞌ rá ñɨvɨ ya̱ nétu kuvi iniꞌ ráa re̱ꞌ.