2 Corintios 8:21 - Mixteco del suroeste de Tlaxiaco Oaxaca

²¹ Chi ñúꞌún iniꞌ ráníꞌ ya̱ sáꞌá na̱a̱ꞌ ránꞌ, jee nsú kua̱chi kuitɨꞌ ichinúúnꞌ maa I̱toꞌoꞌ‑ó ni, chisaꞌ suni ne̱ ichinúúnꞌ rá ñɨvɨ ranika̱ꞌ.

2 Corintios 8:21 Referans Kwoze

Romanos 12:17

Jee koto násaꞌá niva̱ꞌa rán nu̱u̱nꞌ ni ɨɨn ñɨvɨ ya̱ nsa̱ꞌá niva̱ꞌa‑a jín noꞌó. Kuniꞌvɨꞌ iniꞌ rán saꞌá rán tiñu váꞌa ichinúúnꞌ ntáká ñɨvɨ.

1 Pedro 2:12

Jee kueꞌnu va̱ꞌa rán nteñu rá ñɨvɨ ya̱ ntu jíníꞌ ráa Tu̱ꞌun Ndiosíꞌ, sáva súka̱ꞌ káꞌánꞌ rá ñɨvɨ si̱kɨ̱ꞌ rán kuéntáꞌ kua̱ꞌ sáꞌá rán tiñu níváꞌa, soo kuniꞌ rá ñɨvɨ vá rá tiñu váꞌa sáꞌá rán, jee nakuetúꞌún ráa Ndiosíꞌ ki̱vɨ̱ꞌ niji tuku Cristo sanáaꞌ re̱ꞌ sáni ya̱ nááꞌ.

Filipenses 4:8

Jee nu̱u̱nꞌ nɨ́ꞌɨ ka̱ꞌ kachiꞌ ni̱ꞌ ka̱ꞌ nu̱u̱nꞌ rán, ránoꞌó ñaniꞌ jín ku̱ꞌva. Kuꞌun iniꞌ rán jie̱ꞌe̱ꞌ nta̱ká tu̱ꞌun na̱a̱ꞌ, jín jie̱ꞌe̱ꞌ nta̱ká tiñu ya̱ íyó ñáꞌnú, jín jie̱ꞌe̱ꞌ nta̱ká tiñu ya̱ íyó na̱a̱ꞌ, jín jie̱ꞌe̱ꞌ nta̱ká tiñu ya̱ íyó ninuꞌun, jín jie̱ꞌe̱ꞌ nta̱ká tiñu ya̱ sáꞌá ya̱ níní viiꞌ kuvi iniꞌ ñɨvɨ, jín jie̱ꞌe̱ꞌ nta̱ká tiñu ya̱ sáꞌá ñáꞌnú ñɨvɨ nu̱u̱nꞌ‑u. Retú íyó tiñu ya̱ íyó váꞌa, jee retú íyó tiñu ya̱ íyó níꞌínꞌ‑i ya̱ nakuetúꞌún ñɨvɨ jie̱ꞌe̱ꞌ‑e, kuꞌun iniꞌ rán maa.

1 Tesalonicenses 5:22

Chusává rán maárán nu̱u̱nꞌ nta̱ká nu̱u̱nꞌ ya̱ ni̱váꞌa.

2 Corintios 2:17

Soo ránuꞌuꞌ, chi ntu̱ví núkú ránꞌ táváꞌ ránꞌ xu̱ꞌún jie̱ꞌe̱ꞌ Tu̱ꞌun Ndiosíꞌ, kuéntáꞌ sáꞌá kue̱ꞌe̱ꞌ rá te̱e, [jee ntu sáma ránꞌ maa]. Chisaꞌ jíníꞌ Ndiosíꞌ ya̱ saɨn ñúꞌún iniꞌ ránꞌ káchíꞌ ránꞌ tu̱ꞌun re̱ꞌ, chi maá Ndiosíꞌ ví ya̱ nta̱jí re̱ꞌ ránuꞌuꞌ ya̱ stékútu̱ꞌún ránꞌ tu̱ꞌun re̱ꞌ. Jie̱ꞌe̱ꞌ yɨ́ꞌɨ́ ránꞌ nu̱u̱nꞌ Cristo káchíꞌ ránꞌ tu̱ꞌun re̱ꞌ.

Romanos 14:18

Chi ñɨvɨ ya̱ sukuán yɨ́tíñú‑u nu̱u̱nꞌ Cristo, jee kúváꞌa iniꞌ Ndiosíꞌ néꞌyá re̱ꞌ maa, jee kúváꞌa iniꞌ rá inka ñɨvɨ jie̱ꞌe̱ꞌ ya̱ sáꞌá‑a.

1 Timoteo 5:14

Saáva kuíni ni̱ꞌ ya̱ ñaꞌan náꞌví núun kui̱ya̱ꞌ natana̱ꞌa ráa, jee sikuéꞌnu ráa se̱ꞌya, jee kuneeꞌ kuéntáꞌ ráa veꞌi ráa. Jee sukuán jee nkúne ña ichi nu̱u̱nꞌ ñɨvɨ núníꞌin ichi Cristo sáva ni ɨɨn nkúvi kaꞌanꞌ u̱ꞌvi̱ꞌ‑i kune̱ꞌyá‑a ráña.

Mateo 6:4

Saꞌá nú suꞌva sáva koo yuꞌuꞌ ya̱ ku̱ꞌva nú karidáꞌ nu̱u̱nꞌ ñɨvɨ jíniñúꞌún maa, jee maá Tátáꞌ nú Ndiosíꞌ ya̱ jíníꞌ re̱ꞌ ya̱ íyó yuꞌuꞌ, jee maáréꞌ nataji re̱ꞌ ta̱ꞌvi̱ꞌ nu̱u̱nꞌ nú.

Mateo 5:16

Jee suꞌva íyó kueꞌnu na̱a̱ꞌ va̱ꞌa rán sáva kúvi rán kuéntáꞌ ñuꞌunꞌ stúúnꞌ rán nu̱u̱nꞌ rá ñɨvɨ jee kune̱ꞌyá ráa ya̱ váꞌa sáꞌá rán, sáva nakuetúꞌún ráa Tátáꞌ rán Ndiosíꞌ ya̱ nééꞌ antivɨ́ súkún.

Mateo 23:5

’Jee ntáká rá tiñu sáꞌá ráa vá, sáꞌá ráa maa sáva kuniꞌ rá ñɨvɨ maa, jee nakuetúꞌún ñɨvɨ ráa. Jee káꞌnú sáꞌá ráa rá kajúnꞌ lúlí ñúꞌún pedasúꞌ tutuꞌ níso Tu̱ꞌun Ndiosíꞌ ya̱ ténuꞌniꞌ néꞌín ráa yutéénꞌ ráa jín yɨkɨ náꞌá ráa. Jee sáꞌá kání ráa ka̱ꞌ yuxi yuꞌú saꞌma ñúꞌún ráa.

Mateo 6:1

’Kumí rán maárán ya̱ koto saꞌá rán tiñu na̱a̱ꞌ váꞌa ichinúúnꞌ rá ñɨvɨ sáva kune̱ꞌyá ráa maa, chi retú saꞌá rán maa suꞌva jee Tátáꞌ rán ya̱ nééꞌ antivɨ́ súkún nsáꞌ nataji re̱ꞌ ta̱ꞌvi̱ꞌ nu̱u̱nꞌ rán.

2 Corintios 8:20

Jee suꞌva ntu jiáꞌa ránꞌ chikua̱chi néni ɨɨn ñɨvɨ si̱kɨ̱ꞌ ránuꞌuꞌ, jie̱ꞌe̱ꞌ na̱ja sátíñú ránꞌ jín kue̱ꞌe̱ꞌ víꞌí ya̱ tétáꞌán ránú.

2 Corintios 8:22

Jee suni chúichí ránꞌ inka ka̱ꞌ ñaniꞌ‑ó kua̱jiaaꞌ re̱ꞌ jín ráa. Jee kue̱ꞌe̱ꞌ íchí stúvi re̱ꞌ ya̱ ñúkáñá iniꞌ re̱ꞌ saꞌá re̱ꞌ kue̱ꞌe̱ꞌ tiñu Ndiosíꞌ. Jee vitan jee víꞌí ka̱ꞌ ñúkáñá iniꞌ re̱ꞌ saꞌá re̱ꞌ tiñu yaꞌá, chi ne̱ yuchí kúneí víꞌí iniꞌ re̱ꞌ jie̱ꞌe̱ꞌ ya̱ sáꞌá ránoꞌó.

1 Timoteo 3:7

Jee suni íyó kueꞌnu na̱a̱ꞌ re̱ꞌ, sáva rá inka ñɨvɨ, ya̱ ntu kúneí iniꞌ ráa Cristo, kuva̱ꞌa iniꞌ ráa kune̱ꞌyá ráa re̱ꞌ. Jee sáva nnániꞌinꞌ ráa kaꞌanꞌ u̱ꞌvi̱ꞌ ráa si̱kɨ̱ꞌ re̱ꞌ. Jee sáva nkíninkava re̱ꞌ nu̱u̱nꞌ máñáꞌ kui̱ꞌna̱ꞌ kúñáꞌnú.