Apoclipsis 15:2 - Mixteco del suroeste de Tlaxiaco Oaxaca

² Jee niniꞌ ni̱ꞌ ya̱ kuéntáꞌ íyó nteñúꞌún nute ya̱ túvi ni núvíꞌ ichi kuéntáꞌ vidrio, jee sákánuun nute vá jín ñuꞌunꞌ. Jee rá ñɨvɨ ya̱ nku̱neí ráa si̱kɨ̱ꞌ kitɨ xéénꞌ kákini vá, jín si̱kɨ̱ꞌ santúꞌ ñunéꞌyúꞌ máá maátíꞌ, jín ya̱ ntu níso seña ti̱ꞌ te̱e̱nꞌ ráa, ni jín numero súví ti̱ꞌ, jee íñɨ́ rá ñɨvɨ vá yúnteñúꞌún vá ínaꞌá ráa yaaꞌ arpa ya̱ njiáꞌa Ndiosíꞌ nu̱u̱nꞌ ráa.

Apoclipsis 15:2 Referans Kwoze

Apoclipsis 4:6

Jee ichinúúnꞌ teyuꞌ nu̱u̱nꞌ tátúníꞌ re̱ꞌ íyó kuéntáꞌ nteñúꞌún ya̱ kúvi kuéntáꞌ cristal ya̱ túvi ni núvíꞌ ichi kuéntáꞌ vidrio. Jee teyuꞌ nu̱u̱nꞌ nééꞌ re̱ꞌ nu̱u̱nꞌ tátúníꞌ re̱ꞌ jee yukuán ni̱kótíyu ku̱mi̱ꞌ rá tékúꞌ ya̱ ne̱ nchi̱tú ráa titɨ nchinúún ráa ichinúúnꞌ ráa jín ichi yátáꞌ ráa.

Apoclipsis 12:11

Soo nku̱neí ráa nu̱u̱nꞌ Satanás vá jie̱ꞌe̱ꞌ ya̱ nñatɨ Cristo ni̱ñɨ̱ꞌ re̱ꞌ sáá ni̱ꞌi̱ꞌ re̱ꞌ nso̱ko̱ꞌ re̱ꞌ maáréꞌ nu̱u̱nꞌ Ndiosíꞌ jie̱ꞌe̱ꞌ ráa, ya̱ kúvi re̱ꞌ Lanchi Lúlí Ndiosíꞌ, jee suni nku̱neí ráa jie̱ꞌe̱ꞌ tu̱ꞌun ya̱ njia̱ꞌa ráa ya̱ naáꞌ jie̱ꞌe̱ꞌ re̱ꞌ, jee nku̱neí ráa jie̱ꞌe̱ꞌ ntu ñúnúunꞌ ráa maáráa ya̱ kutekuꞌ ráa jee ñeꞌneꞌ iniꞌ ráa maáráa súka̱ꞌ ne̱ kuviꞌ ráa jie̱ꞌe̱ꞌ tu̱ꞌun re̱ꞌ.

Apoclipsis 5:8

Jee sáá ntɨɨn re̱ꞌ tutuꞌ vá, jee ni kúmíꞌ rá tékúꞌ vá, jín ni ókóꞌ ku̱mi̱ꞌ (24) rá te̱e kúñáꞌnú vá nna̱kui̱ñɨ̱ꞌ ítɨ́ ráa jiáxin ráa maáráa ne̱ nu̱u̱nꞌ ñuꞌún nu̱u̱nꞌ re̱ꞌ. Jee ta ɨɨn ɨɨn rá te̱e kúñáꞌnú vá ínaꞌá ráa yaaꞌ naní arpa, jín ko̱ꞌo̱ꞌ oro ñúꞌún chitú su̱jie ííꞌ iniꞌ ráa. Jee rá su̱jie ííꞌ vá kúvi ráa rá tu̱ꞌun ya̱ káꞌánꞌ rá ñɨvɨ Ndiosíꞌ jín re̱ꞌ jee kúvi rá ñɨvɨ vá ya̱ nsa̱ꞌá sɨ́ɨ́n re̱ꞌ ráa sáva kuvi ráa ñɨvɨ re̱ꞌ.

Apoclipsis 21:18

Jee rá nantíñú ya̱ nkuvi nu̱u̱nꞌ nsamaꞌ ti̱yu̱ꞌ yuꞌú ñuunꞌ vá, ví máá ninuꞌun máá yu̱u̱ꞌ kuíjín xiñúꞌ naní jaspe. Jee máá maá ñuunꞌ vá ví máá ninuꞌun oro, jee túvi ñuunꞌ vá kuéntáꞌ túvi vidrio ya̱ túvi nɨꞌɨ iniꞌ‑i néꞌyá‑ó.

1 Pedro 1:7

Sáva kototúníꞌ tu̱nóꞌó ránoꞌó sáva stúvi maá nááꞌ nijia íñɨ́ ni̱ꞌi̱nꞌ rán kúneí iniꞌ rán Cristo, kuéntáꞌ kua̱ꞌ jítotúníꞌ ñɨvɨ ka̱a kuáán oro sáá náteñuꞌunꞌ ráa maa jín ñuꞌunꞌ, sáá jítotúníꞌ ráa oro retú ya̱ váꞌa ví‑i áxí ntu̱ví, soo ya̱ kúneí iniꞌ rán Cristo yɨ́yáꞌvi víꞌí‑i ka̱ꞌ nsú káꞌ oro, ya̱ kúvi‑i nantíñú náánꞌ. Jee retú nkene na̱a̱ꞌ va̱ꞌa ya̱ kúneí iniꞌ rán, jee ni̱ꞌi̱nꞌ rán nakuetúꞌún Ndiosíꞌ ránoꞌó, jee saꞌá yɨ́ñúꞌún jín rán, jee saꞌá ñáꞌnú re̱ꞌ ránoꞌó, ki̱vɨ̱ꞌ nenta nijinꞌ tuku Cristo.

Mateo 3:11

’Jee nuꞌuꞌ chi máá naáꞌ nijia ya̱ síkuánuté ni̱ꞌ ránoꞌó jín nute kuíí ni, ya̱ stúvi ya̱ nna̱kani nijia iniꞌ rán nu̱u̱nꞌ Ndiosíꞌ jie̱ꞌe̱ꞌ kua̱chi rán. Soo ya̱ta̱ꞌ ni̱ꞌ kiji ɨɨn ya̱ kúñáꞌnú nasɨ́kuitɨꞌ re̱ꞌ ka̱ꞌ nsú káꞌ nuꞌuꞌ, ya̱ ni ntu̱né íyó ni̱ꞌi̱nꞌ ni̱ꞌ ya̱ kunaꞌá ni̱ꞌ sú kua̱chi ni̱jia̱nꞌ re̱ꞌ. Jee maáréꞌ chi sikuánuté re̱ꞌ sava ránoꞌó jín Ta̱chi̱ꞌ Ííꞌ re̱ꞌ sáva kɨꞌɨ‑ɨ ánímaꞌ ránú ya̱ nákani iniꞌ rán, jee rá inka rán, ya̱ ntu nákani iniꞌ rán, sikuánuté re̱ꞌ jín ñuꞌunꞌ xinóꞌo re̱ꞌ ránoꞌó.

Apoclipsis 13:14

Jee xínáꞌví ti̱ꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ ntu yɨ́ꞌɨ́ ráa nu̱u̱nꞌ Cristo, jie̱ꞌe̱ꞌ rá seña a̱nasɨ́ sáꞌá ti̱ꞌ, ya̱ níꞌinꞌ ti̱ꞌ ya̱ kuvi saꞌá ti̱ꞌ maa ichinúúnꞌ kitɨ xéénꞌ kákini xíꞌnañúꞌún vá. Jee nta̱túníꞌ ti̱ꞌ nu̱u̱nꞌ rá ñɨvɨ ya̱ nééꞌ ráa iniꞌ ñɨ̱vɨ́ ya̱ saꞌá ráa ɨɨn santúꞌ ñunéꞌyúꞌ máá maá kitɨ xéénꞌ xíꞌnañúꞌún ya̱ ntu̱fi̱ꞌ‑i nsa̱ꞌá yuchiꞌ, jee nna̱tekuꞌ‑u.

1 Pedro 4:12

Ránoꞌó ñanitáꞌán ya̱ ñúnúunꞌ ni̱ꞌ, koto tívɨ́ xíniꞌ rán retú ñúꞌún rán nu̱u̱nꞌ ñúꞌúnꞌ sáá jítotúníꞌ rá tu̱nóꞌó xéénꞌ ránoꞌó, jee koto tívɨ́ xíniꞌ rán jie̱ꞌe̱ꞌ vá chi nsú kua̱chi ránoꞌó ni ya̱ nóꞌo maa.

Apoclipsis 13:1

Jee nuꞌuꞌ, Juan, ni̱ñɨ ni̱ꞌ nu̱u̱nꞌ ñuítɨ́ yúnteñúꞌún. Saájee niniꞌ ni̱ꞌ ɨɨn kitɨ xéénꞌ kákini ya̱ va̱nkaa ti̱ꞌ kéne ti̱ꞌ nu̱u̱nꞌ nteñúꞌún, jee u̱xa̱ꞌ xi̱ni̱ꞌ ti̱ꞌ jee u̱ji̱ꞌ nikɨ ti̱ꞌ. Jee u̱ji̱ꞌ corona ti̱ꞌ jee ɨɨn corona ñúꞌún ta nikɨ ti̱ꞌ ya̱ stúvi ya̱ kúñáꞌnú ti̱ꞌ. Jee nu̱u̱nꞌ ni uxáꞌ xi̱ni̱ꞌ ti̱ꞌ vá níso ɨɨn súví níváꞌa jie̱ꞌe̱ꞌ Ndiosíꞌ.

Apoclipsis 13:17

Jee sáꞌá ti̱ꞌ ya̱ ni nkuvi keꞌen ráa, jee ni nkuvi xi̱kó ráa, retú ntu níso ráa seña vá. Kua̱chi rá ñɨvɨ níso seña vá ya̱ kúvi súví kitɨ xéénꞌ kákini xíꞌnañúꞌún áxí numero ya̱ kúvi súví‑i.