2 Timoteo 2:2 - Mixteco del suroeste de Tlaxiaco Oaxaca

² Jee nta̱ká tu̱ꞌun, ya̱ nteso̱ꞌo nú ya̱ nkachiꞌ ni̱ꞌ nu̱u̱nꞌ nú ichinúúnꞌ kue̱ꞌe̱ꞌ ñɨvɨ ya̱ kúvi stúvi ráa maa, jee natetíñú nú tu̱ꞌun vá nu̱u̱nꞌ inka rá te̱e na̱a̱ꞌ, ya̱ síkúnkuvi va̱ꞌa ráa, ya̱ kuvi naxinéꞌénꞌ ráa maa nu̱u̱nꞌ rá inka ñɨvɨ.

2 Timoteo 2:2 Referans Kwoze

1 Timoteo 4:6

Retú nakutíñú nú rá tu̱ꞌun yaꞌá nu̱u̱nꞌ rá ñaniꞌ jín rá ku̱ꞌva yɨ́ꞌɨ́ ichi Cristo, jee kuvi nú ɨɨn te̱e ya̱ sikúnkuvi va̱ꞌa nú nu̱u̱nꞌ Cristo Jesús. Jee kujia nú jín rá tu̱ꞌun, ya̱ kúneí iniꞌ‑ó jín ya̱ xínéꞌénꞌ‑ó ya̱ ya níkɨ́nꞌ nú.

1 Timoteo 6:12

Núnasɨ́ nú saꞌá nú fesáꞌ kunikɨnꞌ va̱ꞌa nú Cristo, ya̱ kúneí iniꞌ‑ó, kuéntáꞌ ɨɨn te̱e síkɨ́ sáꞌá fesáꞌ. Jee kuꞌun iniꞌ nú, ya̱ taji Ndiosíꞌ ta̱ꞌvi̱ꞌ nu̱u̱nꞌ nú, ya̱ kutekuꞌ nú nɨ́ɨ́nkání jín re̱ꞌ, chi jie̱ꞌe̱ꞌ yaꞌá vá nkana re̱ꞌ noꞌó. Jee suni jie̱ꞌe̱ꞌ yaꞌá, njia̱ꞌayuꞌú va̱ꞌa nú, ya̱ kúneí iniꞌ nú Cristo, ichinúúnꞌ kue̱ꞌe̱ꞌ ñɨvɨ, ya̱ kuvi stúvi ráa maa.

2 Timoteo 3:10

Soo noꞌó, nnikɨnꞌ nú nku̱mí va̱ꞌa nú tu̱ꞌun xínéꞌénꞌ ni̱ꞌ, na̱sa jiáꞌnu ni̱ꞌ ichi na̱a̱ꞌ, ná kúvi ya̱ ñúꞌún iniꞌ ni̱ꞌ saꞌá ni̱ꞌ, na̱sa kúneí iniꞌ ni̱ꞌ I̱toꞌoꞌ‑ó, na̱sa íyó káꞌnú iniꞌ ni̱ꞌ, na̱sa ñúnúunꞌ ni̱ꞌ ñɨvɨ jín Ndiosíꞌ, jín na̱sa kúníꞌin ni̱ꞌ íñɨ́ ni̱ꞌ jín Cristo.

Lucas 12:42

Saájee nkachiꞌ I̱toꞌoꞌ‑ó: ―¿Né ɨɨn kuvi musúꞌ ya̱ ñúꞌún kájí xi̱ni̱ꞌ‑i síkúnkuvi na̱a̱ꞌ va̱ꞌa‑a, ya̱ ñani i̱toꞌoꞌ xí tiñu‑u maa sáva kuneen kuéntáꞌ‑a rá inka ka̱ꞌ táꞌán musúꞌ‑u veꞌi re̱ꞌ sáva ku̱ꞌva‑a kajiꞌ ráa máá hora íyó ku̱ꞌva maa rúja?

1 Timoteo 1:18

Noꞌó, Timoteo, ya̱ kúvi kuéntáꞌ se̱ꞌya ni̱ꞌ. Tiñu yaꞌá tétíñú ni̱ꞌ noꞌó, sánikua̱ꞌ tu̱ꞌun nna̱kani sava rá ñanitáꞌán‑ó ya̱ nkene yuꞌú Ndiosíꞌ. Tétíñú ni̱ꞌ noꞌó, sáva nunasɨ́ nú sikúnkuvi va̱ꞌa nú tiñu vá, kuéntáꞌ kántáꞌán va̱ꞌa ɨɨn soldado.

1 Timoteo 1:12

Jiáꞌa ni̱ꞌ, ya̱ kútaꞌviꞌ ni̱ꞌ nu̱u̱nꞌ I̱toꞌoꞌ‑ó Cristo Jesús, ya̱ chíneí chítuvi re̱ꞌ nuꞌuꞌ. Jee jiáꞌa ni̱ꞌ, ya̱ kútaꞌviꞌ ni̱ꞌ nu̱u̱nꞌ re̱ꞌ, chi nku̱neí iniꞌ re̱ꞌ ya̱ síkúnkuvi ni̱ꞌ nta̱ká tiñu, ya̱ tátúníꞌ re̱ꞌ nu̱u̱nꞌ nuꞌuꞌ, jee ñani re̱ꞌ nuꞌuꞌ saꞌá ni̱ꞌ tiñu yaꞌá.

1 Timoteo 4:14

Koto xínóo nú saꞌá nú tiñu Ndiosíꞌ ya̱ kúvi ta̱ꞌvi̱ꞌ ntaji Ta̱chi̱ꞌ Ííꞌ Ndiosíꞌ nu̱u̱nꞌ nú ya̱ chíneí re̱ꞌ noꞌó sáꞌá nú maa, chi rá te̱e kúñáꞌnú nu̱u̱nꞌ rá ñɨvɨ ya̱ kúneí iniꞌ rává Cristo nchi̱só ráa naꞌá ráa xi̱ni̱ꞌ nú, sáva kani ráa noꞌó kuniso nú tiñu vá, jee ɨɨn ráa nna̱kani‑i tu̱ꞌun nkene yuꞌú Ndiosíꞌ ya̱ taji re̱ꞌ ta̱ꞌvi̱ꞌ vá nu̱u̱nꞌ nú.

1 Corintios 4:2

Chi rá ñɨvɨ ya̱ néen kuéntáꞌ tiñu i̱toꞌoꞌ ráa íyó sikúnkuvi va̱ꞌa ráa maa.

2 Timoteo 3:14

Soo noꞌó, kuni̱ꞌin nú jín ya̱ nku̱tu̱ꞌvá nú, ya̱ jínúꞌ iniꞌ nú. Chi suvinú vá jíníꞌ nú iniꞌ rá ñɨvɨ ya̱ nxi̱néꞌénꞌ maa noꞌó.

Colosenses 1:7

Suꞌva nku̱tu̱ꞌva rán maa sáni nxi̱néꞌénꞌ Epafras ránoꞌó. Suvire̱ꞌ ñúnúunꞌ‑ó re̱ꞌ, jee kúvi re̱ꞌ musúꞌ nu̱u̱nꞌ Cristo, ya̱ táꞌán sátíñú nkáá re̱ꞌ jín ránuꞌuꞌ nu̱u̱nꞌ tiñu Cristo. Chi síkúnkuvi na̱a̱ꞌ nijia re̱ꞌ nu̱u̱nꞌ tiñu Cristo, ya̱ kúvi ya̱ váꞌa ránoꞌó.

Hebreos 2:17

Jee saáva niniñúꞌún re̱ꞌ nkenta nkuvi re̱ꞌ kuéntáꞌ mákua íyó kuitɨꞌ rá ñaniꞌ re̱ꞌ, sáva nkenta nkuvi re̱ꞌ ɨɨn su̱tu̱ꞌ kúñáꞌnú nasɨ́kuitɨꞌ, ya̱ náꞌví iniꞌ re̱ꞌ néꞌyá re̱ꞌ ráa, jee síkúnkuvi na̱a̱ꞌ re̱ꞌ tiñu Ndiosíꞌ, sáva nso̱ko̱ꞌ re̱ꞌ maáréꞌ sáva siíyo re̱ꞌ kua̱chi rá ñɨvɨ.

1 Timoteo 5:22

Koto kéꞌen ya̱chi̱ꞌ nú kani nú ni ɨɨn te̱e kuniso ɨɨn tiñu nu̱u̱nꞌ ñanitáꞌán‑ó, chi xíꞌna íyó kani va̱ꞌa iniꞌ nú. Jee suni koto nákuíñɨꞌ nú jín kua̱chi sáꞌá inka ñɨvɨ. Jee koo ninuꞌun nú.

Mateo 24:25

Jee teso̱ꞌo va̱ꞌa rán, chi ya nstúꞌva ya̱chi̱ꞌ ni̱ꞌ ránoꞌó jie̱ꞌe̱ꞌ rá tiñu vá ne̱ ntiáꞌan kuvi‑i suꞌva.

Mateo 13:52

Saájee nkachiꞌ re̱ꞌ nu̱u̱nꞌ ráa: ―Saáva ntáká te̱e kúvi mestrúꞌ xínéꞌénꞌ jie̱ꞌe̱ꞌ tu̱ꞌun nta̱túníꞌ Ndiosíꞌ, jee súkuáꞌa ráa tu̱ꞌun ni̱ꞌ, jee ki̱vɨ ráa xi̱ntíín Ndiosíꞌ nééꞌ antivɨ́ tátúníꞌ re̱ꞌ nu̱u̱nꞌ ráa, jee kúvi ráa kuéntáꞌ ɨɨn te̱e kúvi i̱toꞌoꞌ xí veꞌi, ya̱ nteñu rá nantíñú yɨ́yáꞌvi chúꞌun va̱ꞌa‑a nátavaꞌ‑a rá nantíñú jiáá jín rá nantíñú túꞌú.

2 Corintios 2:14

Soo kútaꞌviꞌ ni̱ꞌ nu̱u̱nꞌ Ndiosíꞌ, chi suvire̱ꞌ vá sukuáni náka re̱ꞌ ránuꞌuꞌ sáva stúvi re̱ꞌ ya̱ kúneí re̱ꞌ si̱kɨ̱ꞌ nɨꞌɨ jie̱ꞌe̱ꞌ ya̱ nsa̱ꞌá re̱ꞌ jín ránuꞌuꞌ, kuéntáꞌ ɨɨn desfile stúvi‑i ya̱ nku̱neí ɨɨn general sáá nka̱ntáꞌán re̱ꞌ. Náka Ndiosíꞌ ránuꞌuꞌ sukuán jie̱ꞌe̱ꞌ yɨ́ꞌɨ́ ránꞌ nu̱u̱nꞌ Cristo. Jee jiátíñú re̱ꞌ ránuꞌuꞌ sáva sikúténuun ránꞌ tu̱ꞌun váꞌa Cristo nta̱ká ichi, sáva kuvi kuniꞌ rá ñɨvɨ iniꞌ re̱ꞌ, kuéntáꞌ kua̱ꞌ jiéténuun xikoꞌ jiávi̱xi̱ꞌ.

2 Corintios 3:5

Jee nsú nu̱u̱nꞌ ránuꞌuꞌ kéne ya̱ tu̱ꞌva ráníꞌ, saáva ntu kúvi kani iniꞌ rán ya̱ váji ne̱ nu̱u̱nꞌ maáránꞌ ya̱ kee kuneí ránꞌ saꞌá ránꞌ na̱ni tiñu táji Ndiosíꞌ. Chisaꞌ ne̱ nu̱u̱nꞌ maá Ndiosíꞌ va̱ji ya̱ tu̱ꞌva ránꞌ kuneí ránꞌ sáꞌá ránꞌ maa.