1 Corintios 1:2 - Mixteco del suroeste de Tlaxiaco Oaxaca

² tájí ráníꞌ tutuꞌ yaꞌá ya̱ tée ni̱ꞌ nu̱u̱nꞌ ránoꞌó ñɨvɨ kúneí iniꞌ rán Jesús ya̱ yɨ́ꞌɨ́ rán naꞌá Ndiosíꞌ, ya̱ nééꞌ rán nu̱u̱nꞌ ñuunꞌ Corinto. Nsa̱ꞌá sɨ́ɨ́n Ndiosíꞌ ránoꞌó kɨꞌɨ rán nu̱u̱nꞌ Cristo Jesús. Nkana re̱ꞌ ránoꞌó sáva koo sɨ́ɨ́n rán ya̱ nkɨ́ꞌɨ rán ka̱ꞌ nu̱u̱nꞌ kua̱chi rán jee kɨꞌɨ rán naꞌá Cristo Jesús, sánikua̱ꞌ nsa̱ꞌá re̱ꞌ jín ntáká rá ñɨvɨ nééꞌ nta̱ká nu̱u̱nꞌ ya̱ kákua̱chi ráa nu̱u̱nꞌ I̱toꞌoꞌ‑ó Jesús ya̱ níso re̱ꞌ tiñu ya̱ kúvi re̱ꞌ Cristo. Kúvi re̱ꞌ I̱toꞌoꞌ ráa jín I̱toꞌoꞌ‑ó.

1 Corintios 1:2 Referans Kwoze

Romanos 1:7

Tée ni̱ꞌ tutuꞌ yaꞌá nu̱u̱nꞌ ránoꞌó ya̱ ñúnúunꞌ Ndiosíꞌ ránoꞌó ya̱ nééꞌ rán ñuunꞌ Roma, ya̱ nkana re̱ꞌ ránoꞌó sáva kusɨ́ɨ́n rán kɨꞌɨ rán nu̱u̱nꞌ re̱ꞌ. Na̱ ka̱ꞌ koo ma̱ni̱ꞌ iniꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ kúvi Cristo kune̱ꞌyá ráa ránoꞌó jín ya̱ kuneeꞌ va̱ꞌa rán saꞌá ráa.

1 Corintios 1:30

Soo maá Ndiosíꞌ chi nsa̱ꞌá re̱ꞌ ya̱ kɨꞌɨ rán xi̱ntíín Cristo Jesús, jee ne̱ nu̱u̱nꞌ Jesús va̱ji tu̱ꞌun níchí tánɨ́ꞌ xi̱ni̱ꞌ táji Ndiosíꞌ nu̱u̱nꞌ‑ó, jee nsa̱ꞌá re̱ꞌ ya̱ kínóo na̱a̱ꞌ‑ó nu̱u̱nꞌ Ndiosíꞌ, jee nsa̱ꞌá sɨ́ɨ́n re̱ꞌ yó sáva kɨꞌɨ‑ó nu̱u̱nꞌ Ndiosíꞌ, jee nna̱kani núne re̱ꞌ yó nu̱u̱nꞌ kua̱chi ya̱ nkɨ́ꞌɨ‑ó ka̱ꞌ xi̱ntíín kua̱chi.

Hechos 26:18

sava sine nú rá nchinúún ráa sáva kɨ̱ku̱ꞌun iniꞌ ráa Tu̱ꞌun Ndiosíꞌ. Jee sáva kene ráa nu̱u̱nꞌ neenꞌ, jee nakui̱ñɨ̱ꞌ ráa nu̱u̱nꞌ túúnꞌ ñuꞌunꞌ. Jee kene ráa naꞌá ta̱chi̱ꞌ kini kúñáꞌnú kúvi Satanás, jee ki̱vɨ ráa naꞌá Ndiosíꞌ. Sáva ni̱ꞌi̱nꞌ ráa ya̱ kunekáꞌnú iniꞌ Ndiosíꞌ jie̱ꞌe̱ꞌ kua̱chi ráa, jín sáva ni̱ꞌi̱nꞌ ráa ta̱ꞌvi̱ꞌ nteñu rá ñɨvɨ ya̱ nsa̱ꞌá sɨ́ɨ́n re̱ꞌ ráa sáva kuvi ráa ñɨvɨ re̱ꞌ, chi kúneí iniꞌ ráa nuꞌuꞌ.”

Hebreos 13:12

Jee suni sukuán nnoꞌo Jesús ne̱ yuñúúnꞌ jee ni̱ꞌi̱ꞌ re̱ꞌ ñatɨ ni̱ñɨ̱ꞌ re̱ꞌ, sáva jín ni̱ñɨ̱ꞌ maáréꞌ sasɨ́ɨ́n re̱ꞌ ñɨvɨ nu̱u̱nꞌ kua̱chi ráa sáva kuvi ráa ñɨvɨ Ndiosíꞌ.

1 Tesalonicenses 4:7

Chi ntu nkána Ndiosíꞌ yó sáva saꞌá néꞌí‑ó. Chisaꞌ nkana re̱ꞌ yó sáva koo sɨ́ɨ́n‑ó ya̱ nkɨ́ꞌɨ‑ó nu̱u̱nꞌ ya̱ níváꞌa, jee kɨtíñú‑ó nu̱u̱nꞌ re̱ꞌ.

Hebreos 10:10

Jee jie̱ꞌe̱ꞌ ya̱ nsa̱ꞌá re̱ꞌ ya̱ kuíni maá Ndiosíꞌ, saájee nsa̱ꞌá sɨ́ɨ́n re̱ꞌ yó nu̱u̱nꞌ kua̱chi sáva kuvi‑ó ñɨvɨ re̱ꞌ, jie̱ꞌe̱ꞌ ya̱ nso̱ko̱ꞌ Jesucristo yɨkɨkúñu maáréꞌ ni̱ꞌi̱ꞌ re̱ꞌ, ɨɨn ni íchí nu̱u̱nꞌ ntáká tiempúꞌ.

2 Corintios 4:5

Jee nsú jie̱ꞌe̱ꞌ maáráníꞌ ví ya̱ stékútu̱ꞌún ránꞌ, chisaꞌ káchítu̱ꞌún ránꞌ ya̱ I̱toꞌoꞌ nu̱u̱nꞌ kua̱íyó ví Jesús ya̱ kúvi Cristo. Jee ránuꞌuꞌ chi kúvi ránꞌ kua̱chi musúꞌ ni ya̱ sátíñú ránꞌ nu̱u̱nꞌ Jesús nu̱u̱nꞌ ya̱ váꞌa ránoꞌó.

Hechos 9:14

Jee njia̱ꞌa rá su̱tu̱ꞌ kúñáꞌnú tiñu kuneeꞌ si̱kɨ̱ꞌ re̱ꞌ, sáva kiji re̱ꞌ yaꞌá jee tɨɨn re̱ꞌ nta̱ká rá ñɨvɨ néñu̱ꞌun ráa noꞌó ―nkachiꞌ Ananías.

Apoclipsis 19:16

Jee saꞌma ñúꞌún ɨɨn rá sɨ̱ꞌɨn tíkóó re̱ꞌ níso súví yaꞌá: “Nísotíñú re̱ꞌ tátúníꞌ re̱ꞌ nu̱u̱nꞌ ntáká ráa ya tátúníꞌ ráa nu̱u̱nꞌ rá ñuunꞌ jín I̱toꞌoꞌ nu̱u̱nꞌ ntáká i̱toꞌoꞌ.”

Judas 1:1

Nuꞌuꞌ Judas, ya̱ kúvi ni̱ꞌ musúꞌ Jesús, níso re̱ꞌ tiñu Cristo ya̱ ñani Ndiosíꞌ re̱ꞌ sáva tatúníꞌ re̱ꞌ nu̱u̱nꞌ nɨꞌɨ. Jee kúvi ni̱ꞌ ñaniꞌ Jacobo. Jee tée ni̱ꞌ tutuꞌ yaꞌá nu̱u̱nꞌ ránoꞌó ñɨvɨ ya̱ nkana Tátáꞌ‑ó Ndiosíꞌ ránoꞌó kɨꞌɨ rán nu̱u̱nꞌ re̱ꞌ, jee ñúnúunꞌ re̱ꞌ ránoꞌó. Jee maá Jesús, ya̱ kúvi re̱ꞌ Cristo, jee kúmí re̱ꞌ ránoꞌó ya̱ yɨ́ꞌɨ́ rán xi̱ntíín re̱ꞌ.

Hebreos 2:11

Chi Jesús ya̱ násaꞌá sɨ́ɨ́n re̱ꞌ rá ñɨvɨ sáva kɨꞌɨ ráa nu̱u̱nꞌ Tátáꞌ re̱ꞌ, jee rá ñɨvɨ vá ya̱ násaꞌá sɨ́ɨ́n re̱ꞌ, jee núvíꞌ ráa ɨɨn ni nu̱u̱nꞌ Tátáꞌ va̱ji ráa jín re̱ꞌ. Jee saáva ntu kúkanuun re̱ꞌ káꞌánꞌ re̱ꞌ ñaniꞌ re̱ꞌ jín ku̱ꞌva re̱ꞌ ráa.

2 Timoteo 1:9

Chi Ndiosíꞌ nna̱tavaꞌ re̱ꞌ yó nu̱u̱nꞌ kua̱chi‑ó nsi̱káku re̱ꞌ yó, jee nkana re̱ꞌ yó sáva sasɨ́ɨ́n re̱ꞌ yó ya̱ kuvi‑ó ñɨvɨ re̱ꞌ ya̱ kɨtíñú‑ó nu̱u̱nꞌ re̱ꞌ. Nsáꞌá re̱ꞌ suꞌva jín yó nsú jie̱ꞌe̱ꞌ ya̱ váꞌa nsa̱ꞌá‑ó. Soo nsi̱káku re̱ꞌ yó, chi saá nkuini re̱ꞌ, chi suni íyó mániꞌ iniꞌ re̱ꞌ néꞌyá re̱ꞌ yó, ya̱ ntu íyó ni̱ꞌi̱nꞌ‑ó maa. Jee ne̱ sáá ntiáꞌan kijiéꞌé kiko̱o ñɨ̱vɨ́ íyó mániꞌ iniꞌ re̱ꞌ néꞌyá re̱ꞌ yó ya̱ yɨ́ꞌɨ́‑ó nu̱u̱nꞌ Cristo Jesús.

1 Timoteo 3:15

Soo retú kukuéé ni̱ꞌ, jee tée ni̱ꞌ tu̱ꞌun yaꞌá, sáva kukáꞌnú iniꞌ nú sáá íyó kuneeꞌ viiꞌ rá ñɨvɨ ya̱ kúneí iniꞌ ráa Cristo jín ɨɨn inka ráa. Suviráa kúvi táꞌán veꞌi Ndiosíꞌ. Suviráa kúvi ñɨvɨ Ndiosíꞌ tékúꞌ, ya̱ stútú re̱ꞌ ráa. Kuéntáꞌ ɨɨn nekaꞌ yɨ́tuvi xi̱ni̱ꞌ ve̱ꞌí, jee kuéntáꞌ yósóꞌ veꞌi nu̱u̱nꞌ koo, chi maáráa yɨ́tuvi ráa tu̱ꞌun nááꞌ re̱ꞌ.

2 Tesalonicenses 1:1

Nuꞌuꞌ Pablo, jín Silvano jín Timoteo, tée ránꞌ nu̱u̱nꞌ tutuꞌ yaꞌá nu̱u̱nꞌ ránoꞌó, ya̱ kúneí iniꞌ rán Jesús, ya̱ nééꞌ rán ñuunꞌ Tesalónica, jín ya̱ kútútú rán yukuán. Suvirán yɨ́ꞌɨ́ rán nu̱u̱nꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo [ya̱ ñani Ndiosíꞌ sáva tatúníꞌ re̱ꞌ nu̱u̱nꞌ nɨꞌɨ].

1 Tesalonicenses 1:1

Nuꞌuꞌ Pablo jín Silvano jín Timoteo, tée ránꞌ nu̱u̱nꞌ tutuꞌ nu̱u̱nꞌ ránoꞌó, ya̱ kúneí iniꞌ rán Cristo, ya̱ nééꞌ rán ñuunꞌ Tesalónica, jee nútútú rán yukuán. Yɨ́ꞌɨ́ rán nu̱u̱nꞌ Tátáꞌ‑ó Ndiosíꞌ jín I̱toꞌoꞌ‑ó Jesús ya̱ níso re̱ꞌ tiñu Cristo, [ya̱ ñani Ndiosíꞌ re̱ꞌ sáva tatúníꞌ re̱ꞌ nu̱u̱nꞌ nɨꞌɨ]. Na̱ ka̱ꞌ koo ma̱ni̱ꞌ iniꞌ ráa kune̱ꞌyá ráa ránoꞌó jín ya̱ kuneeꞌ va̱ꞌa rán saꞌá ráa.

Efesios 5:26

Nsa̱ꞌá re̱ꞌ sukuán sáva saꞌá sɨ́ɨ́n re̱ꞌ yó sáva nkɨ́ꞌɨ‑ó ka̱ꞌ nu̱u̱nꞌ kua̱chi‑ó, jee nna̱sánoo re̱ꞌ ánímaꞌ‑ó jín tu̱ꞌun re̱ꞌ, kuéntáꞌ nna̱kete re̱ꞌ yó jín nute.

2 Corintios 1:1

Nuꞌuꞌ Pablo, Cristo Jesús nte̱tíñú re̱ꞌ nuꞌuꞌ, kuniso ni̱ꞌ tiñu apóstol ya̱ chúichí re̱ꞌ nuꞌuꞌ sáva stúvi ni̱ꞌ tu̱ꞌun re̱ꞌ, sáni kuíni Ndiosíꞌ. Nuꞌuꞌ jín ñaniꞌ‑ó Timoteo táji ránꞌ tutuꞌ yaꞌá nu̱u̱nꞌ ránoꞌó, ya̱ kúvi ñɨvɨ Ndiosíꞌ ya̱ jínúꞌ iniꞌ rán Jesús, ya̱ nééꞌ rán ñuunꞌ Corinto, ya̱ kútútú rán yukuán. Jee suni táji ránꞌ maa nu̱u̱nꞌ ntáká rá ñɨvɨ ya̱ nsásɨ́ɨ́n Ndiosíꞌ sáva kɨꞌɨ ráa nu̱u̱nꞌ re̱ꞌ, ya̱ nééꞌ ráa ntáká rá ñuunꞌ sánitɨ́ɨn Acaya.

1 Corintios 8:6

soo nu̱u̱nꞌ maáó, chi métúꞌún ni Ndiosíꞌ íyó ya̱ kúvi Tátáꞌ‑ó. Jee maáréꞌ nsa̱ꞌá ntáká ya̱ íyó, jee suni maáó nsáꞌá re̱ꞌ yó sáva kɨtíñú‑ó nu̱u̱nꞌ re̱ꞌ. Jee suni ɨɨn ni I̱toꞌoꞌ‑ó íyó, ya̱ suvi kúvi Jesús ya̱ kúvi re̱ꞌ Cristo, ya̱ ña̱tíñú Ndiosíꞌ maa sáva nsa̱ꞌá ráa ntáká ya̱ íyó, jee suni nsa̱ꞌá re̱ꞌ yó ranika̱ꞌ.

Romanos 10:12

Chi ntu sɨ́ɨ́n kúvi rá ñɨvɨ Israel jín rá ñɨvɨ ya̱ ntu kúvi Israel, chi maá I̱toꞌoꞌ kúvi I̱toꞌoꞌ nu̱u̱nꞌ nɨꞌɨ, jee ntántúníꞌ jiáꞌa re̱ꞌ ya̱ váꞌa sáꞌá re̱ꞌ nu̱u̱nꞌ rá ñɨvɨ ya̱ kákua̱chi ráa nu̱u̱nꞌ re̱ꞌ ya̱ kuvi re̱ꞌ I̱toꞌoꞌ ráa.

Romanos 3:22

Chi Ndiosíꞌ sáꞌá re̱ꞌ ya̱ kínóo na̱a̱ꞌ ñɨvɨ nu̱u̱nꞌ re̱ꞌ jie̱ꞌe̱ꞌ ya̱ kúneí iniꞌ ráa Jesús ya̱ kúvi Cristo. Sáꞌá Ndiosíꞌ sukuán jín ntáká ráa ya̱ kúneí iniꞌ ráa Cristo chi ntu sɨ́ɨ́n sáꞌá re̱ꞌ jín ɨɨn inka ráa.

Hechos 22:16

Jee ntañúꞌún, ¿ná nétu nú? Nakuiñɨꞌ jee kuanuté. Ka̱ka̱nꞌ táꞌvíꞌ nu̱u̱nꞌ I̱toꞌoꞌ‑ó jee nasánoo re̱ꞌ jie̱ꞌe̱ꞌ kua̱chi nú”, suꞌva nkachiꞌ Ananías ―nkachiꞌ Pablo.

Hechos 18:1

Sáá nkuvi rá yaꞌá, jee nkene Pablo ñuunꞌ Atenas, jee kua̱ꞌa̱nꞌ‑a ñuunꞌ Corinto.

Hechos 15:9

Ntu káji Ndiosíꞌ néꞌyá re̱ꞌ yó jín ráa. Chi nxi̱nónoo re̱ꞌ kua̱chi yɨ́ꞌɨ́ ánímaꞌ ráa, chi kúneí iniꞌ ráa Jesús.

Hechos 10:36

’Nchu̱ichí re̱ꞌ tu̱ꞌun va̱ꞌa nu̱u̱nꞌ rá se̱ꞌya tataꞌ Israel, jee stékútu̱ꞌún re̱ꞌ ya̱ kuneeꞌ ma̱ni̱ꞌ ñɨvɨ jín re̱ꞌ sáꞌá Jesús ya̱ kúvi‑i Cristo, ya̱ kúvi‑i I̱toꞌoꞌ nɨꞌɨ ñɨvɨ ñɨ̱vɨ́.

Hechos 9:21

Jee nti̱vɨ́ xíniꞌ rá ñɨvɨ tésóꞌo ya̱ káchíꞌ re̱ꞌ. Jee káchíꞌ ɨɨn inka ráa: ―¿Á nsú te̱e yaꞌá kúvi ya̱ xínáánꞌ‑a rá ñɨvɨ néñu̱ꞌun ráa Jesús, nu̱u̱nꞌ ñuunꞌ Jerusalén, nékui? Jee va̱ji re̱ꞌ yaꞌá, sáva tɨɨn re̱ꞌ ráa, jee kɨ̱na̱ka re̱ꞌ ráa nu̱u̱nꞌ rá su̱tu̱ꞌ kúñáꞌnú ―nkachiꞌ rá ñɨvɨ.

Génesis 12:8

Jee nkene re̱ꞌ yukuán kua̱ꞌa̱nꞌ re̱ꞌ nu̱u̱nꞌ ñu̱ꞌún ichinúúnꞌ ñuunꞌ Betel ichi kénta nka̱niiꞌ nu̱u̱nꞌ íñɨ́ rá yuku, jee ña̱kuneeꞌ re̱ꞌ yukuán, jee ñaniꞌ re̱ꞌ rá veꞌi sayo saꞌma re̱ꞌ ma̱ꞌñú ñuunꞌ Betel jín ñuunꞌ Ai. Jee yukuán káá ñuunꞌ Betel ichi táꞌánꞌ nka̱niiꞌ jee káá ñuunꞌ Ai ichi kénta nka̱niiꞌ. Jee yukuán nsamaꞌ re̱ꞌ yu̱u̱ꞌ ɨɨn nu̱u̱nꞌ so̱ko̱ꞌ re̱ꞌ nu̱u̱nꞌ I̱toꞌoꞌ‑ó jee nkakua̱chi re̱ꞌ nu̱u̱nꞌ I̱toꞌoꞌ‑ó.

Génesis 4:26

Sunisaá Set ni̱yo ɨɨn se̱ꞌya re̱ꞌ ya̱ nsi̱kúnání re̱ꞌ Enós. Ne̱ sa̱a nka̱jiéꞌé néñu̱ꞌun ráa Ndiosíꞌ ya̱ kuvi re̱ꞌ I̱toꞌoꞌ ráa.

2 Timoteo 2:22

Kunu nú chusává maánú nu̱u̱nꞌ ya̱ níyo iniꞌ nú ya̱ sɨ̱ɨ̱ꞌ iniꞌ ɨɨn te̱e súchí. Jee kunikɨnꞌ nú ichi ya̱ kino̱o na̱a̱ꞌ nú nu̱u̱nꞌ Ndiosíꞌ, ya̱ tu̱ꞌun kuneí iniꞌ nú Cristo, ya̱ tu̱ꞌun kunu̱u̱nꞌ nú Ndiosíꞌ jín ñɨvɨ, jín ya̱ tu̱ꞌun kuneeꞌ ñunkúún nú jín táꞌán nú. Jee saꞌá nú suꞌva jín rá ñɨvɨ ya̱ ni̱ka̱nꞌ táꞌvíꞌ ráa jín ánímaꞌ noo nu̱u̱nꞌ Cristo, ya̱ kuvi re̱ꞌ I̱toꞌoꞌ ráa.

Gálatas 1:2

Maáníꞌ jín nɨꞌɨ rá ñaniꞌ kúneí iniꞌ ráa Jesús ya̱ kútáꞌán jín ni̱ꞌ, tájí ránꞌ tutuꞌ yaꞌá nu̱u̱nꞌ ránoꞌó ñɨvɨ, ya̱ kúneí iniꞌ rán Jesús, ya̱ nééꞌ nu̱u̱nꞌ rá ñuunꞌ Galacia, ya̱ kútútú rán nu̱u̱nꞌ rá ñuunꞌ yukuán.

Hechos 9:13

Soo nna̱xiníkó Ananías: ―I̱toꞌoꞌ ni̱ꞌ, tésóꞌo ni̱ꞌ kue̱ꞌe̱ꞌ ñɨvɨ káꞌánꞌ jie̱ꞌe̱ꞌ te̱e vá. Nteso̱ꞌo ni̱ꞌ ya̱ kue̱ꞌe̱ꞌ niva̱ꞌa nsa̱ꞌá re̱ꞌ nu̱u̱nꞌ rá ñɨvɨ yɨ́ꞌɨ́ ráa nu̱u̱nꞌ nú nu̱u̱nꞌ ñuunꞌ Jerusalén.

Romanos 8:28

Jee jíníꞌ‑ó ya̱ ntáká tiñu ya̱ kúvi jín rá ñɨvɨ ya̱ ñúnúunꞌ ráa Ndiosíꞌ jee jiátíñú Ndiosíꞌ rá tiñu vá sáva saꞌá re̱ꞌ ya̱ kúvi ya̱ váꞌa nu̱u̱nꞌ ráa ya̱ nkana re̱ꞌ ráa ya̱ kɨꞌɨ ráa nu̱u̱nꞌ re̱ꞌ sáni nkuna̱a̱ꞌ iniꞌ re̱ꞌ.

1 Corintios 10:32

Jee saáva koto na̱ sáꞌá rán tiñu ya̱ sikúvi rán iniꞌ rá ñɨvɨ ya̱ nsíkíninkava rán ráa nu̱u̱nꞌ kua̱chi, va̱ni ñɨvɨ ñuunꞌ Israel, áxí va̱ni ñɨvɨ inka nación, áxí va̱ni rá ñɨvɨ ya̱ jínúꞌ iniꞌ ráa káníjiá ráa yɨ́ꞌɨ́ ráa xi̱ntíín Ndiosíꞌ.

1 Corintios 12:27

Jee ránoꞌó ranika̱ꞌ chi kúvi rán yɨkɨkúñu Cristo, chi yɨ́ꞌɨ́ rán nu̱u̱nꞌ re̱ꞌ, jee ta ɨɨn ta ɨɨn‑ó kúvi‑ó pedasúꞌ yɨkɨkúñu re̱ꞌ.

1 Timoteo 2:8

Saáva kuíni ni̱ꞌ, ya̱ kaꞌanꞌ rá te̱e jín Ndiosíꞌ né ni ví nkuvi, jee naneꞌen ráa naꞌá ráa, ya̱ ntu yɨ́ꞌɨ́ ráa jín ya̱ níváꞌa, ya̱ nkóo tu̱ꞌun kítɨ́ꞌ iniꞌ ɨɨn inka ráa, jín ya̱ nkóo tu̱ꞌun kántátúꞌun ɨɨn inka ráa.

2 Timoteo 2:19

Soo jiákɨ́nꞌ kutú Ndiosíꞌ tu̱ꞌun re̱ꞌ, nu̱u̱nꞌ jiáni kutú re̱ꞌ rá ñɨvɨ re̱ꞌ. Jee níso vá tu̱ꞌun yaꞌá kuéntáꞌ ɨɨn seyúꞌ ya̱ káchíꞌ‑i: “Jíníꞌ I̱toꞌoꞌ‑ó rá ñɨvɨ yɨ́ꞌɨ́ nu̱u̱nꞌ re̱ꞌ”, jín, “Nta̱ká ñɨvɨ ya̱ jiáꞌayuꞌú ráa ya̱ I̱toꞌoꞌ ráa ví Cristo, íyó saꞌá sɨ́ɨ́n ráa maáráa nu̱u̱nꞌ rá níváꞌa.”