Hebreos 13:15 - Mixteco del suroeste de Tlaxiaco Oaxaca

¹⁵ Jee saáva jie̱ꞌe̱ꞌ ya̱ sáꞌá Cristo jie̱ꞌe̱ꞌ yó, jee yɨ́táꞌán íyó nakuetúꞌún‑ó Ndiosíꞌ, jee yukuán kúvi ya̱ násokoꞌ‑ó nu̱u̱nꞌ re̱ꞌ jín yuꞌú‑ó. Jee ku̱ꞌvayuꞌú‑ó ya̱ I̱toꞌoꞌ‑ó ví Jesús.

Hebreos 13:15 Referans Kwoze

Romanos 12:1

Saáva, ránoꞌó ñanitáꞌán ni̱ꞌ, jie̱ꞌe̱ꞌ ya̱ nníꞌinꞌ yó ya̱ náꞌví iniꞌ Ndiosíꞌ yó, jee saáva náxinániꞌvɨꞌ ni̱ꞌ iniꞌ rán ya̱ nasokoꞌ tékúꞌ rán maárán nu̱u̱nꞌ Ndiosíꞌ sáva kɨtíñú rán nu̱u̱nꞌ re̱ꞌ ya̱ kusɨ́ɨ́n rán kene rán nu̱u̱nꞌ ya̱ niváꞌa, jín ya̱ kueꞌnu rán sáni kúváꞌa iniꞌ re̱ꞌ néꞌyá re̱ꞌ maa. Yukuán kúvi nijia ya̱ néñu̱ꞌun rán re̱ꞌ jín ánímaꞌ rán.

1 Pedro 2:5

Jee ránoꞌó ranika̱ꞌ, suni kúvi rán kuéntáꞌ rá yu̱u̱ꞌ tékúꞌ ya̱ jiátíñú Ndiosíꞌ ránoꞌó sáꞌá re̱ꞌ veꞌi nu̱u̱nꞌ yɨ́ꞌɨ́ Ta̱chi̱ꞌ Ííꞌ re̱ꞌ, sáva kuvi rán su̱tu̱ꞌ ííꞌ kɨtíñú rán nu̱u̱nꞌ tiñu re̱ꞌ, sáva so̱ko̱ꞌ rán nu̱u̱nꞌ Ndiosíꞌ máá tiñu sánikua̱ꞌ sátíñú Ta̱chi̱ꞌ Ííꞌ re̱ꞌ iniꞌ ránoꞌó ya̱ kúváꞌa iniꞌ re̱ꞌ néꞌyá re̱ꞌ maa jie̱ꞌe̱ꞌ yɨ́ꞌɨ́ rán nu̱u̱nꞌ Jesús ya̱ kúvi Cristo.

Mateo 11:25

Jee tiempúꞌ yukuán, jee ni̱ka̱nꞌ táꞌvíꞌ Jesús nu̱u̱nꞌ Tátáꞌ‑a Ndiosíꞌ, jee nkachiꞌ‑i: ―Nákuetúꞌún ni̱ꞌ noꞌó, Tátáꞌ ni̱ꞌ, ya̱ kúvi nú I̱toꞌoꞌ tátúníꞌ nu̱u̱nꞌ antivɨ́ jín iniꞌ ñɨ̱vɨ́ yaꞌá, chi nchise̱ꞌí nú tiñu ñáꞌnú nú yaꞌá nu̱u̱nꞌ rá ñɨvɨ tu̱ꞌva jín rá ñɨvɨ níchí ya̱ ntu njiáꞌa nú ya̱ ki̱ku̱ꞌun iniꞌ ráa maa, chisaꞌ nstúvi nú maa nu̱u̱nꞌ rá ñɨvɨ ñúláꞌví iniꞌ ya̱ kúvi ráa kuéntáꞌ rá súchí lúlí.

1 Pedro 4:11

Retú níꞌínꞌ ɨɨn ránoꞌó ɨɨn ta̱ꞌvi̱ꞌ ya̱ chíneí Ndiosíꞌ nó kaꞌanꞌ nú, jee kaꞌanꞌ sáni káꞌánꞌ nú Tu̱ꞌun Ndiosíꞌ. Jee retú ɨɨn ránoꞌó ni̱ꞌi̱nꞌ nú ta̱ꞌvi̱ꞌ ya̱ chineí nú táꞌán nú, jee saꞌá nú maa jín fuersáꞌ táji Ndiosíꞌ nu̱u̱nꞌ nú, sáva nakuetúꞌún rá ñɨvɨ Ndiosíꞌ jie̱ꞌe̱ꞌ ntáká tiñu sáꞌá rán jie̱ꞌe̱ꞌ Jesús ya̱ kúvi Cristo, jee kúñáꞌnú nasɨ́kuitɨꞌ re̱ꞌ tátúníꞌ re̱ꞌ nɨ́ɨ́nkání. Sukuán koo.

Efesios 2:18

Chi jie̱ꞌe̱ꞌ ya̱ nsa̱ꞌá Cristo jee nni̱ꞌi̱nꞌ‑ó ya̱ kuvi natuꞌva‑ó nu̱u̱nꞌ Tátáꞌ‑ó Ndiosíꞌ, sáꞌá métúꞌún ni Ta̱chi̱ꞌ Ííꞌ re̱ꞌ yɨ́ꞌɨ́ iniꞌ ntáká‑ó, va̱ni ñɨvɨ Israel áxí va̱ni ntu̱ví.

Hebreos 7:25

Jee rá ñɨvɨ ya̱ jiánatuꞌva ráa nu̱u̱nꞌ Ndiosíꞌ jie̱ꞌe̱ꞌ Cristo, jee saáva kávii kuitɨꞌ kuvi natavaꞌ Jesús ráa nu̱u̱nꞌ kua̱chi ráa, jee sikáku re̱ꞌ xinánitáꞌvíꞌ re̱ꞌ nɨ́ɨ́nkání ráa, chi tékúꞌ re̱ꞌ nɨ́ɨ́nkání, sáva yɨ́tuvi re̱ꞌ náma re̱ꞌ ráa nu̱u̱nꞌ Ndiosíꞌ.

Colosenses 1:12

Jee sɨ̱ɨ̱ꞌ koo iniꞌ ánímaꞌ rán ku̱ꞌva rán ya̱ kútaꞌviꞌ rán nu̱u̱nꞌ Tátáꞌ‑ó Ndiosíꞌ, chi maáréꞌ nsa̱túꞌva yó sáá koo‑ó, sáva kuvi kuvisava‑ó ta̱ꞌvi̱ꞌ ya̱ ku̱ꞌva re̱ꞌ nu̱u̱nꞌ rá ñɨvɨ nxi̱nóo sɨ́ɨ́n re̱ꞌ ráa, sáva kuvi ráa se̱ꞌya ñuunꞌ íyó súkún, nu̱u̱nꞌ túúnꞌ ñuꞌunꞌ re̱ꞌ.

Romanos 6:19

(Káꞌánꞌ ni̱ꞌ tu̱ꞌun láꞌví sukuán kuéntáꞌ káꞌánꞌ néni ɨɨn ñɨvɨ chi táyáꞌ iniꞌ rán ya̱ víjí jiáku̱ꞌun iniꞌ rán tu̱ꞌun yaꞌá.) Jee njia̱ꞌa rán yɨkɨkúñu rán sáva kɨtíñú rán nu̱u̱nꞌ tiñu ya̱ ntu íyó ninuꞌun jín nu̱u̱nꞌ ya̱ niváꞌa saꞌá néꞌí rán ka̱ꞌ nékúvi, jee suni sukuán vitan ku̱ꞌva rán yɨkɨkúñu rán nu̱u̱nꞌ máá tiñu na̱a̱ꞌ kuéntáꞌ musúꞌ sáva kusɨ́ɨ́n rán ya̱ nkɨ́ꞌɨ rán ka̱ꞌ nu̱u̱nꞌ ya̱ niváꞌa sáva kɨtíñú rán nu̱u̱nꞌ Ndiosíꞌ.

Juan 10:9

Soo nuꞌuꞌ chi kúvi ni̱ꞌ kuéntáꞌ ɨɨn yuvéꞌí. Jee retú ki̱vɨ néni ɨɨn ñɨvɨ naꞌá Ndiosíꞌ jie̱ꞌe̱ꞌ ni̱ꞌ, jee natavaꞌ re̱ꞌ maa nu̱u̱nꞌ kua̱chi‑i jee nanitáꞌvíꞌ‑i. Kúvi‑i kuéntáꞌ lanchi ni̱ꞌ ya̱ néne nívɨ jee ni̱ꞌi̱nꞌ ti̱ꞌ iteꞌ kajiꞌ ti̱ꞌ.

Juan 14:6

Jee nkachiꞌ Jesús nu̱u̱nꞌ‑u: ―Nuꞌuꞌ kúvi ni̱ꞌ ichi ya̱ nátuꞌva ñɨvɨ nu̱u̱nꞌ Ndiosíꞌ, jín nu̱u̱nꞌ nuꞌuꞌ va̱ji ya̱ naáꞌ, jín maáníꞌ ví ya̱ sáꞌá‑a ya̱ kutekuꞌ ñɨvɨ jín Ndiosíꞌ nɨ́ɨ́nkání. Ntu íyó inka ka̱ꞌ ichi ya̱ kenta ñɨvɨ nu̱u̱nꞌ Tátáꞌ ni̱ꞌ Ndiosíꞌ, chi métúꞌún nuꞌuꞌ ví‑i ya̱ sáꞌá ya̱ nkénta ñɨvɨ nu̱u̱nꞌ Ndiosíꞌ.

Lucas 10:21

Jee máá hora yukuán jee nnusɨ̱ɨ̱ꞌ iniꞌ Jesús nsa̱ꞌá Ta̱chi̱ꞌ Ííꞌ, jee nkachiꞌ re̱ꞌ: ―Nákuetúꞌún ni̱ꞌ noꞌó, Tátáꞌ ni̱ꞌ, ya̱ kúvi nú I̱toꞌoꞌ tátúníꞌ nu̱u̱nꞌ antivɨ́ jín nu̱u̱nꞌ iniꞌ ñɨ̱vɨ́ yaꞌá, chi nchise̱ꞌí nú tiñu ñáꞌnú nú yaꞌá nu̱u̱nꞌ rá ñɨvɨ tu̱ꞌva jín rá ñɨvɨ níchí ya̱ ntu njiáꞌa nú ya̱ ki̱ku̱ꞌun iniꞌ ráa maa, chisaꞌ nstúvi nú maa nu̱u̱nꞌ rá ñɨvɨ ñúláꞌví iniꞌ ya̱ kúvi ráa kuéntáꞌ rá súchí lúlí. Va̱tu̱ni, Tátáꞌ ni̱ꞌ, chi kúváꞌa iniꞌ nú ya̱ sukuán koo.

Hebreos 12:28

Jee nu̱u̱nꞌ ni̱ꞌi̱nꞌ‑ó ɨɨn ñuunꞌ táji Ndiosíꞌ nu̱u̱nꞌ‑ó nu̱u̱nꞌ tátúníꞌ re̱ꞌ nu̱u̱nꞌ‑ó ya̱ ntu kúvi kajiaꞌ‑a chi ya̱ íyó kutú‑u, jee saáva íyó nakuatáꞌví‑ó re̱ꞌ, jee jie̱ꞌe̱ꞌ vá kɨtíñú‑ó nu̱u̱nꞌ re̱ꞌ kɨñúꞌún‑ó nu̱u̱nꞌ re̱ꞌ jín ya̱ kuꞌun yúꞌví iniꞌ‑ó re̱ꞌ sáni kúváꞌa iniꞌ re̱ꞌ néꞌyá re̱ꞌ maa.