2 Corintios 12:11 - Mixteco del suroeste de Tlaxiaco Oaxaca

¹¹ Te̱e naanꞌ nkuvi ni̱ꞌ, jie̱ꞌe̱ꞌ nkaꞌanꞌ téyɨ́ɨ́ ni̱ꞌ, soo jie̱ꞌe̱ꞌ ya̱ sáꞌá ránoꞌó jee nchi̱naꞌá‑a nuꞌuꞌ nkuvi suꞌva. Chi ránoꞌó ví ya̱ íyó nakutíñú va̱ꞌa rán jie̱ꞌe̱ꞌ nuꞌuꞌ. Chi ni ɨɨn nu̱u̱nꞌ ntu núun ka̱ꞌ kúvi ni̱ꞌ nu̱u̱nꞌ rá te̱e vá ya̱ kátúꞌún ráa nika̱ꞌ ya̱ apóstol kúñáꞌnú ka̱ꞌ ví ráa, sú ntu̱náꞌ kúvi ni̱ꞌ.

2 Corintios 12:11 Referans Kwoze

2 Corintios 11:5

Soo jiáni iniꞌ ni̱ꞌ ya̱ ni ɨɨn nu̱u̱nꞌ ntu núun ka̱ꞌ kúvi ni̱ꞌ nu̱u̱nꞌ rá te̱e vá ya̱ jiáni iniꞌ ñɨvɨ ya̱ kúvi ráa apóstol kúñáꞌnú ka̱ꞌ.

2 Corintios 11:1

Varésukuáre kɨnetuꞌ ránú nu̱u̱nꞌ nuꞌuꞌ sáá káꞌánꞌ ni̱ꞌ ntíꞌ kuéntáꞌ káꞌánꞌ te̱e naanꞌ. ¡Kɨnetuꞌ rán nu̱u̱nꞌ nuꞌuꞌ!

Efesios 3:8

Sú núun ka̱ꞌ kúñáꞌnú ni̱ꞌ nu̱u̱nꞌ nɨꞌɨ rá ñɨvɨ núun ka̱ꞌ kúñáꞌnú ráa ya̱ nsa̱ꞌá sɨ́ɨ́n Ndiosíꞌ ráa sáva kuvi ráa ñɨvɨ re̱ꞌ. Soo nsi̱kútaꞌviꞌ re̱ꞌ tiñu vá nu̱u̱nꞌ ni̱ꞌ ya̱ kachitu̱ꞌún ni̱ꞌ tu̱ꞌun váꞌa re̱ꞌ nu̱u̱nꞌ rá ñɨvɨ ya̱ ntu kúvi ñɨvɨ Israel. Tu̱ꞌun vá ví ya̱ ntántúníꞌ yɨ́yáꞌvi nasɨ́kuitɨꞌ ka̱ꞌ ví Cristo jín rá táji re̱ꞌ nu̱u̱nꞌ‑ó. Jee ni nsáꞌ kenta ki̱ku̱ꞌun iniꞌ‑ó nɨꞌɨ tu̱ꞌun vá.

2 Corintios 12:12

Chi maá nááꞌ nijia ya̱ káꞌnú íyó iniꞌ ni̱ꞌ nsa̱ꞌá ni̱ꞌ rá seña nteñu rán, ya̱ stúvi‑i ya̱ níso ni̱ꞌ tiñu apóstol ya̱ chúichi Cristo, chi nsa̱ꞌá ni̱ꞌ rá milagrúꞌ ya̱ tívɨ́ xíniꞌ ñɨvɨ jie̱ꞌe̱ꞌ Ndiosíꞌ maá ñáꞌnú, jín rá tiñu a̱nasɨ́ nsa̱ꞌá ni̱ꞌ jín fuersáꞌ ííꞌ Ndiosíꞌ.

2 Corintios 12:6

Chi retú kuíni ni̱ꞌ kaꞌanꞌ téyɨ́ɨ́ ni̱ꞌ jie̱ꞌe̱ꞌ maáníꞌ, soo nsú te̱e naanꞌ kúvi ni̱ꞌ, chi tu̱ꞌun na̱a̱ꞌ kachiꞌ ni̱ꞌ. Soo nsáꞌ kaꞌanꞌ téyɨ́ɨ́ ni̱ꞌ sáva nkáni iniꞌ ni ɨɨn ñɨvɨ ya̱ kúñáꞌnú ni̱ꞌ ka̱ꞌ nsú káꞌ na̱sa íyó ni̱ꞌ ya̱ kúvi néꞌyá ráa maa jie̱ꞌe̱ꞌ ya̱ sáꞌá ni̱ꞌ, áxí ya̱ tésóꞌo ráa ya̱ káchíꞌ ni̱ꞌ.

2 Corintios 1:6

Saájee, retú sáá nóꞌo ráníꞌ tu̱nóꞌó, jee nóꞌo ránꞌ jie̱ꞌe̱ꞌ táji ránꞌ Tu̱ꞌun Ndiosíꞌ sáva nasáneí ránꞌ iniꞌ ránú, jín sáva xinánitáꞌvíꞌ Ndiosíꞌ ránoꞌó jie̱ꞌe̱ꞌ kua̱chi ránoꞌó. Áxí retú sáá nasáneí iniꞌ ráníꞌ, jee íyó sukuán sáva nasáneí Ndiosíꞌ iniꞌ ránoꞌó [jín ya̱ nanitáꞌvíꞌ rán], jee sukuán sáꞌá‑a ya̱ kuiñɨ ni̱ꞌin rán nu̱u̱nꞌ Cristo jee keꞌneꞌ iniꞌ rán jín tu̱nóꞌó kunoꞌo rán kua̱ꞌ nóꞌo ránuꞌuꞌ.

1 Corintios 3:22

va̱ kúvi nuꞌuꞌ Pablo, áxí Apolos, áxí Pedro ya̱ xínéꞌénꞌ ránoꞌó Tu̱ꞌun Ndiosíꞌ. Áxí nɨꞌɨ ya̱ íyó ñɨ̱vɨ́ yaꞌá, jee vasúꞌ kutekuꞌ rán áxí vasúꞌ kuviꞌ rán iniꞌ ñɨ̱vɨ́ yaꞌá, vá ya̱ íyó tiempúꞌ vitan áxí vá kiji koo tiempúꞌ ichinúúnꞌ, jee nɨꞌɨ ya̱ íyó kúvi nantíñú rán.

Lucas 17:10

Jee suni sukuán ránoꞌó, sáá nɨꞌɨ rán saꞌá rán ntáká ya̱ nta̱túníꞌ Ndiosíꞌ nu̱u̱nꞌ rán, jee kachiꞌ rán: “Musúꞌ saɨn ni kúvi‑ó, chi sáꞌá‑ó kua̱chi sáni rá tiñu nte̱tuvi re̱ꞌ yó ya̱ íyó saꞌá‑ó”, kachiꞌ rán ―nkachiꞌ Jesús.

1 Corintios 13:2

Jee retánꞌ kúvi nakani ni̱ꞌ tu̱ꞌun kéne yuꞌú máá maá Ndiosíꞌ, jín retánꞌ jíníꞌ va̱ꞌa ni̱ꞌ ntáká rá tu̱ꞌun yɨ́yuꞌuꞌ re̱ꞌ, jín retánꞌ jíníꞌ ni̱ꞌ kua̱íyó ya̱ íyó, jee retánꞌ kúneí nasɨ́kuitɨꞌ nijia iniꞌ ni̱ꞌ Ndiosíꞌ ne̱ kuvi tatúníꞌ ni̱ꞌ nu̱u̱nꞌ ɨɨn yuku ya̱ kuiyo‑o nu̱u̱nꞌ íñɨ́‑ɨ jee kuiyo‑o, soo retú ntu̱ví ñúnúunꞌ ni̱ꞌ rá ñɨvɨ, saájee ntu̱náꞌ tiñu kuitɨꞌ ni̱ꞌ.

2 Corintios 3:1

¿Á jiáni iniꞌ ránú ya̱ nákijiéꞌé tuku ráníꞌ ya̱ nákutíñú va̱ꞌa ránꞌ jie̱ꞌe̱ꞌ maáránꞌ rúja? Áxí, ¿á íyó taji ránꞌ nu̱u̱nꞌ ránoꞌó tutuꞌ ya̱ nákutíñú va̱ꞌa‑a jie̱ꞌe̱ꞌ ránuꞌuꞌ rúja?, áxí, ¿á íyó taji ránú tutuꞌ sukuán nu̱u̱nꞌ ránuꞌuꞌ, sáni jíniñúꞌún sava inka ñɨvɨ rúja?

2 Corintios 5:13

Chi retú jiáni iniꞌ ñɨvɨ ya̱ te̱e jíkó xíniꞌ kúvi ráníꞌ, jee kúvi ránꞌ sukuán sáva jiátíñú Ndiosíꞌ ránuꞌuꞌ. Soo retú íyó váꞌa xi̱ni̱ꞌ ráníꞌ, kúvi ránꞌ sukuán sáva kuvi ya̱ váꞌa ránoꞌó.

Gálatas 6:3

Ré ɨɨn ñɨvɨ káꞌvi téyɨ́ɨ́ iniꞌ, súnika̱ꞌ ntu̱náꞌ kúvi‑i, jee xínáꞌví‑i maáa.