Gálatas 3:14 - Mixteco del suroeste de Tlaxiaco Oaxaca

¹⁴ Saáva nchu̱náán nkáꞌnú Cristo Jesús suꞌva, sáva saꞌá Ndiosíꞌ ya̱ netuꞌ kuvi ñɨvɨ nta̱ká nación ya̱ yɨ́ꞌɨ́ nu̱u̱nꞌ Cristo Jesús, ya̱ nchi̱sóyuꞌú Ndiosíꞌ nu̱u̱nꞌ Abraham ya̱ saꞌá re̱ꞌ ya̱ netuꞌ kuvi ráa. Jee sáva ni̱ꞌi̱nꞌ‑ó Ta̱chi̱ꞌ Ííꞌ ya̱ nchi̱sóyuꞌú re̱ꞌ ya̱ taji re̱ꞌ nu̱u̱nꞌ‑ó jie̱ꞌe̱ꞌ kúneí iniꞌ‑ó re̱ꞌ.

Gálatas 3:14 Referans Kwoze

1 Corintios 12:13

Chi suni nsi̱kuánuté Cristo yó jín métúꞌún ni Ta̱chi̱ꞌ Ííꞌ vá sáva kɨꞌɨ‑ɨ iniꞌ ánímaꞌ‑ó jee nsa̱ꞌá Ta̱chi̱ꞌ Ííꞌ vá ya̱ kɨꞌɨ ntáká‑ó nu̱u̱nꞌ Cristo kuéntáꞌ nki̱vɨ‑ó nu̱u̱nꞌ ɨɨn ni yɨkɨkúñu re̱ꞌ. Ya̱ súka̱ꞌ ñɨvɨ Israel kúvi‑ó, áxí ñɨvɨ ntu kúvi‑ó Israel, áxí súka̱ꞌ ñɨvɨ ya̱ kúvi musúꞌ ya̱ nkeꞌen ñɨvɨ maa, áxí va̱ni ñɨvɨ ya̱ íyó núne ya̱ sátíñú‑u tiñu maá‑a, chi ntáká‑ó chi yɨ́ꞌɨ́‑ó nu̱u̱nꞌ rá ñɨvɨ Ndiosíꞌ, chi ɨɨn ni Ta̱chi̱ꞌ Ííꞌ níꞌínꞌ nɨꞌɨ‑ó.

Efesios 2:18

Chi jie̱ꞌe̱ꞌ ya̱ nsa̱ꞌá Cristo jee nni̱ꞌi̱nꞌ‑ó ya̱ kuvi natuꞌva‑ó nu̱u̱nꞌ Tátáꞌ‑ó Ndiosíꞌ, sáꞌá métúꞌún ni Ta̱chi̱ꞌ Ííꞌ re̱ꞌ yɨ́ꞌɨ́ iniꞌ ntáká‑ó, va̱ni ñɨvɨ Israel áxí va̱ni ntu̱ví.

Gálatas 3:2

Kua̱chi kuíni ni̱ꞌ katu̱ꞌún ni̱ꞌ tu̱ꞌun yaꞌá ránoꞌó. ¿Na̱sa nni̱ꞌi̱nꞌ rán Ta̱chi̱ꞌ Ííꞌ Ndiosíꞌ? ¿Á nni̱ꞌi̱nꞌ rán re̱ꞌ chi nsi̱kúnkuvi rán sáni tátúníꞌ tu̱ꞌun ley Moisés? ¡Ntu̱ví kuitɨꞌ!, chi nni̱ꞌi̱nꞌ rán maa chi ínúꞌ iniꞌ rán tu̱ꞌun Jesús sáá nteso̱ꞌo rán maa.

Hechos 2:33

Saáva Ndiosíꞌ nxi̱náa re̱ꞌ Jesús nu̱u̱nꞌ kúñáꞌnú‑u ya̱ nééꞌ‑e ichi kuáꞌá re̱ꞌ. Jee Ndiosíꞌ, Tááꞌ Jesús, njia̱ꞌa re̱ꞌ tiñu nu̱u̱nꞌ Jesús ya̱ tetíñú‑u Ta̱chi̱ꞌ Ííꞌ, sáni nchi̱sóyuꞌú re̱ꞌ, sáva sikúténuun‑u Ta̱chi̱ꞌ Ííꞌ nu̱u̱nꞌ rá ñɨvɨ. Jee yaꞌá ví ya̱ néꞌyá rán jín ya̱ tésóꞌo rán.

1 Pedro 1:22

Soo vitan jee ya̱ nna̱saꞌá ninuꞌun re̱ꞌ iniꞌ ánímaꞌ rán, jie̱ꞌe̱ꞌ ya̱ [nsa̱ꞌá Ta̱chi̱ꞌ Ííꞌ re̱ꞌ] ya̱ nka̱níjiá rán tu̱ꞌun na̱a̱ꞌ re̱ꞌ, sáva kunu̱u̱nꞌ nijia rán rá ñanitáꞌán rán, saáva ne̱ ninuꞌun ánímaꞌ rán kunu̱u̱nꞌ ntántúníꞌ víꞌí rán ɨɨn inka táꞌán rán.

Juan 7:39

Soo nkachiꞌ Jesús rá tu̱ꞌun yaꞌá jie̱ꞌe̱ꞌ Ta̱chi̱ꞌ Ííꞌ Ndiosíꞌ, chi rá ñɨvɨ ya̱ kúneí iniꞌ ráa re̱ꞌ, jee ni̱ꞌi̱nꞌ ráa Ta̱chi̱ꞌ Ííꞌ Ndiosíꞌ kɨꞌɨ‑ɨ iniꞌ ánímaꞌ ráa. Chi ni ntiáꞌan taji Ndiosíꞌ Ta̱chi̱ꞌ Ííꞌ re̱ꞌ, chi jie̱ꞌe̱ꞌ ntiáné kɨ̱naa Jesús antivɨ́ súkún nu̱u̱nꞌ kúñáꞌnú re̱ꞌ.

Efesios 4:30

Jee koto sáꞌá rán kua̱chi sáva nsíkúkuíꞌyáꞌ rán iniꞌ Ta̱chi̱ꞌ Ííꞌ Ndiosíꞌ. Chi nni̱ꞌi̱nꞌ rán Ta̱chi̱ꞌ Ííꞌ vá kuéntáꞌ ɨɨn seyúꞌ ya̱ stúvi ya̱ kúvi rán ñɨvɨ Ndiosíꞌ, ne̱kua̱ꞌ kiji máá ki̱vɨ̱ꞌ ya̱ nakani núne Ndiosíꞌ yó nu̱u̱nꞌ ya̱ nóꞌo‑ó ñɨ̱vɨ́ yaꞌá jee xinánitáꞌvíꞌ re̱ꞌ yó.

Efesios 3:16

Jee jíkánꞌ táꞌvíꞌ ni̱ꞌ nu̱u̱nꞌ Ndiosíꞌ, ya̱ nachituvi Ta̱chi̱ꞌ Ííꞌ re̱ꞌ iniꞌ ránoꞌó, jín fuersáꞌ ííꞌ Ndiosíꞌ sáni ntántúníꞌ kúñáꞌnú re̱ꞌ.

Efesios 2:22

Jee suni ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ Cristo, jee síkuéꞌnu nkáá Ndiosíꞌ ránoꞌó ne̱ kuvi rán veꞌi nu̱u̱nꞌ íyó Ndiosíꞌ, chi yɨ́ꞌɨ́ Ta̱chi̱ꞌ Ííꞌ re̱ꞌ iniꞌ ánímaꞌ rán.

Gálatas 4:6

Jie̱ꞌe̱ꞌ ya̱ kúvi‑ó se̱ꞌya Ndiosíꞌ vá nchu̱ichí re̱ꞌ Ta̱chi̱ꞌ Ííꞌ Se̱ꞌya re̱ꞌ ki̱vɨ‑ɨ iniꞌ ánímaꞌ‑ó, jee Ta̱chi̱ꞌ Ííꞌ re̱ꞌ sáꞌá ya̱ kúvi káchíꞌ nijia‑ó nu̱u̱nꞌ Ndiosíꞌ: “Tááꞌ ni̱ꞌ, Tátáꞌ ni̱ꞌ.”

Gálatas 3:16

Saájee rá váꞌa nchi̱sóyuꞌú Ndiosíꞌ nu̱u̱nꞌ Abraham jín nu̱u̱nꞌ se̱ꞌya ichiyúkúnꞌ nkene nu̱u̱nꞌ re̱ꞌ. Nu̱u̱nꞌ Tutuꞌ Ííꞌ níso Tu̱ꞌun Ndiosíꞌ ntu káchíꞌ‑i: “jín nu̱u̱nꞌ rá ichiyúkúnꞌ nú”, ya̱ káꞌánꞌ‑a jie̱ꞌe̱ꞌ kéꞌín ñɨvɨ. Chisaꞌ káꞌánꞌ‑a jie̱ꞌe̱ꞌ ɨɨn ni, jee káchíꞌ‑i: “jín nu̱u̱nꞌ Se̱ꞌya ichiyúkúnꞌ nú”, ya̱ kúvi‑i Cristo.

2 Corintios 1:22

Jee suni ntaji Ndiosíꞌ Ta̱chi̱ꞌ Ííꞌ re̱ꞌ kɨꞌɨ‑ɨ iniꞌ ánímaꞌ‑ó. Yukuán vá kúvi seyúꞌ ya̱ ntee re̱ꞌ ya̱ stúvi re̱ꞌ ya̱ kúvi‑ó ñɨvɨ re̱ꞌ. Ta̱chi̱ꞌ Ííꞌ re̱ꞌ ví ya̱ táji ya̱chi̱ꞌ re̱ꞌ nu̱u̱nꞌ‑ó ya̱ stúvi ya̱ naáꞌ ya̱ ni̱ꞌi̱nꞌ‑ó nɨꞌɨ ta̱ꞌvi̱ꞌ ya̱ táji Ndiosíꞌ nu̱u̱nꞌ‑ó ichinúúnꞌ ka̱ꞌ.

Hechos 5:32

Jee ránuꞌuꞌ niniꞌ ránꞌ maa jee nástúvi ránꞌ ya̱ naáꞌ jie̱ꞌe̱ꞌ vá. Jee suni nástúvi Ta̱chi̱ꞌ Ííꞌ Ndiosíꞌ maa. Chi Ndiosíꞌ jiáꞌa re̱ꞌ Ta̱chi̱ꞌ Ííꞌ re̱ꞌ nu̱u̱nꞌ rá ñɨvɨ káníjiá ráa re̱ꞌ ―nkachiꞌ Pedro jín rá inka apóstol chúichí Ndiosíꞌ.

Hechos 4:12

Soo kua̱chi Jesús kúvi natavaꞌ re̱ꞌ yó nu̱u̱nꞌ kua̱chi‑ó xinánitáꞌvíꞌ re̱ꞌ yó, chi ntu̱né íyó inka ka̱ꞌ nu̱u̱nꞌ kɨꞌɨ‑ó sáva nanitáꞌvíꞌ‑ó. Chi ntu̱né íyó inka ka̱ꞌ súví ni ɨɨn ñɨvɨ nu̱u̱nꞌ ñɨ̱vɨ́ yaꞌá ya̱ njia̱ꞌa Ndiosíꞌ nu̱u̱nꞌ ñɨvɨ sáva natavaꞌ re̱ꞌ yó nu̱u̱nꞌ kua̱chi‑ó sikáku re̱ꞌ yó ―nkachiꞌ Pedro.

Lucas 24:49

Jee kune̱ꞌyá rán, chi nuꞌuꞌ chúichí ni̱ꞌ Ta̱chi̱ꞌ Ííꞌ kiji‑i nu̱u̱nꞌ rán sánikua̱ꞌ ya̱ nchi̱sóyuꞌú Tátáꞌ ni̱ꞌ. Soo kino̱o rán kunetu rán nu̱u̱nꞌ ñuunꞌ Jerusalén, nekuaꞌ ni̱ꞌi̱nꞌ rán fuersáꞌ ííꞌ Ndiosíꞌ ya̱ kiji ne̱ antivɨ́ súkún ―nkachiꞌ Jesús nu̱u̱nꞌ ráa.

Lucas 11:13

Saáva ránoꞌó, ya̱ kúvi rán ñɨvɨ niváꞌa, jee ya jíníꞌ rán ku̱ꞌva rán rá ta̱ꞌvi̱ꞌ váꞌa nu̱u̱nꞌ rá se̱ꞌya rán, soo saꞌ víꞌí káꞌ Tátáꞌ rán Ndiosíꞌ ya̱ nééꞌ re̱ꞌ ne̱ antivɨ́ ku̱ꞌva re̱ꞌ Ta̱chi̱ꞌ Ííꞌ re̱ꞌ nu̱u̱nꞌ rá ñɨvɨ ya̱ jíkánꞌ táꞌvíꞌ ráa nu̱u̱nꞌ re̱ꞌ ―nkachiꞌ Jesús.

Génesis 22:18

Jee kuatíñú ni̱ꞌ rá ichiyúkúnꞌ nú sáva saꞌá ni̱ꞌ ya̱ netuꞌ kuvi rá ñɨvɨ ntáká rá nación íyó ñɨ̱vɨ́ yaꞌá, chi jie̱ꞌe̱ꞌ nika̱ꞌ nka̱níjiá nú ya̱ káchíꞌ ni̱ꞌ ―nkachiꞌ máá najiáꞌáꞌ ííꞌ I̱toꞌoꞌ.

1 Pedro 3:9

Koto násaꞌá niva̱ꞌa rán nu̱u̱nꞌ ɨɨn ñɨvɨ ya̱ sáꞌá niva̱ꞌa‑a jín ránoꞌó, jee koto nátenu̱u̱nꞌ rán ñɨvɨ ya̱ ténúunꞌ‑u ránoꞌó, chisaꞌ nakaꞌanꞌ rán tu̱ꞌun váꞌa ya̱ kuvi ya̱ váꞌa nu̱u̱nꞌ ráa. Chi nkana Ndiosíꞌ ránoꞌó sáva saꞌá rán suꞌva sáva ni̱ꞌi̱nꞌ rán ta̱ꞌvi̱ꞌ taji re̱ꞌ nu̱u̱nꞌ rán ya̱ kuvi ya̱ váꞌa ránoꞌó.