Gálatas 2:19 - Mixteco del suroeste de Tlaxiaco Oaxaca

¹⁹ Chi jie̱ꞌe̱ꞌ maá ley vá káchíꞌ ya̱ íyó kuviꞌ ni̱ꞌ jie̱ꞌe̱ꞌ ya̱ njiáꞌa ni̱ꞌ nu̱u̱nꞌ ley vá, jee suꞌva nsa̱ꞌá‑a ya̱ níꞌiꞌ ni̱ꞌ nu̱u̱nꞌ ley vá, sáva kutekuꞌ ni̱ꞌ jín Ndiosíꞌ jee kueꞌnu ni̱ꞌ ichi re̱ꞌ.

Gálatas 2:19 Referans Kwoze

Romanos 7:4

Jee suni sukuán vá, ránoꞌó ñaniꞌ ni̱ꞌ jín ku̱ꞌva ni̱ꞌ, nkɨ́ꞌɨ rán ka̱ꞌ xi̱ntíín tu̱ꞌun ley nta̱túníꞌ Ndiosíꞌ yanaꞌán chi kuéntáꞌ ni̱ꞌi̱ꞌ rán nu̱u̱nꞌ ley vá chi jíꞌín rán ni̱ꞌi̱ꞌ rán jín Cristo sáá ni̱ꞌi̱ꞌ re̱ꞌ jín yɨkɨkúñu re̱ꞌ, sáva kɨꞌɨ rán nu̱u̱nꞌ inka ka̱ꞌ. Chi yɨ́ꞌɨ́ rán nu̱u̱nꞌ Cristo ya̱ nnako̱o re̱ꞌ jee nna̱tekuꞌ i̱i̱ꞌ re̱ꞌ nkene re̱ꞌ nteñu rá ni̱yɨ. Yɨ́ꞌɨ́ rán nu̱u̱nꞌ re̱ꞌ sáva kueꞌnu na̱a̱ꞌ‑ó kɨtíñú‑ó nu̱u̱nꞌ Ndiosíꞌ.

Romanos 6:2

¡Vankée sukuán!, chi ya ni̱ꞌi̱ꞌ‑ó nu̱u̱nꞌ kua̱chi‑ó, ¿na̱sa kuvi kueꞌnu i̱i̱ꞌ‑órán ka̱ꞌ jín kua̱chi‑ó, rúsa?

1 Tesalonicenses 5:10

Chi suvire̱ꞌ vá ni̱ꞌi̱ꞌ re̱ꞌ jie̱ꞌe̱ꞌ‑ó, sáva kuvi kutekuꞌ nkáá‑ó jín re̱ꞌ, va̱ni tékúꞌ‑ó áxí va̱ni ya̱ ni̱ꞌi̱ꞌ‑ó.

2 Corintios 5:15

Jee ni̱ꞌi̱ꞌ re̱ꞌ jie̱ꞌe̱ꞌ ntáká ñɨvɨ, sáva rá ñɨvɨ ya̱ tékúꞌ ráa ntu̱ví ka̱ꞌ jiáꞌnu ráa yɨ́tíñú ráa nu̱u̱nꞌ maáráa, chisaꞌ kueꞌnu ráa kɨtíñú ráa nu̱u̱nꞌ maáréꞌ ya̱ ni̱ꞌi̱ꞌ re̱ꞌ jee nna̱tekuꞌ i̱i̱ꞌ re̱ꞌ nnako̱o yɨkɨkúñu re̱ꞌ nkene re̱ꞌ nteñu rá níyɨ sáva kuvi ya̱ váꞌa ráa.

Romanos 6:11

Jee suni sukuán ránoꞌó kuꞌun iniꞌ rán kuéntáꞌ ya̱ ya ni̱ꞌi̱ꞌ rán nu̱u̱nꞌ kua̱chi, soo tékúꞌ rán sáva kɨtíñú rán nu̱u̱nꞌ Ndiosíꞌ jie̱ꞌe̱ꞌ yɨ́ꞌɨ́ rán nu̱u̱nꞌ Cristo Jesús.

Romanos 8:2

Chi nku̱neí Ta̱chi̱ꞌ Ííꞌ Ndiosíꞌ sáꞌá re̱ꞌ ya̱ kutekuꞌ‑ó jín Ndiosíꞌ, jie̱ꞌe̱ꞌ yɨ́ꞌɨ́‑ó nu̱u̱nꞌ Cristo Jesús, jee nákani núne re̱ꞌ ránoꞌó ya̱ nsáꞌ kɨꞌɨ‑ó ka̱ꞌ xi̱ntíín kua̱chi jín nsáꞌ kenta‑ó kuéntáꞌ kuviꞌ‑ó nu̱u̱nꞌ Ndiosíꞌ.

1 Pedro 2:24

Chi máá Cristo nna̱kuniso yɨkɨkúñu re̱ꞌ ntáká kua̱chi sáꞌá‑ó sáá níꞌiꞌ re̱ꞌ nu̱u̱nꞌ kurúsiꞌ, sáva kuviꞌ‑ó nu̱u̱nꞌ kua̱chi‑ó kene‑ó nu̱u̱nꞌ kua̱chi‑ó jee sáva nakueꞌnu‑ó ichi jiáꞌnu na̱a̱ꞌ. Chi jie̱ꞌe̱ꞌ nu̱u̱nꞌ ntúfiꞌ re̱ꞌ vá, yukuán núváꞌa‑ó sííyo re̱ꞌ kua̱chi‑ó.

Romanos 6:14

Chi ntu íyó kuneí kua̱chi jín rán, chi ntu yɨ́ꞌɨ́ rán ka̱ꞌ xi̱ntíín tu̱ꞌun ley ya nta̱túníꞌ Ndiosíꞌ, chisaꞌ yɨ́ꞌɨ́ rán chi̱ji tu̱ꞌun ya̱ íyó mániꞌ iniꞌ Ndiosíꞌ néꞌyá re̱ꞌ ránoꞌó.

1 Pedro 4:6

Chi jie̱ꞌe̱ꞌ saáva suni nte̱ku̱tu̱ꞌún tu̱ꞌun váꞌa Ndiosíꞌ nu̱u̱nꞌ rá ñɨvɨ [ne̱ sáá ntekuꞌ ráa] jee níꞌiꞌ ráa ntañúꞌún, sáva síjíta Ndiosíꞌ ráa ya̱ kuviꞌ ráa sánikua̱ꞌ síjíta re̱ꞌ kua̱chi nɨꞌɨ rá ñɨvɨ ñunéꞌyúꞌ ya̱ jíꞌíꞌ ráa, soo ré ntɨɨn ráa tu̱ꞌun vá sáá ntekuꞌ ráa, jee sanáaꞌ Ndiosíꞌ ya̱ kutekuꞌ ráa jín re̱ꞌ nɨ́ɨ́nkání saꞌá Ta̱chi̱ꞌ Ííꞌ re̱ꞌ.

Hebreos 9:14

Retú sukuán kúvi, soo saꞌ víꞌí káꞌ nasánoo ni̱ñɨ̱ꞌ Cristo ánímaꞌ‑ó, chi ntu níso Cristo kua̱chi, jee Ta̱chi̱ꞌ Ííꞌ ya̱ íyó nɨ́ɨ́nkání jee njia̱ꞌa‑a fuersáꞌ ííꞌ nu̱u̱nꞌ re̱ꞌ sáva kuviꞌ re̱ꞌ so̱ko̱ꞌ re̱ꞌ maáréꞌ nu̱u̱nꞌ Ndiosíꞌ. Jee sukuán násánoo ni̱ñɨ̱ꞌ Cristo ánímaꞌ‑ó, sáva kuniꞌ‑ó ya̱ ntu níso‑ó ka̱ꞌ kua̱chi, jín ya̱ ntu yɨ́ꞌɨ́‑ó ka̱ꞌ nu̱u̱nꞌ rá tiñu sáꞌá ya̱ kuviꞌ‑ó nu̱u̱nꞌ Ndiosíꞌ, jín sáva kɨtíñú‑ó nu̱u̱nꞌ Ndiosíꞌ tékúꞌ.

Tito 2:14

Chi njia̱ꞌa re̱ꞌ maáréꞌ ya̱ kuviꞌ re̱ꞌ jie̱ꞌe̱ꞌ‑ó, sáva chunáán nkáꞌnú re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ‑ó, sáva nakani núne re̱ꞌ yó naꞌá nta̱ká nu̱u̱nꞌ ya̱ niva̱ꞌa. Jee nna̱saꞌá noo nɨꞌɨ kuitɨꞌ re̱ꞌ kua̱chi níso ánímaꞌ‑ó, sáva kuvi‑ó ñɨvɨ maáréꞌ, sáva kuꞌun káñá iniꞌ‑ó saꞌá‑ó ya̱ váꞌa.

Colosenses 2:20

Jee nu̱u̱nꞌ ya̱ níꞌiꞌ rán jín Cristo nu̱u̱nꞌ kurúsiꞌ, jee ya ni̱ꞌi̱ꞌ rán nu̱u̱nꞌ rá costumbre xínéꞌénꞌ ñɨvɨ ñɨ̱vɨ́ yaꞌá, ya̱ ntu yɨ́ꞌɨ́ ráa naꞌá re̱ꞌ. Saáva, ¿na̱ kuvi chi chíꞌi rán maárán xi̱ntíín rá costumbre vá, sáva kaníjiá rán ya̱ tátúníꞌ ráa, kuéntáꞌ yɨ́ꞌɨ́ rán ñujiínꞌ ráa? Rá costumbre vá káchíꞌ kuéntáꞌ yaꞌá:

Gálatas 3:24

Saájee tu̱ꞌun ley ni̱yo kuéntáꞌ ɨɨn musúꞌ ya̱ náka rá kuáchí, jee náka‑a ránuꞌuꞌ ne̱ nu̱u̱nꞌ Cristo. Náka‑a ránuꞌuꞌ sáva siíyo Ndiosíꞌ kua̱chi ránꞌ sáva ku̱ꞌvayuꞌú re̱ꞌ ya̱ kino̱o na̱a̱ꞌ ránꞌ nu̱u̱nꞌ re̱ꞌ jie̱ꞌe̱ꞌ ya̱ kúneí iniꞌ ránꞌ Jesús.

Gálatas 2:20

Taꞌanꞌ ni̱ꞌ níꞌiꞌ ni̱ꞌ nu̱u̱nꞌ kurúsiꞌ jín Cristo. Saáva nsú káꞌ nuꞌuꞌ ví ya̱ tékúꞌ, chi maá Cristo ví ya̱ tékúꞌ iniꞌ ni̱ꞌ. Jee ni tékúꞌ ni̱ꞌ iniꞌ yɨkɨkúñu ni̱ꞌ yaꞌá, jee jiáꞌnu ni̱ꞌ ichi jie̱ꞌe̱ꞌ kúneí iniꞌ ni̱ꞌ Se̱ꞌya Ndiosíꞌ. Chi Cristo ví ya̱ ñúnúunꞌ re̱ꞌ nuꞌuꞌ jee nna̱sokoꞌ re̱ꞌ maáréꞌ ya̱ níꞌiꞌ re̱ꞌ jie̱ꞌe̱ꞌ ya̱ váꞌa kuvi ni̱ꞌ.

Colosenses 3:3

Chi ya̱ ni̱ꞌi̱ꞌ rán jín Cristo, jee vitan jee íyó kutú ya̱ tékúꞌ rán jín re̱ꞌ, chi yɨ́ꞌɨ́ rán nu̱u̱nꞌ Ndiosíꞌ.

Gálatas 3:10

Chi yósóni̱nu nta̱ká rá ñɨvɨ ya̱ nánukú ráa saꞌá ráa ya̱ tátúníꞌ ley vá sáva kino̱o na̱a̱ꞌ ráa nu̱u̱nꞌ Ndiosíꞌ. Chi káchíꞌ tu̱ꞌun ley nta̱túníꞌ Ndiosíꞌ ya̱ nééꞌ nu̱u̱nꞌ tutuꞌ: “Kosoni̱nu nta̱ká ráa ya̱ ntu kúníꞌin ráa kaníjiá ráa nɨꞌɨ kuitɨꞌ ya̱ tátúníꞌ ley ya̱ nééꞌ nu̱u̱nꞌ tutuꞌ.”

1 Corintios 10:31

Saáva va̱ni yájíꞌ ránú áxí va̱ni jíꞌi rán áxí na̱ jie̱ꞌe̱ꞌ tiñu sáꞌá rán, jee saꞌá rán ntáká tiñu sáva nakuetúꞌún rá ñɨvɨ jie̱ꞌe̱ꞌ Ndiosíꞌ ya̱ kuniꞌ ráa ya̱ viiꞌ nasɨ́kuitɨꞌ kúñáꞌnú re̱ꞌ.

Romanos 7:14

Chi jíníꞌ‑ó ya̱ va̱ji ley nu̱u̱nꞌ Ta̱chi̱ꞌ Ííꞌ, jee nuꞌuꞌ kúvi ni̱ꞌ ñɨvɨ ñunéꞌyúꞌ, ya̱ yɨ́ꞌɨ́ ni̱ꞌ xi̱ntíín kua̱chi kuéntáꞌ kúvi ni̱ꞌ musúꞌ ya̱ nkuya̱ꞌvi.

Romanos 5:20

Soo nkenta tu̱ꞌun ley nta̱túníꞌ Ndiosíꞌ sáva kukueꞌeꞌ ka̱ꞌ kua̱chi sáꞌá ñɨvɨ. Soo sáá nku̱kueꞌeꞌ kua̱chi íyó, jee kúkueꞌeꞌ ka̱ꞌ íyó mániꞌ iniꞌ Ndiosíꞌ néꞌyá re̱ꞌ yó.

Romanos 4:15

Chi tu̱ꞌun ley nta̱túníꞌ Ndiosíꞌ síkíji‑i ya̱ ni̱ꞌi̱nꞌ ñɨvɨ ya̱ ki̱tɨ̱ꞌ iniꞌ Ndiosíꞌ jee xinóꞌo re̱ꞌ ráa jie̱ꞌe̱ꞌ ntu kúneí ráa sikúnkuvi ráa nɨꞌɨ ya̱ káchíꞌ ley vá. Soo nu̱u̱nꞌ ntu íyó ni ɨɨn ley, jee suni ntu jiáꞌa ñɨvɨ nu̱u̱nꞌ ya̱ káchíꞌ ley.

1 Corintios 9:20

Sáá nééꞌ ni̱ꞌ nteñu rá ñɨvɨ ñuunꞌ Israel, jee jiáꞌnu ni̱ꞌ kuéntáꞌ jiáꞌnu ráa, sáva ni̱ꞌi̱nꞌ ni̱ꞌ ráa sijínúꞌ ni̱ꞌ iniꞌ ráa kaníjiá ráa tu̱ꞌun váꞌa jie̱ꞌe̱ꞌ Jesús. Jee nteñu rá ñɨvɨ yɨ́ꞌɨ́ ráa xi̱ntíín tu̱ꞌun ley nta̱túníꞌ Ndiosíꞌ nu̱u̱nꞌ Moisés yanaꞌán jee jiáꞌnu ni̱ꞌ kuéntáꞌ retánꞌ yɨ́ꞌɨ́ ni̱ꞌ chi̱ji xi̱ntíín tu̱ꞌun vá, asúnika̱ꞌ ya̱ maáníꞌ ntu̱ví yɨ́ꞌɨ́ nijia ni̱ꞌ ka̱ꞌ xi̱ntíín tu̱ꞌun vá, soo jiáꞌnu ni̱ꞌ sukuán sáva kuvi ni̱ꞌi̱nꞌ ni̱ꞌ ráa sijínúꞌ ni̱ꞌ iniꞌ ráa kaníjiá ráa ji̱nu̱ꞌ iniꞌ ráa tu̱ꞌun jie̱ꞌe̱ꞌ Cristo.

Gálatas 6:14

Soo maáníꞌ ntu̱náꞌ káꞌánꞌ téyɨ́ɨ́ ni̱ꞌ. Kua̱chi káꞌánꞌ téyɨ́ɨ́ ni̱ꞌ jie̱ꞌe̱ꞌ ya̱ níꞌiꞌ I̱toꞌoꞌ‑ó Jesucristo nu̱u̱nꞌ kurúsiꞌ jie̱ꞌe̱ꞌ‑ó. Chi jie̱ꞌe̱ꞌ yukuán jee kúvi kuéntáꞌ níꞌiꞌ rá ñujiínꞌ jiáꞌnu ñɨvɨ ñɨ̱vɨ́ nu̱u̱nꞌ kurúsiꞌ nu̱u̱nꞌ ni̱ꞌ. Chi suni kúvi kuéntáꞌ níꞌiꞌ ni̱ꞌ nu̱u̱nꞌ rá ñujiínꞌ vá, chi ntu yɨ́ꞌɨ́ ni̱ꞌ ka̱ꞌ chi̱ji naꞌá rává.