1 Pedro 1:12 - Mixteco del suroeste de Tlaxiaco Oaxaca

¹² Soo nstúvi Ndiosíꞌ nu̱u̱nꞌ ráa ya̱ nsú ya̱ kuvi maáráa ni ví jie̱ꞌe̱ꞌ rá tiñu ya̱ nkachiꞌ ráa vá, chisaꞌ ya̱ kuvi ya̱ váꞌa maáránoꞌó ví jie̱ꞌe̱ꞌ rá tu̱ꞌun ya̱ nna̱kani ráa vá, jee vitan tu̱ꞌun vá tékútu̱ꞌún nu̱u̱nꞌ ránoꞌó ya̱ stékútu̱ꞌún rá ñɨvɨ tu̱ꞌun váꞌa nsa̱ꞌá Ta̱chi̱ꞌ Ííꞌ Ndiosíꞌ ya̱ nta̱jí re̱ꞌ nkiji‑i ne̱ antivɨ́ súkún. Jee ne̱ rá najiáꞌáꞌ ííꞌ Ndiosíꞌ ñúkúvi iniꞌ ráa ranika̱ꞌ kuniꞌ ráa maa.

1 Pedro 1:12 Referans Kwoze

Juan 15:26

’Jee chuichí ni̱ꞌ ɨɨn ya̱ kiji re̱ꞌ ne̱ nu̱u̱nꞌ Tátáꞌ ni̱ꞌ, jee chineí chituvi re̱ꞌ nachuꞌun neí re̱ꞌ iniꞌ ánímaꞌ rán, jee suvire̱ꞌ kúvi Ta̱chi̱ꞌ Ííꞌ ya̱ xínéꞌénꞌ re̱ꞌ tu̱ꞌun na̱a̱ꞌ. Jee sáá kene re̱ꞌ ne̱ nu̱u̱nꞌ maá Tátáꞌ ni̱ꞌ kiji re̱ꞌ jee ku̱ꞌva re̱ꞌ ya̱ naáꞌ jie̱ꞌe̱ꞌ nuꞌuꞌ.

Efesios 3:10

Sukuán nsa̱ꞌá re̱ꞌ sáva rá najiáꞌáꞌ ííꞌ re̱ꞌ rá kúñáꞌnú jín rá nísotíñú ya̱ nééꞌ ráa antivɨ́ súkún, jee sáá kune̱ꞌyá ráa nu̱u̱nꞌ tiñu sáꞌá re̱ꞌ iniꞌ rá ñɨvɨ ya̱ kúneí iniꞌ ráa Jesús, jee kuniꞌ ráa ya̱ ntáká nu̱u̱nꞌ ntántúníꞌ níchí nasɨ́kuitɨꞌ ka̱ꞌ Ndiosíꞌ.

1 Corintios 2:10

Chisaꞌ nsa̱ꞌá Ndiosíꞌ ya̱ stúvi Ta̱chi̱ꞌ Ííꞌ re̱ꞌ maa nu̱u̱nꞌ ráníꞌ, chi maá Ta̱chi̱ꞌ Ííꞌ Ndiosíꞌ vá nánukútúꞌun va̱ꞌa nɨꞌɨ kuitɨꞌ re̱ꞌ ná kúvi ya̱ yɨ́ꞌɨ́ yuꞌuꞌ ya̱ jiáni iniꞌ maá Ndiosíꞌ.

Hebreos 4:2

Chi suni nu̱u̱nꞌ maáó ranika̱ꞌ nkachitu̱ꞌún jie̱ꞌe̱ꞌ tu̱ꞌun váꞌa kuéntáꞌ kua̱ꞌ nkachiꞌ maa nu̱u̱nꞌ rá ñɨvɨ vá ne̱ yanaꞌán. Soo ntu nníꞌínꞌ ti̱ñú tu̱ꞌun vá nu̱u̱nꞌ ráa súka̱ꞌ nteso̱ꞌo ráa maa, chi maáráa ya̱ nteso̱ꞌo ráa maa, jee ntu̱ví nínúꞌ iniꞌ ráa maa.

Marcos 16:15

Jee nkachiꞌ re̱ꞌ nu̱u̱nꞌ ráa: ―Kuáꞌán rán kua̱íyó ñɨ̱vɨ́, jee stekútu̱ꞌún rán tu̱ꞌun váꞌa jie̱ꞌe̱ꞌ nuꞌuꞌ nu̱u̱nꞌ rá ñɨvɨ kua̱íyó ñɨ̱vɨ́, ya̱ nsa̱ꞌá Ndiosíꞌ.

1 Pedro 1:25

Soo tu̱ꞌun I̱toꞌoꞌ‑ó kínóo íyó‑o nɨ́ɨ́nkání, káchíꞌ nu̱u̱nꞌ Tutuꞌ Ííꞌ. Jee tu̱ꞌun yaꞌá kúvi‑i tu̱ꞌun váꞌa re̱ꞌ ya̱ ya nte̱ku̱tu̱ꞌún‑u nu̱u̱nꞌ ránoꞌó.

Apoclipsis 5:11

Jee nne̱ꞌyá ni̱ꞌ jee nteso̱ꞌo ni̱ꞌ nusuyuꞌú kue̱ꞌe̱ꞌ víꞌí rá najiáꞌáꞌ ííꞌ Ndiosíꞌ, ni̱kótíyu ráa xiín teyuꞌ nu̱u̱nꞌ tátúníꞌ vá, jín rá tékúꞌ vá, jín rá te̱e kúñáꞌnú vá. Jee ntántúníꞌ kue̱ꞌe̱ꞌ nasɨ́kuitɨꞌ rá millón rá najiáꞌáꞌ ííꞌ íyó yukuán.

2 Corintios 6:6

jín jie̱ꞌe̱ꞌ ninuꞌun jiáꞌnu ránꞌ, jín jie̱ꞌe̱ꞌ jíníꞌ va̱ꞌa ránꞌ sáni kuíni Ndiosíꞌ, jín jie̱ꞌe̱ꞌ ya̱ káꞌnú víꞌí íyó iniꞌ ránꞌ jiéꞌnéꞌ iniꞌ ránꞌ nu̱u̱nꞌ tu̱nóꞌó va̱ji si̱kɨ̱ꞌ ránꞌ, jín jie̱ꞌe̱ꞌ kúváꞌa iniꞌ ránꞌ jín ñɨvɨ, jín jie̱ꞌe̱ꞌ yɨ́ꞌɨ́ Ta̱chi̱ꞌ Ííꞌ iniꞌ ránuꞌuꞌ, jín jie̱ꞌe̱ꞌ saɨn ñúꞌún iniꞌ ránꞌ ñúnúunꞌ ránꞌ ñɨvɨ,

2 Corintios 1:22

Jee suni ntaji Ndiosíꞌ Ta̱chi̱ꞌ Ííꞌ re̱ꞌ kɨꞌɨ‑ɨ iniꞌ ánímaꞌ‑ó. Yukuán vá kúvi seyúꞌ ya̱ ntee re̱ꞌ ya̱ stúvi re̱ꞌ ya̱ kúvi‑ó ñɨvɨ re̱ꞌ. Ta̱chi̱ꞌ Ííꞌ re̱ꞌ ví ya̱ táji ya̱chi̱ꞌ re̱ꞌ nu̱u̱nꞌ‑ó ya̱ stúvi ya̱ naáꞌ ya̱ ni̱ꞌi̱nꞌ‑ó nɨꞌɨ ta̱ꞌvi̱ꞌ ya̱ táji Ndiosíꞌ nu̱u̱nꞌ‑ó ichinúúnꞌ ka̱ꞌ.

Romanos 15:19

jín ya̱ káꞌánꞌ ni̱ꞌ jie̱ꞌe̱ꞌ ya̱ nsa̱ꞌá re̱ꞌ jín ni̱ꞌ rá seña ya̱ níso fuersáꞌ ííꞌ jín rá a̱nasɨ́ sáva stúvi ya̱ kúñáꞌnú re̱ꞌ, chi Ta̱chi̱ꞌ Ííꞌ re̱ꞌ nsa̱ꞌá maa jín fuersáꞌ ííꞌ níso re̱ꞌ. Nsa̱ꞌá re̱ꞌ nɨꞌɨ yaꞌá sáva sikúnkuvi ni̱ꞌ stekútu̱ꞌún ni̱ꞌ tu̱ꞌun váꞌa jie̱ꞌe̱ꞌ Cristo ne̱ ñuunꞌ Jerusalén, jín ntáká rá ñuunꞌ ya̱ káá ni̱kótíyu ntáká ichi yukuán, kénta kua̱íyó ne̱ rá ñuunꞌ ya̱ sánitɨ́ɨn ñuunꞌ Ilírico.

Hechos 2:33

Saáva Ndiosíꞌ nxi̱náa re̱ꞌ Jesús nu̱u̱nꞌ kúñáꞌnú‑u ya̱ nééꞌ‑e ichi kuáꞌá re̱ꞌ. Jee Ndiosíꞌ, Tááꞌ Jesús, njia̱ꞌa re̱ꞌ tiñu nu̱u̱nꞌ Jesús ya̱ tetíñú‑u Ta̱chi̱ꞌ Ííꞌ, sáni nchi̱sóyuꞌú re̱ꞌ, sáva sikúténuun‑u Ta̱chi̱ꞌ Ííꞌ nu̱u̱nꞌ rá ñɨvɨ. Jee yaꞌá ví ya̱ néꞌyá rán jín ya̱ tésóꞌo rán.

Hebreos 2:4

Jee stúvi maá Ndiosíꞌ ya̱ naáꞌ ví tu̱ꞌun vá. Chi nsa̱ꞌá re̱ꞌ ya̱ saꞌá rá te̱e vá rá seña, jín tiñu ñáꞌnú ya̱ tívɨ́ xíniꞌ‑ó, jín kéꞌín nu̱u̱nꞌ a̱nasɨ́, ya̱ stúvi ya̱ naáꞌ ví tu̱ꞌun vá. Jee suni ntaji re̱ꞌ Ta̱chi̱ꞌ Ííꞌ re̱ꞌ nu̱u̱nꞌ ta ɨɨn ɨɨn‑órán, sáva saꞌá‑a ya̱ kuvi saꞌá‑ó sɨ́ɨ́n sɨ́ɨ́n tiñu re̱ꞌ, sánikua̱ꞌ kuíni maáréꞌ.

Gálatas 1:16

stúvi re̱ꞌ Se̱ꞌya re̱ꞌ nu̱u̱nꞌ ni̱ꞌ, sáva stekútu̱ꞌún ni̱ꞌ jie̱ꞌe̱ꞌ vá nu̱u̱nꞌ rá ñɨvɨ ntu kúvi Israel. Sáá nsa̱ꞌá re̱ꞌ suꞌva, jee ntu kuísá níkátu̱ꞌún ni̱ꞌ inka ñɨvɨ jie̱ꞌe̱ꞌ tu̱ꞌun vá.

Gálatas 1:12

Chi ntu nni̱ꞌi̱nꞌ ni̱ꞌ tu̱ꞌun vá nu̱u̱nꞌ ñɨvɨ. Ni ntu nxi̱néꞌénꞌ ráa maa nuꞌuꞌ. Soo nni̱ꞌi̱nꞌ ni̱ꞌ tu̱ꞌun vá chi Jesucristo nstúvi re̱ꞌ maa nu̱u̱nꞌ ni̱ꞌ.

Romanos 10:15

Jee, ¿na̱sa kuvi kachitu̱ꞌún ráa jie̱ꞌe̱ꞌ re̱ꞌ, retánꞌ ntu íyó ñɨvɨ ya̱ chuichí rává ráa kɨ̱ꞌɨ̱nꞌ ráa kachitu̱ꞌún ráa jie̱ꞌe̱ꞌ re̱ꞌ résa? Sukuán káchíꞌ tu̱ꞌun níso nu̱u̱nꞌ Tutuꞌ Ííꞌ: “¡Na̱ ka̱ꞌ viiꞌ ka̱ꞌ kúvi ya̱ jíka ñɨvɨ káchítu̱ꞌún ráa tu̱ꞌun váꞌa Ndiosíꞌ!”

Romanos 1:17

Chi tu̱ꞌun váꞌa Jesús stúvi ya̱ sííyo Ndiosíꞌ kua̱chi‑ó sáva kino̱o na̱a̱ꞌ‑ó nu̱u̱nꞌ re̱ꞌ, jie̱ꞌe̱ꞌ kúneí iniꞌ‑ó Jesús jee kua̱chi kuitɨꞌ jie̱ꞌe̱ꞌ ya̱ kúneí iniꞌ‑ó ví‑i, sáni káchíꞌ nu̱u̱nꞌ Tutuꞌ Ííꞌ níso Tu̱ꞌun Ndiosíꞌ: “Rá ñɨvɨ ya̱ sáꞌá Ndiosíꞌ ya̱ nkino̱o na̱a̱ꞌ‑a nu̱u̱nꞌ re̱ꞌ, jie̱ꞌe̱ꞌ kúneí iniꞌ ráa re̱ꞌ, jee kutekuꞌ‑u nɨ́ɨ́nkání jín re̱ꞌ.”

Lucas 15:10

Jee saáva nuꞌuꞌ káchíꞌ ni̱ꞌ nu̱u̱nꞌ rán ya̱ suni íyó tu̱ꞌun kúsɨ́ɨꞌ iniꞌ rá najiáꞌáꞌ ííꞌ Ndiosíꞌ jie̱ꞌe̱ꞌ ɨɨn ñɨvɨ kua̱chi retú nákani iniꞌ‑i jie̱ꞌe̱ꞌ kua̱chi sáꞌá‑a jee kunikɨnꞌ‑ɨ Ndiosíꞌ ―nkachiꞌ Jesús.

Mateo 11:25

Jee tiempúꞌ yukuán, jee ni̱ka̱nꞌ táꞌvíꞌ Jesús nu̱u̱nꞌ Tátáꞌ‑a Ndiosíꞌ, jee nkachiꞌ‑i: ―Nákuetúꞌún ni̱ꞌ noꞌó, Tátáꞌ ni̱ꞌ, ya̱ kúvi nú I̱toꞌoꞌ tátúníꞌ nu̱u̱nꞌ antivɨ́ jín iniꞌ ñɨ̱vɨ́ yaꞌá, chi nchise̱ꞌí nú tiñu ñáꞌnú nú yaꞌá nu̱u̱nꞌ rá ñɨvɨ tu̱ꞌva jín rá ñɨvɨ níchí ya̱ ntu njiáꞌa nú ya̱ ki̱ku̱ꞌun iniꞌ ráa maa, chisaꞌ nstúvi nú maa nu̱u̱nꞌ rá ñɨvɨ ñúláꞌví iniꞌ ya̱ kúvi ráa kuéntáꞌ rá súchí lúlí.

1 Tesalonicenses 2:9

Chi, ránoꞌó ñanitáꞌán, náꞌán rán ya̱ nsa̱tíñú ni̱ꞌin ráníꞌ jee nnu̱nasɨ́ yɨ́ɨ́ ránꞌ. Nuví niñuꞌ nsa̱tíñú ránꞌ sáva ni̱ꞌi̱nꞌ ránꞌ ya̱ jíniñúꞌún ránꞌ, sáva ntu nkúvi ránꞌ ɨɨn tiñu véi nu̱u̱nꞌ ni ɨɨn ránoꞌó, sáá káchítu̱ꞌún ránꞌ tu̱ꞌun váꞌa Ndiosíꞌ nu̱u̱nꞌ ránoꞌó.

Lucas 9:6

Saájee nke̱chí ráa kua̱ꞌa̱nꞌ ráa ntáká rá ñuunꞌ ta ñuunꞌ jíkónúun ráa stékútu̱ꞌún ráa tu̱ꞌun váꞌa Ndiosíꞌ, jee suni ntáká nu̱u̱nꞌ kua̱ꞌa̱nꞌ ráa xínúvi ráa rá ñɨvɨ kúꞌvíꞌ.

Lucas 2:26

Jee nstúvi ya̱chi̱ꞌ Ta̱chi̱ꞌ Ííꞌ nu̱u̱nꞌ re̱ꞌ ya̱ ni nsáꞌ kuviꞌ re̱ꞌ ne̱ ntiáꞌan kuniꞌ re̱ꞌ nu̱u̱nꞌ máá Cristo ya̱ chuichí I̱toꞌoꞌ‑ó Ndiosíꞌ.

Mateo 16:17

Saájee nkachiꞌ Jesús: ―Na̱ ka̱ꞌ netuꞌ ka̱ꞌ kúvi nú Simón, se̱ꞌya Jonás, chi ni ɨɨn ñɨvɨ ñunéꞌyúꞌ ntu̱ví nstúvi maa nu̱u̱nꞌ nú, chisaꞌ máá Tátáꞌ ni̱ꞌ Ndiosíꞌ ya̱ nééꞌ re̱ꞌ antivɨ́ súkún, ví ya̱ nstúvi maa nu̱u̱nꞌ noꞌó.

Mateo 11:27

’Maá Tátáꞌ ni̱ꞌ, nna̱taji re̱ꞌ ntáká ya̱ íyó nu̱u̱nꞌ nuꞌuꞌ. Jee ni ɨɨn ñɨvɨ ntu jíníꞌ ráa iniꞌ ni̱ꞌ né ɨɨn kúvi nuꞌuꞌ, ya̱ kúvi ni̱ꞌ Se̱ꞌya re̱ꞌ, chisaꞌ métúꞌún Tátáꞌ ni̱ꞌ Ndiosíꞌ ví ya̱ jíníꞌ re̱ꞌ iniꞌ ni̱ꞌ né ɨɨn kúvi nuꞌuꞌ. Jee suni ni ɨɨn ntu̱náꞌ jíníꞌ iniꞌ Tátáꞌ ni̱ꞌ né ɨɨn kúvi re̱ꞌ, chisaꞌ nuꞌuꞌ ya̱ kúvi ni̱ꞌ Se̱ꞌya re̱ꞌ jíníꞌ ni̱ꞌ iniꞌ re̱ꞌ né ɨɨn kúvi re̱ꞌ, jee néni ɨɨn ñɨvɨ ya̱ kuíni ni̱ꞌ stúvi ni̱ꞌ maa nu̱u̱nꞌ ráa jee kuniꞌ ráa iniꞌ Ndiosíꞌ né ɨɨn kúvi re̱ꞌ, chi nuꞌuꞌ ya̱ kúvi ni̱ꞌ Se̱ꞌya re̱ꞌ stúvi ni̱ꞌ maa nu̱u̱nꞌ ráa.

Hebreos 11:13

Jee ntáká rá ñɨvɨ vá ni̱ꞌi̱ꞌ ráa súka̱ꞌ nku̱neí iniꞌ ráa Ndiosíꞌ. Súnika̱ꞌ ntu nni̱ꞌi̱nꞌ ráa ya̱ nchi̱sóyuꞌú Ndiosíꞌ nu̱u̱nꞌ ráa, soo ne̱ íká niniꞌ váꞌa ráa jie̱ꞌe̱ꞌ ya̱ koo ichinúúnꞌ, jee ne̱ nku̱sɨ̱ɨ̱ꞌ iniꞌ ráa jie̱ꞌe̱ꞌ‑e. Jee njia̱ꞌayuꞌú ráa ya̱ kúvi ráa to̱ꞌo̱ꞌ ya̱ yakuꞌ ni tiempúꞌ néénúún ráa iniꞌ ñɨ̱vɨ́ yaꞌá.

Romanos 1:15

Saáva nuꞌuꞌ va̱ne̱ꞌ ñúkúvi iniꞌ ni̱ꞌ ya̱ suni kachitu̱ꞌún ni̱ꞌ tu̱ꞌun váꞌa re̱ꞌ nu̱u̱nꞌ ránoꞌó ya̱ nééꞌ rán ñuunꞌ Roma.

Hechos 16:10

Sáá niniꞌ re̱ꞌ ya̱ nxi̱néꞌénꞌ nu̱u̱nꞌ Ndiosíꞌ nu̱u̱nꞌ re̱ꞌ, jee nsa̱ꞌá stákoo ráníꞌ sáva kene ránꞌ kɨ̱ꞌɨ̱nꞌ ránꞌ Macedonia, chi niniꞌ kájí ránꞌ ya̱ kána Ndiosíꞌ ránuꞌuꞌ stekútu̱ꞌún ránꞌ tu̱ꞌun va̱ꞌa re̱ꞌ nu̱u̱nꞌ ráa.

Hechos 10:44

Ni káꞌánꞌ i̱i̱ꞌ Pedro saá rá tu̱ꞌun yaꞌá, nki̱vɨ Ta̱chi̱ꞌ Ííꞌ Ndiosíꞌ iniꞌ nɨꞌɨ rá ñɨvɨ tésóꞌo tu̱ꞌun yaꞌá.

Hechos 8:25

Sáá nkuvi nsa̱náaꞌ Pedro jín Juan ya̱ naáꞌ ya̱ niniꞌ ráa jee nkachitu̱ꞌún ráa tu̱ꞌun I̱toꞌoꞌ‑ó, jee kuíre nkene ráa yukuán sáva nikó ráa nu̱u̱nꞌ ñuunꞌ Jerusalén. Jee ni kua̱jia̱ꞌa ráa jee nste̱kútu̱ꞌún ráa tu̱ꞌun va̱ꞌa Jesús nu̱u̱nꞌ kue̱ꞌe̱ꞌ rá ñuunꞌ tɨ́ɨn Samaria.

Hechos 4:31

Jee sáá nkuvi nkaꞌanꞌ ráa jín Ndiosíꞌ, jee nta̱an nu̱u̱nꞌ íyó tútú ráa. Jee nchi̱tú Ta̱chi̱ꞌ Ííꞌ Ndiosíꞌ nta̱ká ráa, jee nchu̱neí iniꞌ ráa káchíꞌ ráa Tu̱ꞌun Ndiosíꞌ.

Hechos 4:8

Jee kuíre nchi̱tú Ta̱chi̱ꞌ Ííꞌ Ndiosíꞌ Pedro sáva kaꞌanꞌ re̱ꞌ, jee nkachiꞌ re̱ꞌ nu̱u̱nꞌ ráa: ―Ránoꞌó ya̱ nísotíñú nu̱u̱nꞌ rá ñɨvɨ jín ránoꞌó te̱e kúñáꞌnú.

1 Timoteo 3:16

Va̱tu̱ꞌ nijia ya̱ kúvi ya̱ naáꞌ, ya̱ mánasɨ́ ví tu̱ꞌun yuꞌuꞌ jie̱ꞌe̱ꞌ ichi na̱a̱ꞌ Ndiosíꞌ, ya̱ sukuán ntañúꞌún nstúvi re̱ꞌ nu̱u̱nꞌ‑ó: Ndiosíꞌ ntu̱vi nu̱u̱nꞌ ñɨ̱vɨ́, jee ni̱yo yɨkɨkúñu re̱ꞌ, chi nkenta kúvi re̱ꞌ ɨɨn te̱e. Nstúvi kájí nijia Ta̱chi̱ꞌ Ííꞌ re̱ꞌ, ya̱ na̱a̱ꞌ ví re̱ꞌ. Ntu̱vi re̱ꞌ nu̱u̱nꞌ rá najiáꞌáꞌ ííꞌ Ndiosíꞌ. Nte̱ku̱tu̱ꞌún jie̱ꞌe̱ꞌ re̱ꞌ nu̱u̱nꞌ rá ñɨvɨ ñɨ̱vɨ́. Ni̱nu̱ꞌ iniꞌ ñɨvɨ ñɨ̱vɨ́ re̱ꞌ. Nnaa re̱ꞌ kua̱noꞌonꞌ re̱ꞌ súkún nu̱u̱nꞌ ñuunꞌ viiꞌ nasɨ́kuitɨꞌ nu̱u̱nꞌ tátúníꞌ Ndiosíꞌ.

1 Pedro 4:6

Chi jie̱ꞌe̱ꞌ saáva suni nte̱ku̱tu̱ꞌún tu̱ꞌun váꞌa Ndiosíꞌ nu̱u̱nꞌ rá ñɨvɨ [ne̱ sáá ntekuꞌ ráa] jee níꞌiꞌ ráa ntañúꞌún, sáva síjíta Ndiosíꞌ ráa ya̱ kuviꞌ ráa sánikua̱ꞌ síjíta re̱ꞌ kua̱chi nɨꞌɨ rá ñɨvɨ ñunéꞌyúꞌ ya̱ jíꞌíꞌ ráa, soo ré ntɨɨn ráa tu̱ꞌun vá sáá ntekuꞌ ráa, jee sanáaꞌ Ndiosíꞌ ya̱ kutekuꞌ ráa jín re̱ꞌ nɨ́ɨ́nkání saꞌá Ta̱chi̱ꞌ Ííꞌ re̱ꞌ.