1 Corintios 14:6 - Mixteco del suroeste de Tlaxiaco Oaxaca

⁶ Jee saáva ránoꞌó ñaniꞌ jín ku̱ꞌva, retú kua̱jiaaꞌ ni̱ꞌ nu̱u̱nꞌ nééꞌ rán jee retú kaꞌanꞌ ni̱ꞌ jín ɨɨn nu̱u̱nꞌ tu̱ꞌun ya̱ ntu̱ví jiáku̱ꞌun iniꞌ rán, jee, ¿na̱sa kuvi ya̱ váꞌa tu̱ꞌun vá nu̱u̱nꞌ rán rúja? Chisaꞌ kuvi ya̱ váꞌa nu̱u̱nꞌ rán retú káꞌánꞌ ni̱ꞌ jín rán rá tu̱ꞌun ya̱ nstúvi Ndiosíꞌ nu̱u̱nꞌ ni̱ꞌ, áxí va̱ni xínéꞌénꞌ ni̱ꞌ ránoꞌó rá Tu̱ꞌun Ndiosíꞌ ya̱ nsa̱ꞌá re̱ꞌ ya̱ jíníꞌ va̱ꞌa ni̱ꞌ maa, áxí va̱ni nákani ni̱ꞌ tu̱ꞌun kéne yuꞌú re̱ꞌ nu̱u̱nꞌ rán, áxí va̱ni xínéꞌénꞌ ni̱ꞌ ránoꞌó rá tu̱ꞌun re̱ꞌ.

1 Corintios 14:6 Referans Kwoze

Efesios 1:17

Jíkánꞌ ni̱ꞌ nu̱u̱nꞌ Ndiosíꞌ ya̱ kúvi re̱ꞌ Ndiosíꞌ nu̱u̱nꞌ I̱toꞌoꞌ‑ó Jesús ya̱ kúvi Cristo, jee kúvi re̱ꞌ Tátáꞌ‑ó ya̱ viiꞌ nasɨ́kuitɨꞌ kúñáꞌnú re̱ꞌ. Jíkánꞌ ni̱ꞌ nu̱u̱nꞌ re̱ꞌ sáva taji re̱ꞌ ya̱ ta̱nɨ̱ꞌ ka̱ꞌ xi̱ni̱ꞌ rán saꞌá Ta̱chi̱ꞌ Ííꞌ re̱ꞌ, jín ya̱ tɨɨn rán ya̱ naáꞌ ya̱ stúvi re̱ꞌ nu̱u̱nꞌ rán jie̱ꞌe̱ꞌ re̱ꞌ, sáva kuniꞌ rán ka̱ꞌ jie̱ꞌe̱ꞌ re̱ꞌ.

2 Timoteo 3:16

Nɨꞌɨ Tutuꞌ Ííꞌ níso tu̱ꞌun nkene yuꞌú Ndiosíꞌ, jee íyótiñu tu̱ꞌun vá sáva xinéꞌénꞌ‑ó ya̱ nááꞌ, jee sáva naxinákutíñú‑ó nu̱u̱nꞌ ñɨvɨ ya̱ sáꞌá niva̱ꞌa, jee sáva nachuꞌun‑ó ichi na̱a̱ꞌ ñɨvɨ, jee sáva sikújia‑ó ñɨvɨ kueꞌnu na̱a̱ꞌ ráa sáni kuíni Ndiosíꞌ.

Romanos 6:17

Soo nkútaꞌviꞌ‑ó nu̱u̱nꞌ Ndiosíꞌ, ya̱ súnika̱ꞌ nyɨ̱ꞌɨ rán xi̱ntíín kua̱chi kuéntáꞌ musúꞌ kéꞌen, nékúvi, soo vitan jee nka̱níjiá rán ne̱ ánímaꞌ rán Tu̱ꞌun Ndiosíꞌ ya̱ nxi̱néꞌénꞌ ráa nu̱u̱nꞌ ránoꞌó.

1 Corintios 14:1

Jee saáva nunasɨ́ rán kunikɨnꞌ rán kunu̱u̱nꞌ rán rá ñanitáꞌán rán, jee suni kuꞌun kúvi iniꞌ rán rá ta̱ꞌvi̱ꞌ ya̱ táji Ta̱chi̱ꞌ Ííꞌ Ndiosíꞌ nu̱u̱nꞌ rán, jee ta̱ꞌvi̱ꞌ ñáꞌnú ka̱ꞌ taji re̱ꞌ nu̱u̱nꞌ rán ví ya̱ chíneí re̱ꞌ nakani rán nu̱u̱nꞌ rá ñɨvɨ tu̱ꞌun kéne yuꞌú Ndiosíꞌ.

2 Juan 1:9

Nta̱ká ñɨvɨ ya̱ jiáꞌa ka̱ꞌ nu̱u̱nꞌ tu̱ꞌun na̱a̱ꞌ, jee ntu kínóo kutú ráa jín tu̱ꞌun nxi̱néꞌénꞌ Cristo, jee ntu̱ví íyó Tátáꞌ‑ó Ndiosíꞌ jín ráa. Jee ñɨvɨ ya̱ kínóo kutú‑u jín tu̱ꞌun vá jee Tátáꞌ‑ó Ndiosíꞌ jín suni máá Se̱ꞌya re̱ꞌ íyó ráa jín ñɨvɨ vá.

2 Pedro 3:18

Chisaꞌ íyó kujia iniꞌ rán kueꞌnu rán jín Jesús ya̱ kúvi Cristo ya̱ máníꞌ iniꞌ re̱ꞌ chineí re̱ꞌ ka̱ꞌ ránoꞌó jee íyó kujia iniꞌ rán ka̱ꞌ jín tu̱ꞌun re̱ꞌ sáva kuniꞌ rán ka̱ꞌ iniꞌ re̱ꞌ. Jesús ví ya̱ nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó. Nákuetúꞌún‑ó re̱ꞌ vitan jín nɨ́ɨ́nkání. Sukuán koo. Amén.

2 Pedro 1:5

Jee saáva jie̱ꞌe̱ꞌ yukuán vá nu̱u̱nꞌ kúneí iniꞌ rán ínúꞌ iniꞌ rán Cristo jee nikó nei rán nachisó rán ka̱ꞌ ya̱ kueꞌnu va̱ꞌa rán. Jee jie̱ꞌe̱ꞌ kueꞌnu va̱ꞌa rán jee nachisó rán ka̱ꞌ ya̱ kukáꞌnú iniꞌ rán ka̱ꞌ jie̱ꞌe̱ꞌ Ndiosíꞌ.

Hebreos 13:9

Íyó kéꞌín tu̱ꞌun xínéꞌénꞌ ñɨvɨ ya̱ ntu kúnuún jín Tu̱ꞌun Ndiosíꞌ. Jee koto jiáꞌa rán ya̱ nastúꞌva rá tu̱ꞌun vá ránoꞌó nu̱u̱nꞌ‑u. Chi íyó váꞌa ya̱ nukutú ánímaꞌ‑ó saꞌá Ndiosíꞌ chi íyó mániꞌ iniꞌ re̱ꞌ yó, nsú káꞌ jie̱ꞌe̱ꞌ tu̱ꞌun ya̱ tátúníꞌ jie̱ꞌe̱ꞌ ya̱ yájíꞌ‑ó, chi ni ntu̱náꞌ váꞌa nsa̱ꞌá tu̱ꞌun tátúníꞌ vá nu̱u̱nꞌ rá ñɨvɨ ya̱ nyɨ̱tíñú ráa nsa̱ꞌá ráa maa.

Tito 3:8

Tu̱ꞌun yaꞌá ví máá na̱a̱ꞌ nijia. Jee kuíni ni̱ꞌ, ya̱ íchí sanáaꞌ ni̱ꞌin nú rá tu̱ꞌun yaꞌá nu̱u̱nꞌ rá ñɨvɨ kúneí iniꞌ ráa Ndiosíꞌ, sáva kɨtíñú ráa saꞌá ráa rá tiñu váꞌa. Jee ya̱ váꞌa víꞌí ví rá tu̱ꞌun yaꞌá, jee íyótiñu‑u nu̱u̱nꞌ rá ñɨvɨ.

2 Timoteo 4:2

Saáva tétíñú ni̱ꞌin ni̱ꞌ nu̱u̱nꞌ noꞌó ya̱: Kachitu̱ꞌún nú tu̱ꞌun váꞌa jie̱ꞌe̱ꞌ re̱ꞌ. Naniꞌvɨꞌ iniꞌ nú kachitu̱ꞌún nú maa nu̱u̱nꞌ ñɨvɨ sáá íyó tiempúꞌ núne jee súnika̱ꞌ ntu̱ví tiempúꞌ núne. Naxinákutíñú nú nu̱u̱nꞌ rá ñɨvɨ ya̱ sáꞌá niva̱ꞌa, jee kuxeenꞌ nú nu̱u̱nꞌ ráa, jee nasáneí nú iniꞌ ráa, jín nɨꞌɨ ya̱ káꞌnú íyó iniꞌ nú jín ya̱ xinéꞌénꞌ nú.

2 Timoteo 3:10

Soo noꞌó, nnikɨnꞌ nú nku̱mí va̱ꞌa nú tu̱ꞌun xínéꞌénꞌ ni̱ꞌ, na̱sa jiáꞌnu ni̱ꞌ ichi na̱a̱ꞌ, ná kúvi ya̱ ñúꞌún iniꞌ ni̱ꞌ saꞌá ni̱ꞌ, na̱sa kúneí iniꞌ ni̱ꞌ I̱toꞌoꞌ‑ó, na̱sa íyó káꞌnú iniꞌ ni̱ꞌ, na̱sa ñúnúunꞌ ni̱ꞌ ñɨvɨ jín Ndiosíꞌ, jín na̱sa kúníꞌin ni̱ꞌ íñɨ́ ni̱ꞌ jín Cristo.

2 Timoteo 2:14

Xinákúꞌun nú iniꞌ rá ñɨvɨ tu̱ꞌun yaꞌá. Jee ichinúúnꞌ Ndiosíꞌ, tatúníꞌ ni̱ꞌin nú nu̱u̱nꞌ ráa ya̱ koto kántátúꞌun ráa jie̱ꞌe̱ꞌ ntáká tu̱ꞌun saɨn. Chi ntu̱náꞌ íyótiñu‑u nintíꞌínꞌ saꞌá ráa suꞌva, chi stívɨ́‑ɨ ñɨvɨ ya̱ tésóꞌo maa.

Filipenses 3:15

Saájee nta̱ká‑ó ya̱ nijia iniꞌ‑ó kuiñɨ‑ó ichi Jesús, jee íyó kuꞌun iniꞌ‑ó suꞌva. Jee retú sɨ́ɨ́n ñúꞌún iniꞌ rán jie̱ꞌe̱ꞌ néni ɨɨn tiñu, Ndiosíꞌ suni stúvi re̱ꞌ nu̱u̱nꞌ rán ya̱ íyó kuꞌun iniꞌ rán sáni nkachiꞌ ni̱ꞌ.

Efesios 3:4

Jee sáá kaꞌvi rán maa jee ki̱ku̱ꞌun iniꞌ rán ya̱ jíníꞌ va̱ꞌa ni̱ꞌ tu̱ꞌun ya̱ ni̱yo yuꞌuꞌ jie̱ꞌe̱ꞌ Cristo.

2 Corintios 12:7

Jee sáva nkáni téyɨ́ɨ́ víꞌí iniꞌ ni̱ꞌ jie̱ꞌe̱ꞌ ya̱ nxi̱nénu̱u̱nꞌ Ndiosíꞌ nu̱u̱nꞌ nuꞌuꞌ, ya̱ kúvi‑i mánasɨ́ nasɨ́kuitɨꞌ, jee jie̱ꞌe̱ꞌ yaꞌá ntaji Ndiosíꞌ nkenta tu̱nóꞌó nóꞌo ni̱ꞌ iniꞌ yɨkɨkúñu ni̱ꞌ, kuéntáꞌ yɨ́ꞌɨ́ iñu yɨkɨkúñu ni̱ꞌ. Yukuán kúvi ya̱ njia̱ꞌa re̱ꞌ nu̱u̱nꞌ ɨɨn najiáꞌáꞌ Satanás xinóꞌo‑o nuꞌuꞌ sáva nkáni téyɨ́ɨ́ iniꞌ ni̱ꞌ.

2 Corintios 12:1

Jee ntu̱náꞌ íyótiñu ya̱ kaꞌanꞌ téyɨ́ɨ́ ni̱ꞌ. Saáva kaꞌanꞌ ni̱ꞌ jie̱ꞌe̱ꞌ ya̱ nxi̱nénu̱u̱nꞌ I̱toꞌoꞌ‑ó nu̱u̱nꞌ nuꞌuꞌ, jín jie̱ꞌe̱ꞌ ya̱ nstúvi re̱ꞌ nu̱u̱nꞌ ni̱ꞌ.

2 Corintios 11:6

Chi retú ntu túꞌva ni̱ꞌ kaꞌanꞌ va̱ꞌa ni̱ꞌ, soo nsú sukuán kúvi jie̱ꞌe̱ꞌ ya̱ jíníꞌ va̱ꞌa ni̱ꞌ tu̱ꞌun váꞌa jie̱ꞌe̱ꞌ Jesús, chi nstúvi kájí ni̱ꞌ yaꞌá nu̱u̱nꞌ ránoꞌó, ntáká nu̱u̱nꞌ, ntáká íchí.

1 Corintios 10:33

Kuéntáꞌ sáꞌá ni̱ꞌ, chi núkú ni̱ꞌ sáꞌá ni̱ꞌ ntáká tiñu sáva kuva̱ꞌa iniꞌ ntáká rá ñɨvɨ kune̱ꞌyá ráa maa. Chi ntu̱ví núkú ni̱ꞌ ya̱ kuvi ya̱ váꞌa maáníꞌ, chisaꞌ núkú ni̱ꞌ ya̱ saꞌá ni̱ꞌ ya̱ kuvi ya̱ váꞌa kue̱ꞌe̱ꞌ rá ñɨvɨ, sáva ni̱ꞌi̱nꞌ ráa ya̱ natavaꞌ Ndiosíꞌ ráa nu̱u̱nꞌ kua̱chi ráa sikáku re̱ꞌ ráa.

Romanos 16:17

Jee ránoꞌó ñanitáꞌán ni̱ꞌ, jíkánꞌ táꞌvíꞌ ni̱ꞌ ya̱ nito koo rán maárán nu̱u̱nꞌ rá ñɨvɨ ya̱ sáꞌá ráa ya̱ kusɨ́ɨ́n rá táꞌán‑ó jín xíkíninkava ráa táꞌán‑ó jín tu̱ꞌun ya̱ ntu kétáꞌán jín tu̱ꞌun ya̱ ya nku̱tu̱ꞌva rán. Jee kuiyo rán nu̱u̱nꞌ ráa.

Romanos 15:14

Soo ránoꞌó ñanitáꞌán maáníꞌ, nuꞌuꞌ chi jínúꞌ iniꞌ ni̱ꞌ ya̱ íyó mániꞌ nasɨ́kuitɨꞌ iniꞌ rán néꞌyá rán táꞌán rán, jee jíníꞌ va̱ꞌa rán nɨꞌɨ tu̱ꞌun na̱a̱ꞌ Ndiosíꞌ ya̱ nníꞌinꞌ rán, jee kúvi náxiníꞌvɨ́ꞌ iniꞌ rán ɨɨn inka táꞌán rán saꞌá rán sáni káchíꞌ Tu̱ꞌun Ndiosíꞌ.

Hechos 2:42

Jee níkɨ́nꞌ ni̱ꞌin ráa tu̱ꞌun xínéꞌénꞌ rá te̱e níso rává tiñu apóstol. Jee sukuáni nééꞌ ñunkúún ráa. Jee sukuáni yájíꞌ tútú ráa neyu [nu̱u̱nꞌ tásáva ráa i̱xta̱tíláꞌ, sáva naku̱ꞌun iniꞌ ráa, ya̱ ni̱ꞌi̱ꞌ Jesús jie̱ꞌe̱ꞌ kua̱chi ráa]. Jee sukuáni káꞌánꞌ tútú ráa jín Ndiosíꞌ.

Mateo 16:26

Chi, ¿na̱ nu̱u̱nꞌ íyótiñu nu̱u̱nꞌ ɨɨn ñɨvɨ, retú súnika̱ꞌ kuneí‑i ni̱ꞌi̱nꞌ‑i kua̱íyó ñɨ̱vɨ́ yaꞌá, retú sukuíta‑a ánímaꞌ‑a ya̱ nsáꞌ nanitáꞌvíꞌ‑i nu̱u̱nꞌ Ndiosíꞌ rúja? Áxí, ¿ná kúvi ya̱ chunáán ɨɨn ñɨvɨ sáva sikáku‑u ánímaꞌ‑a nanitáꞌvíꞌ‑i nu̱u̱nꞌ Ndiosíꞌ rúja? Ntu̱náꞌ íyó ya̱ kúvi ku̱ꞌva‑a.

Mateo 16:17

Saájee nkachiꞌ Jesús: ―Na̱ ka̱ꞌ netuꞌ ka̱ꞌ kúvi nú Simón, se̱ꞌya Jonás, chi ni ɨɨn ñɨvɨ ñunéꞌyúꞌ ntu̱ví nstúvi maa nu̱u̱nꞌ nú, chisaꞌ máá Tátáꞌ ni̱ꞌ Ndiosíꞌ ya̱ nééꞌ re̱ꞌ antivɨ́ súkún, ví ya̱ nstúvi maa nu̱u̱nꞌ noꞌó.

Mateo 11:25

Jee tiempúꞌ yukuán, jee ni̱ka̱nꞌ táꞌvíꞌ Jesús nu̱u̱nꞌ Tátáꞌ‑a Ndiosíꞌ, jee nkachiꞌ‑i: ―Nákuetúꞌún ni̱ꞌ noꞌó, Tátáꞌ ni̱ꞌ, ya̱ kúvi nú I̱toꞌoꞌ tátúníꞌ nu̱u̱nꞌ antivɨ́ jín iniꞌ ñɨ̱vɨ́ yaꞌá, chi nchise̱ꞌí nú tiñu ñáꞌnú nú yaꞌá nu̱u̱nꞌ rá ñɨvɨ tu̱ꞌva jín rá ñɨvɨ níchí ya̱ ntu njiáꞌa nú ya̱ ki̱ku̱ꞌun iniꞌ ráa maa, chisaꞌ nstúvi nú maa nu̱u̱nꞌ rá ñɨvɨ ñúláꞌví iniꞌ ya̱ kúvi ráa kuéntáꞌ rá súchí lúlí.

1 Corintios 14:7

Saꞌá‑ó kuéntáꞌ sú ne̱ rá nantíñú ya̱ ntu̱ví tékúꞌ kuéntáꞌ xi̱kiꞌli jín yaaꞌ tunkáꞌnú, chi retú ntu̱ví íyó sɨ́ɨ́n sɨ́ɨ́n nu̱u̱nꞌ nusuꞌ‑u sáá sáꞌá ñɨvɨ yaaꞌ jín rá nantíñú vá, jee, ¿na̱sa kuniꞌ‑ó na̱ yaaꞌ ví ya̱ sáꞌá ráa jín xi̱kiꞌli áxí yaaꞌ tunkáꞌnú rúja?