Hebreos 1:14 - Mixteco del suroeste de Tlaxiaco Oaxaca14 Chi ntáká rá najiáꞌáꞌ ííꞌ Ndiosíꞌ, jee súka̱ꞌ ntu̱ví íyó yɨkɨkúñu ráa, soo jiátíñú re̱ꞌ ráa kúvi ráa musúꞌ re̱ꞌ sáꞌá ráa tiñu re̱ꞌ, chi chúichí re̱ꞌ ráa sáva chineí ráa ntáká rá ñɨvɨ ya̱ ni̱ꞌi̱nꞌ rává ta̱ꞌvi̱ꞌ ya̱ nanitáꞌvíꞌ rává. Gade chapit la |
Hebreos 1:14
65 Referans Kwoze
Jee ni jiáni iniꞌ re̱ꞌ ya̱ saꞌá re̱ꞌ sukuán, jee nu̱u̱nꞌ ñuma̱ꞌná re̱ꞌ ntu̱vi ɨɨn najiáꞌáꞌ ííꞌ I̱toꞌoꞌ‑ó Ndiosíꞌ jee nkachiꞌ‑i nu̱u̱nꞌ re̱ꞌ: ―José, noꞌó ichiyúkúnꞌ tataꞌ veꞌi David, koto yúꞌví nú keꞌen nú María kuvi ña ñasɨ́ꞌɨ́ nú, chi Se̱ꞌya ya̱ nna̱nise̱ꞌya ña va̱ji‑i ne̱ nu̱u̱nꞌ Ta̱chi̱ꞌ Ííꞌ Ndiosíꞌ.
Jee sáá ya̱ kua̱noꞌonꞌ rá te̱e tu̱ꞌva níchí xi̱ni̱ꞌ vá, saájee ntu̱vi ɨɨn najiáꞌáꞌ ííꞌ I̱toꞌoꞌ‑ó nu̱u̱nꞌ ñuma̱ꞌná José jee nkachiꞌ‑i nu̱u̱nꞌ re̱ꞌ: ―Nako̱o, keꞌen te̱lúlí jín nánáꞌ re̱ꞌ, jee kene yuꞌuꞌ kaku nú kuáꞌánꞌ jín ráa nu̱u̱nꞌ ñuꞌún ñuunꞌ Egipto, jee kino̱o rán yukuán ne̱kua̱ꞌ kachiꞌ ni̱ꞌ nu̱u̱nꞌ nú ya̱ nikó rán. Chi Herodes tají re̱ꞌ rá te̱e nanukú ráa te̱lúlí yaꞌá sáva kaꞌniꞌ ráa maa ―nkachiꞌ najiáꞌáꞌ ííꞌ vá.
Saájee [nne̱ꞌyá ni̱ꞌ jee] niniꞌ ni̱ꞌ ya̱ ma̱ꞌñú teyuꞌ nu̱u̱nꞌ nééꞌ tátúníꞌ vá jín ma̱ꞌñú ni kúmíꞌ rá tékúꞌ vá jín rá te̱e kúñáꞌnú vá, jee yukuán íñɨ́ maáréꞌ ya̱ kúvi re̱ꞌ Lanchi Lúlí, ya̱ túvi ya̱ ñaꞌniꞌ rá ñɨvɨ re̱ꞌ. Jee íyó u̱xa̱ꞌ nikɨ re̱ꞌ jín u̱xa̱ꞌ nchinúún re̱ꞌ. Jee ni uxáꞌ nchinúún re̱ꞌ vá, yukuán kúvi ni uxáꞌ espíritu Ndiosíꞌ ya̱ nchu̱ichí Ndiosíꞌ kua̱íyó iniꞌ ñɨ̱vɨ́.
Soo nstúvi Ndiosíꞌ nu̱u̱nꞌ ráa ya̱ nsú ya̱ kuvi maáráa ni ví jie̱ꞌe̱ꞌ rá tiñu ya̱ nkachiꞌ ráa vá, chisaꞌ ya̱ kuvi ya̱ váꞌa maáránoꞌó ví jie̱ꞌe̱ꞌ rá tu̱ꞌun ya̱ nna̱kani ráa vá, jee vitan tu̱ꞌun vá tékútu̱ꞌún nu̱u̱nꞌ ránoꞌó ya̱ stékútu̱ꞌún rá ñɨvɨ tu̱ꞌun váꞌa nsa̱ꞌá Ta̱chi̱ꞌ Ííꞌ Ndiosíꞌ ya̱ nta̱jí re̱ꞌ nkiji‑i ne̱ antivɨ́ súkún. Jee ne̱ rá najiáꞌáꞌ ííꞌ Ndiosíꞌ ñúkúvi iniꞌ ráa ranika̱ꞌ kuniꞌ ráa maa.
’Saájee nuꞌuꞌ ya̱ kúvi ni̱ꞌ ya̱ tátúníꞌ nu̱u̱nꞌ nɨꞌɨ jee kachiꞌ ni̱ꞌ nu̱u̱nꞌ rá ñɨvɨ íñɨ́ ichi kuáꞌá ni̱ꞌ: “Neꞌenꞌ ránoꞌó, ya̱ netuꞌ kúvi rán nsa̱ꞌá Tátáꞌ ni̱ꞌ, jee ni̱ꞌi̱nꞌ rán ta̱ꞌvi̱ꞌ ya̱ váꞌa ya̱ yɨ́ꞌɨ́ rán xi̱ntíín re̱ꞌ tátúníꞌ re̱ꞌ nu̱u̱nꞌ rán ya̱ ya íyó túꞌva‑a ne̱ sáá nka̱jiéꞌé ña̱ko̱o ñɨ̱vɨ́ yaꞌá nsa̱ꞌá re̱ꞌ.
Jee suni nkachiꞌ ya̱chi̱ꞌ Enoc tu̱ꞌun nkene yuꞌú maá Ndiosíꞌ ya̱ nkaꞌanꞌ‑a jie̱ꞌe̱ꞌ rá te̱e túꞌún yaꞌá. Jee ne̱ nu̱u̱nꞌ Adán nkene se̱ꞌya re̱ꞌ jee ni̱yo se̱ꞌya se̱ꞌya re̱ꞌ jee suꞌva níkɨ́nꞌ va̱ji ichinúúnꞌ nkenta u̱xa̱ꞌ táꞌ ráa ne̱ sáá nkaku Enoc. Jee nkachiꞌ Enoc: “Kune̱ꞌyá, kiji I̱toꞌoꞌ jín kue̱ꞌe̱ꞌ víꞌí mil rá najiáꞌáꞌ ííꞌ re̱ꞌ,
Chi ñani iniꞌ ráa ya̱ íyó va̱ꞌa saꞌá ráa sukuán, chi táyáꞌvi ráa ya̱ íyó nachineí ráa rá ñɨvɨ Israel, chi retú jíꞌín ráa nni̱ꞌi̱nꞌ ráa ranika̱ꞌ ta̱ꞌvi̱ꞌ iniꞌ ánímaꞌ ráa ya̱ síkútaꞌviꞌ Ndiosíꞌ nu̱u̱nꞌ rá ñɨvɨ Israel, saáva suni íyó nachineí ráa rá ñanitáꞌán‑ó ya̱ kúvi ñɨvɨ Israel ná kúvi jíniñúꞌún rává.
sáva sáꞌá ni̱ꞌ tiñu Cristo Jesús nu̱u̱nꞌ rá ñɨvɨ ya̱ ntu kúvi ñɨvɨ Israel. Sáꞌá ni̱ꞌ tiñu kuéntáꞌ su̱tu̱ꞌ, ya̱ stékútu̱ꞌún ni̱ꞌ tu̱ꞌun váꞌa Ndiosíꞌ, sáva kuvi ki̱vɨ ráa nu̱u̱nꞌ re̱ꞌ, kuéntáꞌ násokoꞌ ni̱ꞌ ráa nu̱u̱nꞌ re̱ꞌ, jee saájee kúváꞌa iniꞌ re̱ꞌ néꞌyá re̱ꞌ ráa, chi nsa̱ꞌá Ta̱chi̱ꞌ Ííꞌ re̱ꞌ nnu̱noo ráa chi nsásɨ́ɨ́n re̱ꞌ ráa sáva kɨtíñú ráa nu̱u̱nꞌ re̱ꞌ.
Jee nuꞌuꞌ, ya̱ nta̱jí Ndiosíꞌ nuꞌuꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ ñɨ̱vɨ́, chuichí ni̱ꞌ ráa najiáꞌáꞌ ííꞌ ni̱ꞌ, jee nastútú ráa rá ñɨvɨ ya̱ xínínkava‑a táꞌán‑a nu̱u̱nꞌ kua̱chi, jín rá ñɨvɨ jiáꞌnu níváꞌa, tavaꞌ ráa rává nteñu rá ñɨvɨ yɨ́ꞌɨ́ xi̱ntíín ni̱ꞌ ya̱ tátúníꞌ ni̱ꞌ nu̱u̱nꞌ rá ñɨvɨ vá.
Jee suni sukuán ránoꞌó, te̱e íyó ñasɨ́ꞌɨ́, kuneeꞌ ñunkúún rán jín ñasɨ́ꞌɨ́ rán kani va̱ꞌa iniꞌ rán jie̱ꞌe̱ꞌ ya̱ jíniñúꞌún ráña, jee koo yɨ́ñúꞌún ñáꞌnú rán nu̱u̱nꞌ ráña, chi táyáꞌ iniꞌ ráña ka̱ꞌ nsú ka̱ꞌ ránoꞌó. Jee koo yɨ́ñúꞌún ñáꞌnú rán nu̱u̱nꞌ ráña chi suni ne̱ jíꞌín ráña jín ránoꞌó ni̱ꞌi̱nꞌ rán ɨɨn ni ta̱ꞌvi̱ꞌ sikútaꞌviꞌ Ndiosíꞌ ránoꞌó kutekuꞌ rán nɨ́ɨ́nkání jín re̱ꞌ saꞌá re̱ꞌ. Sukuán íyó saꞌá rán sáva ntu̱náꞌ kasɨꞌ nu̱u̱nꞌ ya̱ káꞌánꞌ rán jín Ndiosíꞌ.
Ránoꞌó ñaniꞌ ni̱ꞌ jín ku̱ꞌva ni̱ꞌ ya̱ ñúnúunꞌ ni̱ꞌ, teso̱ꞌo yaꞌá: Ndiosíꞌ nka̱ji re̱ꞌ rá ñɨvɨ láꞌví íyó ñɨ̱vɨ́ yaꞌá, sáva kukúká ánímaꞌ ráa kúneí iniꞌ ráa re̱ꞌ, jee sáva ni̱ꞌi̱nꞌ ráa ta̱ꞌvi̱ꞌ ya̱ kɨꞌɨ ráa naꞌá re̱ꞌ nu̱u̱nꞌ tátúníꞌ re̱ꞌ, ya̱ suvivá nchi̱sóyuꞌú re̱ꞌ ya̱ ku̱ꞌva re̱ꞌ nu̱u̱nꞌ rá ñɨvɨ ya̱ ñúnúunꞌ ráa re̱ꞌ.
Soo vitan jee su̱tu̱ꞌ‑ó ya̱ kúvi Cristo nni̱ꞌi̱nꞌ re̱ꞌ tiñu máá ñáꞌnú nasɨ́kuitɨꞌ ka̱ꞌ nsú káꞌ rá tiñu nsa̱ꞌá rá su̱tu̱ꞌ vá. Jee suni sukuán níso re̱ꞌ tiñu ñujiínꞌ jie̱ꞌe̱ꞌ tratúꞌ jiáá ya̱ kúvi va̱ꞌa nasɨ́kuitɨꞌ ka̱ꞌ nsú káꞌ tratúꞌ túꞌú. Jee suni ñakɨnꞌ Ndiosíꞌ tratúꞌ jiáá vá jie̱ꞌe̱ꞌ rá tiñu váꞌa nasɨ́kuitɨꞌ ka̱ꞌ nchi̱sóyuꞌú re̱ꞌ ya̱ saꞌá re̱ꞌ maa.
Jee tu̱ꞌun ya̱ níyo yuꞌuꞌ iniꞌ re̱ꞌ jee nstúvi re̱ꞌ maa vitan ví yaꞌá: Tu̱ꞌun váꞌa jie̱ꞌe̱ꞌ Cristo sáꞌá ya̱ ñɨvɨ rá inka nación, ya̱ ntu kúvi ñɨvɨ Israel, ɨɨn nuún ni ta̱ꞌvi̱ꞌ ni̱ꞌi̱nꞌ ráa jín rá ñɨvɨ Israel, jee ɨɨn ni nnuvi ráa kuéntáꞌ ɨɨn yɨkɨkúñu, jee ɨɨn nuún ni ni̱ꞌi̱nꞌ ráa ya̱ nchi̱sóyuꞌú re̱ꞌ, jie̱ꞌe̱ꞌ yɨ́ꞌɨ́ ráa nu̱u̱nꞌ Cristo Jesús.
Jee ya̱ ya kúvi‑ó se̱ꞌya Ndiosíꞌ, jee suni ni̱ꞌi̱nꞌ‑ó ɨɨn ta̱ꞌvi̱ꞌ. Chi kutaꞌviꞌ‑ó ta̱ꞌvi̱ꞌ taji Ndiosíꞌ nu̱u̱nꞌ‑ó. Jee kutaꞌviꞌ nkáá‑ó ta̱ꞌvi̱ꞌ vá jín Cristo. Retú kuiñɨ ni̱ꞌin‑ó jín Cristo jee íyó ñɨvɨ koto u̱ꞌvi̱ꞌ ráa yó kuéntáꞌ nito u̱ꞌvi̱ꞌ ráa re̱ꞌ. Jee nu̱u̱nꞌ nóꞌo‑órán sukuán jín Cristo, jee suni saꞌá Ndiosíꞌ ya̱ viiꞌ kuñáꞌnú nkáá‑ó jín Cristo.
Chi níchí nasɨ́kuitɨꞌ sáꞌá Ndiosíꞌ, chi nsú ya̱ níchí ñúꞌún xi̱ni̱ꞌ rá ñɨvɨ ñɨ̱vɨ́ sáꞌá ya̱ kuniꞌ ráa iniꞌ Ndiosíꞌ, chisaꞌ nkuva̱ꞌa iniꞌ Ndiosíꞌ ya̱ jiátíñú re̱ꞌ tu̱ꞌun váꞌa re̱ꞌ sáva natavaꞌ re̱ꞌ rá ñɨvɨ nu̱u̱nꞌ kua̱chi ráa sikáku re̱ꞌ ráa ya̱ kúneí iniꞌ ráa ínúꞌ iniꞌ ráa re̱ꞌ, asúꞌ jiáni iniꞌ rá ñɨvɨ ñɨ̱vɨ́ ya̱ tu̱ꞌun naanꞌ ví tu̱ꞌun re̱ꞌ ya̱ tékútu̱ꞌún nu̱u̱nꞌ ráa.
Jee nu̱u̱nꞌ ni̱yo sukuán, jee maáórán, ¿na̱sa ka̱ꞌ vá saꞌá‑ó jee kaku‑ó nu̱u̱nꞌ tu̱nóꞌó vá, retú ntu nénu̱u̱nꞌ‑ó chuꞌun iniꞌ‑ó jie̱ꞌe̱ꞌ tu̱ꞌun máá ñáꞌnú káꞌ jie̱ꞌe̱ꞌ ya̱ na̱sa natavaꞌ Jesús yó nu̱u̱nꞌ kua̱chi‑ó sikáku re̱ꞌ yó rúja? Chi xíꞌna ka̱ꞌ nkachitu̱ꞌún maá I̱toꞌoꞌ‑ó Jesús tu̱ꞌun yaꞌá, jee kuíre rá te̱e ya̱ nteso̱ꞌo maa, jee nna̱stúvi ráa ya̱ naáꞌ jie̱ꞌe̱ꞌ tu̱ꞌun yaꞌá nu̱u̱nꞌ‑órán
Piblisite