Apoclipsis 13:7 - Mixteco del suroeste de Tlaxiaco Oaxaca

⁷ Jee njia̱ꞌa nu̱u̱nꞌ ti̱ꞌ ya̱ kantáꞌán ti̱ꞌ jín rá ñɨvɨ ya̱ nsa̱ꞌá sɨ́ɨ́n Ndiosíꞌ ya̱ yɨ́ꞌɨ́ ráa nu̱u̱nꞌ re̱ꞌ, jee kuneí ti̱ꞌ jín ráa. Jee suni njia̱ꞌa tiñu ya̱ nísotíñú ti̱ꞌ tátúníꞌ ti̱ꞌ nu̱u̱nꞌ kua̱íyó rá ñɨvɨ ntáká tataꞌ, jín nu̱u̱nꞌ ntáká ñuunꞌ, jín nu̱u̱nꞌ ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, jín nu̱u̱nꞌ ntáká nu̱u̱nꞌ rá ñɨvɨ.

Apoclipsis 13:7 Referans Kwoze

Apoclipsis 11:7

Jee sáá kuneí ráa sijínu ráa naku̱ꞌva ráa ya̱ naáꞌ jie̱ꞌe̱ꞌ Tu̱ꞌun Ndiosíꞌ, saájee kene máá kitɨ xéénꞌ kákini ne̱ numaꞌ ya̱ ntu jínu nu̱u̱nꞌ kúnú‑u, jee kantáꞌán‑a jín ni núvíꞌ ráa, jee kuneí‑i jín ráa jee kaꞌniꞌ‑i ráa.

Apoclipsis 12:17

Saájee nki̱tɨ̱ꞌ iniꞌ ko̱o̱ꞌ mánasɨ́ vá néꞌyá ti̱ꞌ ña. Saájee kua̱ꞌa̱nꞌ ti̱ꞌ kantáꞌán ti̱ꞌ jín rá inka rá se̱ꞌya ichiyúkúnꞌ ña, ya̱ suvi kúvi rá ñɨvɨ ya̱ síkúnkuvi ráa tu̱ꞌun ya̱ tátúníꞌ Ndiosíꞌ, jee níkɨ́nꞌ na̱a̱ꞌ ni̱ꞌin ráa nu̱u̱nꞌ rá tu̱ꞌun Jesús.

Apoclipsis 17:15

Jee suni nkachiꞌ‑i nu̱u̱nꞌ ni̱ꞌ: ―Jee rá nute ya̱ niniꞌ nú nu̱u̱nꞌ ña̱kuneeꞌ ñaꞌan sɨ́ɨ́ꞌ iniꞌ vá, yukuán kúvi ñɨvɨ kue̱ꞌe̱ꞌ ñuunꞌ, chi kue̱ꞌe̱ꞌ ñɨvɨ kúvi ráa, jee kúvi ráa kue̱ꞌe̱ꞌ nu̱u̱nꞌ ñɨvɨ, jín rá ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa.

Apoclipsis 11:18

Jee rá ñɨvɨ ntáká nación nki̱tɨ̱ꞌ víꞌí iniꞌ ráa jín nú, soo nkenta ki̱tɨ̱ꞌ iniꞌ nú xinóꞌo nú ráa. Jee ya nkenta tiempúꞌ ya̱ saꞌá na̱a̱ꞌ nú jie̱ꞌe̱ꞌ kua̱chi ntáká rá ñɨvɨ ya̱ níꞌiꞌ, jín ya ku̱ꞌva nú ta̱ꞌvi̱ꞌ kutaꞌviꞌ rá musúꞌ nú, rá ñɨvɨ ya̱ nkachitu̱ꞌún ráa tu̱ꞌun nkene yuꞌú nú, jín ntáká ñɨvɨ yɨ́tíñú ráa nu̱u̱nꞌ nú, ya̱ kúvi rá ñɨvɨ ya̱ ñúyúꞌví iniꞌ ráa noꞌó, va̱ni kuvi ráa ñɨvɨ kúñáꞌnú va̱ni ntu̱ví, jee xináánꞌ nú rá ñɨvɨ ya̱ xínáánꞌ ráa rá ñɨvɨ ñɨ̱vɨ́, nkachiꞌ rá te̱e ñáꞌnú vá.

Juan 19:11

Soo nna̱xiníkó Jesús: ―Ntu̱ví íyó na̱ tiñu kuniso nú sáva sanáaꞌ nú si̱kɨ̱ꞌ nuꞌuꞌ, retánꞌ nsú Ndiosíꞌ nééꞌ antivɨ́ súkún ntaji re̱ꞌ tiñu vá níso nú. Jee saáva te̱e ya̱ nna̱tají re̱ꞌ nuꞌuꞌ xi̱ntíín noꞌó, jee suvire̱ꞌ vá íyó ka̱ꞌ kua̱chi si̱kɨ̱ꞌ re̱ꞌ nsú káꞌ noꞌó.

Apoclipsis 10:11

Jee nkachiꞌ rá najiáꞌáꞌ ííꞌ vá nu̱u̱nꞌ ni̱ꞌ: ―Íyó kachitu̱ꞌún ya̱chi̱ꞌ tuku nú tu̱ꞌun kene yuꞌú Ndiosíꞌ, jie̱ꞌe̱ꞌ na̱sa koo jín kue̱ꞌe̱ꞌ ñuunꞌ, jín kue̱ꞌe̱ꞌ nu̱u̱nꞌ rá ñɨvɨ, jín kue̱ꞌe̱ꞌ ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, jín kue̱ꞌe̱ꞌ rá ñɨvɨ nísotíñú ya̱ tátúníꞌ ráa ―nkachiꞌ rá najiáꞌáꞌ ííꞌ vá.

Apoclipsis 5:9

Jee jíta ráa ɨɨn yaaꞌ jiáá ya̱ káchíꞌ suꞌva: Noꞌó ví ya̱ íyó ni̱ꞌi̱nꞌ nú tɨɨn nú tutuꞌ i̱ña̱ꞌ jee kuvi kune nú rá seyúꞌ násɨ́ꞌ maa. Chi nso̱ko̱ꞌ nú maánú ñaꞌniꞌ rá ñɨvɨ noꞌó, jee jín ni̱ñɨ̱ꞌ nú nna̱chuya̱ꞌvi nú nkeꞌen nú rá ñɨvɨ sáva nuvi ráa ñɨvɨ Ndiosíꞌ. Rá ñɨvɨ vá va̱ji nu̱u̱nꞌ ntáká tataꞌ, ntáká ñɨvɨ ya̱ káꞌánꞌ ráa sɨ́ɨ́n sɨ́ɨ́n nu̱u̱nꞌ tu̱ꞌun nkaku ráa, ntáká ñuunꞌ, ntáká nu̱u̱nꞌ rá ñɨvɨ.

Lucas 4:6

Jee nkachiꞌ kui̱ꞌna̱ꞌ vá nu̱u̱nꞌ re̱ꞌ: ―Nu̱u̱nꞌ noꞌó taji ni̱ꞌ ya̱ kunisotíñú nú tatúníꞌ nú nu̱u̱nꞌ ntáká rá ñuunꞌ yaꞌá, jee taji ni̱ꞌ nu̱u̱nꞌ nú rá viiꞌ nasɨ́kuitɨꞌ kúñáꞌnú íyó maa. Chi nna̱taji maa nu̱u̱nꞌ ni̱ꞌ jee xi̱ntíín ni̱ꞌ nna̱kɨ̱ꞌɨ maa, jee ku̱ꞌva ni̱ꞌ maa nu̱u̱nꞌ néni ɨɨn nu̱u̱nꞌ ya̱ kuíni maáníꞌ ku̱ꞌva ni̱ꞌ maa.