Filipenses 2:1 - Mixteco del suroeste de Tlaxiaco Oaxaca

¹ Saájee, nu̱u̱nꞌ íyó neí iniꞌ‑ó, jie̱ꞌe̱ꞌ ya̱ yɨ́ꞌɨ́‑ó nu̱u̱nꞌ Cristo, jee nu̱u̱nꞌ ñúnúunꞌ re̱ꞌ yó sáꞌá ya̱ núváꞌa iniꞌ‑ó, jee nu̱u̱nꞌ chíneí táꞌán Ta̱chi̱ꞌ Ííꞌ Ndiosíꞌ jín yó sáva koo ma̱ni̱ꞌ táꞌán‑ó ɨɨn inka‑ó, jee nu̱u̱nꞌ ñunkúún iniꞌ‑ó ɨɨn inka táꞌán‑ó jee nu̱u̱nꞌ kúnáꞌví iniꞌ‑ó ɨɨn inka táꞌán‑ó.

Filipenses 2:1 Referans Kwoze

Colosenses 3:12

Saáva sama iniꞌ rán, chi nka̱ji Ndiosíꞌ ránoꞌó sáva kuvi rán ñɨvɨ maáréꞌ, ya̱ nsa̱ꞌá sɨ́ɨ́n re̱ꞌ ránoꞌó nu̱u̱nꞌ ya̱ níváꞌa, jee ñúnúunꞌ re̱ꞌ ránoꞌó. Jee koo rán suꞌva: ya̱ kunáꞌví iniꞌ rán rá táꞌán rán, jín ya̱ kuva̱ꞌa iniꞌ rán kune̱ꞌyá rán táꞌán rán, jín ya̱ kuꞌun láꞌví iniꞌ rán, jín ya̱ koo másúꞌ iniꞌ rán, jín ya̱ káꞌnú koo iniꞌ rán jín táꞌán rán,

1 Juan 4:12

Ni ɨɨn ñɨvɨ ni ntiáꞌan né kuniꞌ kuitɨꞌ‑ɨ Ndiosíꞌ. Soo nu̱u̱nꞌ ñúnúunꞌ‑ó ɨɨn inka táꞌán‑ó, jee kínóo kutú Ndiosíꞌ yɨ́ꞌɨ́‑ɨ iniꞌ yó, jee sáꞌá re̱ꞌ ya̱ jíjia iniꞌ‑ó jín tu̱ꞌun ñúnúunꞌ ñúꞌún iniꞌ‑ó vá.

2 Corintios 13:14

Jee na̱ ka̱ꞌ koo ma̱ni̱ꞌ iniꞌ I̱toꞌoꞌ‑ó Jesús ya̱ kúvi Cristo kune̱ꞌyá re̱ꞌ nta̱ká ránoꞌó, jín ya̱ kunu̱u̱nꞌ Ndiosíꞌ nta̱ká rán, jín ya̱ koo nkáꞌnú Ta̱chi̱ꞌ Ííꞌ Ndiosíꞌ jín rán. Sukuán koo. Amén.

Colosenses 2:2

Sáꞌá ni̱ꞌ suꞌva sáva nuneí iniꞌ ánímaꞌ rá ñaniꞌ vá, jín sáva nuún koo iniꞌ ráa jie̱ꞌe̱ꞌ ñúnúunꞌ ráa ɨɨn inka rá táꞌán ráa. Jee sáva kuéntáꞌ kukúká ráa ya̱ kino̱o kutú ánímaꞌ ráa, jie̱ꞌe̱ꞌ ki̱ku̱ꞌun iniꞌ ráa Tu̱ꞌun Ndiosíꞌ, sáva kuniꞌ ráa tu̱ꞌun re̱ꞌ ya̱ nyɨ́ꞌɨ se̱ꞌí ne̱ yanaꞌán nékúvi, jee jie̱ꞌe̱ꞌ maá Cristo ví tu̱ꞌun vá.

1 Corintios 12:13

Chi suni nsi̱kuánuté Cristo yó jín métúꞌún ni Ta̱chi̱ꞌ Ííꞌ vá sáva kɨꞌɨ‑ɨ iniꞌ ánímaꞌ‑ó jee nsa̱ꞌá Ta̱chi̱ꞌ Ííꞌ vá ya̱ kɨꞌɨ ntáká‑ó nu̱u̱nꞌ Cristo kuéntáꞌ nki̱vɨ‑ó nu̱u̱nꞌ ɨɨn ni yɨkɨkúñu re̱ꞌ. Ya̱ súka̱ꞌ ñɨvɨ Israel kúvi‑ó, áxí ñɨvɨ ntu kúvi‑ó Israel, áxí súka̱ꞌ ñɨvɨ ya̱ kúvi musúꞌ ya̱ nkeꞌen ñɨvɨ maa, áxí va̱ni ñɨvɨ ya̱ íyó núne ya̱ sátíñú‑u tiñu maá‑a, chi ntáká‑ó chi yɨ́ꞌɨ́‑ó nu̱u̱nꞌ rá ñɨvɨ Ndiosíꞌ, chi ɨɨn ni Ta̱chi̱ꞌ Ííꞌ níꞌínꞌ nɨꞌɨ‑ó.

Gálatas 5:22

Soo suni túvi rá tiñu sáꞌá Ta̱chi̱ꞌ Ííꞌ Ndiosíꞌ iniꞌ ñɨvɨ kuéntáꞌ túvi rá vixíꞌ kúun yutun. Sáꞌá re̱ꞌ ya̱ ñɨvɨ: ñúnúunꞌ ráa táꞌán ráa, ñúꞌún tu̱ꞌun íyó sɨ́ɨꞌ iniꞌ ánímaꞌ ráa, nééꞌ ñunkúún ráa jín táꞌán ráa, káꞌnú iniꞌ ráa, kúváꞌa iniꞌ ráa, ma̱ni̱ꞌ iniꞌ ráa, na̱a̱ꞌ ráa nu̱u̱nꞌ rá táꞌán ráa ya̱ kúkáꞌnú iniꞌ rá ñɨvɨ ráa,

Gálatas 4:6

Jie̱ꞌe̱ꞌ ya̱ kúvi‑ó se̱ꞌya Ndiosíꞌ vá nchu̱ichí re̱ꞌ Ta̱chi̱ꞌ Ííꞌ Se̱ꞌya re̱ꞌ ki̱vɨ‑ɨ iniꞌ ánímaꞌ‑ó, jee Ta̱chi̱ꞌ Ííꞌ re̱ꞌ sáꞌá ya̱ kúvi káchíꞌ nijia‑ó nu̱u̱nꞌ Ndiosíꞌ: “Tááꞌ ni̱ꞌ, Tátáꞌ ni̱ꞌ.”

Hechos 4:32

Jee rá ñɨvɨ kue̱ꞌe̱ꞌ ya̱ kúneí iniꞌ ráa Jesús, jee nuún ánímaꞌ ráa jee nuún ñúꞌún iniꞌ ráa. Ni ɨɨn ráa ntu káchíꞌ ya̱ kua̱chi maáréꞌ ví i̱toꞌoꞌ xí na̱ni nantíñú re̱ꞌ. Chi nñu̱ꞌun iniꞌ ráa ya̱ nɨꞌɨ nantíñú ráa kúvi nantíñú nkáꞌnú ráa.

1 Juan 3:24

Jee ñɨvɨ ya̱ síkúnkuvi ya̱ tátúníꞌ Ndiosíꞌ, jee kínóo kutú ñɨvɨ vá yɨ́ꞌɨ́‑ɨ nu̱u̱nꞌ re̱ꞌ, jín suni máá Ndiosíꞌ kínóo kutú re̱ꞌ yɨ́ꞌɨ́ re̱ꞌ iniꞌ‑i. Jee jie̱ꞌe̱ꞌ ya̱ ntaji re̱ꞌ Ta̱chi̱ꞌ Ííꞌ re̱ꞌ yɨ́ꞌɨ́‑ɨ iniꞌ‑ó, saáva jíníꞌ‑ó ya̱ kínóo kutú re̱ꞌ yɨ́ꞌɨ́ re̱ꞌ iniꞌ‑ó.

Juan 17:13

’Soo vitan jee kua̱najiaaꞌ ni̱ꞌ nu̱u̱nꞌ nééꞌ nú, soo ni nééꞌ ni̱ꞌ ntíꞌ ka̱ꞌ iniꞌ ñɨ̱vɨ́ yaꞌá jee káchíꞌ ni̱ꞌ rá tu̱ꞌun yaꞌá, sáva chitú ya̱ kusɨ̱ɨ̱ꞌ nasɨ́kuitɨꞌ iniꞌ ánímaꞌ ráa, kuéntáꞌ kúsɨ́ɨꞌ iniꞌ nuꞌuꞌ.

1 Juan 4:16

Jee jíníꞌ‑ó jee ínúꞌ iniꞌ‑ó ya̱ ñúnúunꞌ Ndiosíꞌ yó. Chi mánitu̱ꞌun ñúnúunꞌ ñúꞌún iniꞌ Ndiosíꞌ. Jee ñɨvɨ kínóo kutú‑u nu̱u̱nꞌ mánitu̱ꞌun ñúnúunꞌ‑u, jee suvivá kínóo kutú‑u yɨ́ꞌɨ́‑ɨ nu̱u̱nꞌ re̱ꞌ, jee kínóo kutú Ndiosíꞌ yɨ́ꞌɨ́ re̱ꞌ iniꞌ ñɨvɨ vá.

Filipenses 3:3

Chi suvió kúvi‑ó ñɨvɨ Ndiosíꞌ, jee suꞌva kúvi‑ó ñɨvɨ circuncidado nijia nu̱u̱nꞌ re̱ꞌ, chi suvió ví ya̱ chíneí Ta̱chi̱ꞌ Ííꞌ maáó ya̱ néñu̱ꞌun‑ó Ndiosíꞌ, chi kúsɨ́ɨꞌ téyɨ́ɨ́ iniꞌ‑ó jie̱ꞌe̱ꞌ ya̱ sáꞌá Cristo Jesús, chi ntu kúkáꞌnú iniꞌ‑ó maáó ya̱ kino̱o na̱a̱ꞌ‑ó nu̱u̱nꞌ Ndiosíꞌ jie̱ꞌe̱ꞌ ya̱ sáꞌá‑ó.

1 Corintios 3:16

¿Á ntu̱ví jíníꞌ ránú ya̱ kúvi rán veñu̱ꞌun maá Ndiosíꞌ jín ya̱ yɨ́ꞌɨ́ Ta̱chi̱ꞌ Ííꞌ Ndiosíꞌ iniꞌ ánímaꞌ rán rúja?

Romanos 8:26

Jee suni sukuán chíneí chítuvi Ta̱chi̱ꞌ Ííꞌ yó chi táyáꞌ iniꞌ‑ó. Chi sáá ntu jíníꞌ‑ó na̱sa kaꞌanꞌ‑ó jín Ndiosíꞌ, soo máá maá Ta̱chi̱ꞌ Ííꞌ vá tána re̱ꞌ jíkánꞌ táꞌvíꞌ re̱ꞌ nu̱u̱nꞌ Ndiosíꞌ jie̱ꞌe̱ꞌ‑ó ya̱ ntu níꞌínꞌ‑ó sákachiꞌ‑ó.

Romanos 5:5

Jee ya̱ íyó tu̱neí iniꞌ‑ó yaꞌá, ntu̱ví jiáꞌa tu̱nkánuun nu̱u̱nꞌ‑ó, chi Ta̱chi̱ꞌ Ííꞌ ya̱ ntaji Ndiosíꞌ nu̱u̱nꞌ‑ó, ya̱ nchu̱chítú re̱ꞌ ánímaꞌ‑ó tu̱ꞌun ñúnúunꞌ Ndiosíꞌ yó.

Hechos 2:46

Jee ta ki̱vɨ̱ꞌ kútútú ráa iniꞌ veñu̱ꞌun káꞌnú. Jee kútútú ráa veꞌi ta ɨɨn táꞌán ráa, sáva tasáva ráa i̱xta̱tíláꞌ, sáva naku̱ꞌun iniꞌ ráa Jesús. Jee yájíꞌ nkáꞌnú ráa jee kúsɨ́ɨꞌ iniꞌ ráa jee saɨn iniꞌ ráa.

1 Pedro 1:2

Jee máá Tátáꞌ‑ó Ndiosíꞌ nka̱ji re̱ꞌ ránoꞌó, sánikua̱ꞌ nkuna̱a̱ꞌ iniꞌ re̱ꞌ ne̱ yanaꞌán jee nsásɨ́ɨ́n Ta̱chi̱ꞌ Ííꞌ re̱ꞌ ránoꞌó kɨtíñú rán nu̱u̱nꞌ Ndiosíꞌ sáva kaníjiá rán re̱ꞌ jee sáva nasánoo re̱ꞌ ránoꞌó nu̱u̱nꞌ kua̱chi rán jín ni̱ñɨ̱ꞌ Jesucristo ya̱ ñatɨ re̱ꞌ sáá níꞌiꞌ re̱ꞌ jie̱ꞌe̱ꞌ rán. Na̱ ka̱ꞌ ntántúníꞌ ka̱ꞌ koo ya̱ máníꞌ iniꞌ Ndiosíꞌ jín rán jín ya̱ kino̱o va̱ꞌa iniꞌ ánímaꞌ rán saꞌá re̱ꞌ.

Hebreos 6:18

Jee saájee íyó u̱vi̱ꞌ tu̱ꞌun nkachiꞌ re̱ꞌ vá ya̱ ni ntu̱né kúvi sama‑a, chi ntu kuvi katúꞌún Ndiosíꞌ. Saáva nsa̱náaꞌ re̱ꞌ sukuán sáva nuneí téyɨ́ɨ́ iniꞌ maáórán ya̱ numíjiꞌíꞌ nna̱tuꞌva‑ó nu̱u̱nꞌ re̱ꞌ nama re̱ꞌ yó, sáva ni̱ꞌi̱nꞌ‑ó tu̱neí iniꞌ‑ó ya̱ ni̱ꞌi̱nꞌ‑ó ta̱ꞌvi̱ꞌ taji re̱ꞌ nu̱u̱nꞌ‑ó.

Filipenses 1:8

Chi jíníꞌ Ndiosíꞌ, ya̱ ñúnúunꞌ ni̱ꞌ nta̱ká ránoꞌó sáni ñúnúunꞌ Cristo Jesús yó.

Efesios 4:4

Chi ɨɨn ni kuvi‑ó nu̱u̱nꞌ Ndiosíꞌ, kuéntáꞌ ɨɨn yɨkɨkúñu, jee ɨɨn ni Ta̱chi̱ꞌ Ííꞌ re̱ꞌ íyó jín‑ó, sánikua̱ꞌ suni nkana Ndiosíꞌ yó ya̱ ɨɨn nuún ni íyó tu̱neí iniꞌ‑ó ya̱ ni̱ꞌi̱nꞌ‑ó kuneeꞌ‑ó jín Cristo, chi nkana re̱ꞌ yó sáva ni̱ꞌi̱nꞌ‑ó maa.

2 Corintios 2:14

Soo kútaꞌviꞌ ni̱ꞌ nu̱u̱nꞌ Ndiosíꞌ, chi suvire̱ꞌ vá sukuáni náka re̱ꞌ ránuꞌuꞌ sáva stúvi re̱ꞌ ya̱ kúneí re̱ꞌ si̱kɨ̱ꞌ nɨꞌɨ jie̱ꞌe̱ꞌ ya̱ nsa̱ꞌá re̱ꞌ jín ránuꞌuꞌ, kuéntáꞌ ɨɨn desfile stúvi‑i ya̱ nku̱neí ɨɨn general sáá nka̱ntáꞌán re̱ꞌ. Náka Ndiosíꞌ ránuꞌuꞌ sukuán jie̱ꞌe̱ꞌ yɨ́ꞌɨ́ ránꞌ nu̱u̱nꞌ Cristo. Jee jiátíñú re̱ꞌ ránuꞌuꞌ sáva sikúténuun ránꞌ tu̱ꞌun váꞌa Cristo nta̱ká ichi, sáva kuvi kuniꞌ rá ñɨvɨ iniꞌ re̱ꞌ, kuéntáꞌ kua̱ꞌ jiéténuun xikoꞌ jiávi̱xi̱ꞌ.

1 Corintios 15:31

Nuꞌuꞌ, ya̱ nááꞌ vá káchíꞌ ni̱ꞌ nu̱u̱nꞌ ránoꞌó ñaniꞌ jín ku̱ꞌva, ya̱ vitan nteenꞌ núkú rá ñɨvɨ kaꞌniꞌ ráa nuꞌuꞌ jie̱ꞌe̱ꞌ ya̱ sáꞌá ni̱ꞌ tiñu I̱toꞌoꞌ‑ó. Jee jiáꞌa ni̱ꞌ ya̱ nááꞌ vá káchíꞌ ni̱ꞌ nu̱u̱nꞌ ránoꞌó ya̱ sukuán íyó sánikua̱ꞌ jiáni téyɨ́ɨ́ iniꞌ ni̱ꞌ jie̱ꞌe̱ꞌ ránoꞌó, [rá ñanitáꞌán ni̱ꞌ] ya̱ jínúꞌ iniꞌ rán káníjiá rán I̱toꞌoꞌ‑ó Cristo Jesús.

Juan 14:27

’Xinóo ni̱ꞌ ránoꞌó jee kɨ̱ꞌɨ̱nꞌ ni̱ꞌ, soo ne̱ va̱ꞌa koo iniꞌ rán kino̱o rán saꞌá ni̱ꞌ. Sáꞌá ni̱ꞌ ya̱ ne̱ va̱ꞌa kino̱o ánímaꞌ ránoꞌó kuéntáꞌ kúváꞌa iniꞌ ánímaꞌ ni̱ꞌ. Chi ntu nuún nótaꞌan sáꞌá ni̱ꞌ kuéntáꞌ kua̱ꞌ sáꞌá rá ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa xi̱ntíín Ndiosíꞌ, chi ntu sáꞌá ráa ya̱ ne̱ va̱ꞌa koo iniꞌ rán kuéntáꞌ sáꞌá ni̱ꞌ. Saáva koto nániꞌvɨꞌ iniꞌ ánímaꞌ rán ni koto yúꞌví rán.

Juan 14:18

’Jee ni nsáꞌ xinóo métúꞌún ni ránoꞌó kuéntáꞌ rá ñɨvɨ kínóo láꞌví, chi niji ni̱ꞌ nu̱u̱nꞌ rán.

Lucas 2:25

Jee saájee ni̱yo ɨɨn te̱e naní Simeón, jee nééꞌ re̱ꞌ Jerusalén jee kúvi re̱ꞌ ɨɨn te̱e na̱a̱ꞌ ya̱ yɨ́tíñú re̱ꞌ nu̱u̱nꞌ Ndiosíꞌ, jee ñúꞌún iniꞌ re̱ꞌ nétu re̱ꞌ ya̱ kiji I̱toꞌoꞌ‑ó sikáku re̱ꞌ rá ñɨvɨ ñuunꞌ Israel nasaváꞌa re̱ꞌ iniꞌ ráa. Jee Ta̱chi̱ꞌ Ííꞌ Ndiosíꞌ íyó‑o jín Simeón.